Matiye 21
21
Yeesu dɔ Zeruzalɛm
Mar 11:1-11; Luk 19:28-40
1Ve fee ka ve sann gbɔra Zeruzalɛm ɛn ve gbɔ kap waga Bɛtfaaze nɔ o sɛkpa toŋ gbɔk yɛɛ oliviye dii tin nɔ oppo, Yeesu yaʼ ɓəəzi kaam an ve itto tinba: 2O feet vo: «vo tak kap waga de o vo tinba ɛn oppo voy zee gɔ̌y wa̧a̧wa̧a̧ naʼ ve taʼaa de tuu vey gɔ̌y wa̧a̧wa̧a̧ waga an daŋ vo bull panzi yaa orɛ. 3Há̧a̧ oò vi vo hɛn zɔʼɔ, vo hi̧i̧za: “Gbɛ̧ɛ̧ kɛŋ hi̧i̧ de moò an yɔ.” Ɛn de ɛ vora voy luunaa.» 4Hɛn nɔ daa too ɛnɔmmɔ kǔt de hɛn Go̧o̧ge yaʼyɛɛ an bɔk fee: 5«Vo feeza náa Siyɔŋ vɛ: mɔ torɛ, Gbɛ̧ɛ̧ mɔn de yaay umpo, so̧o̧t za̧a̧, o hiŋ de gɔ̌y wa̧a̧wa̧ǎ̧ naʼ ba, vere gɔ̌y wa̧a̧wa̧a̧ waga ba, gɔ̌y wa̧a̧wa̧a̧ wagaǎ.» 6Kaamɔ ve tak kɔy too Yeesu ke feet vo nɔm. 7Ve pani gɔy wa̧a̧wa̧a̧ naʼ vere gɔ̌y wa̧a̧wa̧a̧ waga nɔrɛ, ve uu sam von vɛ o ve yɛlba, ɛn Yeesu hiŋ zɔɔ oppo. 8Náa ve duʼza̧a̧ ve uu sam von vɛ yanaa; náa zɔʼ ve gəy wat ve uu yanaa. 9Náa ke vey ɓəəra Yeesu o tinba nɔ vɛ vere náa ke vey ooraa piki nɔ vɛ ve gbǎt wɔɔk ve fee: «Gbəəm do kan Davit tân an oppo! Ɛn Go̧o̧ge do su há̧a̧ de yaay Gbɛ̧ɛ̧ kɛŋ niiba nɔrɛ! Gbəəm do kan Go̧o̧ge de bɛlba gɔɔ nɔ oppo!» 10Yeesu fee ka dɔ Zeruzalɛmmɔ, kappɔ namzinnɛ. Náa kappa tuu nɔ ve virɛ: Hii wa̧yyin de ɛn yɛɛ?.» 11Náa ve hi̧i̧: De Go̧o̧ge yaʼyɛɛ an Yeesu Nazarɛt hɛk Galile nɔ oppo nɛy.
Yeesu nɛn náa mak hɛn vɛ Go̧o̧ge liki
Mar 11:11-19; Luk 19:45-48; Zâŋ 2:13-22
12Yeesu dɔ Go̧o̧ge liki kə nɛnzi náa mak hɛn vɛ vere náa ɓa hɛn verɛ tɛʼ yɛɛ ɛn opporɛ; O yaʼgi náa kpəll hell waa vɛ taabəl von vɛ hɛge vere náa mak kə̌kɔ vɛʼ. 13O kə feet vo: «Dɛptɛlle nɔ, Go̧o̧ge fee: “Ve yà̧à̧ de ka̧a̧ min nɔ ka̧a̧ faa yakka.” Ɛn von vo fit de yuu ka̧ǎ̧!» 14Náa yə̧ə̧̀ nɔ vɛ vere náa dɔʼ ho̧o̧ nɔ vɛ ve diŋŋi Yeesu o hɛge Go̧o̧ge liki tuu Yeesu kə poozi vorɛ. 15Náa kɔ maak ak kɛŋŋɔ vɛ vere náa it Moyi̧i̧zə moò buu an nɔ vɛ ve hə Hɛn Yeesu kɔ ɛn vɛ vere sâm ve gbǎt wɔɔk Go̧o̧ge liki: «Gbəəm do kan Davit tân an oppo nɔ no vo zatta.» 16Ve feeza Yeesu: «Mɔ kii hɛn sâmmɔ vey fee nɔrɛ ɗaarɛ?» Yeesu hi̧i̧t vo: «Ə̧ə̧̀ mi kiirɛ, bɔk vo waʼan hɛn ve dɛ̧ɛ̧ dɛptɛlle nɔ yɛrɛ?: “Bɔk mɔ kɔ sâm ve sɛw vere sâm əə̀nɔ vɛ doò ve gbəŋŋummɛ!”» 17Pik an o luu ɛ vorɛ kə vuk kappa tuurɛ tak kap Bɛtani tak nə ituu.
Yeesu moo lell yɛmma
Mar 11:12-14, 20-24
18Dȩȩ yɔŋgal an, Yeesu ɗɛɛ kəy kare nɔ, gɔ̧ll ya̧ʼa̧rɛ. 19O hə̧ yɛm zɔʼ dii yana yakpa o diŋ tak yɛmmɔ o kɔlba, ɛn o zee watta zaʼ. O feeza yɛmmɔ: «Mɔy leena leet ɓɛ yɛ za̧ǎ̧ ɓim!» An kaʼso yɛmmɔ ɔrɛ ʼwaw. 20Kaamɔ ve hə ɛn nɔ kɔ vo bit ve vi Yeesu: «Hɛ̧ɛ̧n kɔ yɛm ɛnɔ ɔ dɔʼ daŋga zaʼ ʼwawɔ nɛɛ?» 21Yeesu hi̧i̧t vo: «Mi feet vora de ginu: Oo vo ɛ de si̧i̧ tu̧u̧ von nɛ, ɛn oo vo yulin moò yɛ, kaà voy kɔnna hɛn kii kɔ yɛmmɔ oppo nɛy zaʼ yɛ, ɛn kaà voy fee: “Gbɔk ɛn mɔ buk ɛtɛɛ mɔ wan zo̧o̧ lɛk aʼre” ɛn kaà de kɔraa. 22Oò vo tu̧u̧rɛ nɔ, voy hakka hɛn voy haara vere yak faara nɔrɛ.»
Yeesu zee gɔti ɛn anɛ?
Mar 11:27-33; Luk 20:1-8
23Yeesu dɔ Go̧o̧ge liki dii moò ooraa; náa kɔ maak ak kɛŋŋɔ vɛ vere náa kɛŋ Yuuda nɔ vɛ ve yaa viʼi: «Hii pom ya̧a̧ hɛn ɛnɔ vɛ kɔra ze nɔ yɛɛ? Hii pom gɔti ɛnɔ yɛɛ?» 24Yeesu hi̧i̧t vo: «Mi sɛw mii vi vora moò daŋga zaʼ; oò vo hi̧i̧zirɛ, ɛnɔ mii feet vora ya̧a̧ mii kɔnna hɛn ɛn ve nɔrɛ. 25Hii yaʼiy Zâŋ doò po Batɛ̂mma nɔ yɛɛ Go̧o̧geyrɛ ha̧a̧rɔɔ há̧a̧ veyrɛ?» Ɛn ve dii visina o ve fo̧o̧ni ve fee: «Oo bay hi̧i̧ vora: “Go̧o̧ge yaʼay yɔɔ”, de vi ba vora: “ Hɛ̧ɛ̧n kɔ vo tu̧u̧n Zâŋ yɛ nɔ nɛɛ?” 26Ɛn oo bay fee vora: “Náa ve yaʼay yɔɔ”, ba waa vo dòo náa verɛ, ɛnɔ ve tɛʼ ve gaa Zâŋ bo o Go̧o̧ge yaʼyɛɛ ani.» 27Ɛnɔ ve hi̧i̧za Yeesu: «Vi gaanɛ.» Yeesu hi̧i̧ kə̂n vo: «Həəə̂ sȩȩrɛ, mi sɛw mi feezin vo ya̧a̧ mii kɔnna hɛn ɛn vɛ nɔ yɛ.»
Yak bɛmm sâm itto vey
28Yeesu kaʼ ɓɛʼ: «Hɛ̧ɛ̧n vo vəʼə hɛn nɛnɔ oppo nɔ nɛɛ? Wa̧y zɔʼ ɛ sâm wa̧p ve itto. O feeza tân ɓəə timmɔ: “Tân min, munɛ mɔ tak kɔ kɔm vi̧yə̧ hǎn.” 29Tân nɔ hi̧i̧: “Mi tan nɛ.” Pik an, o pi moò vəʼəra an kə luu takkɛ. 30Baa nɔ tak feeza tân zɔʼ nɔ yak da̧a̧ nɛy ɓɛʼ. Tân nɔ hi̧i̧za: “Ə̧ə̧̀, baa, mii takkaa.” Ɛn o yaa tǎn nɛ. 31Sâm itto ɛn ve nɔ hii kɔ hɛn baʼ hi̧i̧ nɔ yɛɛ?» Ve hi̧i̧za: «Tân ɓəə timmɛy», Ɛnɔ Yeesu feet vo: «Mi feet vora de ginu: Náa sɔŋ zɔmɔgɔl vɛ vere kep ya̧a̧ gbaagi ak vɛ vey ɓəə dɔra Go̧o̧ge o Gbɛ̧ɛ̧re yɔ. 32Ɛnɔ Zâŋ Batis yaa o vo po it vo yana za̧a̧ likaa ɛn vo tu̧u̧na yɛ; ɛn náa sɔŋ zɔmɔgɔl vɛ vere kep ya̧a̧ gbaagi ak vɛ ve tu̧u̧u̧ yɔ. Vo hə̧ ɛn nɛ za̧a̧za̧a̧ ɗaa, vo kə filin si̧i̧ von ka vo tu̧u̧u̧rɛ yɛ.»
Yak bɛmm náa ɓɛɛ baa haŋ vi̧i̧yə̧ vey
Mar 12:1-12; Luk 20:9-19
33«Vo kii yak bɛmm zɔʼɔ: Há̧a̧ haŋ ak zɔʼ baa haŋ vi̧i̧yə̧ə̧; O kəkin vere hȩgȩtta, à̧à̧ va̧a̧ ka ɓo̧ʼ mɛkkɔ tin kə yo̧o̧za há̧a̧ laa yɛɛ nɔ lik aʼni tin. Pik an, o ɛ̂za náa kɔ kɔm vi̧i̧yə̧ vey, o luu gayre. 34Yɛɛ fee ka lii vi̧i̧yə̧ hara nɔ, o yaʼ kɔm ak an ve náa kɔ kɔm vi̧i̧yə̧ nɔ o ve po doò ve ɓat voy vi̧i̧yȩ leetɛy. 35Ɛn náa kɔ kɔmmɔ ve so yaʼyɛɛ nɔ verɛ, ve wa̧a̧ zɔʼ daŋga nɔrɛ, ve vɔ̌t zɔʼ nɔrɛ ve kə zun vɔ̌zin zɔʼ goʼ ta̧a̧to nɔ vere pinna. 36Ɛnɔ wa̧y haŋ akkɔ yaʼiy kɔm ak zɔʼ vey, ve ɓoo ɗəə náa ke ve tinba nɔ verɛ, ɛn náa kɔ kɔm vi̧i̧yə̧ nɔ ve kɔ vo too ɛnɔm ɓɛʼ. 37Si̧ʼtum an, o yaʼat voy tân ani o vəʼə: “Vey zɛ̌ppa tân min nɛ.” 38Ɛn náa kɔ kɔm vi̧i̧yə̧ nɔ ve fee ka ve hə̧ tân nɔ, ve feezin o ve yɛɛ ba: “Wa̧y de yaa lɛnna haŋŋɔ oy ɛnɔ! Vo yaa ba vɔ̌za vorɛ ba lɛn vo haŋŋɔ yɔ.” 39Ve soʼorɛ, ve wɔɔ vuksa hǎn tuurɛ ve kə vɔ̌zarɛ. 40Yeesu vi: «Há̧a̧ haŋ akkɔ oò yaay nɔ, de kɔra náa kɔ kɔm vi̧i̧yə̧re nɔ ve tuubɔgɛ?» 41Ve hi̧i̧za: «De yaa vɔ̌tta náa ɓɛɛ ɛn verɛ de gaazin voo gim yɛ de kə ɛ̂zaa haŋ vi̧i̧yə̧ nɔ náa kɔ kɔm vi̧i̧yə̧ zɔʼ vey, yɛɛ oo lii vi̧i̧yə̧ hara nɔ vey poʼoo vi̧i̧yə̧ mɛk yɛɛ o hi̧i̧ tin nɔ oppo.» 42Ɛn Yeesu kə feet vo: «Vo waʼan hɛn dɛptɛl fee nɔ yɛ ɓimmɛ? “Pinn náa yo̧o̧ ka̧a̧ ve gbəllɔ, o bi̧i̧ de pinn za̧a̧ ka̧a̧ kɔlba yɔ. Ɛnɔ Gbɛ̧ɛ̧ kɛŋ kɔ yɔ, de o ba vo nɔre nɔ, de hɛn za̧a̧ ɗəə wɔɔka!” 43Yeesu ka̧ʼ ɓɛʼ: «De moò an oy, mi feet vora Go̧o̧ge Gbɛ̧ɛ̧ an nɔ de îŋŋa o vo porɛ, vey zik zɔʼ ka lee leetɛy. 44Há̧a̧ oò wan pinn ɛnɔ oppo fo̧o̧ an de gəllaa; pinn ɛnɔ oò wan há̧a̧ o fɔn yɔ, de nanaa.» 45Náa kɔ maak ak kɛŋŋɔ vɛ vere náa Farize vɛ ve kii Yeesu yak bɛmm an nɔ vɛ nɔ ve gaarɛ boy moo de moò voni. 46Ve tee yana ka ve soʼorɛ, ɛn ɗaa ve waa dòo náa verɛ, ɛn náa ve ǐn Yeesu too Go̧o̧ge yaʼyɛɛ ani vin.
Currently Selected:
Matiye 21: dae
Highlight
Copy
Compare
Share
Want to have your highlights saved across all your devices? Sign up or sign in
