Matiye 20
20
Náa kɔ kɔm haŋ vi̧i̧yə̧re vey
1Gbɛ̧ɛ̧ bɛlba gɔɔ nɔ liizin vere hɛn nɛʼi̧: wa̧y hâŋ ak zɔʼ vuk yɔŋgay nɔmpo ka tee náa kɔ kɔm ve o haŋ vi̧i̧yə̧re. 2Ve kiizinga náa kɔ kɔmmɔ vɛ sann waa daŋga yo̧o̧ daŋga nɔ oppo nɛy, too o nɛnin tokka nɔm, kə yaʼ vo kɔm kɔra o haŋ vi̧i̧yə̧re. 3O kə vuk yo̧o̧ sǎm gann vɔɔ ba ɓɛʼ o hə̧ náa zɔʼ vey diiri yɛɛ zɔʼ ba ve ɛ̂n kɔm yɛ. 4O feet vo: “Vo sɛw, vo tak kɔ kɔm ii vi̧i̧yə̧ hǎn ɛn mi tok vora za̧a̧za̧a̧.” 5Ɛn ve luu takkɛ. Wa̧y haŋ akkɔ kə vuk yo̧o̧ dàake nɔrɛ ɓɛʼ, pik an vuk yo̧o̧ tân ta̧a̧to mim yakpa kə kɔ da̧a̧ nɔm. 6Si̧ʼtum an, o vuk yo̧o̧ tân saa ba mim yakpa, o zee náa zɔʼ vey diiri yɛɛ zɔʼ ba. O vi vo: “Hɛ̧ɛ̧n kɔ voy dii ɛtɛɛ yo̧o̧ fɛt vo kɔn kɔm yɛ nɔ nɛɛ?” 7Ve hi̧i̧za: “Moò há̧a̧ zɔʼ yà̧a̧n vi kɔm yɛ nɛy.” O feet vo: “Ɛn sȩȩrɛ, vo sɛw vo tak kɔzi kɔm ii hâŋ vi̧i̧yə̧re.” 8‹‹Mim yak fee ka kɔ nɔ, wa̧y haŋ akkɔ feeza dɔʼ ak an: “Mɔ ya̧a̧y náa kɔ kɔmmɔ vɛ mɔ tok vo sân voni. Mɔ bi̧i̧ náa si̧ʼin pikkɔ o ve po mɔ sǐ̧t náa ke ve ɓəə yɔŋgǎy no ove po.” 9Náa ke ve gbɔy yo̧o̧ tân saa mim yakpa nɔ ve yaa hak sann waa danga daŋga. 10Náa ke ve ɓəə hǎn nɔ ve tu̧u̧ nɔ bo vey hakka ɗəəraa; ɛn ve po vo sân waa daŋga daŋga nɛy sɛw. 11Ve ɓa naʼa kəzəkɔ, ve bo̧o̧za wa̧y haŋ akkɔrɛ 12ve fee: “Náa kɔm ak ke ve yaa si̧ʼtum pikpa ɛnɔ vɛ ve kɔ kɔm yo̧o̧ tân daŋga zaʼ mɔ tok vo too náa ki vi noorin moò yo̧o̧ pii ba yo̧o̧ fɛttɔ vin sɛwrɛ!” 13Ɛn ɗaa Wa̧y haŋ akkɔ hi̧i̧za há̧a̧ von daŋga: “Gbaare mi lɛnum yɛ. Ke ba kiizin kɔm yo̧o̧ dɔʼ daŋga nɔ sân waa daŋga, paam ɛŋgɔ yɛrɛ? 14Mɔ ɓa sân waa mɔn mɔ luu tak tuu. Mi hi̧i̧ kay tok há̧a̧ ke yaa si̧ʼtum pikkɔ too ki tokum nɔm. 15Mi liin kay kɔnin sân waa min nɔ kɔm yɛrɛ? ongɛɛ sɛ̧ɛ̧k kɔ́m moò mi kɔ za̧a̧ nɛyrɛ?” 16Yeesu kə ka̧ʼ ɓɛʼ, náa ve si̧ʼin de pikkɔ ve yaa bi̧i̧ náa ɓəə tinba vey ɛn náa ve ɓəə de tinba nɔ ve yaa bi̧i̧ náa si̧ʼin pik vey.››
Yeesu de fee moò vɔɔ an vere niŋzi kəy an za̧a̧ nɔ dɔʼ ta̧a̧to ani
Mar 10:32-34; Luk 18:31-34
17Yeesu de takka Zeruzalɛm. O iŋ kaam an boʼ zoo itto nɔ vɛ o ve da̧a̧re kə feet vo vey ɛmbiba nɔ oppo: 18«Vo kiirɛ bay dɔk vora Zeruzalɛm, vey tak hezaa Há̧a̧ Tân an náa kɔ maak ak kɛŋ vɛ vere náa it Moyi̧zə moò buu an ve ituu. Vey yȩʼȩnaa moò doò vɔrɛ 19ɛn vey heʼee náa gaan Go̧o̧ge yɛ nɔ o ve naʼa, vey zaaa, vey wânaa ɓɛtta vey kə gaʼaa tap ɓanzinna ba. Ɛn yo̧o̧ dɔʼ ta̧a̧to ba nɔ de niŋzi vɔɔ yɛɛre za̧a̧na.››
Zâk vere Zâŋ naʼa von moò vit ani
Mar 10:35-45
20Ɛnɔ Zebede kenaa diŋŋi Yeesu o hɛge vega sâm an itto nɔ ve tin; o boʼ zo̧o̧ o timba ka haaa hɛn zɔʼɔ. 21Yeesu feeza: ‹‹Hɛ̧ɛ̧n mɔ hi̧i̧ nɛɛ?›› O hi̧i̧za: ‹‹Kaǎm bɛni Sâm min itto nɛnɔ vɛ daŋga úm naak za̧a̧ ba, ɛn zɔʼ nɔ úm naak kpǎy ba, oǒm zɔɔ úm Gbɛ̧ɛ̧re nɔ gɔ.›› 22Yeesu hi̧i̧za: «Vo gaan hɛn voy haara nɔ yɛ, ka vo lɔ zɔra gim mak mi yaa zɔra nɔrɛ ɗaarɛ?» Ve hi̧i̧za: «Vii lɔraa.» 23Yeesu hi̧i̧t vo: ‹‹Voy zɔra gim mak min nɔrɛ ɗaa, ɛn ɗaa kaǎy feen yɔ bàa há̧a̧ ɛn de zɔɔ ii naak za̧a̧ ba yɔ, há̧a̧ ɛn de zɔɔ ii naak kpây ba yɔ yɛ; yɛɛ ɛnɔ de náa Baa min bɔk gak vo ve voni.›› 24Kaam zɔʼ boʼ nɔ ve fee ve kii ɛnɔ, no vo zat vere daak von itto nɔ verɛ. 25Ɛnɔ Yeesu ya̧a̧ voy ve bisum tɛʼ kə feet vo: «Vo gaa, kɛŋŋɔ vey buu náa ve too gbɛ̧ɛ̧ vin, ɛn náa kɛŋŋɔ vey itta gɔti von náa zɔʼ o ve po. 26Ɛn o vo po nɔ do daa too ɛnɔm o vo tiŋza̧a̧re sɛ. Há̧a̧ daŋga o vo tiŋza̧a̧re oo hi̧i̧ ka fi kɛŋŋa nɔ do bi̧i̧ kɔm ak voni, 27ɛn há̧a̧ von daŋga oo hi̧i̧ ka fi há̧a̧ ɓəə timma nɔ do bi̧i̧ gbay voni. 28De ɛŋgɔ vin Há̧a̧ Tân an yaani doò ve kɔ̂t vo kɔmma yɛ, ɛn o yaay ka kɔ̂za náa ve kɔm yɔ te ka po za̧a̧n an ka toksina náa ve duʼza̧a̧ vɔɔ wɔɔk voni.››
Yeesu poozi yə̧ə̧̀ ve itto
Mar 10:46-52; Luk 18:35-43
29Ɛn Yeesu vere kaam an vɛ ve vuk Zeriko tuu nɔ, náa ve duʼza̧a̧ ve òorarɛ. 30Yə̧ə̧̀ ve itto ve zɔɔ yana yakpa ve kii Yeesu de daaa; ve bi̧i̧ yak wa̧a̧zaa: «Wa̧y it hɛn, Davit tân an, gim do kɔzum virɛ!» 31Duʼ nɔ ve zɛt vorɛ doò ve gə̌ttɛ, ɛn ve kə wa̧a̧ yak ɗəə wɔɔka aʼvin: Wa̧y it hɛn, Davit tân an, gim do kɔzum virɛ!» 32Yeesu diirɛ, kə ya̧a̧ vorɛ kə vi vo: «Vo hi̧i̧ mi kɔ̂t vo hɛ̧ɛ̧n o nɛɛ?» 33Ve hi̧i̧za: «Wa̧y it hɛn, mɔ kull vi nɔt vini.» 34Yeesu gim kɔza vorɛ kə so̧o̧ nɔt von nɔrɛ; ɓɔllɛ ɛtuu vin yə̧ə̧̀ itto nɔ ve hə̧ nɔt von nɛ, ve kə òo Yeesuy.
Currently Selected:
Matiye 20: dae
Highlight
Copy
Compare
Share
Want to have your highlights saved across all your devices? Sign up or sign in
