Matiye 15
15
Kɛŋ zɛɛti ve tûl voni
Mar 7:1-13
1Náa Farize vɛ vere náa it Moyi̧zə moò buu an vɛ, ve luuy Zeruzalɛm ve yaa zee Yeesu ve viʼi: 2«Moò nɛɛ kaam mɔn ve òorin ǎŋ ban vo ve tûl von yɛ nɛy? Ɛnɔ ve əlin naak von vɛ doʼ ve lɛn lɛm ze too tûl fee nɔm yɛ nɔ gɔ.» 3Yeesu hi̧i̧t vo: «Von hɛ̧ɛ̧n kɔ vo òorin Go̧o̧ge moò buu an yɛ voy oora tûl voni zaʼ nɔ moò nɛɛ? 4Ɛnuu, Go̧o̧ge fee: “Mɔ zɛ̌p Baa mon vere naʼa mon nɛ”, ɛn o fee ɓɛʼ: “Há̧a̧ oò moo ɓɛɛ Baʼ an oppo oŋgɛ naʼan oppo do ve vɔ̌zarɛ.” 5Ɛn von voy feeza náa vɛ: “Há̧a̧ oò feeza baʼ an oŋgɛ naʼ an: Hɛn kaǎy pomma ka maʼzummɔ de pori min mi pora Go̧o̧ge nɛy”. 6Ɛn kaà zɛbin baʼ an vere pori an ɓɛ yɛ si̧ʼ moò paamɛ. Too ɛnɔmmɔ voy lella Go̧o̧ge moò buu an ka vo òo tûl voni! 7Náa yak yuu ɛn voy! Ezǎy moò an nɔ bɔk moò za̧ǎ̧ bɔk o moot vo ɛŋgɔ: 8“Go̧o̧ge fee, náa ɛn vey zɛbira yakpa zaʼ, ɛn si̧i̧ von yəəzinga mirɛ. 9Yak faara vey faazira vere maak vey kɔzira nɔ zɛ̂nnɛ, ɛnɔ ya̧a̧ vey itta nɔ de há̧a̧ ve moò buu von vey”.»
Hɛn ka vi̧i̧zi há̧a̧ nɔ vey
Mar 7:14-23
10Pik an Yeesu ya̧a̧ náa ve kə feet vo ve tɛʼ: «Vo kìirɛ, vo kii Hɛn nɛnɔ za̧a̧za̧a̧: 11Hɛn de dɔra há̧a̧ o yake nɔ vi̧i̧zinna yɔ yɛ. Ɛn hɛn de vukka há̧a̧ o yake nɔ de vi̧i̧zaa yɔ.» 12Ɛnɔ kaamɔ ve diŋ Yeesu o hɛge ve feeza: Mɔ gaa yak moot mɔn nɔ bo no de farize nɔ ve zatta nɔrɛ ɗaarɛ?» 13Yeesu hi̧i̧t vo: «Tap vukka Baa min oy bɛlba nɔ bɔk ɗakin yɔ yɛ nɔ tɛʼ de lulla hɛge. 14Vo ɛ vo tuu: ve náa yə̧ə̧̀ zǎk yə̧ə̧̀ vey! Ɛn yə̧ə̧̀ oò de zǎkka yə̧ə̧̀ zɔʼɔ nɔ, ve itto sɛw vey wanna va̧a̧re.» 15Piyɛr iŋ yak moot kə feeza Yeesu: «Mɔ òo wât vi moò bɛmm ɛnɛy.» 16Yeesu fee: «Vo sɛw vo gaana dee yɛrɛ? 17Vo gaan gɔɔ hɛn bo de dɔra há̧a̧ o yake tɛʼ zo̧o̧ o pə̧ə̧re tak vuk o fɔn ze yɛrɛ? 18Ɛn hɛn de vukii yake nɔ dɔki de si̧i̧ba, ɛn de vi̧i̧zii há̧a̧ yɔ. 19Ɛnɔ moò vəʼəra ɓɛɛ ve vukii há̧a̧ o si̧i̧ba nɔ vɛy yaʼa há̧a̧ vɔ̌tta, gbaagi ya̧a̧, kandi nammatere, yuu iŋŋaa, və̧ə̧k hɛ̀ɛraa, vere mòòt daaa o ve po. 20Hɛn de vi̧i̧zii há̧a̧ nɔ vey ɛnɔ! Ɛn lɛm lɛra naak əlinna yɛ too tull fee nɔmmɔ, vi̧i̧zin há̧a̧ yɔ yɛ.»
Kep gáy zɔʼ tu̧u̧ Yeesuy
Mar 7:24-30
21Pik an Yeesu luu ɛtuurɛ o tak hɛk Tiyir vere Sidɔŋ. 22Waà kep zɔʼ hɛk kanaan nɔ oppo bɔk oy hɛk ɛn oppo vin yaay Yeesu oppo vere yak wa̧a̧ka: «Wa̧y it hɛn, Davit Tân an, gim do kɔzum mi paa! Tân kep min fəəm ɓɛɛ de ɗeʼenaa, oy ɓɛɛ za̧a̧ ɓim!» 23Ɛn ɗaa Yeesu hi̧i̧zinna yak daŋga maaki yɛ. Kaam an ve diŋŋ o hɛge ve kə feeza: «Mɔ yaʼ kəna do luurɛ, oy oorin ba vora wɔɔk gbatta piki.» 24Yeesu hi̧i̧: «Go̧o̧ge yaʼiy náa Islayɛl vey too tɛ̧ɛ̧ ve ti nɔmmɔ o ve po zaʼ.» 25Ɛn waà keppɔ yaa ɗiksi dɔʼ o timba kə fee: «Wa̧y it hɛn, mɔ maʼzirɛ!» 26Yeesu hi̧i̧: «Sȩȩn sâm ve nân von iŋŋa gbəlsaa ǐŋŋɔ ve nɔ yɛ.» 27Waà keppɔ feeza: «De ginu wa̧y hɛn, ɛn si̧ʼ ǐŋŋɔ ve sɛw vey lɛra lɛm puut de pɛlla kɛŋ von o yɛɛ lɛ lɛm ba nɔrɛ.» 28Ɛnɔ Yeesu hi̧i̧za waà keppɔ: «Si̧i̧ tu̧u̧ mɔn naarɛ! Go̧o̧ge de pomma hɛn mɔ hi̧i̧ nɔrɛ.» Ɛn tân kep an nɔ ho̧o̧ an nɔ pooo naʼa tuu vin.
Yeesu poozi ho̧o̧ ve duʼza̧a̧
29Yeesu luu ɛtuu nɔ òo lɛk aʼ Galile nɔ yak ani. O hiŋ gbɔk wagaa ba kə zɔɔrɛ. 30Náa ve duʼza̧a̧ ve yaay Yeesu oppo, ve pani náa dɔʼ ho̧o̧ vey, yə̧ə̧̀ nɔ vey, kpellɔ vey, mûn nɔ vey, vere ná́a ho̧o̧ zɔʼ ve duʼza̧a̧ tin. Ve yaa sit vo Yeesu o hɛge ɛn o póozi vo ho̧o̧ von nɛ. 31Náa ve kɔ vo bit yɛɛ ve hə̧ há̧a̧ mûn nɔ ve moorɛ, kpellɔ vɛ ho̧o̧ von poo vorɛ, náa dɔʼ ho̧o̧ ve ɛ̌m wâttɛ, yə̧ə̧̀ nɔ ve hə̧ nɔttɛ dȩȩza̧a̧, ɛn ve gbəŋ Go̧o̧ge Islayɛlle nɔrɛ.
Yeesu yàà há̧a̧ ve saʼa natto
Mar 8:1-10
32Yeesu ya̧a̧ kaam an vɛ Kə fee: «Gim kɔzi náa ɛn verɛ, ɛnɔ kɔ dɔʼ ta̧a̧to ma vey kanna de vey mii ɛn ve ɛ̂n hɛn lɛra yɛ. Mi hi̧i̧n kǎy baarin vo gɔ̧ll vin nɔ yɛ; kaà vey hakinna gɔti yana ɛ̌mbi yɛ.» 33Kaamɔ ve viʼi: «Ka ba hak vo lɛm ka lii pora náa duʼ too ɛnɔmmɔ vɛ ho̧o̧t talle ɛtɛɛ ka ve lɛ o ve gɔ̧ll ba ze nɔ anɛ?» 34Yeesu vi vo: «Vo ɛ de nân kpɛ̌k baʼgɛ?» Ɛn ve hi̧i̧za: «Gutambe vere dut waga zɔʼ ve kaʼ tin.» 35Ɛnɔ, Yeesu po náa duʼ nɔ ve ya̧a̧ doò ve zɔɔ hɛge. 36Pik an o iŋ nân kpɛ̌k gutambe nɔ vere duttɔ tin dɛnza Go̧o̧ge naak tin, kpəllɛ kə po kaam an vey, kaamɔ ve kə yə̧ʼ vorɛ tɛʼ. 37Hii yɛɛ lɛ o gɔ̧ll ba. Kaamɔ ve fa̧a̧ pəətumɔ vɛ ɓaa gutambe. 38Náa bɔk ve lɛ lɛm ɛnɔ bɔk wa̧p ve saʼa natto, keppɔ vɛ vere sâm vɛ ve waʼ dɔ̌zin vo sɛkke yɛ. 39Yeesu bàa náa ve kəzəkɔ, o hiŋ kɔmballe tak hɛk Magadaŋ#15:39 Magadaŋ: zɔʼ ve ya̧a̧ bo Magdala.
Currently Selected:
Matiye 15: dae
Highlight
Copy
Compare
Share
Want to have your highlights saved across all your devices? Sign up or sign in
