Matiye 14
14
Zâŋ Batis vɔɔ ani
Mar 6:14-29; Luk 9:7-9; 3:19-20
1Vɛllin ɛnɔ, Helot bɔk buu hɛk Galile yɔ, kii vey moò Yeesu moo anni.
2O feeza kɔm ak an vɛ: «Ɛn Zâŋ-Batis: O ninzi kəy vɔɔ o ve tinza̧a̧re yɔ! Moo an oy o ɛ gɔti hɛn yɔfit ve kɔra ze.» 3Ɛtuu nɔ, Helot bɔk po ya̧a̧ doò ve sɔ Zâŋŋɛ, doo ve vɔ̌l gbəlla lik naʼare. Bɔk Herodiya o moore, daak an Filip kɛnaa. 4Ɛnɔ Zâŋ bɔk feeza Helôt: «Ke sȩȩn kam iŋ Helodiya waǎ monni yɛ!» 5Helôt bɔk hi̧i̧ ka vɔt Zâŋŋɛ, ɛnɔ dòo kɔʼɔ zik yuuda nɔrɛ, ɛn náa ve tɛʼ ve iŋ Zâŋ too Go̧o̧ge yaʼyɛ an vin. 6Yo̧o̧n ɛnɔ, Helot yo̧o̧ duʼ ɓɔɔri ani, Helodiya tân kep an naa hɛn náa ke ve ya̧a̧ voy nɔ o ve timba tuu. Sȩȩza Helottɛ kpɛ̌ŋ, 7Ɛn o sa̧a̧za̧ galla: «mii pomma hɛn mɔy hayya nɔ verɛ tɛʼ.» 8Naʼan o pɛɛk ba tuu, o feeza: «mɔ poy zâŋ Batis wɔɔ an pɛɛri yakpa ɛtɛɛ!» 9Gbɛ̧ɛ̧ɛ̧ nɔ luʼurɛ kpɛ̌ŋ. Ɛn ke sa̧a̧zsa gâl náa duʼ nɔ o ve timba ma kəzəkɔ, o po ya̧a̧ doò ve po tan keppɔ Zâŋ wɔɔ an nɛy. 10O yaʼ há̧a̧ doò tak sȩȩy Zâŋ Batis wɔɔ an lik naʼre tuu. 11O pan yaani vɔɔkɔ pɛɛri yakpa yaa po tan kep waaga nɔ panzaa tak naʼanni. 12Zâŋ kaam an ve yaa gan fo̧o̧ nɔrɛ ve leerɛ. Ve kə feeza Yeesu hɛn ke daa nɔrɛ.
Yeesu yaa há̧a̧ ve saʼa saa
Mar 6:30-44; Luk 9:10-17; Zâŋ 6:1-14
13Yeesu fee ka kii moò ɛnɔ kəzəkkɔ, o luu ɛtuu, o hiŋ kɔmbale o da̧a̧re o tak yɛɛ tɔŋgba. Ɛnɔ duʼ nɔ ve kiirɛ; ve vuki kap sekpa tuu nɔ ve oppo ɛn ve oo Yeesurɛ ve ěm lɛk yakpa tuu. 14Yeesu de vukka kɔmbale dɔmmɔ, o həə náa duʼ nɔ vey; gim kɔzaa vorɛ ɛn bi̧i̧ poozi vo ho̧o̧ von verɛ. 15Mim yak kɔ kəzəkkɔ, Yeesu kaam an ve diŋ yaa o hɛge ve feeza: «Yo̧o̧ tun ma yɛɛ nɛnɔ ba vo de yɛɛ tɔŋgba. Mɔ yaʼ kən tak náa ɛnɔ ve kare tɛʼ do ve tak ɓa hɛn ka ve lɛ nɛy. 16Yeesu hi̧i̧t vo: «Ke sȩȩn kaà ve luurɛ yɛ; voy vo po vo hɛn lɛra yɔ!» 17Ɛn ve feeza: «vi ɛ de ɛttɛɛ nɔ nân kpɛ̌k saa vere dut itto zaʼ.» 18Yeesu feet vo: «Vo panziirɛ,» 19Pik an, Yeesu po ya̧a̧ náa doò ve zɔɔ ho̧o̧t ba; o kə iŋ nân kpɛ̌k saa nɔ vere dut itto nɔ tin kə to nɔt bɛlba kə dɛnza Go̧o̧ge naaka. O kpə̌l nân nɔ po kaam an vey, ɛn kammɔ ve kə yəʼ náa vey. 20Hii yɛɛ lɛ o gɔ̧ll ba ha̧a̧rɛ. Kaamɔ ve sɔ̌ŋ pəətummɔ hi̧ʼ ɓàa boʼzoo itto. 21Há̧a̧ wa̧p bɔk ve lɛ lɛmmɔ kaà ve kɔ tak saʼa saarɛ, keppɔ vɛ vere sâmmɔ vɛ ve waʼ dɔzin vo sɛkke yɛ.
Yeesu ɛ̌m maam ba
Mar 6:45-52; Zâŋ 6:15-21
22Ɛtuu vin Yeesu hiŋzi kaàm an ve kɔmballe ka bo ve ɗaa ɓəə tak vo lɛk dən ii nɔ oppo deé, yɛɛ bɔk oy baara náa ve tin nɔ oppo. 23O bàa vo kəzəkɔ, o hiŋ dɔk gbɔk waa ba ka faa yakka. Mim yak kɔ nɔ, o kan tuu o da̧a̧re; 24Kɔmballɔ yəəzinga leksum yakkɔ ma, yam duni maam ba tuu maam heŋzinna nɔ vɛ zaʼ kɔmballɔ oppo. 25An yɛɛ hamba tɛɛ, Yeesu yaa kaam an o ve po ɛ̌mi maam ba vey dɔʼɔ. 26Kaamɔ ve hə̧ʼə̧ de ɛ̌mii maam ba nɔ, ve lɔkklɛ ve kə fee: «De ɛn gappa!» Ɛn ve wa̧a̧zi dòo yakka. 27Ɛn Yeesu feet vo: «dòo do kɔ vo sɛ de mii!» 28Ɛnɔ Piyɛr ǐŋ yak moot kə feeza: «Gbɛ̧ɛ̧ kɛŋ, oo de mɔy ginu nɔ, mɔ poy ya̧a̧ kǎy tak umpo maam ba vere dɔʼɔ.» 29Yeesu hi̧i̧za: «mɔ yaay bɔ!» Piyɛr vuk kɔmballe bi̧i̧ ɛ̌mma maam ba tuu ka tak Yeesu oppo. 30Ɛn o hə̧ yam ɔ̂ŋ de dunna nɔ, dòo kɔʼɔrɛ. O bi̧i̧ ɓin zo̧o̧ maame, kə wa̧a̧ yakka: «Gbɛ̧ɛ̧ kɛŋ, mɔ sɔzirɛ!» 31An kaʼso Yeesu yɔ̌l naak nɔmpo, soʼo kə feeza: «Si̧i̧ tu̧u̧ mɔn ɓoonɛ! Mɔ yǔl moò kɔn nɛɛ?» 32Ve hiŋ kɔmballe ve itto sɛw ɛn yammɔ gbəʼrɛ. 33Ɛnɔ kaam ke vey kɔmballe tuu nɔ ve ɗiksi dɔʼ ɗuk Yeesu o timba ve fee: «Mɔ Go̧o̧ge tân ani ginu!»
Yeesu poozi ho̧o̧ ve hɛk Gɛnesaarɛt
Mar 6:53-56
34Yeesu vere kaam an vɛ ve ɗaa sǐ̧t lɛkkɔ ve gbɔ hɛk Gɛnesaarɛt. 35Náa tuu nɔ ve gaa Yeesurɛ ɛn ve wɛksi yaari an nɔ o ve hɛkpa tuu sɛw tɛʼ, ɛn ve panzay ho̧o̧ verɛ tɛʼ. 36Ve wa̧a̧za yak doò ɛ ba ka bo ba so̧o̧ sam yak an maakirɛ; ɛn náa ve so̧o̧o̧ nɔ ve sɛw tɛʼ ho̧o̧ von poo vorɛ.
Currently Selected:
Matiye 14: dae
Highlight
Copy
Compare
Share
Want to have your highlights saved across all your devices? Sign up or sign in
