Matiye 13
13
Moò bɛmm wa̧y ba hɛn lûk ak oppo
Mar 4:1-9; Luk 8:4-8
1Yo̧o̧ ɛnɔ, Yeesu vuk kàa tak zɔɔ lɛk yakpa ka òo moǒ. 2Naa ve du'za̧a̧ ve sɔŋŋi o hɛge, o hiŋ kɔmballe zɔɔ oppo. Naa ve dii von maam yakpa tuu. 3Yeesu moot vo moò ɓooza̧a̧ vere yak bɛmma, feet vo: «Wa̧y zɔ' tak o hǎn ka hoo hoota. 4Wa̧y nɔ de hoo hootɔ, zɔ' ve pɛl yana yakpa nook bɛrɛttɔ ve yaa dorɛ. 5Zɔ' ve pɛl pinn yɛɛ ba, yɛɛ hɛt ɓoon tin yɛ nɔ oppo. Hɛn lukkɔ vukkɛ nɔmpo ɛn hɛttɔ sunnɛ nɛy. 6Yo̧o̧ fee ka laay bɛlba nɔ, aŋŋ hɛn vukka wagaa nɔ verɛ: Ve kaŋŋɛ moò hɛttɔ ɓoon o ve dɔ'i yɛ nɛy. 7Zɔ' ve pɛl sa̧a̧t tiŋza̧a̧re. Naa dɔkkɛ ɗaa, sa̧a̧tɔ ve sǎl vorɛ 8Hɛn luk zɔ' ve pɛl hɛt za̧a̧ba, o̧o̧ kɔ za̧a̧rɛ: Zɔ' ve gan yen wɔɔk saa, zɔ' ve wɔɔk ta̧a̧to, zɔ' ve gbɛk zoo bo.» 9Yeesu kə̀ ka̧ʼ ɓɛ: «Vo kii za̧a̧za̧a̧ òo vo ɛ de kɔ'rɛ nɛy.»
Yeesu moò yak bɛmme nɔ moò nɛɛ
Mar 4:10-12; Luk 8:9-10
10Ɛnuu, kaamɔ ve diŋŋi Yeesu o hɛge ve viʼi: «Moò nɛɛ mɔ moot voo vere yak bɛmma nɛy?» 11Yeesu hi̧i̧t vo: «Go̧o̧ge po vo, von, doò vo gaa moò za̧a̧ Gbɛ̧ɛ̧re ɗinn de bɛlba gǎŋŋɔ verɛ, ɛn o pon vo von yɛ. 12Ɛnɔ há̧a̧ oò ɛ de hɛ̂naa zɔʼrɛ, de kə hakka zɔʼ tin aʼvin ɛn de kanna za̧a̧re; ɛn há̧a̧ oò ɛ̂n nɛ biʼ nɔ, vey iŋŋa kaʼso waga an kaà de hakka nɔrɛ. 13Moò an oy mii moot voo vere yak bɛmmɔ ze: Ɛn vey toraa ɗaa ve hə̌n ke yɛ, vey kiiraa ɗaa ɛn ve kiin ke yɛ ve gaan nɛ vin. 14Too ɛnɔm, hɛn yaʼyɛɛ Ezǎy bɔk fee nɔ de kura o ve po oy: “Voy kii za̧a̧za̧a̧ ɗaa, ɛn voy ɛn voy gaána ke yɛ; voy toraa za̧a̧za̧a̧ ɗaa, ɛn voy hənna ke yɛ. 15Ɛnɔ, náa ɛn vɛ wɔɔk von sennɛ; ve yuʼ kɔʼ von verɛ, ve gbɛ̧ʼ nɔt von verɛ, ve gbȩʼ nɔt von doò to sɛ, kɔʼ von doò kii sɛ, moò gaa von doò gaan sɛ, too ɛnɔm vey ɗɛɛ kənii iipo gɔɔ doǒy poozi vorɛ yɛ Go̧o̧ge fee ɛŋgɔ.” 16Ɛn von, voy za̧a̧re: Nɔt von vɛy hə̧raa ɛn kɔʼ von vɛy kii! 17Mii feet vora, de ginu: Go̧o̧ge yaʼyɛɛ an ve ɓooza̧a̧ vere náa vey kan de za̧a̧ Go̧o̧ge oppo nɔ vɛ ve hi̧i̧ ka ve hə̧ hɛn voy hə̧ra nɔrɛ, ɛn ve hə̧nnɛ, ka ve kii hɛn voy kii nɔrɛ, ɛn ve kiinɛ#13:17 Vo goozin vere 1Piy 1:10-12.
Yeesu òo wǎt yak bɛmm wa̧y ba hɛn luk oppo nɛy
Mar 4:13-20; Luk 8:11-15
18«Vo kii hɛn yak bɛmm wa̧y hoo hootɔ oppo nɔ hi̧i̧ fee nɛy. 19Yana yak yɛɛ hɛn luk pɛl tin nɔ de náa vey kii Gbɛ̧ɛ̧ moò bɛlba gǎŋŋɔ ɛn ve gaan kɔllan yɛ nɔ vey. Fəəm ɓɛɛ yaa fat hɛn luk ke ve ba o ve si̧i̧ba nɔrɛ. 20Yɛɛ sɛksɛk hɛn lûk pɛl tin nɔ de náa vey kii Go̧o̧ge moò an, ve ɓa nɔmpo vere si̧i̧ dȩȩta nɔ vey. 21Ɛn ɗaa ve ɛ̂naa doò ɗaksi zazak o ve si̧i̧ba yɛ ve ɓa bolaa kaʼso gɔ̌m, hɛn goll yɛɛ oo fee ka zee vo nɔ, ongɛɛ oo ve ɗeʼen vo moò bo vey oora Go̧o̧ge moò ani nɔ ve hoozi si̧i̧ ɛtta von nɛ nɔmpo. 22Sa̧a̧t yɛɛ hɛn lûk pɛl tin nɔ de náa vey kii Go̧o̧ge moò an, ve sɔ vəʼəra hɛn hɛkpa nɔ vɛ vere hêl sɔɔtum hi̧i̧ra nɔ ve gbǎm Go̧o̧ge moò an o ve si̧i̧ba nɔrɛ , ɛn o leen leet yɛ. 23Hɛt za̧a̧ nɔ de náa vey kii moò ve gaarɛ nɔ vey. Ɛnɔ ve lee leetɛ, zɔʼ ve lee wɔɔk saa, zoʼ ve wɔɔk ta̧a̧to, zɔʼ ve gbɛk zoo boʼ.»
Yak bɛmm ho̧o̧t ɓɛɛ moǒ
24Yeesu moot vo yak bɛmm zɔʼɔ: «Hɛn liizinga Gbɛ̧ɛ̧ bɛlba nɔ de nɛ: Wa̧y zɔʼ ba hɛn luk za̧a̧ o hǎn. 25Vi̧i̧ zɔʼ, náa ve tɛʼ vey nəmme, wa̧y ɛnɔ za̧a̧k an zɔʼ yaa baza ho̧o̧t ɓɛɛ o Bəle tiŋza̧a̧re o luu kərɛ. 26Hɛn lukko ve vukkɛ vey o̧o̧ra dɔmmɔ, ho̧o̧t ɓɛɛ nɔ ve hənnɛ vin. 27Náa kɔ kɔmmɔ ve yaa feeza wa̧y hâŋ akkɔ: “Gbɛ̧ɛ̧ kɛŋ, bɔk mɔ ba hɛn luk za̧a̧ um hǎn oy: ho̧o̧t ɓɛɛ nɔ ve vuki anɛ?” 28O hi̧i̧t vo: “Za̧a̧k min zɔʼ ba yɔ.” Ɛnɔ náa kɔm akkɔ ve viʼi: “Mɔ hi̧i̧ vi tak lull ho̧o̧t ɓɛɛ nɔ ve hɛgerɛ?” 29O hi̧i̧ vo, “hə̧̂ə̧́, ɛnɔ oo voy lulaa nɔ kaà voy lulla Bəle nɔ verɛ vin. 30Vo ɛ vo do ve naa daŋ ɛŋgɔ ka gbɔ yo̧o̧ gəra ba doʼ yo̧o̧ ɛnɔ oppo mii fee náa gəra akkɔ vɛ: Vo gə ho̧o̧t ɓɛɛ nɔ ve tiyɔ vo sɔŋ vo yɛɛ daŋ vo sɛ vorɛ, pik an, vo sɔŋzi Bəle nɔ ii a̧lle.”»
Moò bɛmm saŋŋ noʼ yȩnna
Mar 4:30-32; Luk 13:18-19
31Yeewu oot vo yak bɛmm zɔʼɔ: «Gbɛ̧ɛ̧ bɛlba nɔ liizinga saŋ noʼ yȩnna háa zɔʼ iŋ tak ba o hǎn. 32O koo ɗəə hɛn, yȩnn zɔʼ ve tɛʼ yɔ ɛn ɗaa, oò vuk kəzəkɔ, o naa ɗəə hɛn luk dəə yɛɛre nɔ verɛ tɛʼ: o yaa bi̧i̧ tap aʼa, ɛn nook bɛrɛttɔ ve yaa waa puuk von vɛ o ɓâkke tuu.»
Yak bɛmm waak moǒ
Luk 13:20-21
33Yeesu feet vo yak bɛmm zɔʼɔ: «Gbɛ̧ɛ̧ bɛlba nɔ liizinga waaka kěp oo ɓɛ̧ɛ̧ kaʼ wəʼən zumma ɓooza̧a̧, ɛn zummɔ hoʼrɛ.»
Yeesu moo yak bɛmme nɔ moò nɛɛ?
Mar 4:33-34
34Yeesu fee hɛn ɛn ve tɛʼ vere yak bɛmma; ke bo moozin vo yak zɔʼ bɛmme yɛ nɔ paamɛ. 35O kɔ too ɛnɔmmɔ o kǔt yaʼyɛɛ yak moot an bɔk fee: «Mii moot voo vere yak bɛmmɔ vɛy, mii feet voo hɛn kan de yɛɛ ɗindire bɔk bi̧i̧ kɔll hɛk yěppa ba nɔ oppo.#13:35 Vo to dɛptɛl gəəm 78:2 36Ɛnɔ Yeesu luu ɛ náa verɛ ɛn o tak kàa. Kaam an ve diŋ tak o hɛge ve kə fee: «Mɔ moo wat vi moò bɛmm ho̧o̧t ɓɛɛ hǎn nɛy.» 37Yeesu hi̧i̧t vo: «Há̧a̧ de bara hɛn luk za̧a̧ nɔ de Há̧a̧ tân ani; 38hǎŋŋɔ de hɛkkɛy; hɛn luk za̧a̧ nɔ de náa ve lii dɔra Gbɛ̧ɛ̧re bɛlba nɔ vey; ho̧o̧tɔ de náa vey oora wa̧y ɓɛɛ nɔ vey; 39Za̧a̧k de bara ho̧o̧t ɓɛɛ nɔ de sɛɛɗanni; yo̧o̧ toot gəra nɔ, de yo̧o̧ hɛk de si̧ʼra tin nɛy; náa gə tootɔ de Go̧o̧ge Zə̧ə̧ an vey. 40Too vey faara ho̧o̧t ɓɛɛ vey hoo vɛre nɔm, de daa yo̧o̧ hɛk si̧ʼtum ba nɔ too ɛnɔm vin: 41Há̧a̧ tân an de yaʼi Zə̧ə̧ an vɛ; ve yaa vuksii náa vey sɔɔ yaʼa dǎa zɔʼ ve hɛn ɓɛɛ kɔlla nɔ ve tɛʼ o Gbɛ̧ɛ̧re tuurɛ vere náa kɔll hɛn ɓɛɛ ve tɛʼ, 42Ɛn vey gbəll voo vɛɛ aʼre; há̧a̧ ve duʼza̧a̧ vey ba̧a̧zii, vey yəʼzii nuut intuu. 43Ɛn dɔmmɔ, náa vey za̧ǎ̧ Go̧o̧ge oppo nɔ vey dȩȩzinna Baa von o Gbɛ̧ɛ̧re too yo̧o̧ vin#13:43 Vo goozin vere Dan 12:3. Vo kii za̧a̧za̧a̧, oo vo ɛ de kɔʼrɛ nɛy!»
Yak bɛmm hell ɗinnaa vere hitii
44«Gbɛ̧ɛ̧ bɛlba nɔ liizinga vey hell zɔʼ ɗinn haŋ zɔʼre. Há̧a̧ zɔʼ tak hə hell ɛnɔrɛ kə ɗǐn nɛ ɓɛ. O gbo̧ʼrɛ tak mak hɛn an o ɛ nɔ verɛ tɛʼ o ɗɛɛ kəy ɓa haŋ ɛnɔrɛ. 45«Gbɛ̧ɛ̧ bɛlba nɔ liiznga há̧a̧ mak hɛn de tee hiti za̧a̧ sȩȩri vɛy. 46Oò zee hiti za̧a̧ sɛk akka, o tak maki hɛn an o ɛ nɔ verɛ tɛʼ kə ɓan hiti ɛnəy.»
Yak bɛmm yaama moǒ
47«Gbɛ̧ɛ̧ bɛlba nɔ liizinga de ɓɛʼ nɔ, vere yaam ve hoo lɛk aʼre ɛn sǒl dut ve gâʼ kətkət. 48Yaamɔ oo hi̧ʼ kəzəkɔ, náa sǒl duttɔ ve wɔɔ dɔn leksum yakpa, pikan ve zɔɔ ve tì̧i̧ duttɔ verɛ: Ve ɛ zo̧o̧ za̧a̧ nɔ ve hergire ve gbəll zɔʼ ve kɔnn za̧a̧ yɛ nɔ verɛ. 49Yo̧o̧ hɛk si̧ʼtum ba nɔ de daa too ɛnom vin: Go̧o̧ge Zə̧ə̧ an ve yaa ɓɛ̧ɛ̧zinna náa ɓɛɛ vere náa za̧a̧ verɛ 50ka ve gbəll vo vɛɛ aʼre; vey ba̧a̧ vey yəʼzii nuut intuu.»
Hell pəŋŋa vere fə̧ə̧ka
51Yeesu vi kaam an vɛ: «Vo kii hɛn ɛnɔ verɛ tɛʼ ɗaarɛ?» Ve hi̧i̧za: «ə̧ə̧.» 52Yeesu feet vo: «Há̧a̧ it moò buu ak zɔʼ oo bi̧i̧ Gbɛ̧ɛ̧ bɛlba nɔ kaam ani nɔ, o liizinga há̧a̧ ka̧a̧ ak zɔʼ de vuksii hɛn pəŋ vere hɛn fə̧ə̧k o a̧lle nɔm.»
Náa Nazarɛt ve tu̧u̧n Yeesu yɛ
Mar 6:1-6; Luk 4:16-30
53Yeesu fee ka òo si̧t yak bɛmm ɛnɔ vɛ kəzəkɔ, o luu ɛtturɛ 54ɛn o tak kap bɔk o naa tin nɔ oppo#13:54 Kap o naa tin nɔ, toŋ Nazarɛt. Vo to dən 2:23 ver Luk 4:16. . O dii moò oora náa Yuuda o ve lik faa yakke ɛtuu ɛn náa intuu nɔ ve tɛʼ kɔ vo bit. Ve fee: «Hii poʼo hɛn gaa ɛn yɛɛ? Hii poʼo gɔti hɛn yell ɛn vɛ kɔra yɛɛ? 55De ɛn wa̧y dôt tappɔ tân an oy yɛrɛ? Naʼ an paam Maarii yɛrɛ? Zâkki, Zozɛfi, Simɔŋŋi vere Zuudə vɛ ve paam daak an vey yɛrɛ? 56Ɛn da̧a̧kii ve tɛʼ vey kaninna de o ba vo nɛ yɛrɛ? O hak gɔti ɛn ve tɛʼ nɔ anɛ?» 57Moò an oy ve bon Yeesu tu̧u̧u̧ ze. Ɛnɔ Yeesu feet vo: Yɛɛ tɛʼ ve zɛ̌p yaʼyɛɛrɛ, ɛn o kap ɓɔɔrire, vere o eeke nɔ ve hi̧i̧na yɛ.» 58Nazarɛt tuu nɔ Yeesu kaà kɔn hɛn yell ɓooza̧a̧ yɛ, moò náa ve tu̧u̧nɛ nɛy.
Currently Selected:
Matiye 13: dae
Highlight
Copy
Compare
Share
Want to have your highlights saved across all your devices? Sign up or sign in
