Matiye 11
11
Zân batis yaʼ yɛɛ an vey
Luk 7:18-35
1Yeesu po kaam an boʼzoo itto nɔ vɛ ya̧a̧ si̧ʼ kəzəkɔ luu ɛtuurɛ, ka tak izaa náa ve, ka kə òo moò za̧a̧ kap hɛkpa tuu nɔ ve oppo tɛʼ. 2Zân batis kii o lik naʼre tuu vey moo yeesu moò kɔm an nɛy. Ɛnɔ o yaʼ kaam an zɔʼ vɛ 3doò ve viʼi yeesu: «Mɔ kris kaà de yaay nɔ yɔrɛɛ ha̧a̧rɔɔ vi laa ha̧a̧ zɔʼɔre?» 4Yeesu hi̧i̧t vo: «Vo tak ooza zân hɛn ke voy kii nɛy vere hɛn ke voy həra nɛy: 5yə̧ə̧ ve hə̧ nɔtte, náa dɔk ho̧o̧ ve ɛm watte, náa guni akkɔ vɛ po vorɛ, lakkɔ vɛ ve kiirɛ, vɔɔ nɔ vɛ ve ninzi kəy za̧a̧na ɛn ve ooza gim ak vɛ moò za̧a̧rɛ. 6Ha̧a̧ oo ɓəllin si̧i̧ ɛtta ii po yɛ nɔ oy za̧a̧re!» 7Zân kaam an ve luu kə nɔ, Yeesu dii náa ve zân moò an moot voo o fee: «Vo tak to hɛ̧ɛ̧n ho̧o̧tale tuu nɛɛ? Kɔŋ yam bɔk nam mɛyrɛ? Hə̧ə̧ə̧! 8An vo tak hɛn o tol nɛɛ? Ha̧a̧ dɔt sam za̧a̧ akkarɛ? Ɛn náa vey dɔtta sam za̧a̧ nɔ vɛ vey kanna de Gbɛ̧ɛ̧ o pɛkke 9An vo tak hɛn tora təppɔ nɛɛ? Go̧o̧ge yaʼyɛɛ anirɛ? Ɛɛ, mi feet vora o dəə Go̧o̧ge yaʼyɛɛ annɛ. 10Ɛnɔ zân o há̧a̧ dɛptɛl bɔk moo moò an fee: “Go̧o̧ge fee, mii yaʼa fee moò ak min um tinba, do kulsum yanaa.” 11Mii feet vora, de ginu: Há̧a̧ o ve tinzaare nɔ, há̧a̧ zɔʼ o paam kɛŋ dəə zâŋ batis yɛ; ɛnɔ, há̧a̧ o koo dəə Gbɛ̧ɛ̧ yɛɛre bɛlba gaŋŋɔ o dəəna kɛŋ yɔ. 12Bɔk bi̧i̧ vɛl zân batis bɔk de oora moò tin nɔ oppo gbɔ ɓɔllɛ nɛ, náa ka ve dɔ Gbɛ̧ɛ̧re bɛlba ze nɔ təərɛ, náa gɔti ak vey dɔra yɔ. 13Go̧o̧ge yaʼyɛɛ an vɛ tɛʼ vere moyi̧zə moò buu an vɛ bɔk ve fee Go̧o̧ge Gbɛ̧ɛ̧ moò an, ha̧ gbɔ zân batis o vɛl ba. 14Ɛn oo vo ɓa zâŋ o bo Eli bɔk ve fee kaa de ɗɛɛ kəy nɛy nɔ. 15Vo kii za̧a̧za̧a̧ o vo ɛ de kɔrɛ nɛy! 16«Ɛn kay goozin gaa náa munɛ nɛ nɔ vɛ vey hi̧i̧ ve yɛɛ? Ve liizinga vey sam waa vey zɔɔ katin nɔ vɛy, vey gbatsinna wɔɔka: 17“Vi uut vo gɔl naa hɛn na vo kə naa nɛ! Vi bi̧i̧t vo vɔɔ pɛrbɛkka vo kə ba̧a̧ nɛ vin!” 18Ɛnuu, Zâŋ batis o yaay. O lɛnnɛ, o zɔnnɛ, ɛn náa ve fee: “o bo kemmɛte akka!” 19Há̧a̧ tan an yaay, o lɛrɛ kə zɔrɛ, ɛn ve fee: “Vo to wa̧y ɛn de vəʼəra lɛm lɛra vere bum zɔra zaʼ, o náa sɔŋsɔmgɔl vɛ vere náa kɔl hɛn bɛ̧ɛ̧ ak vɛ gbaare voni!” Ɛn Go̧o̧ge moó gaa an de gaana o kɔm ba.»
Kap ve bɔn yeesu tu̧u̧ nɛy
Luk 10:13-15
20Ɛnɔ yeesu dii moò kə̧ə̧zaa kap aʼ bɔk o kɔ hɛn yɔ̧fit an ɓoo dəə tin nɔ vey, moò kap akkɔ vɛ bɔk ve pin kandi von yɛ nɛy. O fee: 21Yɔʼ de zeemaa, kɔrazɛŋ moy! Yɔʼ de zeemaa, Bɛtsayda moy! Ɛnɔ hɛn yɔ̧fit bɔk kɔ o vo tuu nɔ bɔk kaà kɔ Tiir vere Sidɔŋŋɔ, náa kappa tuu nɔ bɔk kaà ve wa̧a̧ de vɔɔ ba̧a̧ka, kaà ve kuu de hu̧u̧k o ve wɔɔkpa kaà ve fill de kandi von ve ma zɛɛ#11:21 Vɔɔ ba̧a̧kɔ vere hu̧u̧k kuu wɔɔkpa nɔ it. 22Moò an oy, mi feet vora, yo̧o̧ moò yȩʼȩ ba nɔ, kap Tiir vere sidɔŋ moò yȩʼe von de poo kaʼrɛ vey vo nɔ gɔ. 23Ɛn mɔy, kap Kapɛrnaûm, mɔy tu̧u̧ nɔ boo gan dɔk bɛlba gaŋ gɔɔrɛrɛ? Ɛn mɔy ɓin zo̧o̧ vɔɔ yɛɛre. Ɛnɔ hɛn yɔ̧fit bɔk kɔ um tuu nɔ bɔk kaà kɔ kap Sodɔmmɔ#11:23 Sodɔɔm vo to Zənɛzə 19:24-28, kap ɛn kaà de munɛ tin kete. 24Moò an oy, mii feet vora, yo̧o̧ moò yȩʼȩ ba nɔ kap Sodɔmmɔ, moò yȩʼȩ an de poo kaʼrɛ vega mɔ nɔ gɔ.»
Vo yaa iipo voy hakka wə̧ə̧rirɛ
Luk 10:21-22
25Yɛɛ bɔk ɛnɔ, Yeesu fee: «Baa, Gbɛ̧ɛ̧ kɛŋ bɛlba vere hɛtte nɔ, mi dɛnzum naak yɛɛ mɔ îza sâm waa ve hɛn mɔ ɗinza náa gaa hɛn vɛ vere náa gaa hɛn ɗəə nɔ vɛ nɛy#11:25 Vo goozin vere 1Kɔ 1:17-29.. 26Ə̧ə̧, Baa, ɛn mɔ hi̧i̧ de yɔ za̧a̧za̧a̧ doò too ɛnɔm. 27«Baa min poy hɛn nɔ ve tɛʼ. Há̧a̧ zɔʼ gaan nɛnɔ Tân nɛy yɛ Baa nɔ gaa yɔ zaʼ, há̧a̧ zɔʼ gaan nɛnɔ Baa nɛy yɛ Tâ nɔ gaa yɔ vere ná̧a̧, Tân nɔ hi̧i̧ ît voo baa nɔ vɛy zaʼ. 28Vo yaa iipo náa vo noo de vey hɛn loksok ganna nɔ vo tɛʼ mii po vora wə̧ə̧rii. 29Mi teen kay buu vorɛ yɛ. Vo sɛw, vo ɓa hɛn mi feet vora nɛy, ɛn kaà vo bi̧i̧ kaam min vey. Too ɛnɔmmɔ voy hakka wə̧ə̧ri von nɛ vin#11:29 Vo goozin Zer 6:16. 30Hɛn mii ya̧a̧ vora vo gan nɔ təən ganinna yɛ ɛn hɛn mi po vora vo gan nɔ hukke derɛ.»
Currently Selected:
Matiye 11: dae
Highlight
Copy
Compare
Share
Want to have your highlights saved across all your devices? Sign up or sign in
