Luka 21
21
Waa kuu ɗeʼsi ak zɔʼ po pori ani
Mar 12:41-44
1Yeesu to nɔt o sɛkpa, hə̧ náa nagate ak ve yaa po pori von vɛ dɛnn po pori Go̧o̧ge ligi nɔ oppo. 2O hə̧ waa kuu ɗeʼsi ak zɔʼ tuu, o sɛw yaa gbəl san yȩȩk wagaa vɛ itto. 3Yeesu fee: «Ɛn mi feet vora, de ginu: Waa kuu ɗeʼsi ak ɛnɔ o gbəl ɗəə náa zɔʼ ve tɛʼ. 4Ɛnɔ náa zɔʼ ve tɛʼ ve ɛ von hel aʼvin, ve ɓɛ̧ɛ̧ kaʼso teet ve po oy; Ɛn waa kuu ɛnɔ, o ɗeʼsire tuu, o iŋ hɛnaa an kaʼso kaà de lɛra nɔ porɛ bisum tɛʼ».
Yeesu fee Go̧o̧ge likkɔ boy tullaa
Mat 24:1-2; Mar 13:1-2
5Náa zɔʼ ve moo Go̧o̧ge likkɔ moò ani bo sɛ̧ɛ̧rɛ kpɛŋ, vere pîn za̧a̧ ve yo̧o̧n nɔ vɛ, vere pori ve po Go̧o̧ge ve soorin likkɔ vɛ. Ɛn ɗaa Yeesu fee: 6«Yo̧o̧ zɔʼ de yaa tuu, pîn zɔʼ daŋga de pəəna ka goʼ daaa zɔʼ o daake yɛ, hɛn voy hə̧ra ɛnɔ ve tɛʼ de tullaa hɛge».
Hɛn de gbɔy doʼ hɛk ka si̧ʼ ze nɛy
Mat 24:3-14; Mar 13:3-13
7Ɛnɔ ve vi Yeesu: «Wa̧y it hɛn, hɛn ɛnɔ de daa yɛttugɛ? Hɛ̧ɛ̧n de yaa itta gɔɔ ka vi gaa hɛn ɛnɔ vɛ, boy gbɔyyaarɛ ze nɔ nɛ?» 8Yeesu hi̧i̧t vo: «Vo laa wɔɔk vonnɛ, gaa náa ka ve yaa sɔɔ vora sɛ. Náa ve duʼza̧a̧ vey yaay vere nii mini, vey yaa fee: “Mi Kiris yɔ!” Ɛn “yɛɛ lii ma!” Ɛn vo òo vo sɛ. 9Oò vo kii vey moò see moǒ vere kɔtɔke nɔ vɛy nɔ, doo do kɔ vo sɛ; Hɛn ɛnɔ vɛ do gbɔy doʼ, Ɛn ɗaa hɛkkɔ de si̧ʼi̧na ɛtuu ɓɔllɛ yɛ». 10Yeesu kə feet vo: «Zik zɔʼ de wa̧a̧ringaa zik zɔʼɔ, gbɛ̧ɛ̧ daŋ zɔʼ de taksingaa see vere gbɛ̧ɛ̧ daŋ zɔʼɔ; 11Hɛt de nammaa aʼvin, hɛk yɛɛ kətkət, gɔ̧llɔ vɛ vere ho̧o̧ ɓɛɛ ɗaazinna nɔ vɛ; Hɛn yel po doo nɔ vɛ sɛw vere hɛn to̧o̧ si̧i̧ nɔ vɛ de hənii bɛltiiba. 12Hɛn ɛnɔ ve tɛʼ ka gbɔy ze nɔ, vey so voraa, vey ɗeʼen voraa, vey pan vora náa Yuuda o ve lik faa yakke doo ve yȩʼ vorɛ, vey kə yaʼ vora lik naʼre; vey pan vora gbɛ̧ɛ̧ nɔ vɛ vere gɔmna kɛŋŋɔ vɛ o ve timba ii moòre. 13Hɛn ɛnɔ ve tɛʼ de po vora yana moò min səksinaa. 14Vo so o vo si̧i̧ba za̧a̧za̧a̧, gaa doo ka yaa kɔ vora ka voy ɓəəzii moò vəʼəra tinba gɔɔ, vii kɔra tuubɔgɛ ka vi yaŋŋin wɔɔk vin ze nɛy sɛ. 15Ɛnuu, mii po vora yak moot vere moò gaa yɔ vin, ɛn za̧a̧k von vey diina o vo timba yɛ ongɛɛ vey moona kət yɛ vey baʼnin vo yak yɛ vin. 16Baa von vɛ, naʼa von vɛ, vere daak von vɛ, kɛŋ von vɛ, vere gbaare von vɛ vey he vora yɔ; Vey kə vɔtta náa zɔʼ ve ɓooza̧a̧ o vo tiŋza̧a̧re. 17Náa ve tɛʼ vey ɓɛɛ vora ii moòre. 18Ɛn ɗaa wɔɔk hu̧u̧ daŋga o vo wɔɔkpa tinnɛ. 19Vo dii za̧a̧za̧a̧: Too ɛnɔm voy sɔ̌tta za̧a̧n von ze».
Yeesu de fee zeruzalɛm de yaa tulla hɛge nɛy
Mat 24:15-21; Mar 13:14-19
20«Oò vo hə̧ wa̧a̧ vɛɛ nɔ òo ve yaa kək Zeruzalɛm ma nɔ, voy gaarɛ yɛɛ bo lii ma, an kaʼso Zeruzalɛm boy tullaarɛ. 21Ɛnɔ, náa hɛk Yuuda do ve at dɔk gbɔkke; Náa vey kanna zeruzalɛmmɔ do ve vuk yəərɛ, náa ke ve kan de kap waare nɔ vɛ do ve kəy kap aʼre sɛ. 22Ɛnɔ de bi̧i̧ yo̧o̧ yȩʼ moǒ, hɛn Dɛptɛl fee nɔ de kura oppo. 23Hɛ̧ɛ̧n yɔʼɔn yo̧o̧ ɛn oppo nɔ nɛɛ, kep pə̧ə̧ri nɔ vɛ vere zȩya̧ nɔ vɛ, vey gaara gimma kpɛŋ! Ɛn náa hɛk ɛnɔ oppo nɔ vɛ, vey gaa gimma, Go̧o̧ge si̧i̧ zat an de yaa zik ɛnɔ oppo. 24Vey vɔzin voo vere pak bindɛlla, vey pan voo too gbay vin zik zɔʼ ve òo ve tiŋza̧a̧re. Náa gaan Go̧o̧ge yɛ nɔ vey ɗa̧ʼgi zeruzalɛm dɔʼi de gbɔra bol ve gət vo nɔ doò si̧ʼ doʼ».
Ha̧a̧ tan an de yaay
Mat 24:29-31; Mar 13:24-27
25«Hɛn yel vey hənii yo̧o̧ nɔ oppo, sȩȩ nɔ oppo vere sȩȩ waa nɔ o ve po. Hɛtte tɛɛ nɔ, náa doo de kɔ voo kpɛŋ, òo ve kii maam de sasinna lɛge de hɛŋzinna nɔ gɔ. 26Náa vey vɔnna vere doǒ vey vəʼəra hɛn kaà de yaay hɛkpa tɛʼ nɛy, ɛnɔ gɔti bɛltii ba nɔ vɛʼ de nammaa. 27Ɛnuu, vey hə̧ra ha̧a̧ tan an de yaay ku̧ʼre, vere gɔtii yəəm za̧a̧, vere Gbəəm an daŋ. 28Hɛn ɛnɔ vɛ, òo ve bi̧i̧ yaay ma nɔ, vo dii za̧a̧za̧a̧, vo luuzi wɔɔk von bɛlba, ɛnɔ vo san bulla ma».
Hɛn goozinna vere yemma
Mat 24:32-35; Mar 13:28-31
29Pik an Yeesu feet vo moò bɛmm nɛʼi̧: «Vo to yemma vere tap zɔʼ ve tɛʼ: 30Oò vo hə̧ ve sa wat ma nɔ, ɛn vo gaarɛ veek san ma. 31De too ɛnɔm vin, òo vo hə̧ hɛn ɛnɔ vɛ òo ve gbɔy ma nɔ, voy gaa gəl Go̧o̧ge Gbɛ̧ɛ̧ an bo sani ma. 32Mi feet vora, de ginu: Náa ɓɔllɛ nɛnɔ vey vɔ si̧ʼna tɛʼ do hɛn ɛnɔ vɛ sɛw tɛʼ ka ve daa ze yɛ. 33Bɛlti̧i̧ vere hɛt daŋ vey tɛkkaa, ɛn yak moot min vey tɛgin yɛ ɓim».
Hɛn sȩȩ wɔɔk laaa
34«Vo laa wɔɔk vonnɛ! Gaa si̧i̧ von do sɔ niŋŋa lɛmba ongɛɛ gɛɛ bum zɔllaa, vere hɛn nɔt von de hə̧ra hɛkpa nɔ vɛ vəʼəra oy sɛ, oò ɛŋgɔ nɔ, yo̧o̧ yȩʼ moò de yaa dumm voraa zuksiʼ, 35Too yaam de gba̧ʼra dut ve maàme nɔm; Yo̧o̧ yȩʼ moò de yaa gba̧ʼra náa vey kanna hɛkpa tɛɛ nɔ ve bisum tɛʼ too ɛnɔm vin. 36Vo nə sɛ, vo kan yak faara tuŋ; ka vo hak gɔti baʼana yɔʼ de yaagi voyy tɛʼ nɔ ve ze, ka vo dii bɛlba há̧a̧ tân an o timba ze». 37Yo̧o̧re nɔ Yeesu òo moò Go̧o̧ge ligi; Mim yak òo kɔ nɔ, o dɔk nə gbɔk waa ve yaa bo gbɔk oliviyee nɔ oppo. 38Ɛn náa ve tɛʼ ve yaa Go̧o̧ge ligi yɔŋgay nɔmpo ka ve kii moò Yeesu de oora nɛy.
Currently Selected:
Luka 21: dae
Highlight
Copy
Compare
Share
Want to have your highlights saved across all your devices? Sign up or sign in
