Luka 12
12
Yeesu feeza kaam an vɛ doo ve yəəzin vere yak yuurɛ
Mat 10:26-27
1Yɛɛ bɔk ɛnɔ, náa duʼ ve yəəmza̧a̧, ve sɔŋ sȩʼzin Yeesu o hɛge, hii yɛɛ ɛm daaa o dɔʼba, dɔʼba. Yeesu bi̧i̧ mooza kaam an vey kere feet vo: «Vo laa wɔɔk von vere náa Farize vɛ waak von nɔrɛ, feeri an yak yuǔ. 2Hɛn kan de yɛɛ ɗindire nɔ ve tɛʼ de hənaa, hɛn goomɔ o ve tɛʼ de gaanaa. 3Moò an oy hɛn voy fee visamme nɔ ve tɛʼ de yaa kinna yo̧o̧re nɔrɛ, hɛn voy moó laame kɔʼba ligi vo toʼ leppɔ tin nɔ, de kinna dɔkka ka̧a̧ wɔɔkpa gaŋ».
Ha̧a̧ kaa vo waaa doorɛ nɛy
Mat 10:28-31
4«Mi feeza vorɛ, gbaare min voy: Vo waa doo náa vey vɔtta fo̧ǒ̧ zaʼ nɔ ve sɛ, ɛn pig an ve gaan hɛn zɔʼ kɔnna ɓɛ yɛ. 5Mii it vora ha̧a̧ o lii kaa vo waaa doo nɔrɛ: Vo waa Go̧o̧ge doo oy, o ɛ gɔti vɔt vora, kaa kə gbəl vo vɛɛ va̧a̧re yɔ. ƐʼƐ, mii feet vora, o lii kaa vo waa doo oy! 6“Kaa ve fa̧a̧n zaw ve saa kaa ve magin vo vere san waa itto yɛrɛ? Go̧o̧ge zanin zɔʼ daŋga yɛ.” 7Ɛn wɔɔk hu̧u̧ von sɛw tɛʼ o waʼ derɛ daŋga, daŋga. Doo do kɔ vo sɛ: vo sȩȩ ɗəə zaw duʼ verɛ!»
Yeesu moò an səkkaa ongɛɛ paʼaa náa o ve timba
Mat 10:32-33; 12:32; 10:19-20
8«Mii feet voraa ɓɛʼ: Ha̧a̧ oò fee náa o ve timba tɛʼ, boo kaam mini, ɛn ha̧a̧ tan an sɛw, de fee Go̧o̧ge zə̧ə̧ an o ve timbarɛ vin bo o ha̧a̧ voni; 9Ɛn ha̧a̧ oò fee náa o ve tinba sɛɛɛ boo gaani yɛ, ha̧a̧ tan an sɛw de fee Go̧o̧ge zə̧ə̧ an o ve timba boo gaana yɛ vin. 10Ɛn ha̧a̧ oò moò yak ɓɛɛ ha̧a̧ tan an oppo, Go̧o̧ge de hoozaa moò ɓɛɛ an ɛn nɛ; Ɛn oò zɛɛ Go̧o̧ge fəəm ani dɔmmɔ, moò ɓɛɛ an ɛnɔ ve hoozin yɛ». 11«Oò ve pan vora ka ve yȩʼ vo, náa yuuda o ve lik faa yakke, oò gbɛ̧ɛ̧ o ve timba, oò naa yȩʼ moò o ve timba, gaa si̧i̧ do duu vo gɔɔ, ka vi moò tuu bɔgɛ, ka vi sɔ ze nɛy sɛ, 12Ɛnɔ yo̧o̧ tan ɛnɔ oppo nɔ, fəəm dȩȩt de feet vora hɛn ka vo fee nɔ yɔ».
Moò bɛmm, nagate gippa akka
13Ha̧a̧ zɔʼ duʼ tiŋza̧a̧re tuu feeza Yeesu: «Wa̧y it hɛn, mɔ feeza daay do ɓɛ̧ɛ̧zin vey mi hɛn ba̧a̧n Baa vin bɔk ɛt vi nɛy». 14Yeesu hi̧i̧za: «Gbaare min, hii wəy gɔɔ dooy yȩʼ moò voni, ongɛɛ hel von vɛ ɓɛ̧ɛ̧zin vora yɛɛ?» 15Pig an Yeesu feeza náa ve bisum tɛʼ: «Vo laa wɔɔk von vere si̧i̧ ɛtta hel ba nɔrɛ! Ɛnɔ ha̧a̧ za̧a̧n an kann moò hella yɛ, ha̧a̧ kaa nak yəəmza̧a̧ si̧ʼ nɔ gɔ». 16Ɛn Yeesu oot vo moò bɛmm nɛʼi̧: «Wa̧y nagate ak zɔʼ ɛ haŋ an o baa hak lɛm aʼvin. 17O vəʼə o si̧i̧ ba kə fee: “Hɛn ɛnɔ mii kɔra tuubɔgɛ? Mi ɛn yɛɛ kay sɔŋ lɛm min ve tɛʼ tin yɛ nɛy.” 18Pig an o fee: “Ɛ̧ɛ̧nɔ, mi gaa hɛn mii kɔra nɔ ma: Mii gballa a̧ll min nɔ ve hɛge, mii yo̧o̧ kəra zɔʼ vey naa ɗəəra ɛnɔ verɛ, mii sɔŋŋa bəle#12:18 Bəle; Faraŋsɛ ya̧a̧ bo Blé: Hɛ̧ɛ̧n de too toot vin ve baa han sɛw. min vere hɛn za̧a̧ min zɔʼ ve intuu. 19Ɛn mii kə fee ii yɔm baa: Wa̧yi̧ min, mɔ ɛ hɛn ɓoo de aʼvin derɛ, vɛll ɓooza̧a̧, mɔ wə̧ə̧rɛ, mɔ lɛrɛ, mɔ zɔrɛ, mɔ bɛl um za̧a̧nerɛ.” 20Ɛn Go̧o̧ge feeza: “Wa̧y gippa ak ɛn mɔy! Vi̧i̧ munɛ mii iŋŋa za̧a̧n mɔn nɛ. Hɛn mɔ sɔŋ ɛn ve tɛ ʼ nɔ de bi̧i̧ hii an yɛɛ?”» 21Yeesu kə ka̧ʼ ɓɛʼ: «De too ɛnɔm vin ha̧a̧ oò sɔŋ hel anaǎ, oò nagin Go̧o̧ge oppo yɛ o liizinga wa̧y ɛnɛy».
Si̧i̧ ɛtta Go̧o̧ge oppo
Mat 6:25-34
22Yeesu kə feeza kaam an vɛ: «Moò an oy mii feet vora: Si̧i̧ do duu vo moò lɛm vo hi̧i̧ lɛra ka vo za̧a̧n nɔ vɛ sɛ, onn vere sam vo hi̧i̧ ka vo dɔt o vo fɔn nɔ ve sɛ. 23Ɛnɔ za̧a̧n sȩȩ ɗəə lɛmmɛ, fo̧o̧ sȩȩ ɗəə sammɛ. 24Vo to ga̧a̧ri nɔ vey: Ve ban hɛn yɛ, ve sɔŋŋin lɛm yɛ, ve ɛn yɛɛ kɛɛ lɛm yɛ, ve ɛn a̧ll yɛ vin, ɛn Go̧o̧ge de yaa voo yɔ! Vo sȩȩ ɗəə nookɔ verɛ aʼvin! 25Hii o vo tiŋza̧a̧re tuu kaa bit za̧a̧n an kaʼso vere moò vəʼəra ɛnɔ oppo yɛɛ? 26Oò vo lɔn hɛn zɔʼ kɔnna kaʼaso maaki yɛ nɔ, si̧i̧ duu vo hɛn pəətummɔ vɛ oppo kɔnna nɛɛ? 27Vo to ho̧o̧t guttɔ vɛy, ve kɔn kɔm yɛ, ve tȩȩn sam yɛ vin. Ɛn mii feet vora, gbɛ̧ɛ̧ Salmɔŋ sɛw, vere hel an yəəm ɛnɔ vɛ tɛʼ, o dɔzin sam za̧a̧ sȩȩ too ho̧o̧t vin yɛ. 28Go̧o̧ge de dɔzaa ho̧o̧t ho̧o̧te ɛn vɛ sâm too ɛnɔm munɛ ɛn yɔŋgɔ nɔ gbəl vo vɛre: Ɛnɔ Go̧o̧ge kaa dɔzin vo sâm ɗəən nɛrɛ! Náa vo ɛzin si̧i̧ Go̧o̧ge oppo yɛ ɛnɔ voy! 29Gaa vo sɛn moò tu̧u̧ teera gɔɔ Hɛ̧ɛ̧n vii lɛra nɛɛ, vii zɔra nɛɛ sɛ. 30Náa gaan Go̧o̧ge yɛ hɛkpa tɛɛ nɔ ve gbəʼən teera hɛn ɛn ve yɛ yɔ. Von vo ɛ Baarɛ, o gaa hɛn vo hi̧i̧ nɔrɛ. 31Vo teee Go̧o̧ge Gbɛ̧ɛ̧ an tiyɔ ɛn Go̧o̧ge de po vora hɛn pəətummɔ verɛ sɛw tɛʼ».
Mɔ sɔŋ hel mɔn vɛ Go̧o̧ge o naʼa
Mat 6:19-21
32«Doo do kɔ vo sɛ, náa min kaʼso waa ɛn voy vo ɓoonɛ! Ɛnɔ Baa von sȩȩza po vora Gbɛ̧ɛ̧̌. 33Vo mak hɛn von vɛ vo kə po hel waa nɔ gim akkɔ vey. Voy hakka hel saʼa ha̧ vɛllla#12:33 Hel saʼa ha̧ vɛllla; Feeri an: Za̧a̧n ha̧ vɛll Go̧o̧ge oppo. , voy sɔŋŋa hel von vɛ intuu bɛlba gaŋ, Yɛɛ hel kaà tǐn tin yɛ nɔ oppo: Yuu kaa so̧o̧n nɛ, maa muʼzi kaa munɛ. 34Ɛn yɛɛ hel von kan de tin nɔ, si̧i̧ von de kanna oppo vin sɛw».
Naa kɔm ak za̧a̧ nɔt vey
35«Vo kan vere kɔm sam von vɛ fɔn vere kanda sȩȩge tin, vo ko lalap von nɛ. 36Vo bi̧i̧ too náa kɔm ak zɔʼ vey laa kɛŋ von de ɗɛɛ kəy ɓasin yɛɛre nɔm, oò gbɔy ya̧a̧t vo yɛɛ ma nɔ, ka ve kulsa pek leppɔrɛ. 37Náa kɔm akkɔ ɛn vey za̧a̧re, kɛŋ von oò gbɔy zee vo nɔtta nɛy! Mii feet vora de moò za̧ǎ̧ ginu: Kɛŋ von nɔ de tara kanda an sȩȩge, de zɔɔ voo yɛɛ lɛ lɛm ba, ka po vo lɛmma. 38Oò ɗɛɛ kəy yɔɔkpa, ongɛɛ yɛɛ hamba tɛɛ, oò yaa zee vo nɔtta nɔ, mii feet vora kɔm akkɔ vey za̧a̧re. 39«Vo kii moò nɛnɔ za̧a̧za̧a̧: Ha̧a̧ ka̧a̧ akkɔ kaa gaa, yo̧o̧ tan yuu de yaa tin nɔrɛ nɔ, kaa ɛn yuu nɔ doo dɔ o kaa yɛ. 40Vo sɛw, vo gakkɛ, ɛn vo gaan yo̧o̧ ha̧a̧ tan an de yaa tin nɔ yɛ».
Há̧a̧ kɔ kɔm vere si̧i̧ daŋga vere ha̧a̧ kɔn kɔm za̧a̧ yɛ
Mat 24:45-51
41Ɛnɔ Piyɛr vi Yeesu: «Gbɛ̧ɛ̧ kɛŋ, moò bɛmm ɛnɔ mɔ moozaa de vii zaʼrɛɛ, ha̧a̧ ve sɛw tɛʼrɛ?» 42Gbɛ̧ɛ̧ kɛŋ hi̧i̧za: «Ha̧a̧ kɔ kɔm ak vere si̧i̧ daŋga gaa moò nɔ de hii yɛɛ? Ɛn de ha̧a̧, kɛŋ an ɛʼɛ doo laat vo ka̧a̧ voni yɛɛ oò lii lɛm lɛra nɔ doo po kɔm akkɔ ve lɛmma nɛy. 43Kɔm ak ɛnɔ oy za̧a̧re, kɛŋ an oò ɗɛɛ kəy zeee de kɔra kɔmmɔ tin nɔ gɔ. 44Mi feet vora de moò za̧ǎ̧ ginu: Kɛŋ an nɔ de ɛzaa hel an ve tɛʼ. 45Ɛn ha̧a̧ kɔm akkɔ oò vəʼə o si̧i̧ba: “Kɛŋ min de kəni ɓɔllɛ yɛ”, oò pɛ kɔm akkɔ vɛ wa̧a̧zi voo, wa̧ppɔ vɛ, vere keppɔ vɛ sɛw tɛʼ, o kə dɔ lɛm lɛraa, bum zɔllaa, kə vɔnaa. 46Kɛŋ an de ɗɛɛ kəy yo̧o̧n o laana yɛ nɔ oppo, yo̧o̧ tan o gaanɛ tin nɔ oppo. De nɛn yəəna doo tak kanga vere náa kɔl hɛn ɓɛɛ vey. 47Kɔm ak oò gaa hɛn kɛŋ an hi̧i̧ nɔrɛ za̧a̧za̧a̧, oò kɔnnɛ ze nɔ, vey wa̧a̧a̧ aʼvin. 48Kɔm ak oò gaan hɛn kɛŋ an hi̧i̧ nɔ yɛ, oò kɔ hɛn lii kaa ve wa̧a̧rɛ nɛy, vey wa̧a̧naa aʼvin yɛ; Ha̧a̧ oò ve poʼo hɛn aʼvin, vey viʼi aʼvin, Ha̧a̧ ve ɛza hɛn aʼvin nɔ, vey viʼi zɔʼ de ɗəəraa».
Yeesu, o to̧o̧k ɓɛ̧ɛ̧zin yɔ
Mat 10:34-36
49«Mi yaay kay gbəl vɛɛ hɛkpa ɛn mi hi̧i̧ do korɛ maa! 50Kay hak Batɛma, de nənira derɛ nɔ mii laa kaa kɔ nɔm. 51Voy vəʼəra, mi yaay de hɛkpa nɛnɔ, ka boy pani de sosinna sɛ, paam ɛŋgɔ yɛ, mii feet vora, náa vey ɓɛ̧ɛ̧zina ii moòre te. 52Ɛnɔ bi̧i̧ de ɓɔllɛ nɛ, ha̧a̧ ve saa ka̧a̧ da̧a̧ nɔ oppo vey ɓɛ̧ɛ̧zinaa, ta̧a̧to nɔ vey kiizingaa itto nɔ ve yɛ, itto nɔ vey kiizingaa ta̧a̧to nɔ ve yɛ. 53Tan baʼ de kiizingaa tan wa̧p an yɛ, tan wa̧ppɔ de kiizingaa baʼan yɛ vin, tan naʼ de kiizingaa tan kep an yɛ, tan kep de kiizingaa naʼan yɛ, a̧k kep de kiizingaa ak an yɛ, ak an nɔ de kiizingaa ak an yɛ vin».
Gaa səksinna hɛn de itta bollɔ vey
Mat 16:2-3
54Yeesu feeza naa duʼ nɔ vɛ sɛw: «Oò vo həy zà̧á̧za̧á̧ yo̧o̧ tunnare, voy fee ɓɔllɛ nɛ “maam boy naŋŋaa”, ɛn naŋŋɛ ginu. 55Oò vo hə yam duni sɛk gaŋgɔɔ nɔ oppo, voy fee “yɛɛ boy piraa”, ɛn pirɛ ginu. 56Náa yak yuu vɛ! Vo gaa səksinna hɛn de daa hɛtte tɛɛ vere bɛlba nɔ verɛ ɗaaʼ; Hɛ̧ɛ̧n kɔ, vo gaan səksinna hɛn de daa yɛɛ ɓɔllɛ nɛnɔ oppo yɛ nɔ moò nɛɛ?»
Vo tee kiizin voga zammi
Mat 5:25-26
57«Hɛ̧ɛ̧n kɔ vo yȩʼȩn wɔɔk von, hɛn lii kaa vo kɔ nɔ yɛ nɔ, moò nɛɛ? 58Oò mɔ ɛ de moò vere ha̧a̧rɛ oò vo luuzin daŋ voy taksina yɛɛ yȩʼ moòre, mɔ yoon mɔ kiizinga voy yanaa kere nɔ oppo. Ɛn mɔ pekkɛ ka yaa gbɔ tuu ka pom yȩʼ moò ak o naʼa, yȩʼ moò akkɔ ka yaa pom wa̧a̧ vɛɛ o naʼa, wa̧a̧ vɛɛ nɔ ka yaa dɔzum lik naʼre sɛ. 59Mii feezumma de ginu: mɔy vuginna intuu yɛ, oò mɔ togin ɓɔllɔ oò siʼ̧in tɛʼ doʼ yɛ nɔ gɔ».
Currently Selected:
Luka 12: dae
Highlight
Copy
Compare
Share
Want to have your highlights saved across all your devices? Sign up or sign in
