Luka 11
11
Yeesu iza kaam an ve yak faara
Mt 6:9-13; 7:7-11
1Yo̧o̧ zɔʼ Yeesu de faara yak yɛɛ zɔʼba. O si̧t kəzəkɔ, kaam an zɔʼ daŋga feeza: «Gbɛ̧ɛ̧ kɛŋ, mɔ it vi yak faara nɔ dɔm, too zâŋ bɔk iza kaam an ve nɔm». 2Yeesu feet vo: «Oò voy faara yakkɔ vo fee: “Baa Go̧o̧ge vin, mɔ kɔ ha̧a̧ ve tɛʼ kaa ve gaa bom Go̧o̧ge dȩȩt yɔ; Kaam buu yɛɛ hɛkpa tɛʼ yɔ. 3Yo̧o̧ tuŋ kaam po vi lɛm za̧a̧ vi hi̧i̧ nɛy. 4Kaam hoozi vi ɓɛɛ vin vɛ too vii hoozaa naa vey kɔ vira ɓɛɛ nɔm. Mɔ ɛ vi ka vi yaa wanna hɛn gootumme sɛ.”» 5Yeesu kə feet vo ɓɛʼ: «Too hɛn goozinna vin: Ha̧a̧ daŋga o vo tiŋza̧a̧re oò tak zee gbaare an vinni yɔɔkpa, ka feeza: “Gbaare min, mɔ poy nan ki̧ll ta̧a̧to. 6Gbaare min zɔʼ daŋga key gbɔy gayre ɓɔllɛ mi ɛ̂n lɛm kay poʼo ka lɛ nɔ yɛ.” 7Too hɛn goozinna vin, gbaare an ligi tuu nɔ hi̧i̧za: “Mɔ goli yɛɛ sɛ! Vi toʼ pek lep vi samma, viga sâm min ve daŋ vire nəmme maa; Kaay luun kay pom nan ko̧o̧ta ɓɛyɛ.” 8Mii feet voraa ginuʼ, oò luu ponaa moò vega gbaaree nɛy yɛ si̧ʼ nɔ, de poʼoo hɛn hi̧i̧ nɔ, moò de gbazaa wɔɔk hən nəm yɛ nɛy. 9Ɛn mii mi feet vora: Vo haarɛ voy hakkaa; Vo teerɛ voy zee; Vo ya̧a̧ yɛɛrɛ vey kǔl vora pek leppɔrɛ. 10Ha̧a̧ oò haarɛ hakkɛ, ha̧a̧ oò teerɛ nɔ zeerɛ, ha̧a̧ oò ya̧a̧ yɛɛ pek leppa vey kulsaa. 11Ha̧a̧ daŋga o vo tiŋza̧a̧re oò o baǎ, tan an oò haaa dutta nɔ poʼo bekkarɛ? 12Ongɛɛ oò haaa nɔɔk ba̧ʼa̧ nɔ poʼo nɛkkarɛ? 13Naa ɓɛɛ voy si̧ʼ, vo gaa sam von vɛ hɛn za̧a̧ po voorɛ, voy tu̧u̧ nɔ, Baa von oy bɛlba nɔ kaa pon fəəm dȩȩt an naa vey haaa nɔ ve yɛrɛ?»
Yeesu nɛn fəəm ɓɛɛ nɔ vey
Mat 12:22-30; Mar 3:22-27
14Yeesu nɛn fəəm ɓɛɛ, bɔk de fitta wa̧y zɔʼ munna. Fəəm ɓɛɛ nɔ fee ka vuk kəzəkkɔ, wa̧y mun akkɔ bi̧i̧ yak moò duʼre tuu, náa ve kɔ vo bit. 15Ɛn oppo nɔ, náa zɔʼ ve fee: «Beʼɛlzɛbul#11:15 Beʼɛlzɛbul: Gap hɔ̧zɔkkɔ vɛ, ongɛɛ (fəəm ɓɛɛ nɔ vɛ) gbɛ̧ɛ̧ von nii ani Mt 10: 25. , fəəm ɓɛɛ nɔ vɛ kɛŋ von bo po Yeesu gɔti fəəm ɓɛɛ nɔ vɛ nɛnina yɔ!» 16Náa zɔʼ ve toʼza Yeesu wəkka: Ve feeza doo kɔt vo hɛn yella, ka bo ba gaa Go̧o̧ge bo yaʼay yɔ ginu ze. 17Yeesu gaa moò vəʼəra von nɛ; O feet vo: «Náa vey kanna kap gbɛ̧ɛ̧ yɛɛ daŋga nɔ vɛ, oò ve kɔsin see oò ve yɛɛ ba nɔ, gbɛ̧ɛ̧ von nɔ turɛ, ka̧a̧ nɔ ve tulsin daa o ve fɔn. 18Sɛɛɗan oò kɔsinga see vere fo̧o̧ ani vin nɔ, gbɛ̧ɛ̧ an nɔ de dii tuubɔgɛ? Vo fee, boy nɛnna fəəm ɓɛɛ nɔ vɛ nɔ, Beʼɛlzɛbul bo poy gɔti yɔ nɛy. 19Min ooy nɛnna fəəm ɓɛɛ nɔ vɛ vere Beʼɛlzɛbul gɔti ani nɔ, von sâm von vey nɛnina vere hii gɔti an yɛɛ? Moò an oy, náa von ɛn vey, vin, ve yaa kə̧ə̧t vora moò yɔ. 20Moò za̧ǎ̧, mii nɛnna fəəm ɓɛɛ nɔ vɛ vere Go̧o̧ge gɔti ani, Too ɛnɔmmɔ de itta Go̧o̧ge Gbɛ̧ɛ̧ an bo yaay o vo po ma». 21«Ha̧a̧ gɔti ak oò gak see hɛn an vɛ za̧a̧za̧a̧ oò laa ka̧a̧ an nɛ nɔ, hɛn an ve tɛʼ de kanna za̧a̧re. 22Ɛn ɗaa ha̧a̧ gɔti ak ɗəəsi wɔɔk zɔʼ oò gbɔgay nɔ de baʼaa, de fatta see hɛn an bɔk de ɛ̌tta si̧i̧ an tin nɔrɛ kə yə̧ʼ hɛn ke fattɔ verɛ tɛʼ. 23«Ha̧a̧ oò paam vega mi yɛ nɔ, o za̧a̧k mini; Ha̧a̧ oò maʼzinni sɔŋinna yɛ nɔ, oy wɛksii».
Fəəm ɓɛɛ nɔ ɗɛɛ kəyrɛ
Mat 12:43-45
24«Ɛnɔ fəəm ɓɛɛ oò vuk ha̧a̧ oppo, oò tak kəli yɛɛ dɛmm ɔŋŋɔ vɛ oppo ka teee yɛɛ zɔɔri, oò hagin yɛ nɔ, de fee: “Mii ɗɛɛ kəra ka̧a̧ min bɔk mi vuk ɛ̂y nɔ oppo.” 25Oò fee ka ɗɛɛ kəy nɔ, de hə̧ra ha̧a̧ nɔ too ka̧a̧ zɔʼ ve zeerɛ dȩȩt za̧a̧, ve kə sɛga za̧a̧za̧a̧ nɔm. 26Ɛnuu de luu tak panii fəəm ɓɛɛ ve gutambe, ve ɗəəna hɛn ɓɛɛ kɔllarɛ; Ve ɗɛɛ kəy ve kan ka̧a̧ nɔ oppo daŋ. Pig an, wa̧y nɔ de gaa gim ɗəəra bɔk tinba nɔrɛ».
Náa vey kii Go̧o̧ge moò an nɔ, vey za̧a̧re!
27Yeesu ke moò ɛnɔ kəzəkɔ, waà kep zɔʼ bɔk duʼ tiŋza̧a̧re tuu, o gan wɛl aʼvin feeza: «Waà kep bɔk vuksummi hɛkpa, o pom va̧a̧ an mɔ a̧a̧ nɔ oy za̧a̧re!» 28Ɛn ɗaa, Yeesu hi̧i̧: «kaam fee: “Náa vey kii Go̧o̧ge yak moot an, ve ɓa wɔɔka za̧a̧za̧a̧ nɔ vey za̧a̧re yɔ te yɛɛ!”»
Náa ve haa Yeesu doo kɔt vo hɛn yella
Mat 12:38-42
29Náa ve duʼza̧a̧ ve sɔŋŋi Yeesu o sɛkpa, o feet vo: «Náa ɓɔllɛ nɛ nɔ ve ɓɛɛ̌; Vey haara hɛn yella, ɛnɔ hɛn itta zɔʼ de hənina o ve timba yɛ, ɛn Zonas an nɛy zaʼ. 30Too Zonas bɔk o hɛn yel náa kap Ninivə o ve po nɔm, too ɛnɔm vin, ha̧a̧ tan an de bi̧i̧zaa náa ɓɔllɛ nɛnɔ vɛ hɛn yel voni. 31Yo̧o̧ moò yȩʼȩba nɔ, Gbɛ̧ɛ̧ kep zɔʼ de luuy sɛk gaŋgɔɔ#11:31 Sɛk gaŋgɔɔ: Yak faraŋse ya̧a̧ bo Sud. de dii bɛlba náa ɓɔllɛ nɛ o ve timba, de kə̧ə̧t voo moǒ, ɛnɔ o luuy hɛk yɛɛ yəəte ka yaa kii Salɔmɔŋ yak moot an hiʼ vere kɛmmɛy. Ha̧a̧ ɗəə Salomɔŋŋo oy nɛ! 32Yo̧o̧ moò yȩʼȩba nɔ, náa kap Ninivə vɛ, vey luu dii náa ɓɔllɛ nɛnɔ o ve timba vey kə̧ə̧t voo moǒ, ɛn náa kap Ninivə bɔk ve kii Zonas oot vo Go̧o̧ge moò an nɔ, ve fil si̧i̧ von verɛ. Ha̧a̧ ɗəə zonasɔ oy nɛ!»
Kandi Yɛɛ dȩȩte
Mat 5:15; 6:22-23
33«Ha̧a̧ kaa kon lalap ɗinin yɛ, kaa zuʼun dəəge yɛ vin, on za̧ǎ̧ nɔ, de goʼo dɔm ba te, náa oò vey dɔra ligi tuu nɔ, do ve hə̧ yɛɛ dȩȩt an nɔrɛ. 34Nɔt mɔn vey de lalap um fɔnn yɔ: Nɔt mɔn vɛ oò vey hə̧ra za̧a̧za̧a̧ nɔ, fo̧o̧ mɔn tɛʼ de yɛɛ dȩȩte vin sɛw; Nɔt mɔn vɛ oò ve hən ɓɛ yɛ nɔ, ɛn fo̧o̧ mɔn sɛw tɛʼ de visamme. 35Ɛn mɔ laa, yɛɛ dȩȩt de umpo nɔ za̧a̧za̧a̧, ka yaa bi̧i̧ visam sɛ. 36Fo̧o̧ mɔn tɛʼ oò dȩȩ derɛ, sɛk zɔʼ oò paam visamme yɛ, ɛnɔ fo̧o̧ mɔn tɛʼ de yɛɛ dȩȩte, too lalap de dȩȩzinna umpo nɔm».
Yeesu kə̧ə̧za náa Farize vɛ, vere náa it Mɔyi̧zə moò buu an nɔ vɛ moǒ
Mat 23:1-36; Mat 12:38-40
37Yeesu moò si̧t kəzəkkɔ, wa̧y Faarize zɔʼ ya̧a̧a̧ ka bo ve tak lɛga lɛm o vo kàa. Yeesu dɔ tak wa̧y nɔ o kàa zɔɔ de lɛra lɛmmɛy. 38Wa̧y Faarize nɔ hə̧ Yeesu bi̧i̧ lɛm lɛra əllin naak yɛ nɔ kɔʼɔ bit. 39Gbɛ̧ɛ̧ Kɛŋ feeza: “Náa Faarize voy, voy ha̧tta mak pikkɔ vɛ vere beleŋke pikkɔ vɛy zaʼ, o vo pə̧ə̧re nɔ vo hi̧i̧ de yuu iŋŋaa vere hɛn ɓɛɛ ve kɔlla oy.” 40Náa yak yuu ɛn voy! Go̧o̧ge kɔ mak pikkɔ o kɔn mak pə̧ə̧ nɔ yɔ vin yɛrɛ? 41Vo po náa gim ak ve hɛn de o vo mak pə̧ə̧re nɔ vere o vo beleŋke pə̧ə̧re nɔrɛ, hɛn nɔ ve tɛʼ de dȩȩ o vo po ze. 42“Yɔʼ de zee vora náa Faarize voy! Voy pora Dim#11:42 Dimma: Hɛn ha̧a̧ de hakka o kɔm ba, òo baa haŋŋa, òo de makka makpalla, hɛn há̧a̧ de kɔra nɔ vɛ tɛʼ òo hak toot saʼa boʼ o wə daŋga po Go̧o̧gey; hɛn daŋga ke po ɛnɔ ve ya̧a̧ dimmɔ oy. Oò ɓɔgumma, ɓəyya, hɛn há̧a̧ baa nɔ ve sɛw tɛʼ, òo mak makpal vɛ òo hak san waa nɔ o kɔ too ɛnɔm vin do waʼ saʼa boʼ o wə daŋga nɔ po Go̧o̧gey o lɛ an kɛrdaŋga vo to Malasi 3:10-12. von vɛ Go̧o̧gerɛ ɗaa, pori wat lɛra akkɔ vey, sɔŋŋ naʼa, vere wat zɔʼ ve ya̧a̧ bo ruǔ nɔ vey, ɛn vo zân de Go̧o̧ge moò za̧a̧ likka an vere hi̧i̧zin anɔrɛ: Hɛn ɛnɔ vɛ kaa voy kɔra de oy kaa vo zân pəətum zɔʼ nɔ ve sɛ.” 43“Yɔʼ de zee voraa náa Farize voy! Vo hi̧i̧ kɛŋ yɛɛ zɔɔri tinba náa Yuuda o ve lik faa yakke, vo hi̧i̧ doò ve moogi vo duʼ yɛɛre nɔ vere so̧o̧ta.” 44Yɔʼ de zee voraa náa Farize voy! Voy too gak zɔʼ gaanin yɛ, náa vey daa tin ve gaanɛ nɔm». 45Ha̧a̧ zɔʼ daŋga náa it Mɔyi̧zə moò buu an o ve tiŋza̧a̧re feeza: «Wa̧y it hɛn, Yak mɔ moò too ɛnɔmmɔ, mɔ zɛɛ de vii sɛw!» 46Yeesu hi̧i̧za: «Voy yɔʼre, náa it Mɔyi̧zə moò buu an vɛ! Ɛn voy ganzaa náa ve dɔŋgal aʼni nənna náa o ve yɛlle doò ve gan nɛ, von vo namin naak waa daŋga ka vo maʼa̧t vo ganna dɔŋgal ɛnɔ tin yɛ. 47Yɔʼ de zee voraa! Voy yo̧o̧ zaa Go̧o̧ge yaʼyɛɛ an ve gak za̧a̧ sȩȩ nɛy, Go̧o̧ge yaʼyɛɛ an ɛn vɛ, aŋ von vɛ bɔk ve vɔt vo nɔ vey. 48Hɛn vo kɔ ɛnɔ, voy itta bo de oppo, vo ɓa de kɔm aŋ von vɛ bɔk ve kɔ nɔrɛ, ɛn bɔk ve vɔt Porofɛt vey, vo kə yo̧o̧ gak von nɔ ve tin! 49Moò an oy, Go̧o̧ge o kɛmme, o fee: “Mii yaʼat voo Go̧o̧ge yaʼyɛɛ an vɛ vere Yaʼyɛɛ nɔ vey; vey vɔtta zɔʼ verɛ, vey ɗeʼena zɔʼ verɛ.” 50Moò an oy náa munɛ voy, vo yaa tokka Go̧o̧ge yaʼyɛɛ an ve mɛɛm von ve yɔ tɛʼ, hɛt bɔk bi̧i̧ tin nɔ oppo. 51Zɛɛ ve vɔt Abɛl tin nɔ oppo, yaa gbɔy zakari o vɔɔre, bɔk ve vɔzaa tiŋza̧a̧, yɛɛ kɔ maakɔ vere maak likkɔ oppo. Mi feet vora: Náa ɓɔllɛ nɛnɔ voy tokka, vɔɔ wɔɔk, ve vɔt vo yəəmza̧a̧ ɛnɔ ve yɔ! 52«Voy yɔʼre, náa it mɔyi̧zə moò buu an nɔ voy! Vo iŋ de lakele pek lep gaa hɛn nɔrɛ: voy, vo dɔnnɛ vin, ɛn náa ve hi̧i̧ dɔra nɔ vey, vo yaŋ vo dɔrarɛ vin». 53Yeesu fee ka vuk ka̧a̧ ɛnɔ oppo nɔ, náa it Moyi̧zə moò buu an vɛ vere náa farize vɛ, si̧i̧ zat hi̧ʼ o ve pə̧ə̧re pɛk ve viʼi moò ve ɓooza̧a̧ kətkət:» 54Ve toʼza wəkka, ke bo de vuksii yak moot ɓɛɛ zɔʼ tin nɛrɛʼ, ka ve sonaa oy.
Currently Selected:
Luka 11: dae
Highlight
Copy
Compare
Share
Want to have your highlights saved across all your devices? Sign up or sign in
