Luka 10
10
Yeesu yaʼ kaam wɔɔk ta̧a̧to zoo boʼ daam itto nɔ ve yɛɛ̌
Mat 10:7-16
1Pig an ɛnɔ, Gbɛ̧ɛ̧ kɛŋ wɛɛ ha̧a̧ zɔʼ ve wɔɔk ta̧a̧to zoo boʼ daam itto yaʼ ɓəəzi vo ve itto, itto o tinba dee, kappɔ vɛ oppo vere yɛɛ o kaa de daa tin nɔ ve oppo. 2O feet vo: «Lɛm vɛ ɓoo han nɛ, náa kɔ kɔmmɔ ve ɓoon ke yɛ. Vo haa wa̧y haŋ ak do yaʼiy náa kɔm ak zɔʼ ve tin. 3Vo takpɔ, mi yaʼ vo too tɛ̧ɛ̧ waa ve wə̧rkum o ve tiŋza̧a̧re nɔm. 4Gaa vo pan hel waa sɛ, ke saʼaarɛ, ke tɛkkarɛ, vo dii moogii ha̧a̧ yanaa sɛ. 5Ka̧a̧ voy dɔra tin nɔ vo fee: “Sosin do kan ka̧a̧ nɛ oppo doʼ.” 6Ha̧a̧ hi̧i̧ sosin òo de kanna de kaa tuurɛ, sosin von ɛnɔ de kanna ha̧a̧ ɛnɔ opporɛ; òo paamɛ dɔmmɔ, sosin von nɔ de ɗɛɛ kəy o vo po. 7Vo kan ka̧a̧ ɛnɔ oppo, vo lɛrɛ, vo zɔrɛ, hɛn vey po vora kaa tuu nɔ ve sɛw tɛʼ, ha̧a̧ kɔm ak lii kaa hak hɛn naazi zum an nɛ. Ka vo yaa luura ka̧a̧ ɛnɔ oppo, takka ka̧a̧ zɔʼre sɛ. 8Kap voy takka tin náa kap ak vey ɓa vora nɔ, vo lɛ hɛn vey po vora nɔrɛ. 9Vo poozi náa ho̧o̧ voy zee voo kappa tuu nɔ verɛ, vo feeza kap akkɔ vɛ: “Go̧o̧ge Gbɛ̧ɛ̧ an diŋŋi o vo po ma.” 10Oò vo dɔ kap zɔʼ oò ve ɓan vo yɛ nɔ, vo vuk katin nɔ vɛ oppo, vo feeza náa vɛ: 11“Vi wa̧a̧si kən vo uurum von o vo kappa ɓann ivi dɔʼba nɔ verɛ, ɛnuu vo vəʼə gaa Go̧o̧ge Gbɛ̧ɛ̧ an bo diŋ yaa o vo po ma.” 12Mi feet voraa, Yo̧o̧ moò yȩʼȩba nɔ, vey yȩʼe náa kap ɛnɔ vɛ de ɗəəra náa kap sodɔmmɔ verɛ».
Kap ve bɔn si̧i̧ tu̧u̧ nɔ vey
Mat 11:20-24
13«Kɔrazeŋ mɔy yɔʼre! Bɛtsayda mɔy yɔʼre! Hɛn yel bɔk kɔ o vo tuu nɔ bɔk kaa kɔ kap Tiir vere kap Sidɔŋŋɔ oppo nɔ, náa kappa tuu nɔ bɔk kaa vey wa̧a̧ vɔɔ ba̧a̧ka, kaa vey zɔɔ hu̧u̧ke kaa vey itta bo ve fil de si̧i̧ von ve ma zɛɛ. 14Moò an oy, yo̧o̧n Go̧o̧ge de yȩʼȩ náa ve tin nɔ, náa kap tiir vere kap sidɔŋ moò yȩʼȩ von de poo kaʼsorɛ, vere vo nɔ gɔ. 15Ɛn kapɛrnum mɔy, mɔy tu̧u̧ nɔ boo gan dɔkka bɛltiiba gaŋ gɔɔrɛ? Hɔ̧ɔ̧̌, mɔy ɓin zo̧o̧ vɔɔ yɛɛre». 16Yeesu kə feeza kaam an ve ɓɛʼ: «Ha̧a̧ òo kiit vorɛ, o kiiza mii; Ha̧a̧ òo gbəl vorɛ, o gbəl mii, ha̧a̧ òo gbəlirɛ, o gbəl ha̧a̧ yaʼiy nɛy».
Kaam wɔɔk ta̧a̧to zoo boʼ daam itto nɔ ve kəy voni
17Yaʼyɛɛ wɔɔk ta̧a̧to zoo boʼ daam itto nɔ ve kəy vere si̧i̧ dɛ̧ɛ̧ta, ve fee: «Gbɛ̧ɛ̧ kɛŋ, fəəm ɓɛɛ nɔ vey si̧ʼ ve kiit vi kɔʼrɛ, òo vi feet vo hɛn um niiba nɔ gɔ!» 18Yeesu hi̧i̧t vo: «Kii hə̧ sɛɛɗan wan zo̧o̧y bɛlba too maam yȩʼgii vin. 19Vo kiirɛ: Nɛ, mi po vo Gɔti ɛminna bekkɔ vɛ vere nɛkkɔ vɛ o ve daake, vo nan za̧a̧k von gɔti an nɛ tɛʼ, hɛn zɔʼ kɔn vo ɓɛɛ yɛ. 20Ɛn vo gbo̧ʼ moò fəəm ɓɛɛ nɔ ve kiit vo kɔʼrɛ nɛy sɛ, vo gbo̧ʼ moò nii von dɛ̧ɛ̧ de bɛlba nɛy te».
Yeesu gbo̧ʼrɛ
Mat 11:25-27; 13:16-17
21Bɔk yo̧o̧ da̧a̧ nɔ oppo vin, Go̧o̧ge fəəm dȩȩt an hiʼ Yeesu o si̧i̧ ba o bɛllɛ, o fee: «Baa, Gbɛ̧ɛ̧ bɛlba vere hɛtte nɔ, mi dɛnzum naak, yɛɛ mɔ iza sam waa ve, hɛn mɔ ɗinza náa gaa hɛn vɛ vere náa nɛɛri ak vɛ nɛy. ƐʼƐ, Baa, mɔ hi̧i̧ yɔ, doo kɔ too ɛnɔm». 22«Baa min poy hɛn nɔ ve tɛʼ. Ha̧a̧ zɔʼ gaan nɛ tan nɛy yɛ Baa nɔ gaa yɔ zaʼ, ha̧a̧ zɔʼ gaan nɛ Baa nɛy yɛ tan nɔ gaa yɔ zaʼ vere ha̧a̧ tan nɔ hi̧i̧ izaa nɔ gaa yɔ zaʼ». 23Pig an Yeesu fil kə kaam an o ve po feet vo o ve da̧a̧re zaʼ: «Náa voy hə̧ra hɛn vey nɔt von nɛnɔ voy za̧a̧re. 24Ɛnɔ mii feet voraa: Porofɛt ve yəəmza̧a̧ vere gbɛ̧ɛ̧ nɔ vɛ, bɔk ve hi̧i̧ hə̧ra hɛn voy hə̧ra nɛnɔrɛ, ve hənnɛ, bɔk ve hi̧i̧ kii hɛn voy kii nɛnɔrɛ, ve kiinɛ».
Moò bɛmm wa̧y za̧a̧ zɔʼ kap hɛk samari nɔ oppo
25Wa̧y it Mɔyi̧zə moò buu an zɔʼ gbɔy, o hi̧i̧ ka goo Yeesurɛ, o viʼi: «Wa̧y it hɛn ya, hɛ̧ɛ̧n kay kɔ gɔɔ, kay hak za̧a̧n ha̧ vɛll Go̧o̧ge oppo ze nɔ nɛɛ?» 26Yeesu feeza: «Hɛ̧ɛ̧n ve dɛ̧ɛ̧ de o ba vo moò buure nɛɛ? Mɔ waʼ mɔ kii ɛn tuubɔgɛ?» 27Wa̧y nɔ hi̧i̧: «“Mɔ hi̧i̧ Gbɛ̧ɛ̧ kɛŋ mɔn Go̧o̧ge vey si̧i̧ mɔn tɛʼ vey vɔ̂k mɔn tɛʼ vey gɔti mɔn tɛʼ vere moò gaa mɔn sɛw tɛʼ.” “Mɔ kə hi̧i̧ damza̧a̧ too mɔ hi̧i̧ wɔɔk mɔn nɔm.”» 28Yeesu hi̧i̧za: «Mɔ hi̧i̧ de oppo. Mɔ kɔ oy mɔy za̧a̧a̧». 29Ɛn wa̧y it Mɔyi̧zə moò buu an nɔ, hi̧i̧ itta moò vira an ɛnɔ bo sȩȩrɛ. O vi Yeesu: «Hii o dȩȩza̧a̧ yɛɛ?» 30Yeesu hi̧i̧: «Wa̧y zɔ' luu zeruzalɛm, ka zo̧o̧ zeriko, náa vəʼ yana ve kpɔɔrɛ, ve fat hɛn an ke pan nɔ verɛ tɛʼ, ve wa̧a̧rɛ, ve luu ɛʼɛ vɔɔ yakpa. 31Wa̧y kɔ maak ak zɔʼ daa yana ɛnɔ oppo vin. O hə̧ wa̧y nɔ, o pek sɛkpa, vəərɛ. 32Wa̧y Levit zɔʼ daa yana da̧a̧ ɛnɔ oppo ɓɛʼ, o hə wa̧y nɔrɛ vin, pek sɛkpa, o vəərɛ ɓɛʼ. 33Ɛn wa̧y samari zɔʼ, de luura gayya, o daa yana ɛnɔ oppo, gbɔ wa̧y ho̧o̧ nɔ o hɛge. O hə ho̧o̧ nɔ, gim kɔza orɛ kpɛŋ. 34O diŋ tak o hɛge za̧a̧za̧a̧, gulsa kum vere bum tin nɔk an nɔ vɛ oppo, niʼza tin kə hiŋza o gɔy wa̧a̧wa̧a̧ ba, tana ka̧a̧ ɓa gayre yoona oppo. 35Dȩȩ yɔŋgal an nɔ, wa̧y Samari nɔ iŋ san waa itto po wa̧y laa gay ka̧a̧ nɔ tin, feeza: “Mɔ yoon wa̧y ɛnɔrɛ, oò mɔ tut hɛn o fɔn òo ɗəə ɛnnɛ, ooy kəy tɛɛ nɔ, mi yaa toguma yɔ.”» 36Yeesu kə vi wa̧y it Mɔyi̧zə moò buu an nɔ: «Umpo nɔ, náa ta̧a̧to ɛn ve nɔ, hii o wa̧y yuu ve wa̧a̧ nɔ da̧ʼa̧za̧a̧ tin yɛɛ?» 37Wa̧y it Mɔyi̧zə moò buu an nɔ hi̧i̧za: «Ha̧a̧ kɔza za̧a̧ nɛy». Yeesu kə feeza: «Mɔ tak, mɔ kɔ hɛn da̧a̧ ɛnɛy vin sɛw».
Yeesu oy Martə vere Maari o ve kaa
38Yeesu vega kaam an vɛ bɔk vere yanaa, o dɔ kap waa zɔʼre, kap ɛn oppo, waa kep zɔʼ tuu, nii an martəy, o ɓa tana o kaa. 39Bɔk o ɛ daak an tin, nii an Maarii, Maari kan zɔɔ Yeesu o hɛge, oy kii moò Yeesu de oora nɛy. 40Martə bɔk o kɔmme yəəmza̧a̧ de yoona ka dəə lɛmma. O yaay Yeesu o hɛge feeza: «Gbɛ̧ɛ̧ kɛŋ, Mɔ hə̧ daay ɛy mii kɔra kɔm ii da̧a̧re nɔ golin mɔ yɛɛ yɛrɛ? Mɔ feeza do yaa maʼzi tin». 41Gbɛ̧ɛ̧ kɛŋ hi̧i̧za: «Martə, Martə, mɔy gballa wɔɔk mɔn vere hɛn zɔʼ yəəmza̧a̧ ɓaʼ, 42Hɛn sȩȩ de daŋga zaʼ. Maari wə de an za̧a̧ nɛy, ha̧a̧ kaa fazin yɛ».
Currently Selected:
Luka 10: dae
Highlight
Copy
Compare
Share
Want to have your highlights saved across all your devices? Sign up or sign in
