Umatiu 21
21
Ujeso a be he Ujeruselem na Usu
(Mak 11:1-11; Luk 19:28-40; Jọn 12:12-19)
1Nya ana Ujeso befe le bendi-utung bema be maa ndu wu he Ujeruselem, be le wu he ushokwo Ubefeji, he ukwel angwu be ko le Olif, Ujeso a ha sọm bendi-utung bema befee, 2a de be le, “Ma gye he kubọng ahwu ku yi amen le he kushu ana. Ma la wa ha, ma nda kizaaki ki tyuu ha le unwaa ashi. Ma pel abe puu befee be le be ke-m. 3Gbe undi a bii amen atan-lengi angwu ma pel kung abe, ma de le, ki fọng Ada le be, ma u tyang amen ma ba le be.”
4Ashin ki shi he ki fe sho ashi utye-ugie kisọm Unim a ma kọng le-iti a. 5A ma de le:
“Ma de bendi Uzayọn le,
ma nde, usu umen u ba le ha.
U yi mbiloo.
U pwọm he ushọm kizaaki.”#21:5 Uzakariya 9:9
6Bendi-utung Ujeso be te le shi nya ana Ujeso a de be. 7Be le be le kizaaki le ushọm ashi be ke-e. Be kung bihwọm bibel kie ashi he item. Ujeso a ha bel kwu ha. 8Liwu bendi gbam be kung bihwọm bibel kie he kukwo kpu-ludu-dudu. Besuso be kpi akikie kiwuọ kie he kukwo. 9Liwu bendi abe be maa te Ujeso le he kushu le abe be maa pwọm he le he item be maa gaa kọng le,
“Ipee i kwu ke unwaa Udebid.
“Kukwun ku yi ke undi angwu u be he lizen Ada.#21:9 Agyam 118:26
“Ipee i kwu ke Unim.”
10He kunyọng ahwu a wu ha he Ujeruselem, ki kwu bendi puu abe ha he kuhwo kaang. Be fel bii le, “U yi kibang kitaa undi a?”
11Liwu bendi abe be ma yi utung ha Ujeso be fan le, “U yi utye-ugie kisọm Unim angwu u be le he Unazaret he kubọng Ugalili a.”
Ujeso he afee Ushọm Unim
(Mak 11:15-19; Luk 19:45-48; Jọn 2:13-22)
12Ujeso a ma ngwee he afee Ushọm Unim ha he Ujeruselem. A ma nde bendi abe be ndyeb biwọm zi le abe be ndyeb ha he Ushọm Unim, a ma ndo abe wu he igye. U nyii itebul bendi abe be gie unde le bidem bendi abe be ndyeb lilulu zi wu le hel. 13A ma kung de be le, “Be ma fee ndọ he kushia Unim le-iti le, Unim a de le, be ba ko Ushọm uma le kiteng ushang akele, ukpọ men ma shi-e a bel kiteng ashi ma ndyel zi kazi a.”#21:13 Azaya 56:7; Ujerimaya 7:11
14Bendi abe be hwọ ashi le abe be hwo abee be be hwaa le Ujeso ha he Ushọm Unim, a mbee abe puu. 15Ukpọ he kunyọng ahwu bekandi bishang Unim le bitisha Iten be nde bikwole-kuhwo abi Ujeso a shi, be mbee gyo na inwaa-bwan be fel gaa le he ushọm Unim le, “Ipee i kwu ke igia Udebid.” Befe be fel he ingyo.
16Be kung bii Ujeso le, “Wo gyo ashi inwaa-bwan i gaa ana a?”
Ujeso a bọng, a de be le, “Men ma wa bo ashi be fee he kushia Unim ma ye a? Be fee le,
“ ‘le he ungwu inwaa-bwan le abe be so-i nyia abi
wo kam ndọ le be ka-a ipee.’#21:16 Agyam 8:2 ”
17Ujeso a gbe tyang bekandi bemen i ha he Ujeruselem gbe gye he Ubetani. A ngyọ ha he Ubetani taa ashi.
Ujeso a buu Ufig atye
(Mak 11:12-14, 20-24)
18Nya a le-iti-le-iti Ujeso a ma tem le ha Ubetani u gya he Ujeruselem, itung i maa fel ndo he. 19A bel ashi nde Ufig he ufaa ubo. A gbe gye ha le nde-e u yi le agbe ye, u yi ashia-ashia. A kung de ukwan ana le u ha tem wum agbe ye kpam. Ukwan ana a ma hwo nya kukwo-kukwo.
20Bendi-utung bema be nde ashin, ki kwu abe he kuhwo kaang. Be fel bii he le, “Ki shi na a, ukwan Ufig angwuna a hwo kukwo-kukwo kitaa ana?”
21Ujeso a kung de be le, “Mi kee le ma ngye le gbe ma fe lityam ha ami faale atyang-ale, ma sha ashi mi shi ukwan Ufig ana kife-kife a ye, ma mbee sha gba gyọng ashi mi shi ana ọ, ma da ukwel le u kwuo le wu he umbwo ukandi ọ, u kwuo. 22Kiwọm kiyang-yang ashi ma de Unim le lishi andọ-ale le u shi ke men, ma kpa ashi.”
Be bii Ujeso angwu a ke-e ikeb
(Mak 11:27-33; Luk 20:1-8)
23Ujeso a ma ngwee he ushọm Unim ha he Ujeruselem. Nya ana a maa hwọ bendi biwọm ha, bekandi bishang Unim le bekandi kubọng be le bii Ujeso le, “Le kung wo be le ikeb angi wo shi biwọm bimen i? Ayang a ka-a ikeb imen i?”
24Ujeso a fan abe le, “Mi bii amen kibibi ken ukpọng. Gbe ma fan ashi, mi ọ mi da amen undi angwu a ke-m ikeb angi mi kung shi biwọm abin. 25Ayang a ke Ujọn ikeb angi a maa wu bendi umbwo? Unim na a ma ke-e a, ha bendi-gye a?”
Be ma fel tyang le bende le, “Li fan kimen i le ana? Gbe li fan he le Ujọn a maa wa bendi umbwo he ikeb Unim a, u bii li le, fe kibang ki tan le shi li ma bọng ha Ujọn ye? 26Ukpọ li nya de le Ujọn a maa wa bendi umbwo he ikeb angi undi-gye a? Li shel ashi bendi betyan be be shi li, likọye befe puu be bọng le Ujọn a ma yi utye-ugie kisọm Unim a na afọng.”
27Be ha kung fan Ujeso le be ngye ye. Ujeso a de be le ufe ọ u da abe undi angwu a ke-e ikeb angi u shi biwọm bimen i ye.
Ityang gbe le bebwaa bengikye befee
28“Ukpọ kibang ma gim gbe le ashin? Ma gyo mi he men ma nde kiwọm ashi ityang anyin i tyung amen. Ungikye ken a ma yi le bebwaa bengikye befee. He liti ken a le de angwu gbel le, ‘Unwa-agi gye he utia uvine kunyin le shi aki.’
29“A ma swan de atyam le ‘u ta ha ye.’ Ukpọ abe gie ugim uma tem te.
30“Ungikye umen i a ha mbee le de unwaama angwu kisun le u gye he utia. A bọng de-e le, ‘Ukandi, mi ta.’ Ukpọ a te ye.”
31“Ujeso a ha bii abe le, bebwaa abe befee i, angwu kung a shi ashi atyam a kee?”
Be fan he le “angwu gbel a.”
Ujeso a kung de be le, “Kigyang-kigyang, bendi abe be kpe ukpanda ọ, bendi akpla ọ, be ngwee he kiteng kusu Unim teng amen. 32Ujọn a ma be u tyung amen kukwo ahwu ku yi kpa-kpa, ma gyo he ye. Ukpọ bendi abe be kpe ukpanda le a be akpla be bọng he ahe. Ma na ma nde abin ọ, ma shi beshi kpe ashi a kọng ye.”
Ityang gbe le bendi abe be nde gbe le utia undi
(Mak 12:1-12; Luk 20:9-19)
33Ujeso a de le “Ma mbee gyo ityang isuso le, ungikye ususo a ma nam utia ivine, angi be bung agbe angi shi kutyo. A kaa ugbe fe-e kel-kel, u tem kania he kipi be shọ agbe ikwan ana kung umbwo angi, u shi udye angwu bendi be kwu kang he utia. A kung utia uma ke bendi le be nde gbe le he. A ha bo ndo litan gye he kubọng kususo. 34Nyọng kunyọng ku ma fel ahwu be gbung agbe ikwan, a ma sọm ibọyi ima le i le kpe ukpo uma le ha bendi abe be nde gbe-e le utia be ke-e.
35“Bendi abe be ma nde gbe-e le utia ana be kwu ubọyi angwu ken kpam, be gwu ususo, be maa angwu ken akọ. 36Ungikye umen ana a sọm ibọyi ima fel gbe-gyọng abe ukpi-kikwu hwaa le bendi utia bemen ana. Bendi utia bemen ana be mbee shi abe kitaa ken na be shi abe ukpi-kikwu. 37He umbee-likel a ha kung unwaama ugyang sọm hwaa le be, le ugim le ki shi na ana ọ be ba ka he ufe ife.
38“He kunyọng ahwu bendi utia ana be bel ashi nde unwaa ugyang utia ana, be de bende le, ‘Angwun na u be zi lishi, ma li gwu-e, ma utia angwun u fel utyan.’ 39Be kwu-e fem le he le he utia tang gye he igye, kwu-e gwu.”
40“He kimen ashin, gbe ugyang utia a be, u nya sha bendi abe be nde gbe-e le utia na a?”
41Befe be fan Ujeso le, “Faale ifung, u gwa mbee bendi bebibi bemen ana puu, u kung utia uma ke bendi besuso abe be be ke-e ukpo uma he kunyọng agbu-dyu.”
42Ujeso a mbee bii abe le, “Ityang angi be fee he kushia Unim le-iti, ma wa bo angi ngye ye a? Be fee le,
“ ‘Kukọ ahwu bendi abe be tye ushọm
be swan ahwu
kufe na ku tem fel kwu ushọm naa gen.
Ada Unim na a shi ashin.
Ki kwu li he kuhwo kaang.’ ”#21:42 Agyam 118:22, 23
43Ujeso a ha kung de be le, “Ma tem ba kwa le abwo he kiteng kusu Unim ye, Unim u ba waa kung bendi abe be shi biwọm abi a kee a le be kwu le abwo he kiteng kusu kima. [ 44Undi angwu a mbu pwọm ha he likwu kukọ kumen ana, u ba bun he ate-ate. Ukpọ gbe kukọ kumen ana ku mbu kpo he, ku kpo mbyọ he.]”
45Nyọng bekandi bishang Unim le bendi Iferesis be ma gyo ityang imen i puu, be ngye le Ujeso u kọng gba le befe a. 46Be fel kee kukwo ahwu be kwu-e. Be shel bendi likọye bendi be bọng le Ujeso u yi utye-ugie kisọm Unim a.
Currently Selected:
Umatiu 21: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Umatiu 21
21
Ujeso a be he Ujeruselem na Usu
(Mak 11:1-11; Luk 19:28-40; Jọn 12:12-19)
1Nya ana Ujeso befe le bendi-utung bema be maa ndu wu he Ujeruselem, be le wu he ushokwo Ubefeji, he ukwel angwu be ko le Olif, Ujeso a ha sọm bendi-utung bema befee, 2a de be le, “Ma gye he kubọng ahwu ku yi amen le he kushu ana. Ma la wa ha, ma nda kizaaki ki tyuu ha le unwaa ashi. Ma pel abe puu befee be le be ke-m. 3Gbe undi a bii amen atan-lengi angwu ma pel kung abe, ma de le, ki fọng Ada le be, ma u tyang amen ma ba le be.”
4Ashin ki shi he ki fe sho ashi utye-ugie kisọm Unim a ma kọng le-iti a. 5A ma de le:
“Ma de bendi Uzayọn le,
ma nde, usu umen u ba le ha.
U yi mbiloo.
U pwọm he ushọm kizaaki.”#21:5 Uzakariya 9:9
6Bendi-utung Ujeso be te le shi nya ana Ujeso a de be. 7Be le be le kizaaki le ushọm ashi be ke-e. Be kung bihwọm bibel kie ashi he item. Ujeso a ha bel kwu ha. 8Liwu bendi gbam be kung bihwọm bibel kie he kukwo kpu-ludu-dudu. Besuso be kpi akikie kiwuọ kie he kukwo. 9Liwu bendi abe be maa te Ujeso le he kushu le abe be maa pwọm he le he item be maa gaa kọng le,
“Ipee i kwu ke unwaa Udebid.
“Kukwun ku yi ke undi angwu u be he lizen Ada.#21:9 Agyam 118:26
“Ipee i kwu ke Unim.”
10He kunyọng ahwu a wu ha he Ujeruselem, ki kwu bendi puu abe ha he kuhwo kaang. Be fel bii le, “U yi kibang kitaa undi a?”
11Liwu bendi abe be ma yi utung ha Ujeso be fan le, “U yi utye-ugie kisọm Unim angwu u be le he Unazaret he kubọng Ugalili a.”
Ujeso he afee Ushọm Unim
(Mak 11:15-19; Luk 19:45-48; Jọn 2:13-22)
12Ujeso a ma ngwee he afee Ushọm Unim ha he Ujeruselem. A ma nde bendi abe be ndyeb biwọm zi le abe be ndyeb ha he Ushọm Unim, a ma ndo abe wu he igye. U nyii itebul bendi abe be gie unde le bidem bendi abe be ndyeb lilulu zi wu le hel. 13A ma kung de be le, “Be ma fee ndọ he kushia Unim le-iti le, Unim a de le, be ba ko Ushọm uma le kiteng ushang akele, ukpọ men ma shi-e a bel kiteng ashi ma ndyel zi kazi a.”#21:13 Azaya 56:7; Ujerimaya 7:11
14Bendi abe be hwọ ashi le abe be hwo abee be be hwaa le Ujeso ha he Ushọm Unim, a mbee abe puu. 15Ukpọ he kunyọng ahwu bekandi bishang Unim le bitisha Iten be nde bikwole-kuhwo abi Ujeso a shi, be mbee gyo na inwaa-bwan be fel gaa le he ushọm Unim le, “Ipee i kwu ke igia Udebid.” Befe be fel he ingyo.
16Be kung bii Ujeso le, “Wo gyo ashi inwaa-bwan i gaa ana a?”
Ujeso a bọng, a de be le, “Men ma wa bo ashi be fee he kushia Unim ma ye a? Be fee le,
“ ‘le he ungwu inwaa-bwan le abe be so-i nyia abi
wo kam ndọ le be ka-a ipee.’#21:16 Agyam 8:2 ”
17Ujeso a gbe tyang bekandi bemen i ha he Ujeruselem gbe gye he Ubetani. A ngyọ ha he Ubetani taa ashi.
Ujeso a buu Ufig atye
(Mak 11:12-14, 20-24)
18Nya a le-iti-le-iti Ujeso a ma tem le ha Ubetani u gya he Ujeruselem, itung i maa fel ndo he. 19A bel ashi nde Ufig he ufaa ubo. A gbe gye ha le nde-e u yi le agbe ye, u yi ashia-ashia. A kung de ukwan ana le u ha tem wum agbe ye kpam. Ukwan ana a ma hwo nya kukwo-kukwo.
20Bendi-utung bema be nde ashin, ki kwu abe he kuhwo kaang. Be fel bii he le, “Ki shi na a, ukwan Ufig angwuna a hwo kukwo-kukwo kitaa ana?”
21Ujeso a kung de be le, “Mi kee le ma ngye le gbe ma fe lityam ha ami faale atyang-ale, ma sha ashi mi shi ukwan Ufig ana kife-kife a ye, ma mbee sha gba gyọng ashi mi shi ana ọ, ma da ukwel le u kwuo le wu he umbwo ukandi ọ, u kwuo. 22Kiwọm kiyang-yang ashi ma de Unim le lishi andọ-ale le u shi ke men, ma kpa ashi.”
Be bii Ujeso angwu a ke-e ikeb
(Mak 11:27-33; Luk 20:1-8)
23Ujeso a ma ngwee he ushọm Unim ha he Ujeruselem. Nya ana a maa hwọ bendi biwọm ha, bekandi bishang Unim le bekandi kubọng be le bii Ujeso le, “Le kung wo be le ikeb angi wo shi biwọm bimen i? Ayang a ka-a ikeb imen i?”
24Ujeso a fan abe le, “Mi bii amen kibibi ken ukpọng. Gbe ma fan ashi, mi ọ mi da amen undi angwu a ke-m ikeb angi mi kung shi biwọm abin. 25Ayang a ke Ujọn ikeb angi a maa wu bendi umbwo? Unim na a ma ke-e a, ha bendi-gye a?”
Be ma fel tyang le bende le, “Li fan kimen i le ana? Gbe li fan he le Ujọn a maa wa bendi umbwo he ikeb Unim a, u bii li le, fe kibang ki tan le shi li ma bọng ha Ujọn ye? 26Ukpọ li nya de le Ujọn a maa wa bendi umbwo he ikeb angi undi-gye a? Li shel ashi bendi betyan be be shi li, likọye befe puu be bọng le Ujọn a ma yi utye-ugie kisọm Unim a na afọng.”
27Be ha kung fan Ujeso le be ngye ye. Ujeso a de be le ufe ọ u da abe undi angwu a ke-e ikeb angi u shi biwọm bimen i ye.
Ityang gbe le bebwaa bengikye befee
28“Ukpọ kibang ma gim gbe le ashin? Ma gyo mi he men ma nde kiwọm ashi ityang anyin i tyung amen. Ungikye ken a ma yi le bebwaa bengikye befee. He liti ken a le de angwu gbel le, ‘Unwa-agi gye he utia uvine kunyin le shi aki.’
29“A ma swan de atyam le ‘u ta ha ye.’ Ukpọ abe gie ugim uma tem te.
30“Ungikye umen i a ha mbee le de unwaama angwu kisun le u gye he utia. A bọng de-e le, ‘Ukandi, mi ta.’ Ukpọ a te ye.”
31“Ujeso a ha bii abe le, bebwaa abe befee i, angwu kung a shi ashi atyam a kee?”
Be fan he le “angwu gbel a.”
Ujeso a kung de be le, “Kigyang-kigyang, bendi abe be kpe ukpanda ọ, bendi akpla ọ, be ngwee he kiteng kusu Unim teng amen. 32Ujọn a ma be u tyung amen kukwo ahwu ku yi kpa-kpa, ma gyo he ye. Ukpọ bendi abe be kpe ukpanda le a be akpla be bọng he ahe. Ma na ma nde abin ọ, ma shi beshi kpe ashi a kọng ye.”
Ityang gbe le bendi abe be nde gbe le utia undi
(Mak 12:1-12; Luk 20:9-19)
33Ujeso a de le “Ma mbee gyo ityang isuso le, ungikye ususo a ma nam utia ivine, angi be bung agbe angi shi kutyo. A kaa ugbe fe-e kel-kel, u tem kania he kipi be shọ agbe ikwan ana kung umbwo angi, u shi udye angwu bendi be kwu kang he utia. A kung utia uma ke bendi le be nde gbe le he. A ha bo ndo litan gye he kubọng kususo. 34Nyọng kunyọng ku ma fel ahwu be gbung agbe ikwan, a ma sọm ibọyi ima le i le kpe ukpo uma le ha bendi abe be nde gbe-e le utia be ke-e.
35“Bendi abe be ma nde gbe-e le utia ana be kwu ubọyi angwu ken kpam, be gwu ususo, be maa angwu ken akọ. 36Ungikye umen ana a sọm ibọyi ima fel gbe-gyọng abe ukpi-kikwu hwaa le bendi utia bemen ana. Bendi utia bemen ana be mbee shi abe kitaa ken na be shi abe ukpi-kikwu. 37He umbee-likel a ha kung unwaama ugyang sọm hwaa le be, le ugim le ki shi na ana ọ be ba ka he ufe ife.
38“He kunyọng ahwu bendi utia ana be bel ashi nde unwaa ugyang utia ana, be de bende le, ‘Angwun na u be zi lishi, ma li gwu-e, ma utia angwun u fel utyan.’ 39Be kwu-e fem le he le he utia tang gye he igye, kwu-e gwu.”
40“He kimen ashin, gbe ugyang utia a be, u nya sha bendi abe be nde gbe-e le utia na a?”
41Befe be fan Ujeso le, “Faale ifung, u gwa mbee bendi bebibi bemen ana puu, u kung utia uma ke bendi besuso abe be be ke-e ukpo uma he kunyọng agbu-dyu.”
42Ujeso a mbee bii abe le, “Ityang angi be fee he kushia Unim le-iti, ma wa bo angi ngye ye a? Be fee le,
“ ‘Kukọ ahwu bendi abe be tye ushọm
be swan ahwu
kufe na ku tem fel kwu ushọm naa gen.
Ada Unim na a shi ashin.
Ki kwu li he kuhwo kaang.’ ”#21:42 Agyam 118:22, 23
43Ujeso a ha kung de be le, “Ma tem ba kwa le abwo he kiteng kusu Unim ye, Unim u ba waa kung bendi abe be shi biwọm abi a kee a le be kwu le abwo he kiteng kusu kima. [ 44Undi angwu a mbu pwọm ha he likwu kukọ kumen ana, u ba bun he ate-ate. Ukpọ gbe kukọ kumen ana ku mbu kpo he, ku kpo mbyọ he.]”
45Nyọng bekandi bishang Unim le bendi Iferesis be ma gyo ityang imen i puu, be ngye le Ujeso u kọng gba le befe a. 46Be fel kee kukwo ahwu be kwu-e. Be shel bendi likọye bendi be bọng le Ujeso u yi utye-ugie kisọm Unim a.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.