Umatiu 11
11
Ujeso befe le Ujọn angwu u maa wu bendi umbwo
(Luk 7:18-35)
1He kunyọng Ujeso a ke bendi-utung bema abe lihwo le be befee uteb angwun puu, a ha gbe le ha kiteng kimen ana le bun kisọm Unim de bendi he Ugalili.
2Bendi-utung Ujọn angwu u maa wu bendi umbwo be be he igaadye be de-e gbe le aki angi Ujeso Kristi u shi. A sọm abe hwaa le Ujeso, 3le be le bii he le, “Wo na Ujọn a ma de le wo ba a, ha li ndọ lishi undi ususo a?”
4Ujeso a de be le, “Ma tem le de Ujọn biwọm abi ma gyo, ma mbee nde. 5Bendi abe be hwọ ashi be fel nda, abe be hwo abee be fel tan, abe akpaa be taa, abe be kwọm atyung be fel gyo, akwọm a wum, bendi-likaa be gyo kisọm kinunung. 6Kukwun ku yi ke undi uyang-yang angwu u tyang ityang gbe le mi ye.”
7Nya ana bendi-utung Ujọn be kung tem gye, Ujeso a keb akọng-ale ha bendi gbam abe be yi ha gbe le Ujọn. A bii abe le, “He kunyọng ahwu ma ma le hwaa le Ujọn he afee ugbaa-libeb, ma ma ndọ lishi le ma la nda kibang a ha? Abia angi kufem ku shi nii angi a, ha ma maa la nda kibang a? 8Ma maa la nda undi angwu a shi bigbọ binunung a? Bendi abe be shi bigbọ kitaa ana, be mbu kingbeb, be nda he ishaale besu a. 9Ma ma ndọ lishi le ma la nda kibang a? Utye-ugie kisọm Unim a ye a?” A tem le shi fan le, Eng, ukpọ ma ngye le ma ma nde undi angwu a dyam hwo bendi abe be tye ugie kisọm Unim abe le-iti. 10Ujọn na undi angwu u tye ugie kisọm Unim a ma fee he kushia Unim gbe le he le-iti le Unim a de le,
“ ‘Unwaa-kisọm ugi u yi nyin, mi ba sọm he ta-a le he kushu he
u shi kukwo ndọ a.’#11:10 Umalakai 3:1
11Kigyang-kigyang mi de men le, Ujọn angwu u maa wu bendi umbwo a ma dyam hwo bendi-gye puu, ukpọ undi uyang-yang angwu a zen hwo he kiteng kusu lifung-atabe a dyam hwo-e. 12Kung le he kunyọng ahwu Ujọn angwu u maa wu bendi umbwo kpam be wu kunyin i nyin, kiteng kusu Unim ki yi he linaa, bendi be-gyọng be naa linaa he ashi. 13Bitye-ugie kisọm Unim puu le Iten Umosis be maa kọng gba le kiteng kusu Unim kpam be kwọm he kunyọng ahwu Ujọn a maa wu bendi umbwo. 14Gbe ma fe lityam ha kisọm kibel, Ujọn u yi Elaija angwu be ma kọng gbe le abele uma a. 15Undi uyang-yang angwu u yi le atyung kigyo, u gyo.”
16Ujeso a mbee bii le, “Mi kung ugbe angwun paa ha kibang a? Be yi na inwaa-bwan i kwu he ushokwo kate na. Likwu ken li ko da likwu angyel le:
17“ ‘Li gwee upipi gyam agyam igọ fe men,
ma ngyọ ye.
Li gyam agyam lihwu,
men ma kii ye.’
18Ujọn a maa ndo itung, u ngwo kutyo ye, bendi be maa da le ikeb ibibi i yi he ahe. 19Mi Unwaa undi-gye, mi be, mi za bizizi, mi ngwo bingwu-ngwo, ukpọ ma kọng le, ‘Ma nde ungikye angwun, u yi undi kupuu a, u mbee ngwo betyo kaang. U yi udim bendi abe be kpe ukpanda le bendi abe be shi biban.’ Ukpọ lishi-abyele li tyung gboo gba he aki angi li shi a.”
Ki ban amen shie: abọng angi a shi beshi ye
(Luk 10:13-15)
20Ujeso a kọng bia bendi ashi angi a ma shi bikwole-kuhwo gbam, likọye be bel atyam le he biban ye. 21A de le, “Ki ban amen shie, men bendi Ukorazin! Ki ban amen shie, men bendi Ubesaida! Mi shi bikwole-kuhwo he Utaya le Usaidọn na mi shi ha amen kubọng nyin, hang bendi abe ha be fe bihwọm akpen, be kem atyung wu kuhwobel le-iti he ki tyung le be bel atyam le he biban bibel. 22Ma ngye le he atan-lengi angwun Unim u ba nda bendi Utaya le Usaidọn beshi hwa men he liti angi u tang bendi ushe. 23Men bendi Ukapanum befe, ma kọng le Unim u ba kung amen gya he kusi-kusi a? Dia! U ba sọm amen gya he kusu-behwuu. Bikwole-kuhwo abi mi shi ha amen kubọng i, mi shi abi he Usọdọm a, hang Usọdọm u so igye. 24Ma ngye le Unim u ba nda bendi Usọdọm beshi he liti ushe ama-ale hwa amen.”
Unwaa u fem Atyam tyung
(Luk 10:21-22)
25He kunyọng kumen ana Ujeso a kung kọng ha Unim le, “Atyagi, Ada angwu u yi le lifung-atabe le igye, mi pee a na wo kung biwọm abi wo ndyel le ha bendi abe be bilishi le abe be ngye biwọm, tyung bendi abe be ngye kiwọm ye. 26Eng, Atyagi, ashin na ki ngbeb-a wogyang le wo shi.
27“Atyagi a kung biwọm puu fe-m ha abwo. Ki yi le undi angwu a ngye-m mi Unwaama, dang fem Atyagi tyang ye. Ki shi le undi angwu a ngye Atyagi dang fem imi Unwaama, le bendi abe mi kee le mi fem he tyung abe tyang ye.
28“Men puu abe ma so bengbeb be ngbeb amen, ma be hwaa le mi, mi ba ka amen kunyọng ashole. 29Ma kung ukpung ugi so, ma hwọ le ha mi, likọye mi mbwa kuhwo, ma ma nda kunyọng ashole ka likpan limen. 30Likọye ukpung ugi u yi pie-pie u ngbeb ye.”
Currently Selected:
Umatiu 11: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Umatiu 11
11
Ujeso befe le Ujọn angwu u maa wu bendi umbwo
(Luk 7:18-35)
1He kunyọng Ujeso a ke bendi-utung bema abe lihwo le be befee uteb angwun puu, a ha gbe le ha kiteng kimen ana le bun kisọm Unim de bendi he Ugalili.
2Bendi-utung Ujọn angwu u maa wu bendi umbwo be be he igaadye be de-e gbe le aki angi Ujeso Kristi u shi. A sọm abe hwaa le Ujeso, 3le be le bii he le, “Wo na Ujọn a ma de le wo ba a, ha li ndọ lishi undi ususo a?”
4Ujeso a de be le, “Ma tem le de Ujọn biwọm abi ma gyo, ma mbee nde. 5Bendi abe be hwọ ashi be fel nda, abe be hwo abee be fel tan, abe akpaa be taa, abe be kwọm atyung be fel gyo, akwọm a wum, bendi-likaa be gyo kisọm kinunung. 6Kukwun ku yi ke undi uyang-yang angwu u tyang ityang gbe le mi ye.”
7Nya ana bendi-utung Ujọn be kung tem gye, Ujeso a keb akọng-ale ha bendi gbam abe be yi ha gbe le Ujọn. A bii abe le, “He kunyọng ahwu ma ma le hwaa le Ujọn he afee ugbaa-libeb, ma ma ndọ lishi le ma la nda kibang a ha? Abia angi kufem ku shi nii angi a, ha ma maa la nda kibang a? 8Ma maa la nda undi angwu a shi bigbọ binunung a? Bendi abe be shi bigbọ kitaa ana, be mbu kingbeb, be nda he ishaale besu a. 9Ma ma ndọ lishi le ma la nda kibang a? Utye-ugie kisọm Unim a ye a?” A tem le shi fan le, Eng, ukpọ ma ngye le ma ma nde undi angwu a dyam hwo bendi abe be tye ugie kisọm Unim abe le-iti. 10Ujọn na undi angwu u tye ugie kisọm Unim a ma fee he kushia Unim gbe le he le-iti le Unim a de le,
“ ‘Unwaa-kisọm ugi u yi nyin, mi ba sọm he ta-a le he kushu he
u shi kukwo ndọ a.’#11:10 Umalakai 3:1
11Kigyang-kigyang mi de men le, Ujọn angwu u maa wu bendi umbwo a ma dyam hwo bendi-gye puu, ukpọ undi uyang-yang angwu a zen hwo he kiteng kusu lifung-atabe a dyam hwo-e. 12Kung le he kunyọng ahwu Ujọn angwu u maa wu bendi umbwo kpam be wu kunyin i nyin, kiteng kusu Unim ki yi he linaa, bendi be-gyọng be naa linaa he ashi. 13Bitye-ugie kisọm Unim puu le Iten Umosis be maa kọng gba le kiteng kusu Unim kpam be kwọm he kunyọng ahwu Ujọn a maa wu bendi umbwo. 14Gbe ma fe lityam ha kisọm kibel, Ujọn u yi Elaija angwu be ma kọng gbe le abele uma a. 15Undi uyang-yang angwu u yi le atyung kigyo, u gyo.”
16Ujeso a mbee bii le, “Mi kung ugbe angwun paa ha kibang a? Be yi na inwaa-bwan i kwu he ushokwo kate na. Likwu ken li ko da likwu angyel le:
17“ ‘Li gwee upipi gyam agyam igọ fe men,
ma ngyọ ye.
Li gyam agyam lihwu,
men ma kii ye.’
18Ujọn a maa ndo itung, u ngwo kutyo ye, bendi be maa da le ikeb ibibi i yi he ahe. 19Mi Unwaa undi-gye, mi be, mi za bizizi, mi ngwo bingwu-ngwo, ukpọ ma kọng le, ‘Ma nde ungikye angwun, u yi undi kupuu a, u mbee ngwo betyo kaang. U yi udim bendi abe be kpe ukpanda le bendi abe be shi biban.’ Ukpọ lishi-abyele li tyung gboo gba he aki angi li shi a.”
Ki ban amen shie: abọng angi a shi beshi ye
(Luk 10:13-15)
20Ujeso a kọng bia bendi ashi angi a ma shi bikwole-kuhwo gbam, likọye be bel atyam le he biban ye. 21A de le, “Ki ban amen shie, men bendi Ukorazin! Ki ban amen shie, men bendi Ubesaida! Mi shi bikwole-kuhwo he Utaya le Usaidọn na mi shi ha amen kubọng nyin, hang bendi abe ha be fe bihwọm akpen, be kem atyung wu kuhwobel le-iti he ki tyung le be bel atyam le he biban bibel. 22Ma ngye le he atan-lengi angwun Unim u ba nda bendi Utaya le Usaidọn beshi hwa men he liti angi u tang bendi ushe. 23Men bendi Ukapanum befe, ma kọng le Unim u ba kung amen gya he kusi-kusi a? Dia! U ba sọm amen gya he kusu-behwuu. Bikwole-kuhwo abi mi shi ha amen kubọng i, mi shi abi he Usọdọm a, hang Usọdọm u so igye. 24Ma ngye le Unim u ba nda bendi Usọdọm beshi he liti ushe ama-ale hwa amen.”
Unwaa u fem Atyam tyung
(Luk 10:21-22)
25He kunyọng kumen ana Ujeso a kung kọng ha Unim le, “Atyagi, Ada angwu u yi le lifung-atabe le igye, mi pee a na wo kung biwọm abi wo ndyel le ha bendi abe be bilishi le abe be ngye biwọm, tyung bendi abe be ngye kiwọm ye. 26Eng, Atyagi, ashin na ki ngbeb-a wogyang le wo shi.
27“Atyagi a kung biwọm puu fe-m ha abwo. Ki yi le undi angwu a ngye-m mi Unwaama, dang fem Atyagi tyang ye. Ki shi le undi angwu a ngye Atyagi dang fem imi Unwaama, le bendi abe mi kee le mi fem he tyung abe tyang ye.
28“Men puu abe ma so bengbeb be ngbeb amen, ma be hwaa le mi, mi ba ka amen kunyọng ashole. 29Ma kung ukpung ugi so, ma hwọ le ha mi, likọye mi mbwa kuhwo, ma ma nda kunyọng ashole ka likpan limen. 30Likọye ukpung ugi u yi pie-pie u ngbeb ye.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.