Umatiu 12
12
Ujeso na u yi ugyang liti-uwel Ijuus
(Mak 2:23-28; Luk 6:1-5)
1Ha he kunyọng kumen ana, Ujeso a le tan gbe he utia utung ha bendi-utung bema he liti-uwel Ijuus. Itung i maa ndo bendi-utung bema. Be maa fel tang biwọm abi bi yi itọng na abung, gbel abi he abwo za. 2Nyọng bendi Iferesis be nde ashin, be kung de Ujeso le, “Nde! Bendi-utung begang be ban uten liti-uwel.”
3Ujeso a kung fan abe le, “Ma wa bo gbe le kiwọm ashi Usu Udebid a ma shi he kunyọng ahwu itung i maa ndo abe befe le bendi-utung bema ye a? 4A ma gye he Ushọm Unim le kung ibred angi i yi tata ke Unim kung zi teng ke bendi-utung bema. Ma na Iten ityan i bọng le be zi angi ye ọ, be ma zi angi, ukpọ bendi abe be shang Unim befe-befe na ki yi le be za angi. 5Ma wa bo ashia Iten Umosis le he liti-uwel bendi abe be shang Unim he Ushọm Unim be ma ban uten liti-uwel ye a? Be maa za libi he ashele ashin ye. 6Mi de men le ma ngye le kiwọm ki yi nyin inyin ashi ki dyam hwo Ushọm Unim. 7Kiwọm ashi be ma fee ndọ le-iti le mi kee bitwole ashang-ale a ye, mi kee beshi atyung-ale a,#12:7 Uhosia 6:6 ma ngye likpe ashi hang ma ben bendi abe be zi likpọng ye. 8Mi Unwaa undi-gye na mi yi ugyang liti-uwel.”
9A gbe le he kiteng kimen ana le ngwee he ushọm Unim angwu Ijuus i kwu liwu. 10Undi ususo a ma yi ha angwu a ma hwo kubwo. Bendi besuso abe be yi ha, be kee le be kee ashi be kwu kubwo kwu-e le a mbu he Iten. Be bii he le, “Iten ityan i bọng le undi u mbee undi he liti-uwel Ijuus a?”
11Ujeso a kung bii abe le, “Gbe undi ken he liwu limen u nya yi le utia ken, gbe utia angwu ha a mbu fe he libel he liti-uwel, undi angwu ha u nya fem he ye a? 12Undi-gye u nya yi he kukpo hwo utia ye a! He ashin, Iten ityan i bọng le ki ngbeb le li shi kinunung he liti-uwel.”
13A kung de ungikye umen angwu a hwo kubwo ana le, “nda kubwo kugang.” A nda ahwu, ku tem fel kang-kang nya ana ahwel ku yi. 14Bendi Iferesis be kung gbe le ha le shi itim le be gwu-e.
Unwaa-kisọm angwu Unim a waa
15Ujeso a gyo gbe le shi, a gbe le ha he kiteng kimen ana. Bendi be tye kwuo pwọm he. A ma mbee bendi-angbam puu abe be pwọm he. 16U tye be uten le be de undi gbe le he ye. 17Ashin ki fe sho ashi utye-ugie kisọm Unim Azaya a ma kọng le-iti le,
18“Ubọyi ugi angwu mi waa sọm na u yi i.
Ki nyin mi le he kindee-kindee.
Mi ba kung Ukatia Kunyọng ugi fa he.
Unwaa umen i u ba da abọng puu gba le
kigyang kigi.
19U ba shwan kushwan ọ,
ngwu u gaa kigegaa ọ ye,
u ba naa he kukwo gaa kigegaa ye.
20Kubia ahwu ku nii shi he itang ọ,
u ba tyam ahwu ye.
Kinde he uwuu ashi ki la nim ọ, u ba nim ashi ye.
U ba ngib lityam kpam u gbe shi kigyang
ki hwo kibibi.
21Gbe he lizen lima abọng puu be ba ndọ lishi he ahe.”#12:21 Azaya 42:1-4
Ujeso be fe le Ubelzebub
(Mak 3:20-30; Luk 11:14-23)
22Bendi besuso be ha be le ungikye ususo be hwaa le Ujeso. Ungikye umen i a ma hwọ ashi, ukwọm-umbel likọye ikeb ibibi i ma yi he ahe. Ujeso a mbee he. A maa fel kọng likọng, u mbee nde. 23Ki kwu bendi puu he kuhwo, be fel bii le, “Unwaa Udebid na u nya yi nyin ye a?”
24Bendi Iferesis be kung fan abe le: “U ndo ikeb ibibi le gbe Ubeelzebub angwu u yi usu bibibi a ke-e ikeb a.”
25Ujeso a ma ngye igim ibel, a kung de be le, “Kiteng kusu ashi ki tang he abwo keb ando-ale ha bende ki ha ndu naa ye. Kubọng ọ, kikwu-lihwan ọ ashi ki tang he abwo keb ando-ale ki ha ndu naa ye. 26Gbe Usu bibibi a ndo ha Usu bibibi ha a tang kuhwo-ma he abwo. Kiteng kusu kima ki naa na a? 27Nyọng ki yi i nyin, ma de le mi ndo ikeb ibibi le gbe Ubeelzebub a ke-m ikeb a. Ayang a ha ke bendi bemen ikeb le be ndo angi? Bendi bemen be-gyang be tyung le ma mbeb. 28Ukpọ gbe Ukatia Kunyọng na u ke-m ikeb le mi ndo ikeb ibibi, ashin ki tyung le ikeb kiteng kusu Unim i fel he liwu limen ma.
29“Ki yi le undi angwu u gye he ushọm undi angwu u yi le ikeb le kung he bigbọ faale afa-ale a kwu-e bwọ indii ukpọng ye. U kwa he bwọ indii, u ha zi kute kung bigbọ bima le ha he ushọm.
30“Undi uyang-yang angwu u yi utung ha ami ye, u yi linaa ha ami, undi uyang-yang angwu u kpel mi kam i kam ye, u peb ipeb. 31He atan-lengi angwun mi de men le, kitaa kiban kiyang-yang le adal-ale ungwu uyang-yang u kpa atyang-ale ke. Ukpọ, akọng-ale bia Ukatia Kunyọng u kwa le atyang-ale ke ye. 32Undi uyang-yang angwu a kọng ban imi Unwaa undi-gye, Unim u tyang ka he, ukpọ undi uyang-yang angwu a kọng ban Ukatia Kunyọng u tyang ka he ye, ma he ugbe angwun ọ, ugbe angwu u be be ọ.”
33Ujeso a gye kushu kọng le, “Gbe undi a kee agbe anunung, u kwan ukwan ununung. Gbe undi a kwan ukwan ubibi, u kwa le agbe abibi. Be ngya ukwan uyang-yang gba he agbe angi u wum a. 34Men ibu ishii ibibi, ma nya kọng kinunung na a nyọng ma yi bebibi? Ungwu undi u kọng kiwọm ashi ki sho he ahe lityam a. 35Undi ununung u ba le kinunung le he ahe lityam angi li sho le biwọm binunung. Undi ubibi u be le bibibi le he ahe lityam angi li sho le biwọm bibibi. 36Mi kee le ma ngye le, he liti angi Unim u be tang ushe, undi uyang-yang u ba ka ubo igie ilaa iyang-yang angi a ma kọng. 37Gbe he igie igang na wo zi likpọng, gbe ha igie igang imen, na wo zi libi.”
Kitaa Ujona
(Mak 8:11-12; Luk 11:29-32)
38He ashin bitisha Iten le abe Iferesis be kung de Ujeso le, “Itisha, li kee le wo shi kitaa tyung li li nde.”
39Ujeso a kung fan le, “Men bendi abe he ati anyin ma fel bebibi, ma tem fa Unim ọ ye. Ma kee le ma nda kikwole-kuhwo ashi ki tyung ikeb Unim, ukpọ ma ha ndu nda kisuso fem ashi utye-ugie kisọm Unim Ujona tyang ye. 40Nya ana Ujona a ma kwu he lifung ukwan ukandi ati akie le besu bekie, kitaa kimen na mi Unwaa undi-gye, mi be kwu ati akie, besu bekie he kudyan igye. 41He liti angi Unim u be tang bendi ushe, bendi Unineve be ba bo kinaa ha, be ke men libi likọye befe be ma bel atyam le he biban bibel he kunyọng ahwu be ma gyo Ujona a bun igie Unim. Undi ususo u yi utung ha amen nyin a dyam hwo Ujona. 42He liti limen ana, usu ungingye angwu u be le he Ushiba u ba bo kinaa ha, u ke bendi abe ati anyin libi likọye a ma be le kigbe kaang le gyo biwọm abi Usu Usolomọn u maa hwọ le lishi-abyele. Undi ususo u yi utung ha amen nyin kanaa-anaa i a dyam hwo Usolomọn.”
43Ujeso a mbee de be le, “He kunyọng ahwu ikeb ibibi i fem le ha undi, i la tan mbee libeb kee kiteng ashi i kwu sho kunyọng. Gbe i nde ye, 44i tem kọng ha kuhwo-ngi le, ‘Mi ba tem gya he ushọm angwu mi ma gbe tyang.’ Gbe i le nde ushọm umen ana u yi utaa, be tie he ndọ utaa-utaa, be kam he ndọ del-del, 45i ha tem la ba le ikeb ibibi isuso idyọng-ifee angi i ban hwo angi igyang, tem ba ngwee ha ushọm umen ana, be shi-e u fel ban hwo kitaa a ma yi le he ukpi-kikwu. Kitaa kimen i na ki be shi ha bendi bebibi abe he ugbe angwun.”
Anam Ujeso le bebwaa-nde bengikye
(Mak 3:31-35; Luk 8:19-21)
46Nya ana Ujeso u maa kọng ha liwu bendi, anam le bebwaa-nam bengikye be be naa he igye, be kee le be la kọng he ahe. 47Undi ususo a kung de-e le, “anaa le bebwaa-naa bengikye be yi naa he igye, be kee le be kọng ha awo.”
48A fan he le, “Ayang u yi andagi, beyang be yi bebwaa-ndagi bengikye?” 49A kung kubwo tyung bendi-utung bema, u de le, “Aben na be yi andagi le bebwaa-ndagi bengikye. 50Undi uyang-yang angwu a shi ashi atyagi angwu lifung-atabe a kee, na u yi unwaa-ndagi ungikye le ungingye le andagi.”
Currently Selected:
Umatiu 12: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Umatiu 12
12
Ujeso na u yi ugyang liti-uwel Ijuus
(Mak 2:23-28; Luk 6:1-5)
1Ha he kunyọng kumen ana, Ujeso a le tan gbe he utia utung ha bendi-utung bema he liti-uwel Ijuus. Itung i maa ndo bendi-utung bema. Be maa fel tang biwọm abi bi yi itọng na abung, gbel abi he abwo za. 2Nyọng bendi Iferesis be nde ashin, be kung de Ujeso le, “Nde! Bendi-utung begang be ban uten liti-uwel.”
3Ujeso a kung fan abe le, “Ma wa bo gbe le kiwọm ashi Usu Udebid a ma shi he kunyọng ahwu itung i maa ndo abe befe le bendi-utung bema ye a? 4A ma gye he Ushọm Unim le kung ibred angi i yi tata ke Unim kung zi teng ke bendi-utung bema. Ma na Iten ityan i bọng le be zi angi ye ọ, be ma zi angi, ukpọ bendi abe be shang Unim befe-befe na ki yi le be za angi. 5Ma wa bo ashia Iten Umosis le he liti-uwel bendi abe be shang Unim he Ushọm Unim be ma ban uten liti-uwel ye a? Be maa za libi he ashele ashin ye. 6Mi de men le ma ngye le kiwọm ki yi nyin inyin ashi ki dyam hwo Ushọm Unim. 7Kiwọm ashi be ma fee ndọ le-iti le mi kee bitwole ashang-ale a ye, mi kee beshi atyung-ale a,#12:7 Uhosia 6:6 ma ngye likpe ashi hang ma ben bendi abe be zi likpọng ye. 8Mi Unwaa undi-gye na mi yi ugyang liti-uwel.”
9A gbe le he kiteng kimen ana le ngwee he ushọm Unim angwu Ijuus i kwu liwu. 10Undi ususo a ma yi ha angwu a ma hwo kubwo. Bendi besuso abe be yi ha, be kee le be kee ashi be kwu kubwo kwu-e le a mbu he Iten. Be bii he le, “Iten ityan i bọng le undi u mbee undi he liti-uwel Ijuus a?”
11Ujeso a kung bii abe le, “Gbe undi ken he liwu limen u nya yi le utia ken, gbe utia angwu ha a mbu fe he libel he liti-uwel, undi angwu ha u nya fem he ye a? 12Undi-gye u nya yi he kukpo hwo utia ye a! He ashin, Iten ityan i bọng le ki ngbeb le li shi kinunung he liti-uwel.”
13A kung de ungikye umen angwu a hwo kubwo ana le, “nda kubwo kugang.” A nda ahwu, ku tem fel kang-kang nya ana ahwel ku yi. 14Bendi Iferesis be kung gbe le ha le shi itim le be gwu-e.
Unwaa-kisọm angwu Unim a waa
15Ujeso a gyo gbe le shi, a gbe le ha he kiteng kimen ana. Bendi be tye kwuo pwọm he. A ma mbee bendi-angbam puu abe be pwọm he. 16U tye be uten le be de undi gbe le he ye. 17Ashin ki fe sho ashi utye-ugie kisọm Unim Azaya a ma kọng le-iti le,
18“Ubọyi ugi angwu mi waa sọm na u yi i.
Ki nyin mi le he kindee-kindee.
Mi ba kung Ukatia Kunyọng ugi fa he.
Unwaa umen i u ba da abọng puu gba le
kigyang kigi.
19U ba shwan kushwan ọ,
ngwu u gaa kigegaa ọ ye,
u ba naa he kukwo gaa kigegaa ye.
20Kubia ahwu ku nii shi he itang ọ,
u ba tyam ahwu ye.
Kinde he uwuu ashi ki la nim ọ, u ba nim ashi ye.
U ba ngib lityam kpam u gbe shi kigyang
ki hwo kibibi.
21Gbe he lizen lima abọng puu be ba ndọ lishi he ahe.”#12:21 Azaya 42:1-4
Ujeso be fe le Ubelzebub
(Mak 3:20-30; Luk 11:14-23)
22Bendi besuso be ha be le ungikye ususo be hwaa le Ujeso. Ungikye umen i a ma hwọ ashi, ukwọm-umbel likọye ikeb ibibi i ma yi he ahe. Ujeso a mbee he. A maa fel kọng likọng, u mbee nde. 23Ki kwu bendi puu he kuhwo, be fel bii le, “Unwaa Udebid na u nya yi nyin ye a?”
24Bendi Iferesis be kung fan abe le: “U ndo ikeb ibibi le gbe Ubeelzebub angwu u yi usu bibibi a ke-e ikeb a.”
25Ujeso a ma ngye igim ibel, a kung de be le, “Kiteng kusu ashi ki tang he abwo keb ando-ale ha bende ki ha ndu naa ye. Kubọng ọ, kikwu-lihwan ọ ashi ki tang he abwo keb ando-ale ki ha ndu naa ye. 26Gbe Usu bibibi a ndo ha Usu bibibi ha a tang kuhwo-ma he abwo. Kiteng kusu kima ki naa na a? 27Nyọng ki yi i nyin, ma de le mi ndo ikeb ibibi le gbe Ubeelzebub a ke-m ikeb a. Ayang a ha ke bendi bemen ikeb le be ndo angi? Bendi bemen be-gyang be tyung le ma mbeb. 28Ukpọ gbe Ukatia Kunyọng na u ke-m ikeb le mi ndo ikeb ibibi, ashin ki tyung le ikeb kiteng kusu Unim i fel he liwu limen ma.
29“Ki yi le undi angwu u gye he ushọm undi angwu u yi le ikeb le kung he bigbọ faale afa-ale a kwu-e bwọ indii ukpọng ye. U kwa he bwọ indii, u ha zi kute kung bigbọ bima le ha he ushọm.
30“Undi uyang-yang angwu u yi utung ha ami ye, u yi linaa ha ami, undi uyang-yang angwu u kpel mi kam i kam ye, u peb ipeb. 31He atan-lengi angwun mi de men le, kitaa kiban kiyang-yang le adal-ale ungwu uyang-yang u kpa atyang-ale ke. Ukpọ, akọng-ale bia Ukatia Kunyọng u kwa le atyang-ale ke ye. 32Undi uyang-yang angwu a kọng ban imi Unwaa undi-gye, Unim u tyang ka he, ukpọ undi uyang-yang angwu a kọng ban Ukatia Kunyọng u tyang ka he ye, ma he ugbe angwun ọ, ugbe angwu u be be ọ.”
33Ujeso a gye kushu kọng le, “Gbe undi a kee agbe anunung, u kwan ukwan ununung. Gbe undi a kwan ukwan ubibi, u kwa le agbe abibi. Be ngya ukwan uyang-yang gba he agbe angi u wum a. 34Men ibu ishii ibibi, ma nya kọng kinunung na a nyọng ma yi bebibi? Ungwu undi u kọng kiwọm ashi ki sho he ahe lityam a. 35Undi ununung u ba le kinunung le he ahe lityam angi li sho le biwọm binunung. Undi ubibi u be le bibibi le he ahe lityam angi li sho le biwọm bibibi. 36Mi kee le ma ngye le, he liti angi Unim u be tang ushe, undi uyang-yang u ba ka ubo igie ilaa iyang-yang angi a ma kọng. 37Gbe he igie igang na wo zi likpọng, gbe ha igie igang imen, na wo zi libi.”
Kitaa Ujona
(Mak 8:11-12; Luk 11:29-32)
38He ashin bitisha Iten le abe Iferesis be kung de Ujeso le, “Itisha, li kee le wo shi kitaa tyung li li nde.”
39Ujeso a kung fan le, “Men bendi abe he ati anyin ma fel bebibi, ma tem fa Unim ọ ye. Ma kee le ma nda kikwole-kuhwo ashi ki tyung ikeb Unim, ukpọ ma ha ndu nda kisuso fem ashi utye-ugie kisọm Unim Ujona tyang ye. 40Nya ana Ujona a ma kwu he lifung ukwan ukandi ati akie le besu bekie, kitaa kimen na mi Unwaa undi-gye, mi be kwu ati akie, besu bekie he kudyan igye. 41He liti angi Unim u be tang bendi ushe, bendi Unineve be ba bo kinaa ha, be ke men libi likọye befe be ma bel atyam le he biban bibel he kunyọng ahwu be ma gyo Ujona a bun igie Unim. Undi ususo u yi utung ha amen nyin a dyam hwo Ujona. 42He liti limen ana, usu ungingye angwu u be le he Ushiba u ba bo kinaa ha, u ke bendi abe ati anyin libi likọye a ma be le kigbe kaang le gyo biwọm abi Usu Usolomọn u maa hwọ le lishi-abyele. Undi ususo u yi utung ha amen nyin kanaa-anaa i a dyam hwo Usolomọn.”
43Ujeso a mbee de be le, “He kunyọng ahwu ikeb ibibi i fem le ha undi, i la tan mbee libeb kee kiteng ashi i kwu sho kunyọng. Gbe i nde ye, 44i tem kọng ha kuhwo-ngi le, ‘Mi ba tem gya he ushọm angwu mi ma gbe tyang.’ Gbe i le nde ushọm umen ana u yi utaa, be tie he ndọ utaa-utaa, be kam he ndọ del-del, 45i ha tem la ba le ikeb ibibi isuso idyọng-ifee angi i ban hwo angi igyang, tem ba ngwee ha ushọm umen ana, be shi-e u fel ban hwo kitaa a ma yi le he ukpi-kikwu. Kitaa kimen i na ki be shi ha bendi bebibi abe he ugbe angwun.”
Anam Ujeso le bebwaa-nde bengikye
(Mak 3:31-35; Luk 8:19-21)
46Nya ana Ujeso u maa kọng ha liwu bendi, anam le bebwaa-nam bengikye be be naa he igye, be kee le be la kọng he ahe. 47Undi ususo a kung de-e le, “anaa le bebwaa-naa bengikye be yi naa he igye, be kee le be kọng ha awo.”
48A fan he le, “Ayang u yi andagi, beyang be yi bebwaa-ndagi bengikye?” 49A kung kubwo tyung bendi-utung bema, u de le, “Aben na be yi andagi le bebwaa-ndagi bengikye. 50Undi uyang-yang angwu a shi ashi atyagi angwu lifung-atabe a kee, na u yi unwaa-ndagi ungikye le ungingye le andagi.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.