Uluk 6
6
Ujeso u yi le ikeb gbe le liti-uwel
(Mat 12:1-8; Mak 2:23-28)
1Ujeso a maa tan gba he utia le bendi-utung bema he liti-uwel Ijuus. Bendi-utung bema be tang biwọm abi bi yi itọng na abung gbel abi he abwo keb azele. 2Iferesis isuso i bii abe le, “Ki shi naa, ma shi kiwọm he liti-uwel angi Iten ityan i de le li shi ye?”
3Ujeso a kung fan abe le, “Ma wa bo gbe le kiwọm ashi Usu Udebid a ma shi he kunyọng ahwu itung i ma ndo he, befe le bendi-utung bema, ye a? 4A ma gye he Ushọm Unim. Ibred angi i yi tata ke Unim, a ma kung angi zi teng ke bendi-utung bema. Ki shi le Iten ityan i bọng le undi ususo u zi angi pel ha bendi abe be shang Unim ye.” 5A ha mbee de be le, “Mi Unwaa undi-gye mi yi le ikeb le mi da bendi ashi be shi he liti-uwel.”
Ujeso a mbee ungikye angwu a hwo kubwo
(Mat 12:9-14; Mak 3:1-6)
6He liti-uwel lisuso Ujeso a gye he ushọm Unim angwu be kwu liwu le hwọ bendi biwọm. Ungikye ususo a ma yi ha angwu a hwo kubwo lizen. 7Bitisha Iten le bendi Iferesis abe be ma yi ha be maa fel kang Ujeso he be nde le u mbee undi nya he liti-uwel a. Be maa kang he na likọye be kee ashi be kwu kubwo kwu-e le a mbu he Iten. 8Ujeso a ngye igim ibel. A ha de ungikye umen angwu a hwo kubwo ana le u bo gye he kushu. Ungikye ana a bo le naa ha.
9Ujeso a kung de be le, mi bii amen, “Kibang Iten ityan i bọng le li shi he liti-uwel? I bọng le li shi kinunung a, ha li shi kibibi a? Li kpan undi ikpan a, ha li gwu-e igwu?”
10A bel ashi shun abe kel-kel. A ha de ungikye ana le, “nda kubwo kugang.” A nda ahwu, ku tem fel kang-kang na ku ma yi. 11Be ma fel he ingyo kaang, be fel tim ha bende kiwọm ashi be shi Ujeso.
Ujeso a waa Bebwaa-kisọm lihwo le be befee
(Mat 10:1-4; Mak 3:13-19)
12Ha he kunyọng kumen ana Ujeso a mbo gye he ukwel le kọng ha Unim. A kwu ha kọng ha Unim kpam ashi a gbe taa. 13Ashi a taa, a ko bendi-utung bema le waa kung bendi lihwo le be befee le be kwu bebwaa-kisọm bema, he u sọm abe. Aben na a ma waa:
14Usaimọn (angwu be ko le Ipita), le unwaa-nde Andru, le
Ujems, le
Ujọn, le
Ufilip, le
Ubatolomi, le
15Umatiu, le
Utọmas, le
Ujems, angwu u yi unwaa Alfeyus le,
Usaimọn angwu a ma yi Izilọt (liwu Ijuus angi i kee le be kwa le kuhwobel), le
16Ujudas angwu u yi unwaa Ujems,
Ujudas Iskariyọt angwu a ma ndyeb Ujeso zi.
Kukwun le atye
(Mat 4:23-25)
17Ujeso a be le Bebwaa-kisọm bema le he ukwel, a be naa he kudidyang kipi. Bendi gbam abe be ma pwọm he le abe be be le he Ujudia puu le Ujeruselem le bipi abi be ko le Utaya le Usaidọn abi bi yi gwaa ha umbwo ukandi be ma yi ha. 18Be ma be le he be gyo he, u mbee abe. Bendi abe ikeb ibibi i ma yi ha abe ọ be ma be hwaa le he le u mbee abe. 19Bendi puu be maa kaa he be tyọ he abwo likọye ikeb i maa ba le he ahe mbee abe puu.
Ujeso a hwọ abe gbe le igọ le kimbwee
(Mat 5:1-12)
20Ujeso a bel ashi nde bendi-utung bema, u de be le,
“Men bendi-likaa, kukwun ku yi ke men
le gbe men ma yi le abwo he kiteng kusu Unim a.
21Men abe itung i ndo amen kanaa-anaa i,
igọ i yi ke men le gbe ma be gwul.
Men abe ma kii kanaa-anaa i nyin,
kukwun ku yi ke men le gbe ma be yal gọ.
22He kunyọng ahwu bendi be tel amen,
be mọ amen, be buu amen atye,
be kọng kibibi gbe le men likọye ma yi
ke-m mi Unwaa undi-gye, ha kukwun ku yi kumen a.
23“Ma kwu le igọ he kunyọng ahwu abin puu bi shi fe men, ma yal gọ likọye kuke kukandi ku yi ndọ amen he lifung-atabe. Kitaa ashin na betiebel be ma teb le bitye-ugie kisọm Unim.
24“Ukpọ men abe ma mbu kingbeb, ki ban amen he kuhwo shie
ma mbu kingbeb kanaa-anaa i nyin likọye ma kpe itie imen ma.
25Ki ba kwa kibibi ka amen abe ma gwul kanaa-anaa i nyin likọye le he kushu itung i ba ndo amen.
Ki ba kwa kibibi ka amen abe ma gọ igọ kanaa-anaa nyin likọye ma ba kya, ma fe akpen.
26Ki ba kwa kibibi ka amen he kunyọng ahwu bendi puu be kọng kinunung gbe le men.
Bitye-ugie iman ọ,
betya-bel be maa kọng kinunung gba le be.”
Ujeso a hwọ gbe le akwole le benyin ha bendi-linaa
(Mat 5:38-48; 7:12a)
27Ujeso a mbee de be le, “Mi da amen abe ma dang kutyung gyo mi le ki nyin amen le bendi-linaa bemen; ma shi kinunung ha bendi abe be tel amen. 28Ma de Unim le u ke bendi abe be buu amen atye kukwun, ma kọng ha Unim ke bendi abe be teb le men. 29Gbe undi a kpam a kubwo he kunaa, bel ahwu ken ndọ he he u mbee kpam. Gbe undi a waa kpa-a ukpe aliga angwu le he igye, tyang he u mbee waa kpe angi le ha afee ọ titi. 30Gbe undi a nyọng-a kiwọm, wo ke-e ashi. Gbe undi a kung a kiwọm, de-e le u tem le shi ka-a ye. 31Biwọm puu abi wo kee le bendi be shi ka-a, wo kung abi shi ke be.
32“Gbe bendi abe ki nyin abe le wo befe-befe na ki nyin a le be, ha wo kpe le wo kpa kukwun ye. Bendi-biban ọ, ki nyin abe le bendi abe ki nyin abe le be. 33Gbe bendi abe be shi kinunung ha awo befe-befe na wo shi kinunung ha abe, ha wo kpe le wo kpa kukwun ye. Bendi-biban ọ be sha ashina. 34Gbe wo pwee bendi abe wo gim le be ba tem le ashi be pwee a ka-a, ha wo kpe le wo kpa kukwun ye. Bendi-biban ọ be pwee bende biwọm, be ndọ lishi le be tem le bi ka abe na be pwee. 35Ki nyin amen le bendi-linaa bemen, ma shi kinunung ha abe. Ma pwee abe kiwọm le lishi andọ-ale le be tem le shi ka men ye, ma ma ba kpa kuke kukandi, ma kwu bebwaa Unim angwu a dyam hwo puu. Ufe u sha kinunung ha bendi abe be pee he ye le abe bebibi. 36Ma kwu le beshi ha bendi nya ana Atyamen Unim u yi le be.”
Ujeso a hwọ gbe le atang-ale undi ushe
(Mat 7:1-5)
37Ujeso a gye kushu kọng le, “Ma tang undi ushe ye, ma Unim ọ u tang amen ushe ye. Ma ke undi libi ye, ma Unim ọ u ka amen libi ye. Ma tyang ke bendi, ma Unim ọ u tyang ka amen. 38Ma ke bendi kuke, ma Unim u ba ka amen. U ba kee kiwọm shwa lululu ngya abwo, yi ashi, kee shwa bwel-bwel-bwel bel fa men. Kigbọ ashi ma kee ke undi na Unim u be kee ke men.”
39Ujeso a mbee bun ityang de be le, “Uhwọ-ashi u nya teng uhwọ-ashi a? Dia! Gbe a shi na, ha befe puu befee be mbwa fa he libel. 40Unwaa ushukwul u dyam hwa undi angwu u hwọ he ye, ukpọ gbe angwu a mbee le ahwọ-ale puu, u fel na undi angwu a hwọ he.
41“Ki shi na a, wo nde kanwaa kibia ake ka yi unde-gang he utọng-shi, ki gbee a gbe le ubim ukwan angwu u yi kie he ugang utọng-shi ye? 42Na wo nya de unde-gang le, ‘Ndọ, mi fem a kanwaa kibia le he utọng-shi,’ ukpọ wo nde ubim ukwan angwu u yi kie he ugang utọng-shi ye? Wo undi bikpe-ashi, wo o fem ubim ukwan le ha awo utọng-shi, ma wo nda ngwọng fem unde-gang kanwaa kibia le he ahe utọng-shi.”
Ujeso a kọng gbe le ukwan le agbe ama
(Mat 7:16-20; 12:33-35)
43Ujeso a mbee kọng le, “Ukwan ununung u wum agbe abibi ye, ukwan ubibi u wum agbe anunung ye. 44Be ngya ukwan uyang-yang gba he agbe angi u wum a. Wo ha ndu bung agbe Uvine le he bidang, nyọng wo bung agbe Ufig le he ítọng ye. 45Undi ununung u ba le kinunung le he ahe lityam angi li sho le biwọm binunung, undi ubibi u be le bibibi le he ahe lityam angi li sho le biwọm bibibi. Ungwu undi u kọng kiwọm ashi ki sho he ahe lityam a.”
Bendi lingye le akpelye abe be tye
(Mat 7:24-27)
46“Kibang a, ma ko mi le Ada, ukpọ ashi mi de men le ma shi, ma shi ashi ye?” 47U de be le, “Mi tyung amen kitaa undi u kwu, gbe a be hwaa le mi, u dang kutyung gyo igie igi, u shi angi. 48U yi na ungikye angwu a tye ushọm angwu a tem libel gye he liten le kpee ha kukọ, u ha tye lishii ushọm pwọm ha. Umbwo a ndọ kaang sho le wu ha he kipi ushọm u yi. A ma gyeb he ye, likọye ungikye ana a tye-e ngbeb-ngbeb. 49Ukpọ undi angwu a gyo igie igi shi angi ye, u yi na undi angwu a tye ushọm faale lishii atyele. He kunyọng ahwu umbwo a sho be kib ushọm angwun, a gyeb shi he itang kpem. Agyeb-ale ushọm angwun a ma ban kaang.”
Currently Selected:
Uluk 6: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Uluk 6
6
Ujeso u yi le ikeb gbe le liti-uwel
(Mat 12:1-8; Mak 2:23-28)
1Ujeso a maa tan gba he utia le bendi-utung bema he liti-uwel Ijuus. Bendi-utung bema be tang biwọm abi bi yi itọng na abung gbel abi he abwo keb azele. 2Iferesis isuso i bii abe le, “Ki shi naa, ma shi kiwọm he liti-uwel angi Iten ityan i de le li shi ye?”
3Ujeso a kung fan abe le, “Ma wa bo gbe le kiwọm ashi Usu Udebid a ma shi he kunyọng ahwu itung i ma ndo he, befe le bendi-utung bema, ye a? 4A ma gye he Ushọm Unim. Ibred angi i yi tata ke Unim, a ma kung angi zi teng ke bendi-utung bema. Ki shi le Iten ityan i bọng le undi ususo u zi angi pel ha bendi abe be shang Unim ye.” 5A ha mbee de be le, “Mi Unwaa undi-gye mi yi le ikeb le mi da bendi ashi be shi he liti-uwel.”
Ujeso a mbee ungikye angwu a hwo kubwo
(Mat 12:9-14; Mak 3:1-6)
6He liti-uwel lisuso Ujeso a gye he ushọm Unim angwu be kwu liwu le hwọ bendi biwọm. Ungikye ususo a ma yi ha angwu a hwo kubwo lizen. 7Bitisha Iten le bendi Iferesis abe be ma yi ha be maa fel kang Ujeso he be nde le u mbee undi nya he liti-uwel a. Be maa kang he na likọye be kee ashi be kwu kubwo kwu-e le a mbu he Iten. 8Ujeso a ngye igim ibel. A ha de ungikye umen angwu a hwo kubwo ana le u bo gye he kushu. Ungikye ana a bo le naa ha.
9Ujeso a kung de be le, mi bii amen, “Kibang Iten ityan i bọng le li shi he liti-uwel? I bọng le li shi kinunung a, ha li shi kibibi a? Li kpan undi ikpan a, ha li gwu-e igwu?”
10A bel ashi shun abe kel-kel. A ha de ungikye ana le, “nda kubwo kugang.” A nda ahwu, ku tem fel kang-kang na ku ma yi. 11Be ma fel he ingyo kaang, be fel tim ha bende kiwọm ashi be shi Ujeso.
Ujeso a waa Bebwaa-kisọm lihwo le be befee
(Mat 10:1-4; Mak 3:13-19)
12Ha he kunyọng kumen ana Ujeso a mbo gye he ukwel le kọng ha Unim. A kwu ha kọng ha Unim kpam ashi a gbe taa. 13Ashi a taa, a ko bendi-utung bema le waa kung bendi lihwo le be befee le be kwu bebwaa-kisọm bema, he u sọm abe. Aben na a ma waa:
14Usaimọn (angwu be ko le Ipita), le unwaa-nde Andru, le
Ujems, le
Ujọn, le
Ufilip, le
Ubatolomi, le
15Umatiu, le
Utọmas, le
Ujems, angwu u yi unwaa Alfeyus le,
Usaimọn angwu a ma yi Izilọt (liwu Ijuus angi i kee le be kwa le kuhwobel), le
16Ujudas angwu u yi unwaa Ujems,
Ujudas Iskariyọt angwu a ma ndyeb Ujeso zi.
Kukwun le atye
(Mat 4:23-25)
17Ujeso a be le Bebwaa-kisọm bema le he ukwel, a be naa he kudidyang kipi. Bendi gbam abe be ma pwọm he le abe be be le he Ujudia puu le Ujeruselem le bipi abi be ko le Utaya le Usaidọn abi bi yi gwaa ha umbwo ukandi be ma yi ha. 18Be ma be le he be gyo he, u mbee abe. Bendi abe ikeb ibibi i ma yi ha abe ọ be ma be hwaa le he le u mbee abe. 19Bendi puu be maa kaa he be tyọ he abwo likọye ikeb i maa ba le he ahe mbee abe puu.
Ujeso a hwọ abe gbe le igọ le kimbwee
(Mat 5:1-12)
20Ujeso a bel ashi nde bendi-utung bema, u de be le,
“Men bendi-likaa, kukwun ku yi ke men
le gbe men ma yi le abwo he kiteng kusu Unim a.
21Men abe itung i ndo amen kanaa-anaa i,
igọ i yi ke men le gbe ma be gwul.
Men abe ma kii kanaa-anaa i nyin,
kukwun ku yi ke men le gbe ma be yal gọ.
22He kunyọng ahwu bendi be tel amen,
be mọ amen, be buu amen atye,
be kọng kibibi gbe le men likọye ma yi
ke-m mi Unwaa undi-gye, ha kukwun ku yi kumen a.
23“Ma kwu le igọ he kunyọng ahwu abin puu bi shi fe men, ma yal gọ likọye kuke kukandi ku yi ndọ amen he lifung-atabe. Kitaa ashin na betiebel be ma teb le bitye-ugie kisọm Unim.
24“Ukpọ men abe ma mbu kingbeb, ki ban amen he kuhwo shie
ma mbu kingbeb kanaa-anaa i nyin likọye ma kpe itie imen ma.
25Ki ba kwa kibibi ka amen abe ma gwul kanaa-anaa i nyin likọye le he kushu itung i ba ndo amen.
Ki ba kwa kibibi ka amen abe ma gọ igọ kanaa-anaa nyin likọye ma ba kya, ma fe akpen.
26Ki ba kwa kibibi ka amen he kunyọng ahwu bendi puu be kọng kinunung gbe le men.
Bitye-ugie iman ọ,
betya-bel be maa kọng kinunung gba le be.”
Ujeso a hwọ gbe le akwole le benyin ha bendi-linaa
(Mat 5:38-48; 7:12a)
27Ujeso a mbee de be le, “Mi da amen abe ma dang kutyung gyo mi le ki nyin amen le bendi-linaa bemen; ma shi kinunung ha bendi abe be tel amen. 28Ma de Unim le u ke bendi abe be buu amen atye kukwun, ma kọng ha Unim ke bendi abe be teb le men. 29Gbe undi a kpam a kubwo he kunaa, bel ahwu ken ndọ he he u mbee kpam. Gbe undi a waa kpa-a ukpe aliga angwu le he igye, tyang he u mbee waa kpe angi le ha afee ọ titi. 30Gbe undi a nyọng-a kiwọm, wo ke-e ashi. Gbe undi a kung a kiwọm, de-e le u tem le shi ka-a ye. 31Biwọm puu abi wo kee le bendi be shi ka-a, wo kung abi shi ke be.
32“Gbe bendi abe ki nyin abe le wo befe-befe na ki nyin a le be, ha wo kpe le wo kpa kukwun ye. Bendi-biban ọ, ki nyin abe le bendi abe ki nyin abe le be. 33Gbe bendi abe be shi kinunung ha awo befe-befe na wo shi kinunung ha abe, ha wo kpe le wo kpa kukwun ye. Bendi-biban ọ be sha ashina. 34Gbe wo pwee bendi abe wo gim le be ba tem le ashi be pwee a ka-a, ha wo kpe le wo kpa kukwun ye. Bendi-biban ọ be pwee bende biwọm, be ndọ lishi le be tem le bi ka abe na be pwee. 35Ki nyin amen le bendi-linaa bemen, ma shi kinunung ha abe. Ma pwee abe kiwọm le lishi andọ-ale le be tem le shi ka men ye, ma ma ba kpa kuke kukandi, ma kwu bebwaa Unim angwu a dyam hwo puu. Ufe u sha kinunung ha bendi abe be pee he ye le abe bebibi. 36Ma kwu le beshi ha bendi nya ana Atyamen Unim u yi le be.”
Ujeso a hwọ gbe le atang-ale undi ushe
(Mat 7:1-5)
37Ujeso a gye kushu kọng le, “Ma tang undi ushe ye, ma Unim ọ u tang amen ushe ye. Ma ke undi libi ye, ma Unim ọ u ka amen libi ye. Ma tyang ke bendi, ma Unim ọ u tyang ka amen. 38Ma ke bendi kuke, ma Unim u ba ka amen. U ba kee kiwọm shwa lululu ngya abwo, yi ashi, kee shwa bwel-bwel-bwel bel fa men. Kigbọ ashi ma kee ke undi na Unim u be kee ke men.”
39Ujeso a mbee bun ityang de be le, “Uhwọ-ashi u nya teng uhwọ-ashi a? Dia! Gbe a shi na, ha befe puu befee be mbwa fa he libel. 40Unwaa ushukwul u dyam hwa undi angwu u hwọ he ye, ukpọ gbe angwu a mbee le ahwọ-ale puu, u fel na undi angwu a hwọ he.
41“Ki shi na a, wo nde kanwaa kibia ake ka yi unde-gang he utọng-shi, ki gbee a gbe le ubim ukwan angwu u yi kie he ugang utọng-shi ye? 42Na wo nya de unde-gang le, ‘Ndọ, mi fem a kanwaa kibia le he utọng-shi,’ ukpọ wo nde ubim ukwan angwu u yi kie he ugang utọng-shi ye? Wo undi bikpe-ashi, wo o fem ubim ukwan le ha awo utọng-shi, ma wo nda ngwọng fem unde-gang kanwaa kibia le he ahe utọng-shi.”
Ujeso a kọng gbe le ukwan le agbe ama
(Mat 7:16-20; 12:33-35)
43Ujeso a mbee kọng le, “Ukwan ununung u wum agbe abibi ye, ukwan ubibi u wum agbe anunung ye. 44Be ngya ukwan uyang-yang gba he agbe angi u wum a. Wo ha ndu bung agbe Uvine le he bidang, nyọng wo bung agbe Ufig le he ítọng ye. 45Undi ununung u ba le kinunung le he ahe lityam angi li sho le biwọm binunung, undi ubibi u be le bibibi le he ahe lityam angi li sho le biwọm bibibi. Ungwu undi u kọng kiwọm ashi ki sho he ahe lityam a.”
Bendi lingye le akpelye abe be tye
(Mat 7:24-27)
46“Kibang a, ma ko mi le Ada, ukpọ ashi mi de men le ma shi, ma shi ashi ye?” 47U de be le, “Mi tyung amen kitaa undi u kwu, gbe a be hwaa le mi, u dang kutyung gyo igie igi, u shi angi. 48U yi na ungikye angwu a tye ushọm angwu a tem libel gye he liten le kpee ha kukọ, u ha tye lishii ushọm pwọm ha. Umbwo a ndọ kaang sho le wu ha he kipi ushọm u yi. A ma gyeb he ye, likọye ungikye ana a tye-e ngbeb-ngbeb. 49Ukpọ undi angwu a gyo igie igi shi angi ye, u yi na undi angwu a tye ushọm faale lishii atyele. He kunyọng ahwu umbwo a sho be kib ushọm angwun, a gyeb shi he itang kpem. Agyeb-ale ushọm angwun a ma ban kaang.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.