Uluk 4
4
Usu bibibi a gil Ujeso he ugbaa-libeb
(Mat 4:1-11; Mak 1:12-13)
1Ukatia Kunyọng a ma yi ha Ujeso he kunyọng ahwu a ma fem le he umbwo Ujọdan. Ukatia Kunyọng ana a teng he gye he ugbaa-libeb. 2Usu bibibi a ma gil he ati asi afee. Ujeso a ma zi lizi he kunyọng kumen ana ye. Itung i maa fel ndo he.
3Usu bibibi a de-e le, “Ndu shi kukọ ahwun ku bel lizi ka-a he wo zi a, gbe wo de le wo yi Unwaa Unim a.”
4Ujeso a kung de-e le, “Be fee he kushia Unim le-iti le, undi-gye u kwa uwum gba he lizi life-life a ye.”#4:4 Iten lefee 8:3
5Usu bibibi ana a teng he gye he kipi ashi ki yi he kusi-kusi le tyung he biteng kusu igye puu he kanwaa kunyọng zang kekelii. 6Usu bibibi a de Ujeso le, “Mi ba ka-a ikeb abọng anyin puu le ifem angi likọye bi yi ha ami kubwo a. Mi kung abi ka undi uyang-yang angwu mi kee. 7Gbe wo tim anung he itang fe-m, biwọm abin puu bi ba fel bigang a.”
8Ujeso a fan he le, “Be fee he kushia Unim le-iti le undi-gye u fe Ada Unim, u fe-e ufe-ufe a.”#4:8 Iten lefee 6:13; Iten lefee 10:20
9Usu bibibi a ha teng he gye he Ujeruselem. A te le he le pwọm he lishi kuto he Ushọm Unim, u de-e le, “Geb le nyin gye he itang,” gbe wo de le wo yi Unwaa Unim a, 10likọye be fee fe he kushia Unim le-iti le,
“Unim u ba da idengel ima
le i kpa-a tyang.”
11Be mbee fee le “be ba kwa-a he abwo ndọ he kusi
he wo tye kubee ọ fe he kukọ ye.”#4:11 Agyam 91:11, 12
12Ujeso a kung de-e le, “Be fee he kushia Unim le-iti le, undi u shi gil Ada Unim ye.”#4:12 Iten lefee 6:16
13Usu bibibi a gil Ujeso mbee akwo anyin puu, a tyang he ndọ kunyọng kususo.
Bendi Unazaret be swan Ujeso
(Mat 13:53-58; Mak 6:1-6)
14Ujeso a ma tem gye he Ugalili he ikeb Ukatia Kunyọng. Bendi puu he kubọng kumen ana be ma gyo gbe le he. 15A maa hwọ bendi Ijuus he ishọm Unim ibel angi be kwu awu. Bendi puu be ma pee he.
16Ujeso a kung gbe gye he lishi Unazaret he kipi a kwu kpe. He liti-uwel a gye he ushọm Unim angwu be kwu liwu nya ana u shaa shi. A bo kinaa he u bo le he kushia Unim. 17Be kung kushia ahwu Azaya utye-ugie kisọm Unim a ma fee le-iti, ke Ujeso. A pel ahwu le bo kiteng ashi be ma fee le:
18“Ukatia Kunyọng u yi ha ami,
likọye a ke-m ikeb le mi bun kisọm kinunung de bendi-likaa.
A sọm mi le mi be de bendi abe be yi he igaadye le be fel pọ,
mi mbee de bendi abe be hwọ ashi le be fel nde.
A sọm mi le mi kpan bendi le ha bendi-linaa bebel,
19mi mbee bun de bendi le kunyọng ku fel ahwu Unim Ada u tyung inung ha bendi bema.”#4:19 Azaya 61:1, 2
20Ujeso a tem le kushia ana kan kung ke undi angwu u shi aki ha he ushọm Unim angwu be kwu liwu tem le kwu ko. Bendi puu ha he ushọm be fel nda he kpọ.
21A keb akọng-ale ha abe le, “Kiwọm ashi kimen be fee le-iti nyin, ki fe sho nya ana ma gyo mi bo nyin.”
22Igie inunung angi a bun i kwu abe befe puu he kuhwo kaang. Be fel kọng le ashi a kọng ana ki yi kigyang a. Be bii le, unwaa Ujosef a ye a?
23A kung de be le, “Mi ngye le ma kam le ma bun ityang angi le undi-usi u mbee kuhwo-ma da-m. Ma mbee de-m le biwọm abi ma gyo le mi shi he Ukapanum, mi shi abi hen ha amen kubọng.”
24A mbee de be le, “Mi da amen kigyang a le bendi be kpa utye-ugie kisọm Unim he kubọng kuma ye. 25Mi de men kigyang, ki ma shi he kunyọng ahwu Elaija a ma bun kisọm Unim he kunyọng ahwu umbwo a ma tem ndọ ye aze akie le afel adyọng-ken. He kunyọng kumen ana ubwaa ukandi a ma kwu kubọng puu. Bengye-uhwuu be ma yi hen he Izwel gbam, 26ukpọ Unim a ma sọm Elaija hwaa le ungye-uhwuu ken ọ he Izwel ye. A ma kee-kee sọm he hwaa le ungye-uhwuu angwu he lishi Uzarefat angi he kigie Usaidọn a. 27Ki mbee shi le bendi gbam abe be tang akpaa he Izwel he kunyọng Elaisha utye-ugie kisọm Unim, ukpọ undi ken ọ, akpaa ama a ma taa fem Uneman angwu a maa be le he Usiria tyang ye.”
28Bendi abe be ma yi ha he ushọm Unim angwu be kwu liwu be gyo ashin, be fel he ingyo kaang. 29Be bo kinaa ndeb le Ujeso le ha he lifung-ushu le pwọm he lishi ukwel angwu be nde he be nyii he le ha tye gye he kibebel. 30Ukpọ a tan gbe ha he liwu libel gbe gye he kipi ki fọng he.
Ujeso a ndo ikeb ibibi
(Mak 1:21-28)
31Ujeso a ha shul gye he lishi Ugalili angi be ko le Ukapanum. He liti-uwel a gye he ushọm angwu be kwu liwu le hwọ bendi. 32Ki kwu bendi he kuhwo kitaa ashi a maa hwọ abe, likọye a maa kọng na undi angwu ikeb puu i yi he kubwo kuma a.
33Ungikye ususo a ma yi ha he ushọm umen ana, ikeb ibibi i ma yi he ahe. A gaa kaang le, 34“Aye, wo Ujeso angwu Unazaret, wo le li sha-a na a? Wo be nyin he wo kpam peb li ipeb a? Mi ngya a, wo yi Unwaa Unim, wo yi faale uben.”
35Ujeso a kung gaa fe ikeb ibibi ana le i tyang kihwee, i fem be he igye. Ikeb ibibi ana i shi ungikye angwuna a mbu kpam he itang nya he ashi abel, i fem be he igye, ukpọ i do he ye.
36Ki kwu bendi puu he kuhwo. Be fel kọng ha bende le igie anyin i kwu he kuhwo dii. Ungikye angwun u kọng ha ikeb ibibi le ikeb le i fem he igye, i fem. 37Bendi gbam he kigie kimen ana be maa fel kọng gba le Ujeso mbee bipi.
Ujeso a mbee bendi gbam
(Mat 8:14-17; Mak 1:29-34)
38Ujeso a gbe le ha he ushọm Unim angwu be kwu liwu gye he ushu Usaimọn. Anam ungye Usaimọn a ma yi gogo ye. Inyia-hwo i maa sha he kaang. Be de Ujeso le u kpel he. 39Ujeso a le na he ahe ungwu agodo de lingbam ana le li tyang he, a ma mbee. A kung bo nya kukwo-kukwo, u maa fel sha abe kugaa.
40Nyọng libwee li ngwee, bendi puu ha he Ukapanum abe bendi bebel be ma mbu bitaa angbam atyetye-atyetye be be le be hwaa le Ujeso. A pwọm abe abwo puu, u mbee abe. 41Ikeb ibibi ọ titi i ma fem le ha bendi gbam. I gaa kọng le, “Wo yi Unwaa Unim a.” Ujeso a tye ngi uten le i kọng likọng ye likọye i ngye le u yi Ukristi a.
Ujeso a bun kisọm Unim de bendi he Ujudia
(Mak 1:35-39)
42Nyọng ashi a taa, Ujeso a gbe le ha he lifung-ushu gye he kipi undi u yi ye. Bendi be keb he ashun-ale. Be le nde-e, be kaa he be shi-e u tem gbe tyang abe ye. 43Ukpọ a fan abe le, “Ki yi kpe-kpe le mi bun kisọm kinunung de bendi he abọng asuso ọ le Unim u ndu fem kiteng kusu kima he igye, likọye kife na Unim a sọm mi le mi be shi.” 44A ma bun kisọm Unim de bendi he ishọm Unim angi be kwu awu angi he Ujudia.
Currently Selected:
Uluk 4: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Uluk 4
4
Usu bibibi a gil Ujeso he ugbaa-libeb
(Mat 4:1-11; Mak 1:12-13)
1Ukatia Kunyọng a ma yi ha Ujeso he kunyọng ahwu a ma fem le he umbwo Ujọdan. Ukatia Kunyọng ana a teng he gye he ugbaa-libeb. 2Usu bibibi a ma gil he ati asi afee. Ujeso a ma zi lizi he kunyọng kumen ana ye. Itung i maa fel ndo he.
3Usu bibibi a de-e le, “Ndu shi kukọ ahwun ku bel lizi ka-a he wo zi a, gbe wo de le wo yi Unwaa Unim a.”
4Ujeso a kung de-e le, “Be fee he kushia Unim le-iti le, undi-gye u kwa uwum gba he lizi life-life a ye.”#4:4 Iten lefee 8:3
5Usu bibibi ana a teng he gye he kipi ashi ki yi he kusi-kusi le tyung he biteng kusu igye puu he kanwaa kunyọng zang kekelii. 6Usu bibibi a de Ujeso le, “Mi ba ka-a ikeb abọng anyin puu le ifem angi likọye bi yi ha ami kubwo a. Mi kung abi ka undi uyang-yang angwu mi kee. 7Gbe wo tim anung he itang fe-m, biwọm abin puu bi ba fel bigang a.”
8Ujeso a fan he le, “Be fee he kushia Unim le-iti le undi-gye u fe Ada Unim, u fe-e ufe-ufe a.”#4:8 Iten lefee 6:13; Iten lefee 10:20
9Usu bibibi a ha teng he gye he Ujeruselem. A te le he le pwọm he lishi kuto he Ushọm Unim, u de-e le, “Geb le nyin gye he itang,” gbe wo de le wo yi Unwaa Unim a, 10likọye be fee fe he kushia Unim le-iti le,
“Unim u ba da idengel ima
le i kpa-a tyang.”
11Be mbee fee le “be ba kwa-a he abwo ndọ he kusi
he wo tye kubee ọ fe he kukọ ye.”#4:11 Agyam 91:11, 12
12Ujeso a kung de-e le, “Be fee he kushia Unim le-iti le, undi u shi gil Ada Unim ye.”#4:12 Iten lefee 6:16
13Usu bibibi a gil Ujeso mbee akwo anyin puu, a tyang he ndọ kunyọng kususo.
Bendi Unazaret be swan Ujeso
(Mat 13:53-58; Mak 6:1-6)
14Ujeso a ma tem gye he Ugalili he ikeb Ukatia Kunyọng. Bendi puu he kubọng kumen ana be ma gyo gbe le he. 15A maa hwọ bendi Ijuus he ishọm Unim ibel angi be kwu awu. Bendi puu be ma pee he.
16Ujeso a kung gbe gye he lishi Unazaret he kipi a kwu kpe. He liti-uwel a gye he ushọm Unim angwu be kwu liwu nya ana u shaa shi. A bo kinaa he u bo le he kushia Unim. 17Be kung kushia ahwu Azaya utye-ugie kisọm Unim a ma fee le-iti, ke Ujeso. A pel ahwu le bo kiteng ashi be ma fee le:
18“Ukatia Kunyọng u yi ha ami,
likọye a ke-m ikeb le mi bun kisọm kinunung de bendi-likaa.
A sọm mi le mi be de bendi abe be yi he igaadye le be fel pọ,
mi mbee de bendi abe be hwọ ashi le be fel nde.
A sọm mi le mi kpan bendi le ha bendi-linaa bebel,
19mi mbee bun de bendi le kunyọng ku fel ahwu Unim Ada u tyung inung ha bendi bema.”#4:19 Azaya 61:1, 2
20Ujeso a tem le kushia ana kan kung ke undi angwu u shi aki ha he ushọm Unim angwu be kwu liwu tem le kwu ko. Bendi puu ha he ushọm be fel nda he kpọ.
21A keb akọng-ale ha abe le, “Kiwọm ashi kimen be fee le-iti nyin, ki fe sho nya ana ma gyo mi bo nyin.”
22Igie inunung angi a bun i kwu abe befe puu he kuhwo kaang. Be fel kọng le ashi a kọng ana ki yi kigyang a. Be bii le, unwaa Ujosef a ye a?
23A kung de be le, “Mi ngye le ma kam le ma bun ityang angi le undi-usi u mbee kuhwo-ma da-m. Ma mbee de-m le biwọm abi ma gyo le mi shi he Ukapanum, mi shi abi hen ha amen kubọng.”
24A mbee de be le, “Mi da amen kigyang a le bendi be kpa utye-ugie kisọm Unim he kubọng kuma ye. 25Mi de men kigyang, ki ma shi he kunyọng ahwu Elaija a ma bun kisọm Unim he kunyọng ahwu umbwo a ma tem ndọ ye aze akie le afel adyọng-ken. He kunyọng kumen ana ubwaa ukandi a ma kwu kubọng puu. Bengye-uhwuu be ma yi hen he Izwel gbam, 26ukpọ Unim a ma sọm Elaija hwaa le ungye-uhwuu ken ọ he Izwel ye. A ma kee-kee sọm he hwaa le ungye-uhwuu angwu he lishi Uzarefat angi he kigie Usaidọn a. 27Ki mbee shi le bendi gbam abe be tang akpaa he Izwel he kunyọng Elaisha utye-ugie kisọm Unim, ukpọ undi ken ọ, akpaa ama a ma taa fem Uneman angwu a maa be le he Usiria tyang ye.”
28Bendi abe be ma yi ha he ushọm Unim angwu be kwu liwu be gyo ashin, be fel he ingyo kaang. 29Be bo kinaa ndeb le Ujeso le ha he lifung-ushu le pwọm he lishi ukwel angwu be nde he be nyii he le ha tye gye he kibebel. 30Ukpọ a tan gbe ha he liwu libel gbe gye he kipi ki fọng he.
Ujeso a ndo ikeb ibibi
(Mak 1:21-28)
31Ujeso a ha shul gye he lishi Ugalili angi be ko le Ukapanum. He liti-uwel a gye he ushọm angwu be kwu liwu le hwọ bendi. 32Ki kwu bendi he kuhwo kitaa ashi a maa hwọ abe, likọye a maa kọng na undi angwu ikeb puu i yi he kubwo kuma a.
33Ungikye ususo a ma yi ha he ushọm umen ana, ikeb ibibi i ma yi he ahe. A gaa kaang le, 34“Aye, wo Ujeso angwu Unazaret, wo le li sha-a na a? Wo be nyin he wo kpam peb li ipeb a? Mi ngya a, wo yi Unwaa Unim, wo yi faale uben.”
35Ujeso a kung gaa fe ikeb ibibi ana le i tyang kihwee, i fem be he igye. Ikeb ibibi ana i shi ungikye angwuna a mbu kpam he itang nya he ashi abel, i fem be he igye, ukpọ i do he ye.
36Ki kwu bendi puu he kuhwo. Be fel kọng ha bende le igie anyin i kwu he kuhwo dii. Ungikye angwun u kọng ha ikeb ibibi le ikeb le i fem he igye, i fem. 37Bendi gbam he kigie kimen ana be maa fel kọng gba le Ujeso mbee bipi.
Ujeso a mbee bendi gbam
(Mat 8:14-17; Mak 1:29-34)
38Ujeso a gbe le ha he ushọm Unim angwu be kwu liwu gye he ushu Usaimọn. Anam ungye Usaimọn a ma yi gogo ye. Inyia-hwo i maa sha he kaang. Be de Ujeso le u kpel he. 39Ujeso a le na he ahe ungwu agodo de lingbam ana le li tyang he, a ma mbee. A kung bo nya kukwo-kukwo, u maa fel sha abe kugaa.
40Nyọng libwee li ngwee, bendi puu ha he Ukapanum abe bendi bebel be ma mbu bitaa angbam atyetye-atyetye be be le be hwaa le Ujeso. A pwọm abe abwo puu, u mbee abe. 41Ikeb ibibi ọ titi i ma fem le ha bendi gbam. I gaa kọng le, “Wo yi Unwaa Unim a.” Ujeso a tye ngi uten le i kọng likọng ye likọye i ngye le u yi Ukristi a.
Ujeso a bun kisọm Unim de bendi he Ujudia
(Mak 1:35-39)
42Nyọng ashi a taa, Ujeso a gbe le ha he lifung-ushu gye he kipi undi u yi ye. Bendi be keb he ashun-ale. Be le nde-e, be kaa he be shi-e u tem gbe tyang abe ye. 43Ukpọ a fan abe le, “Ki yi kpe-kpe le mi bun kisọm kinunung de bendi he abọng asuso ọ le Unim u ndu fem kiteng kusu kima he igye, likọye kife na Unim a sọm mi le mi be shi.” 44A ma bun kisọm Unim de bendi he ishọm Unim angi be kwu awu angi he Ujudia.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.