Uluk 11
11
Ujeso a hwọ gbe le kitaa be kọng ha Unim
(Mat 6:9-13; 7:7-11)
1He liti ken Ujeso a maa kọng ha Unim he kiteng kisuso. A kọng ha Unim puu, undi-utung uma ken a kung de-e le, “Ukandi, hwọ li bel ọ na li kọng ha Unim na Ujọn a hwọ bendi-utung bema.”
2Ujeso a de be le, “Nyọng ma kọng ha Unim, ma kọng kitel i,
“ ‘Atya-tyan Unim,
Mi tye ugboo ke lizen ligang,
kiteng kusu kigang ki be.
3Ke li lizi angi li zi he liti-liti.
4Tyang biban bityan ke li,
na bel li tyang ke bendi abe be shi ban li.
Tyang li li mbu he ugil-ale ye.’ ”
5A mbee de bendi-utung bema le, “Ki nya yi le undi ken le he liwu limen angwu u nya le hwaa le udimma le kididyan kusu de-e le, ‘Udimgi, pwee mi bikem ibred bikie. 6Udimgi angwu u gye litan, a bel gbe ha ami nyin. Mi yi le ashi mi ke-e ye.’ 7Udim uma angwu ha u nya da he le ha afee le: ‘Shi fem mi kushun ye, mi ngib lishi ma, mi le bebwaagi li ngwee, mi tem bo le mi ka-a kiwọm ye a?’ 8Ma ngye le ki kwu-e le u bo ke-e ibred he kuhwo kudim kubel ye ọ, u bo ka he kiwọm ashi a kee likọye ishwia i shi-e na u bii he nya-nya-nya ye.
9“He atan-lengi angwun mi de men le, kiwọm ashi ki fọng amen, ma bii, ma ma kpa ashi, ma kee, ma ma nda ashi, ma kem abwo he lishi, ma Unim u buu amen angi. 10Undi uyang-yang angwu a bii kiwọm, u kpa ashi, angwu a kee, u nda shi, angwu a kem abwo he lishi, Unim u buu he angi.
11“Men betyam bebwaa, ayang he liwu limen u nya kwu ushii ke unwaama, gbe a bii he ukwan? 12Ha u kwa unọng a ka he, gbe a bii he liti ukwuo? 13Men abe ma ban i, ma ngye le ma ka bebwaa-men biwọm binunung teng-teng le Atyamen angwu he lifung-atabe a? Ufe u ba kung Ukatia Kunyọng uma ka bendi abe be bii he.”
Ujeso le Ubelzebub
(Mat 12:22-30; Mak 3:20-27)
14Ujeso a maa ndo undi ikeb ibibi angi i kwọm undi umbel, he kunyọng ahwu ikeb ibibi igyang i gbe le he ahe, ungikye angwu a ma kwom umbel ana a keb likọng akọng-ale. Ki kwu bendi abe be ma yi ha he kuhwo kaang. 15Bendi besuso be de le Ubeelzebub angwu u yi usu bibibi na u ke-e ikeb le u ndo angi. 16Besuso be kee le be gil Ujeso. Be ha be de-e le u shi kikwole-kuhwo tyung abe he be ngye le Unim na a sọm he.
17Ujeso a ngye igim ibel, a ha de be le, “Kiteng kusu kiyang-yang ashi ki tang he abwo keb ando-ale ha bende ki ha ndu naa ye. Kikwu-lihwan ashi ki tang he abwo keb ando-ale ki naa ye. 18Fe, gbe bendi Usu bibibi be tang he abwo be fel ndo ha bende, kiteng kusu kibel ki naa na a? Nyọng ki yi nyin, ma de le mi ndo ikeb ibibi le gbe Ubeelzebub a ke-m ikeb a. 19Gbe ki yi le Ubeelzebub na u ke-m ikeb le mi ndo ikeb ibibi, bendi bemen befe be ndo angi na a? Bendi bemen be tyung le ma mbeb. 20Gbe ki yi le mi ndo ikeb ibibi gbe he ikeb Unim a, ki nung amen le ikeb kiteng kusu Unim i fel he liwu limen.
21“Gbe undi angwu u yi le ikeb a kam biwọm bedye kwu, u kang usha-ale uma, biwọm bima bi nim ye. 22Gbe undi angwu u yi le ikeb hwo-e a kwu-e, u hwa he, u kpa kung he biwọm bedye abi a fe lityam ha abi, u zi kute kung biwọm bima le hwọ ke bema bendi.
23“Undi uyang-yang angwu u yi utung ha ami ye, u yi linaa ha ami, undi angwu u kpel mi kam i kam ye, u peb ipeb.”
24Ujeso a mbee de be le, “He kunyọng ahwu ikeb ibibi i fem le ha undi, i la tan mbee ugbaa-libeb kee kiteng ashi i kwu sho kunyọng. Gbe i nde ye, i tem kọng ha kuhwo-ngi le, ‘Mi ba tem gya he kipi mi ma be.’ 25Gbe i tem le nde kipi kimen ana ki yi kitaa-kitaa, bigbọ bi shi ndọ he kiteng abi, 26i ha tem la ba le ikeb ibibi idyọng-ifee angi i ban hwo angi igyang. Be be fel ha undi umen ana, be shi-e u fel ban hwo kitaa a ma yi le he ukpi-kikwu.”
27Ujeso a kọng ashin kọng-kọng, ungingye ususo a de-e le ha he liwu le, “Ungingye angwu a hwan a, u kwob a, u yi le kukwun kaang.”
28Ujeso a kung de-e le, “Undi angwu a gyo igie Unim, u ke ngi ife, ufe na u yi le kukwun kugyang ahwel.”
Kitaa Ujona
(Mat 12:38-42)
29Nya ana bendi be ma sho fe Ujeso kel-kel, a gye kushu de be le, “Bendi abe ati anyin be fel bebibi gbe-gyọng. Be kee le be nda kikwole-kuhwo ashi ki tyung le Unim na a sọm mi, ukpọ be ha ndu nda kisuso fem ashi Ujona tyang ye. 30Nya ana Ujona a ma yi kitaa ke bendi Unineve, na mi Unwaa undi-gye, mi yi kitaa ke bendi abe ati anyin. 31He liti angi Unim u be tang bendi ushe, usu angwu ungingye angwu u be le he kigie kutan Ushiba, u ba bo kinaa ha, u ke bendi abe ati anyin libi likọye a ma tan le he kubọng kuma ukọng-ukọng-ukọng le gyo biwọm abi Usu Usolomọn u hwọ le lishi-abyele. Undi ususo u yi nyin kanaa-anaa i a dyam hwo Usolomọn. 32He liti limen ana, bendi Unineve be ba bo kinaa ha, be ke men libi likọye befe be ma tyang abwo le biban bibel he kunyọng ahwu be ma gyo Ujona a bun igie Unim. Undi ususo u yi nyin a dyam hwo Ujona.”
Ujeso a kọng gbe le kikung-gboo inyia-hwo
(Mat 5:15; 6:22-23)
33Ujeso a mbee de le, “Undi u gba kimọ-kinde tem le shi ndyel sha ọ, nyọng u kung kitetel sha ashi ọ ye. U kung ashi la ndọ he kusi he kudyan ushọm a, he bendi abe be gye ha he afee be nde gboo. 34Atọng-shi a yi nya ana kimọ-kinde a ke inyia-hwo. Gbe ashi amen a yi gelalala, inyia-hwo imen puu i kwa le kikung-gboo. Ukpọ gbe ashi amen a yi anunung ye, inyia-hwo imen puu i kwa he kifufeb. 35Ma nde le kikung-gboo ashi ki yi ha amen ki yi kifufeb a ye. 36Gbe inyia-hwo imen puu i yi he kikung-gboo teng ligwo ken ọ ye, ha inyia-hwo imen puu i taa nya ana kimọ-kinde ki taa kung gboo a.”
Ujeso a kọng ban Iferesis le bitisha Iten
(Mat 23:1-36; Mak 12:38-40)
37Ujeso a kọng ashin puu, undi ken angwu u yi he likwu Iferesis a hwaa he lizi. Ujeso a kung gbe ndo ha le kwu ko he u ndu zi lizi. 38Ki ma kwu angwu Iferesis he kuhwo likọye a nde Ujeso a to abwo na itel ibel i yi ma ukpọng u ha zi lizi ye.
39Ada Ujeso a kung de-e le, “Men Iferesis ma to item igba-ala le indọ, ukpọ atyam amen a sho le bitaa bibibi atyetye-atyetye.” 40Ma yi kpelye! Unim angwu a shi item na a shi afee ye a? 41Ma kung ashi ma fe he igba-ala le indọ le ke bendi-likaa, ma bigbọ puu bi fel bitaa-bitaa na Iten ityan i yi.
42“Men bendi Iferesis, ki ba kwa kibibi ka amen. Biwọm na afufeb i ọ, gbe a hwaa, ma hwọ angi he biteng lihwo, ma ke Unim likwu ken, ukpọ ma mọ kigyang ashele, ki nyin amen le Unim ye. Ma shi bimen i puu, gia bisuso shi, tyang bisuso ye.
43“Men bendi Iferesis, ki ba kwa kibibi ka amen. Ki nyin amen le bidem abi be kie ndọ bekandi bendi he ishọm Unim angi ma kwu awu. Ki nyin amen le bendi be kọng le men le ife he ishokwo kate.
44“Ki ban amen shie. Ma yi nya ana akwun angi bendi be tan gbe ha he likwu, be ngye le akwun a ye a.”
45Undi ken angwu u hwọ bendi Iten a kung de-e le, “Ukandi, ashi wo kọng i, wo bia li bel ọ titi.”
46Ujeso a fan le, “Eng, ki ba kwa kibibi ka amen bitisha Iten ọ titi. Ma kwuo biwọm swa bendi abi bi ngbeb gbe be gbe he akele ubel Iten angi i go gbe be. Men-agyang ma tyọ kubwo ọ ha ye.
47“Ki ba kwa kibibi ka amen. Ma tye akwun bitye-ugie kisọm Unim abe betie-men be ma gwu. 48Men-agyang ma tyung le ma bọng le ashi betie-men be ma shi ki ngbeb. Befe be gwu bendi abe be tye ugie kisọm Unim, men ma tye akwun abel. 49He atan-lengi angwun Unim angwu a bilishi a de le, ‘Mi ba sọm bitye-ugie kisọm begi hwaa le bendi. Be ba gwa bendi-kisọm besuso, be ke besuso kingie.’ 50Unim u ba ka bendi abe ati anyin kingie he kuhwo bitye-ugie kisọm bema abe be gwu kung le he kunyọng ahwu a shi igye anyin, 51kung le ha kunyọng ahwu be gwu Ebel be wu he kunyọng ahwu be gwu Uzakariya. Uzakariya na be gwu he Ushọm Unim he kudyan kimbe ashi be shang Unim le kipo ashi be ndọ tata ke Unim. Bendi ati angi kunyin be ba kpa kingie he kuhwo kubel puu.
52“Men abe ma hwọ bendi Iten, ki ban amen shie. Ma waa kung ukukol angwu u yi lingye igie Unim gbe he ahwọ-ale Iten he kukwo ahwu igie Unim i ngwee bendi ye, i ngwee amen ye.”
53A gbe le ha, bitisha Iten le bendi Iferesis be fel ben he, be bii he bibibi gbe le biwọm gbam, 54kaa he be nde le u kọng kiban a, he be kwu-e.
Currently Selected:
Uluk 11: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Uluk 11
11
Ujeso a hwọ gbe le kitaa be kọng ha Unim
(Mat 6:9-13; 7:7-11)
1He liti ken Ujeso a maa kọng ha Unim he kiteng kisuso. A kọng ha Unim puu, undi-utung uma ken a kung de-e le, “Ukandi, hwọ li bel ọ na li kọng ha Unim na Ujọn a hwọ bendi-utung bema.”
2Ujeso a de be le, “Nyọng ma kọng ha Unim, ma kọng kitel i,
“ ‘Atya-tyan Unim,
Mi tye ugboo ke lizen ligang,
kiteng kusu kigang ki be.
3Ke li lizi angi li zi he liti-liti.
4Tyang biban bityan ke li,
na bel li tyang ke bendi abe be shi ban li.
Tyang li li mbu he ugil-ale ye.’ ”
5A mbee de bendi-utung bema le, “Ki nya yi le undi ken le he liwu limen angwu u nya le hwaa le udimma le kididyan kusu de-e le, ‘Udimgi, pwee mi bikem ibred bikie. 6Udimgi angwu u gye litan, a bel gbe ha ami nyin. Mi yi le ashi mi ke-e ye.’ 7Udim uma angwu ha u nya da he le ha afee le: ‘Shi fem mi kushun ye, mi ngib lishi ma, mi le bebwaagi li ngwee, mi tem bo le mi ka-a kiwọm ye a?’ 8Ma ngye le ki kwu-e le u bo ke-e ibred he kuhwo kudim kubel ye ọ, u bo ka he kiwọm ashi a kee likọye ishwia i shi-e na u bii he nya-nya-nya ye.
9“He atan-lengi angwun mi de men le, kiwọm ashi ki fọng amen, ma bii, ma ma kpa ashi, ma kee, ma ma nda ashi, ma kem abwo he lishi, ma Unim u buu amen angi. 10Undi uyang-yang angwu a bii kiwọm, u kpa ashi, angwu a kee, u nda shi, angwu a kem abwo he lishi, Unim u buu he angi.
11“Men betyam bebwaa, ayang he liwu limen u nya kwu ushii ke unwaama, gbe a bii he ukwan? 12Ha u kwa unọng a ka he, gbe a bii he liti ukwuo? 13Men abe ma ban i, ma ngye le ma ka bebwaa-men biwọm binunung teng-teng le Atyamen angwu he lifung-atabe a? Ufe u ba kung Ukatia Kunyọng uma ka bendi abe be bii he.”
Ujeso le Ubelzebub
(Mat 12:22-30; Mak 3:20-27)
14Ujeso a maa ndo undi ikeb ibibi angi i kwọm undi umbel, he kunyọng ahwu ikeb ibibi igyang i gbe le he ahe, ungikye angwu a ma kwom umbel ana a keb likọng akọng-ale. Ki kwu bendi abe be ma yi ha he kuhwo kaang. 15Bendi besuso be de le Ubeelzebub angwu u yi usu bibibi na u ke-e ikeb le u ndo angi. 16Besuso be kee le be gil Ujeso. Be ha be de-e le u shi kikwole-kuhwo tyung abe he be ngye le Unim na a sọm he.
17Ujeso a ngye igim ibel, a ha de be le, “Kiteng kusu kiyang-yang ashi ki tang he abwo keb ando-ale ha bende ki ha ndu naa ye. Kikwu-lihwan ashi ki tang he abwo keb ando-ale ki naa ye. 18Fe, gbe bendi Usu bibibi be tang he abwo be fel ndo ha bende, kiteng kusu kibel ki naa na a? Nyọng ki yi nyin, ma de le mi ndo ikeb ibibi le gbe Ubeelzebub a ke-m ikeb a. 19Gbe ki yi le Ubeelzebub na u ke-m ikeb le mi ndo ikeb ibibi, bendi bemen befe be ndo angi na a? Bendi bemen be tyung le ma mbeb. 20Gbe ki yi le mi ndo ikeb ibibi gbe he ikeb Unim a, ki nung amen le ikeb kiteng kusu Unim i fel he liwu limen.
21“Gbe undi angwu u yi le ikeb a kam biwọm bedye kwu, u kang usha-ale uma, biwọm bima bi nim ye. 22Gbe undi angwu u yi le ikeb hwo-e a kwu-e, u hwa he, u kpa kung he biwọm bedye abi a fe lityam ha abi, u zi kute kung biwọm bima le hwọ ke bema bendi.
23“Undi uyang-yang angwu u yi utung ha ami ye, u yi linaa ha ami, undi angwu u kpel mi kam i kam ye, u peb ipeb.”
24Ujeso a mbee de be le, “He kunyọng ahwu ikeb ibibi i fem le ha undi, i la tan mbee ugbaa-libeb kee kiteng ashi i kwu sho kunyọng. Gbe i nde ye, i tem kọng ha kuhwo-ngi le, ‘Mi ba tem gya he kipi mi ma be.’ 25Gbe i tem le nde kipi kimen ana ki yi kitaa-kitaa, bigbọ bi shi ndọ he kiteng abi, 26i ha tem la ba le ikeb ibibi idyọng-ifee angi i ban hwo angi igyang. Be be fel ha undi umen ana, be shi-e u fel ban hwo kitaa a ma yi le he ukpi-kikwu.”
27Ujeso a kọng ashin kọng-kọng, ungingye ususo a de-e le ha he liwu le, “Ungingye angwu a hwan a, u kwob a, u yi le kukwun kaang.”
28Ujeso a kung de-e le, “Undi angwu a gyo igie Unim, u ke ngi ife, ufe na u yi le kukwun kugyang ahwel.”
Kitaa Ujona
(Mat 12:38-42)
29Nya ana bendi be ma sho fe Ujeso kel-kel, a gye kushu de be le, “Bendi abe ati anyin be fel bebibi gbe-gyọng. Be kee le be nda kikwole-kuhwo ashi ki tyung le Unim na a sọm mi, ukpọ be ha ndu nda kisuso fem ashi Ujona tyang ye. 30Nya ana Ujona a ma yi kitaa ke bendi Unineve, na mi Unwaa undi-gye, mi yi kitaa ke bendi abe ati anyin. 31He liti angi Unim u be tang bendi ushe, usu angwu ungingye angwu u be le he kigie kutan Ushiba, u ba bo kinaa ha, u ke bendi abe ati anyin libi likọye a ma tan le he kubọng kuma ukọng-ukọng-ukọng le gyo biwọm abi Usu Usolomọn u hwọ le lishi-abyele. Undi ususo u yi nyin kanaa-anaa i a dyam hwo Usolomọn. 32He liti limen ana, bendi Unineve be ba bo kinaa ha, be ke men libi likọye befe be ma tyang abwo le biban bibel he kunyọng ahwu be ma gyo Ujona a bun igie Unim. Undi ususo u yi nyin a dyam hwo Ujona.”
Ujeso a kọng gbe le kikung-gboo inyia-hwo
(Mat 5:15; 6:22-23)
33Ujeso a mbee de le, “Undi u gba kimọ-kinde tem le shi ndyel sha ọ, nyọng u kung kitetel sha ashi ọ ye. U kung ashi la ndọ he kusi he kudyan ushọm a, he bendi abe be gye ha he afee be nde gboo. 34Atọng-shi a yi nya ana kimọ-kinde a ke inyia-hwo. Gbe ashi amen a yi gelalala, inyia-hwo imen puu i kwa le kikung-gboo. Ukpọ gbe ashi amen a yi anunung ye, inyia-hwo imen puu i kwa he kifufeb. 35Ma nde le kikung-gboo ashi ki yi ha amen ki yi kifufeb a ye. 36Gbe inyia-hwo imen puu i yi he kikung-gboo teng ligwo ken ọ ye, ha inyia-hwo imen puu i taa nya ana kimọ-kinde ki taa kung gboo a.”
Ujeso a kọng ban Iferesis le bitisha Iten
(Mat 23:1-36; Mak 12:38-40)
37Ujeso a kọng ashin puu, undi ken angwu u yi he likwu Iferesis a hwaa he lizi. Ujeso a kung gbe ndo ha le kwu ko he u ndu zi lizi. 38Ki ma kwu angwu Iferesis he kuhwo likọye a nde Ujeso a to abwo na itel ibel i yi ma ukpọng u ha zi lizi ye.
39Ada Ujeso a kung de-e le, “Men Iferesis ma to item igba-ala le indọ, ukpọ atyam amen a sho le bitaa bibibi atyetye-atyetye.” 40Ma yi kpelye! Unim angwu a shi item na a shi afee ye a? 41Ma kung ashi ma fe he igba-ala le indọ le ke bendi-likaa, ma bigbọ puu bi fel bitaa-bitaa na Iten ityan i yi.
42“Men bendi Iferesis, ki ba kwa kibibi ka amen. Biwọm na afufeb i ọ, gbe a hwaa, ma hwọ angi he biteng lihwo, ma ke Unim likwu ken, ukpọ ma mọ kigyang ashele, ki nyin amen le Unim ye. Ma shi bimen i puu, gia bisuso shi, tyang bisuso ye.
43“Men bendi Iferesis, ki ba kwa kibibi ka amen. Ki nyin amen le bidem abi be kie ndọ bekandi bendi he ishọm Unim angi ma kwu awu. Ki nyin amen le bendi be kọng le men le ife he ishokwo kate.
44“Ki ban amen shie. Ma yi nya ana akwun angi bendi be tan gbe ha he likwu, be ngye le akwun a ye a.”
45Undi ken angwu u hwọ bendi Iten a kung de-e le, “Ukandi, ashi wo kọng i, wo bia li bel ọ titi.”
46Ujeso a fan le, “Eng, ki ba kwa kibibi ka amen bitisha Iten ọ titi. Ma kwuo biwọm swa bendi abi bi ngbeb gbe be gbe he akele ubel Iten angi i go gbe be. Men-agyang ma tyọ kubwo ọ ha ye.
47“Ki ba kwa kibibi ka amen. Ma tye akwun bitye-ugie kisọm Unim abe betie-men be ma gwu. 48Men-agyang ma tyung le ma bọng le ashi betie-men be ma shi ki ngbeb. Befe be gwu bendi abe be tye ugie kisọm Unim, men ma tye akwun abel. 49He atan-lengi angwun Unim angwu a bilishi a de le, ‘Mi ba sọm bitye-ugie kisọm begi hwaa le bendi. Be ba gwa bendi-kisọm besuso, be ke besuso kingie.’ 50Unim u ba ka bendi abe ati anyin kingie he kuhwo bitye-ugie kisọm bema abe be gwu kung le he kunyọng ahwu a shi igye anyin, 51kung le ha kunyọng ahwu be gwu Ebel be wu he kunyọng ahwu be gwu Uzakariya. Uzakariya na be gwu he Ushọm Unim he kudyan kimbe ashi be shang Unim le kipo ashi be ndọ tata ke Unim. Bendi ati angi kunyin be ba kpa kingie he kuhwo kubel puu.
52“Men abe ma hwọ bendi Iten, ki ban amen shie. Ma waa kung ukukol angwu u yi lingye igie Unim gbe he ahwọ-ale Iten he kukwo ahwu igie Unim i ngwee bendi ye, i ngwee amen ye.”
53A gbe le ha, bitisha Iten le bendi Iferesis be fel ben he, be bii he bibibi gbe le biwọm gbam, 54kaa he be nde le u kọng kiban a, he be kwu-e.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.