Uluk 10
10
Ujeso a sọm bendi asi akie le be lihwo le be befee gye he igye
1Ujeso a ha waa bendi asi akie le bendi lihwo le be befee. A sọm abe gye he igye he befee-befee le be le bun igie ima he biteng abi ufe-gyang u ndu gye. 2A de be le, “Agbu-dyu a go, ukpọ bendi abe be fem be go ye. Ma bii ugyang utia le u sọm bendi aki gbam he be be le fem agbu-dyu. 3Ma ndu te. Mi sọm amen le ma te le kwu na inwaa itia i kwu he liwu betang a.” 4U mbee de be le, ma kung ibam unde ọ, nyọng ibam lizi ọ, nyọng ikwob abee ọ ye. Ma naa kọng le undi he kukwo ye.
5“Ushọm uyang-yang angwu ma gye, ma kpi-kikwu de bendi abe he ushọm angwu ha le, ‘Unim u ke men ikwun.’ 6Gbe undi angwu ki ngbeb he le ikwun u yi ha, ikwun imen i ngyọ kwu ha. Ukpọ gbe na a ye, be tem kwu le ikwun ye. 7Ma kwu ha he ushọm umen angwu bendi be kpe men ana kpam, ma zi lizi liyang-yang angi be ke men, likọye undi aki a kpe le u za he kingie kima. Ma tan zi lizi ọ, nyọng ma tan nde mbee ishọm ye, ma kwu he ushọm ken.
8“Kubọng kuyang-ayang ahwu ma gye bendi be kpe men, ma zi lizi angi be ke men. 9Ma mbee bendi-angbam ha he kubọng kumen ana. Ma bun de bendi ha le, ‘Kiteng kusu Unim ki fel kpee-kpee he amen.’ 10Ukpọ kubọng kuyang-ayang ahwu ma te, bendi be kpe men ye, ma gbe le ha gye he igba-akwo, ma de be le, 11‘Ma kumbul-mbul le ha kubọng kumen ku bee li he abee ọ, li shel ahwu wu amen he itang he ki tyung ushe ubibi ke men. Ukpọ ma shi abe be ngye le, kiteng kusu Unim ki fel kpee-kpee.’ 12Ujeso a kung de le, ‘ma ngye le he liti angi Unim u be tang bendi puu ushe, kingie kubọng kumen ana ki ba go hwa ashi kubọng Usọdọm.’
13“Ki ban amen shie, men bendi Ukorazin! Ki ban amen shie, men bendi Ubesaida! Mi shi bikwole-kuhwo he Utaya le Usaidọn na mi shi ha amen kubọng nyin, hang bendi abe ha be kwu ko fe bihwọm akpen, be kem atyung wu kuhwobel le-iti he ki tyung le be bel atyam le he biban bibel. 14He atan-lengi angwun, he liti angi Unim u be tang bendi puu ushe, u ba nda Utaya le Usaidọn beshi hwa men. 15Men bendi Ukapanum befe, ma kọng le Unim u ba kung amen gya he kusi-kusi a? Dia! U ba sọm amen gya he kusu-behwuu.
16“Undi angwu a dang kutyung gyo amen, ha a gyo imi a, undi angwu a swan amen, ha a swan imi a. Undi angwu a swan mi, ha a swan Ada angwu a sọm mi a.”
17Ki gbe kigbe, bendi bemen asi akie le be lihwo le be befee ana be tem be le igọ. Be de Ujeso le, “Ukandi, ikeb ibibi ọ i ke li ife he kunyọng ahwu li ko lizen ligang.”
18Ujeso a de be le, “Mi yi nde Usu bibibi, a mbu le he lifung-atabe imbul-imbul na kindeb-nwaa ki ndeb na. 19Nde le ki nung amen le mi ke men ikeb le ma tem ishii le inọng abee, ma hwo Usu bibibi, undi-linaa umen, ukpọ kiwọm ki do amen ye gbang? 20Ma na ọ ma gọ le gbe ikeb ibibi i ke men ife a ye, ukpọ ma gọ le gbe be fee azen amen fe he kushia he lifung-atabe a.”
21Ha he kunyọng kumen ana Ukatia Kunyọng a ma shi Ujeso a fel le igọ kaang. Ujeso a ha de le, “Ada angwu u yi le lifung-atabe le igye, mi pee a na wo kung biwọm abi wo ndyel le ha bendi abe be bilishi le abe be ngye biwọm tyung bendi abe be ngye kiwọm ye. Eng, Atyagi, ashin na ki ngbeb-a wogyang le wo shi.
22“Atyagi a kung biwọm puu fe-m ha abwo. Ki yi le undi angwu a ngye-m mi Unwaama dang fem Atyagi tyang ye, ki shi le undi angwu a ngye Atyagi dang fem imi Unwaama, le bendi abe mi kee le mi fem he tyung abe tyang ye.”
23Ujeso a bel ashi nde bendi-utung bema, u nyia de be le, “Ikwun i yi ke atọng-shi angi a nde abi ma nde i. 24Ma ngye le bitye-ugie kisọm Unim gbam le besu gbam be maa kee le hang be nde abi ma nde i, be mbee gyo abi ma gyo i, ukpọ be ma nda ọ, nyọng be gyo ọ ye.”
Ityang gbe le undi Usameria ununung
25Undi ken angwu u hwọ bendi Iten a bo be he kushu he u kung Ujeso le he kusi gyo ashi u kọng. A bii Ujeso le, “Ukandi, mi shi na a, mi kwu le likpan angi li ngyọ igye kpam?”
26Ujeso a bii he le kibang be fee he kushia Iten Unim? Kibang a bo le ha?
27Ungikye ana a kung fan le, “Be fee le, ‘Ki nyin a le Ada Unim le lityam ligang puu, le kunyọng kugang puu, le ikeb igang puu, le ugim ugang puu.#10:27 Iten lefee 6:5; 10:12; 30:6 Ki mbee nyin a le unde-gang na ki nyin a le kuhwo-gang.’#10:27 Iten ashang-ale 19:18 ”
28Ujeso a de-e le, “Wo fan ki yi del-del. Shi na, ma wo kwa le likpan kunyọng.”
29Ungikye angwuna a ma kee le u kọng ngbeb kuhwo-ma he ashi. A ha kung bii Ujeso le, “Ayang u ha yi undegi?”
30Ujeso a fan he le, “Ungikye ken a ma bo le he Ujeruselem, u nda ashi gya he Ujeriko. A be mbu fe bezi he abwo he kukwo. Be kwu-e, kpam do he kaang, be waa kung he biwọm le he kuhwo, kwu kpe-e biwọm abi a ma yi le bi puu. Be kpam he teng he lihwu-lihwu buu gbe. 31Nya ana a ma yi tyang ha he kukwo, undi angwu u shang Unim a be gbe ha, a nde-e. A le baa gbe he kigie kukwo ashel. 32Nya kitaa ken undi angwu u yi he kikwu-lihwan ashi be ko le Ulevi a mbee be wu ha. A le naa nde ungikye angwuna. A mbee le baa gbe he kigie kukwo ashel. 33Ungikye ususo angwu a ma be le he Usameria a ha be gbe he kukwo kumen ana. A nde-e u yi tyang ha he kukwo. Beshi be ma shi-e le he. 34A le hwaa le he. A kung kutyo to he bibaa, u tyọ he abi behwu, u kung ileyi bwọ he abi. A kung he pwọm he kukaa-inyia kuma gye le he he ushọm angwu be kpe begaa-ndi ndọ, u mbee nde gbe le he ha. 35Nyọng ashi a ma taa, a kung ikwudi lihwo le ke ugyang ushọm. A de-e le u nde gbee le he nyin. Gbe a ban kiwọm he kuhwo ungikye angwun gbe-gyọng unde angwu a ke-e ana, u tem ma u ka he.”
36Ujeso a ha fe ityang anyin lishi le, “He bendi bekie abena, ayang angwu wo gim le a ma yi undema?”
37Undi angwu u hwọ bendi Iten ana a fan Ujeso le undi angwu beshi be ma shi-e le he a.
Ujeso a de-e le ufe ọ titi u le shi nya ana ungikye angwuna a ma shi.
He ushọm Umata le Umeri
38Nya ana Ujeso befe le bendi-utung bema be maa te le kukwo, be le fel he lishi kubọng angi ungingye angwu be maa ko le Umata a ma kpe-e gye he ahe ushu. 39A ma yi le unwaa-nde ungingye angwu be maa ko le Umeri. Umeri a ma kwu Ada he kushu, u gyo ashi u hwọ. 40Umata a maa waa ufung gba le kugaa ahwu ku yi le u shi. A be hwaa le Ujeso bii he le, “Ada, ki ngbeb-a na unwaa-ndagi a gbe tyang mi le mi shi lizi ututeb a? Ha de-e le u be kpel mi.”
41Ada Ujeso a kung de-e le, “Unwa-agi Umata, ki ngie a likọye wo waa ufung gba le biwọm abin puu, 42ukpọ kiwọm ken na ki yi kindee-kindee. Umeri na a waa kiwọm kimen ashi ki ngbeb i. Undi u ha ndu kpa he ashi ye.”
Currently Selected:
Uluk 10: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Uluk 10
10
Ujeso a sọm bendi asi akie le be lihwo le be befee gye he igye
1Ujeso a ha waa bendi asi akie le bendi lihwo le be befee. A sọm abe gye he igye he befee-befee le be le bun igie ima he biteng abi ufe-gyang u ndu gye. 2A de be le, “Agbu-dyu a go, ukpọ bendi abe be fem be go ye. Ma bii ugyang utia le u sọm bendi aki gbam he be be le fem agbu-dyu. 3Ma ndu te. Mi sọm amen le ma te le kwu na inwaa itia i kwu he liwu betang a.” 4U mbee de be le, ma kung ibam unde ọ, nyọng ibam lizi ọ, nyọng ikwob abee ọ ye. Ma naa kọng le undi he kukwo ye.
5“Ushọm uyang-yang angwu ma gye, ma kpi-kikwu de bendi abe he ushọm angwu ha le, ‘Unim u ke men ikwun.’ 6Gbe undi angwu ki ngbeb he le ikwun u yi ha, ikwun imen i ngyọ kwu ha. Ukpọ gbe na a ye, be tem kwu le ikwun ye. 7Ma kwu ha he ushọm umen angwu bendi be kpe men ana kpam, ma zi lizi liyang-yang angi be ke men, likọye undi aki a kpe le u za he kingie kima. Ma tan zi lizi ọ, nyọng ma tan nde mbee ishọm ye, ma kwu he ushọm ken.
8“Kubọng kuyang-ayang ahwu ma gye bendi be kpe men, ma zi lizi angi be ke men. 9Ma mbee bendi-angbam ha he kubọng kumen ana. Ma bun de bendi ha le, ‘Kiteng kusu Unim ki fel kpee-kpee he amen.’ 10Ukpọ kubọng kuyang-ayang ahwu ma te, bendi be kpe men ye, ma gbe le ha gye he igba-akwo, ma de be le, 11‘Ma kumbul-mbul le ha kubọng kumen ku bee li he abee ọ, li shel ahwu wu amen he itang he ki tyung ushe ubibi ke men. Ukpọ ma shi abe be ngye le, kiteng kusu Unim ki fel kpee-kpee.’ 12Ujeso a kung de le, ‘ma ngye le he liti angi Unim u be tang bendi puu ushe, kingie kubọng kumen ana ki ba go hwa ashi kubọng Usọdọm.’
13“Ki ban amen shie, men bendi Ukorazin! Ki ban amen shie, men bendi Ubesaida! Mi shi bikwole-kuhwo he Utaya le Usaidọn na mi shi ha amen kubọng nyin, hang bendi abe ha be kwu ko fe bihwọm akpen, be kem atyung wu kuhwobel le-iti he ki tyung le be bel atyam le he biban bibel. 14He atan-lengi angwun, he liti angi Unim u be tang bendi puu ushe, u ba nda Utaya le Usaidọn beshi hwa men. 15Men bendi Ukapanum befe, ma kọng le Unim u ba kung amen gya he kusi-kusi a? Dia! U ba sọm amen gya he kusu-behwuu.
16“Undi angwu a dang kutyung gyo amen, ha a gyo imi a, undi angwu a swan amen, ha a swan imi a. Undi angwu a swan mi, ha a swan Ada angwu a sọm mi a.”
17Ki gbe kigbe, bendi bemen asi akie le be lihwo le be befee ana be tem be le igọ. Be de Ujeso le, “Ukandi, ikeb ibibi ọ i ke li ife he kunyọng ahwu li ko lizen ligang.”
18Ujeso a de be le, “Mi yi nde Usu bibibi, a mbu le he lifung-atabe imbul-imbul na kindeb-nwaa ki ndeb na. 19Nde le ki nung amen le mi ke men ikeb le ma tem ishii le inọng abee, ma hwo Usu bibibi, undi-linaa umen, ukpọ kiwọm ki do amen ye gbang? 20Ma na ọ ma gọ le gbe ikeb ibibi i ke men ife a ye, ukpọ ma gọ le gbe be fee azen amen fe he kushia he lifung-atabe a.”
21Ha he kunyọng kumen ana Ukatia Kunyọng a ma shi Ujeso a fel le igọ kaang. Ujeso a ha de le, “Ada angwu u yi le lifung-atabe le igye, mi pee a na wo kung biwọm abi wo ndyel le ha bendi abe be bilishi le abe be ngye biwọm tyung bendi abe be ngye kiwọm ye. Eng, Atyagi, ashin na ki ngbeb-a wogyang le wo shi.
22“Atyagi a kung biwọm puu fe-m ha abwo. Ki yi le undi angwu a ngye-m mi Unwaama dang fem Atyagi tyang ye, ki shi le undi angwu a ngye Atyagi dang fem imi Unwaama, le bendi abe mi kee le mi fem he tyung abe tyang ye.”
23Ujeso a bel ashi nde bendi-utung bema, u nyia de be le, “Ikwun i yi ke atọng-shi angi a nde abi ma nde i. 24Ma ngye le bitye-ugie kisọm Unim gbam le besu gbam be maa kee le hang be nde abi ma nde i, be mbee gyo abi ma gyo i, ukpọ be ma nda ọ, nyọng be gyo ọ ye.”
Ityang gbe le undi Usameria ununung
25Undi ken angwu u hwọ bendi Iten a bo be he kushu he u kung Ujeso le he kusi gyo ashi u kọng. A bii Ujeso le, “Ukandi, mi shi na a, mi kwu le likpan angi li ngyọ igye kpam?”
26Ujeso a bii he le kibang be fee he kushia Iten Unim? Kibang a bo le ha?
27Ungikye ana a kung fan le, “Be fee le, ‘Ki nyin a le Ada Unim le lityam ligang puu, le kunyọng kugang puu, le ikeb igang puu, le ugim ugang puu.#10:27 Iten lefee 6:5; 10:12; 30:6 Ki mbee nyin a le unde-gang na ki nyin a le kuhwo-gang.’#10:27 Iten ashang-ale 19:18 ”
28Ujeso a de-e le, “Wo fan ki yi del-del. Shi na, ma wo kwa le likpan kunyọng.”
29Ungikye angwuna a ma kee le u kọng ngbeb kuhwo-ma he ashi. A ha kung bii Ujeso le, “Ayang u ha yi undegi?”
30Ujeso a fan he le, “Ungikye ken a ma bo le he Ujeruselem, u nda ashi gya he Ujeriko. A be mbu fe bezi he abwo he kukwo. Be kwu-e, kpam do he kaang, be waa kung he biwọm le he kuhwo, kwu kpe-e biwọm abi a ma yi le bi puu. Be kpam he teng he lihwu-lihwu buu gbe. 31Nya ana a ma yi tyang ha he kukwo, undi angwu u shang Unim a be gbe ha, a nde-e. A le baa gbe he kigie kukwo ashel. 32Nya kitaa ken undi angwu u yi he kikwu-lihwan ashi be ko le Ulevi a mbee be wu ha. A le naa nde ungikye angwuna. A mbee le baa gbe he kigie kukwo ashel. 33Ungikye ususo angwu a ma be le he Usameria a ha be gbe he kukwo kumen ana. A nde-e u yi tyang ha he kukwo. Beshi be ma shi-e le he. 34A le hwaa le he. A kung kutyo to he bibaa, u tyọ he abi behwu, u kung ileyi bwọ he abi. A kung he pwọm he kukaa-inyia kuma gye le he he ushọm angwu be kpe begaa-ndi ndọ, u mbee nde gbe le he ha. 35Nyọng ashi a ma taa, a kung ikwudi lihwo le ke ugyang ushọm. A de-e le u nde gbee le he nyin. Gbe a ban kiwọm he kuhwo ungikye angwun gbe-gyọng unde angwu a ke-e ana, u tem ma u ka he.”
36Ujeso a ha fe ityang anyin lishi le, “He bendi bekie abena, ayang angwu wo gim le a ma yi undema?”
37Undi angwu u hwọ bendi Iten ana a fan Ujeso le undi angwu beshi be ma shi-e le he a.
Ujeso a de-e le ufe ọ titi u le shi nya ana ungikye angwuna a ma shi.
He ushọm Umata le Umeri
38Nya ana Ujeso befe le bendi-utung bema be maa te le kukwo, be le fel he lishi kubọng angi ungingye angwu be maa ko le Umata a ma kpe-e gye he ahe ushu. 39A ma yi le unwaa-nde ungingye angwu be maa ko le Umeri. Umeri a ma kwu Ada he kushu, u gyo ashi u hwọ. 40Umata a maa waa ufung gba le kugaa ahwu ku yi le u shi. A be hwaa le Ujeso bii he le, “Ada, ki ngbeb-a na unwaa-ndagi a gbe tyang mi le mi shi lizi ututeb a? Ha de-e le u be kpel mi.”
41Ada Ujeso a kung de-e le, “Unwa-agi Umata, ki ngie a likọye wo waa ufung gba le biwọm abin puu, 42ukpọ kiwọm ken na ki yi kindee-kindee. Umeri na a waa kiwọm kimen ashi ki ngbeb i. Undi u ha ndu kpa he ashi ye.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.