Ujọn 1
1
Igie i bel agwo undi-gye
1Le ha linde-linde ki ma yi igie, igie imen ana i ma yi utung ha Unim, igie imen ana i ma yi Unim a. 2A ma yi utung ha Unim le ha linde-linde. 3Gbe he ahe na limbee puu li ma be; be ma mbe kihwom ken ọ faale he ye. 4He ahe na ki ma yi le likpan, likpan limen ana na li ma yi kikung-gboo bendi puu. 5Kikung-gboo ana ki taa he kifufeb, ukpọ kifufeb ki nim ashi mbee ye.
6Le-iti, Unim a ma sọm undi ususo angwu be ma ko le Ujọn. 7Unim a ma sọm he le u be bun de bendi gbe le kikung-gboo ana, le he bendi puu be gyo, be bọng kpe kisọm kimen ashi Ujọn a ma bun ana. 8Ufe-gyang na a ma yi kikung-gboo kimen ana ye, ufe a ma kee-kee be na ushada kikung-gboo kimen ana a.
9Kikung-gboo kigyang ashel ashi ki ke bendi puu kikung-gboo i, ki ma ndọ ashi ki ba he igye anyin. 10Ufe angwu u yi kikung-gboo kigyang ashel abe he igye i. Ma na Unim a mbe igye anyin gbe ha ufe a ọ, bendi be ma nde shob he ye. 11A be hwaa le bendi bema be-gyang, ukpọ be swan he. 12Ukpọ abe be kpe-e, be mbee bọng he ahe kigyang-kigyang, u buu kukwo ka be le be fel bebwaa Unim. 13Lihwan libel limen ana li be le he ubu a ọ, nyọng li be gbe he ugim undi-gye a ọ ye. Unim ugyang na a hwan kung abe.
14Igie angi i ma yi Unim ana i fel agwo, a be kwu ipel ha abel he kanwaa kunyọng zang. Li nde ifem ima angi i be le ha Unim Atyam, ifem kiken unwaa ama angwu a sho le beshi le kigyang.
15Ujọn a de bendi gbe le he le, “Ma nde undi angwu le-iti mi ma de men gbe le he le angwu u be-m le ha item a dyam hwo-m likọye ufe u yi ma ukpọng be ha hwan mi.” 16Le gbe a ngbeb inung kaang, a ke li bel puu kukwun kugbe ibwan-ibwan. 17Unim a ke li Iten ima gbe ha Umosis, ukpọ gbe ha Ujeso Kristi igie ima, na a tyung inung le beshi ha abel, u mbee fem kigyang he igye gboo tyung li. 18Kung le ha ukpi-kikwu igye anyin, ki yi le undi angwu a wa nde Unim le ashi ngye ye. Ujeso Kristi kiken Unwaama angwu u yi gwaa le Atyam, ufe na a tyung li kitaa Atyam u yi.
Ujọn a de bendi le ufe u yi Ukristi a ye
(Mat 3:1-12; Mak 1:1-8; Luk 3:1-18)
19He kunyọng ken bekandi Ijuus abe he Ujeruselem be sọm bendi abe be shang Unim le bendi abe be be ubu le he kikwu-lihwan Ulevi le be le bii Ujọn kitaa undi ashi u yi. 20Ujọn a ma fan abe le, “Mi yi Ukristi angwu Unim a waa le u kwu Undi-likpan igye anyin a ye.” A ma kọng igie angina gboo he atyung bendi abena puu.
21Be mbee bii he le, “Fe wo ha yi ayang a? Wo na wo yi Elaija a?”
Ujọn a swan.
Be mbee kung bii he le, “Wo na wo yi utye-ugie kisọm Unim angwu kushia Unim ku kọng gbe le he ana a?”
Ujọn a swan le u yi ufe a ye.
22He ashina be mbee kung bii he le, “Fe wo ha yi ayang a? De li li le de abe be sọm li. Kibang ashi wo de li gbe le kuhwo-gang?”
23Ujọn a ma fan na Azaya utye-ugie kisọm Unim a ma kọng le, “Undi u ba gaa le he ugbaa-libeb le, Ada u ba le ha, ‘ma shi kukwo ahwu ku nọng ndọ he.’ ”#1:23 Azaya 40:3-5
24He liwu bendi abe be sọm ana, Iferesis i ma gia yi ha, 25be kung bii Ujọn le, “Gbe wo yi Ukristi, Undi-likpan angwu Unim a sọm be he igye a ye, wo shi Elaija a, ngwu wo kwu utye-ugie kisọm Unim angwu kushia Unim ku kọng gbe le he ana a ye, kibang a, wo ha wu bendi umbwo?”
26Ujọn a fan abe le, “Mi wa bendi umbwo, ukpọ undi ususo u yi naa he liwu limen angwu ma ngye-e ye. 27U yi undi angwu u be-m le ha item a, mi kpe le mi pel indii ikwob ima ọ ye.”
28Le-iti biwọm abin bi ma shi he Ubetani he igbindi umbwo angwu be ko le Ujọdan he kipi Ujọn a maa wu bendi umbwo a.
Ujọn a naa ushada gbe le Ujeso
29He utepwọm liti, Ujọn a ma nde Ujeso u ba hwaa le he, Ujọn a kung de le, “Ma nde Unwaa Utia Unim angwu a kung biban igye. 30Ufe na mi ma kọng gbe le he nyọng mi ma de le angwu u be-m le ha item a dyam hwo-m kaang, likọye ufe u yi-m le he kushu. 31Le-iti mi ọ mi ma ngye-e ye, ukpọ atan-lengi angwu mi maa wu bendi umbwo u yi le he men bendi Izwel ma ngye-e a.”
32Ujọn a ma mbee tye ipọng gboo gbe le Ujeso Kristi le, “Mi ma nde Ukatia Kunyọng na a shul le he lifung-atabe be he itang. A ma shul na kalulu be so-e he lishi. 33Kpam be wu he kunyọng kumen ana, mi ma wa ngye-e ye, ukpọ Unim angwu a ma sọm mi le mi be wu bendi umbwo, a ma de-m le, mi ba nda Ukatia Kunyọng na u shul le he kusi be he itang be so undi he lishi. Kitaa ana na mi shi ngye undi umen angwu u be sho bendi le Ukatia Kunyọng i. 34Mi nde biwọm abin puu kitaa a ma de-m. Kife na mi de men gboo le ufe angwun u yi Unwaa Unim a.”
Bendi-utung Ujọn be pwọm Ujeso
35He utepwọm liti, Ujọn a ma mbee yi naa ha le bendi-utung bema befee. 36A nde Ujeso a be u gba, a de be le, “Ma nde Unwaa Utia Unim ana.”
37Bendi-utung Ujọn befee ana be gyo he a kọng ashin, be ma bo pwọm Ujeso. 38Ujeso a bel ashi he item nde be be pwọm he, a bii abe le, “Ma kee kibang a?”
Be fan he le, “Itisha ukandi, wo kwa he kung a?”
39Ujeso a de be le, “Ma be nde.”
Be ma gbe utung he ahe le nde he kipi u kwu, be ngyọ kwu he ahe ha kpam gyeb likwu-lukwu. Ki ma yi inde inde angi ishu likwu-lukwu a.
40Bendi bemen befee abe be ma gyo Ujọn, be gbe pwọm he ana, be ko angwu ken le Andru. U yi unwaa-nam Usaimọn Pita a. 41Andru ana a buu akye le nde unwaa-nde Usaimọn, a de-e le, “Bel li nde Umezaya.” (Ashi ki ze le undi-likpan) 42Andru a ma te le Usaimọn le hwaa le Ujeso.
Ujeso a nde-e, a kung de-e le, “Usaimọn, unwaa Ujọn, lizen ligang angi ken li fel le Usefas.” (Lizen angi le Usefas li yi kitaa ken ha angi le Ipita, puu angi afee a ze le kukọ.)
Ujeso a ko Ufilip le Unatandyel
43He utepwọm liti, Ujeso a bo u gya he kigie Ugalili. A nde Ufilip angwu u yi kubọng Ubesaida ahwu Andru le Ipita be be. A de Ufilip le, “Bo li gye.”
44Ufilip ọ a maa ba le he kubọng Ubesaida a nya na Andru le Ipita. 45Ufilip a bo le nde Unataniyel, a de-e le, “Li nde undi angwu le-iti Umosis a ma fee gbe le he he kushia Iten Unim, bendi abe be maa tye ugie kisọm Unim ọ titi be ma fee gbe le he. Be ko he le Ujeso, u yi kubọng Unazaret, u shi unwaa Ujosef a.”
46Unataniyel a bii he le, “Kinunung kisuso ki ba le he Unazaret a?”
Ufilip a de-e le, “Be, ma wo nda!”
47Ujeso a nde Unataniyel u ba hwaa le he, a kung kọng gbe le he le, “Angwu u be ana u yi undi Izwel ugyang kpa-kpa faale uman a.”
48Unataniyel a bii he le, “Na wo shi nyọng wo ngye-m?”
Ujeso a fan he le, “Mi yi nda-a he kunyọng ahwu wo yi he liten Ufig, ma ukpọng Ufilip u ha le ko-a.”
49Unataniyel a kung de-e le, “Itisha, wo yi Unwaa Unim a, wo shi Usu Izwel a!”
50Ujeso a de-e le, “Wo ndaa bọng le mi yi Unwaa Unim a likọye mi da-a le mi yi nda-a he liten Ufig. Kigyang-kigyang, wo ha nda biwọm abi bi gbe-gyọng ashin.” 51Ujeso a mbee de be le, “Mi da amen kigyang a le, ma ba nda lifung-atabe li buu ndọ gboo, ma nda idengel Unim na i mbo gye he kusi, i tem shul#1:51 Ukpi-kikwu 28:12 be he itang gbe ha ami Unwaa undi-gye.”
Currently Selected:
Ujọn 1: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
