Ọbọsuru 20
20
1Ke ini ndutime emi ama okodobo, Pọl ama okot ikọt Abasi obok ebiet kiet onyuñ ọnọ mmọ ikọ idọñesit ndien ọkọm mmọ unyọñ. Ndien enye ama ọkọñ aka ke Masidonia. 2Enye ama asaña akanade mme ñkanñkuk oro onyuñ ọnọ mme owo ikọ nsọñidem emi otode ñwed Abasi. Ndien enye ama ekesim Kris, 3ebiet emi enye okodude ọfiọñ ita. Enye ke ekebeñe idem ndika Siria ndien enye ama ayarade ete ke mme Ju ke ekenanam ediomi ebaña imọ, do enye ama ebiere ndifiak edem ndikebe ke Masidonia.
4Sopata, eyen Pairọs, emi otode Beria ama asaña ye enye, kpa ntre ñko ye Aristakọs ye Sekundọs emi etode Tesalonika, Keyọs emi otode Derbe, Timoti, ye Taikikọs, ye Trofimọs emi etode ñkanñkuk Esia. 5Mme mmọ emi ema ebem iso ekebet ñnyin ke Troas. 6Ñnyin ikosio ke Filipai ke ema ekekure usọrọ ebok uyo, ndien ke usen ition ema ekebe ñnyin ima ikosobo mmọ ke Troas, ke ebiet emi ikodude urua kiet.
Akparawa Ọduọ Akpa
7Ke akpa usen urua ñnyin ima ibok idem ọtọ kiet ndibuñ uyo. Pọl ama ọkwọrọ ikọ ọnọ mme mmọ emi ekedude, sia enye okoyomde ndidaha ke udiana usen, anam enye ama aka iso nditiñ ikọ tutu esim ufọt okoneyo. 8Mme ediwak utueneikañ ema edu ke ubet enyọñ emi ñnyin ikobonode. 9Akparawa kiet emi ekekerede Iyutikọs ama etie ke windo ndien ke ini Pọl okosuk akade iso nditiñ ikọ, Yutikọs ama aka iso ndide ọkpọsọñ idap tutu enye ama adiañade ke ọyọhọ ikpehe enyọñ ita ediduọ ke isọñ. Mmọ ema ekemen okpo esie. 10Pọl ama ọsuhọde aka ọkọduọ ofuk enye onyuñ awaña enye. Pọl ama ọdọhọ ete, “Ekufehe ndik ke enye ke ododu uwem!” 11Ndien enye ama afiak ọdọk enyọñ okobuñ uyo onyuñ ata. Ke enye ama eketiñ ikọ tutu usiere, enye ama adaha ọkpọñ mmọ. 12Mme owo oro ema emen akparawa oro ye uwem enyọñ ufọk, ndien mmọ ema ekop inemesit eti eti.
13Ñnyin ima ikoduk nsuñikañ isio ika Asọs ke ebiet emi ñnyin ikenyenede ndimen Pọl. Enye akanam ediomi emi ye ñnyin koro akanade nte enye asaña obot obot. 14Ke ini enye ama okosobo ñnyin ke Asọs, ñnyin ima imen enye isin ke nsuñikañ ika Mitilin. 15Ke udiana usen, ñnyin ima isio ito do ikebehe ke Kiọs. Ke usen kiet ama ekebe ñnyin, ima ikadian ke Samọs, ndien ke udiana usen ñnyin ima ikebehe ke Miletọs.
Etop Unyọñ Pọl Ke Efisọs
16Pọl ama ebiere ndiwat mbe Efisọs mbak enye edibiat ini ke ñkanñkuk Esia, koro enye okodude ke udọñ ndisọp ñkesim Jerusalem, edieke edide mmemmem ke usen usọrọ idọk mme Ju. 17Ke Miletọs, Pọl ama ọdọñ eka ke Efisọs ekekot mme ada idaha ufọk Abasi.
18Ke ini mmọ ema ekesim, enye ama ọdọhọ mmọ ete, “Mbufo emefiọk nte ami ñkodude uwem mi ke ofuri ini emi ñkodude ye mbufo, ọtọñọde ke akpa usen emi ami ñkedide ñkanñkuk Esia. 19Ami ñkanam ñkpọ nnọ Abasi ke akwa nsuhọdidem ye mmọñ eyet, okposuk edi oro ekedomode mi ese oto ke mme ndibe ediomi mme Ju.
20Mbufo emefiọk ete ke ami ñketreke ndikwọrọ se idiñwam mbufo ke ukpepñkpọ emi ke añwa ye ke esit ufọk. 21Mme Ju ye mme mmọ emi midighe Ju, ukem ukem, mma nduri utọñ nte yak mmọ ewọñọde ekpọñ mme idiọkñkpọ mmọ etiene Abasi enyuñ enim Ọbọñ Jisọs ke akpanikọ.”
22“Ndien ke emi, ke idak ñkop uyo Edisana Spirit, ami ke ñka Jerusalem, ndiọñọke se iditibede inọ mi do. 23Ami mmọfiọk nte ke Edisana Spirit oduri mi utọñ ete ke ñkpọkọbi ye afanikọñ ena ebet mi ke kpukpru obio. 24Ke usuñ kiet ekededi, anam mbatke uwem mi nte ñkpọ ndomokiet, man ami ñkeme ndinam uduak mi osu, ñnyuñ nnam utom emi Ọbọñ Jisọs ọkọnọde mi, emi edide ndisuan Eti Mbuk mfọn Abasi.”
25“Idahaemi ami mmọdiọñọ nte baba owo mbufo ndomokiet emi ñkasañade ye enye ñkwọrọ ikọ Obio Ubọñ Abasi idikwe mi aba. 26Ke ntre ami mmọsọñọ ntiñ nnọ mbufo mfin emi nte, edieke owo mbufo ndomokiet atakde, ami nsañake do. 27Koro ami ñketreke nditiñ nnọ mbufo ofuri uduak Abasi.
28Ekpeme idem mbufo ye otu erọñ emi Edisana Spirit emende esin mbufo ke ubọk ke ubiọñ. Edi mme ekpeme erọñ ufọk Abasi, emi Enye akanamde edi Esie oto ke ñkpa Eyen Esie. 29Ami mmọfiọk nte kadaña emi ami mme ndiduhọ, mme enyene ndik ekpe eyedi ke otu mbufo, ndien mmọ idifenke mme erọñ. 30Ini eyedi emi ubak irenowo ke otu mbufo edisude nsu man eda mme andinim ke akpanikọ enọ idem mmọ. 31Ekpeme ndien, enyuñ eti ete ke ekedi ke mmọñ eyet, ke uwemeyo ye ke okoneyo ke ami ñkekpep kpukpru mbufo ñkpọ ke isua ita.”
32“Ndien ke emi ami mmayak mbufo nsin Abasi ke ubọk, ye ke mfọn ikọ Abasi, emi ekemede ndinam mbufo ekọri, ndien ọnọ mbufo udeme mbufo ke otu mme mmọ emi Enye anamde esana.
33Ami ñkesinke enyin ke silfa mme gold owo ndomokiet, mme ọfọñ idem. 34Mbufo ke idem mbufo emefiọk ete ke nda ubọk mi emi nnam utom ñnyene kpukpru mme ñkpọ emi akananade mi ye mme nsaña mi. 35Ami mma ñwut mbufo ke kpukpru ñkpọ nte ke edinam ọkpọsọñ utom edi ukure usuñ emi ñnyin ikemede ndiñwam mme mmọ emi idem ememde, ke editi mme ikọ emi Ọbọñ Jisọs ke idem esie eketiñde ete, ‘Udori odu akan ke edinọnọ ñkan ke ndibọbọ.’ ”
36Ke enye ama eketiñ emi ama enye ama ọtọñọ erọñ ke isọñ ye kpukpru mmọ Ọbọñ akam. 37Kpukpru mmọ ema etuaña kadaña emi mmọ ekefatde enye enyuñ etim enye inua. 38Mmọ eketim efuhọ ebaña mme ikọ emi enye eketiñde ete ke mmọ idikwe imọ aba. Ndien mmọ ema etiene enye ekesim nsuñikañ.
Currently Selected:
Ọbọsuru 20: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
