Ọbọsuru 21
21
Akpatre Emi Pọl Akade Jerusalem
1Ima ikọm mmọ ekọm unyọñ inyuñ ikpọñ mmọ; ima iwọrọ akpa inyuñ iwat nnen nnen ika Kọs. Ke udiana usen ñnyin ima ika Rọd ndien ito do ika Patara.
2Do ke ñnyin ikokut nsuñikañ emi okoyomde ndika Fonisia, do ñnyin ima iduk inyuñ isio. 3Ñnyin ima iwat ikesim nda ñkut Saiprọs ndien iwọñọde ika ñkañ usuk usuk ikesim Siria. Ñnyin ima idọk obot ke Taya ebiet emi akanade nte nsuñikañ osioño mbiomo esie. 4Ñnyin ima ikut mme andinim ke akpanikọ do inyuñ idañ ye mmọ urua kiet. Ke odudu Edisana Spirit mmọ ema edọhọ Pọl ete yak enye okuka Jerusalem. 5Edi ke ini unyọñ ama ekekem, ñnyin ima ikpọñ mmọ inyuñ ika iso ke isañ ñnyin. Kpukpru mmọ ye mme iban mmọ, ye mme nditọ mmọ, ema esaña ye ñnyin tutu ewọrọ ekpọñ obio. Ñnyin kpukpru ima itọñọ edọñ do ke esuk inyuñ ibọñ akam. 6Do ima ikọm kiet eken unyọñ ndien ikoduk nsuñikañ ndien mmọ ema efiak edem enyọñ ufọk.
7Ñnyin ima ika iso ke isañ ñnyin, iwat ito ke Taya ika Tolemais, ebiet emi ñnyin ikọkọmde nditọ ete inyuñ idañ ye mmọ usen kiet. 8Ñnyin ima idiañade ke udiana usen ikebehe ke Siseria. Do ke ñnyin ikaka ufọk Filip emi ekedide ọkwọrọ ikọ Abasi, inyuñ iduñ do ye enye. Enye ekedi kiet ke otu Owo itiaba emi ekemekde ke Jerusalem. 9Enye ama enyene nditọ iban inañ emi mikediọñọke eren owo kaña edi ekenyenede enọ usiak uduak Abasi.
10Ke ini ñnyin ima ikodu do ke ñkpọ nte usen ifañ prọfet kiet emi ekekerede Akabọs ama oto Judia edi. 11Enye ama edi ebine ñnyin, edimen ñkpaha isin Pọl ọbọp ukot ye ubọk esie, onyuñ ọdọhọ ete, “Emi edi se Edisana Spirit ọdọhọde: Mme Ju ke Jerusalem eyebọp enyene ñkpaha isin emi ntem, ndien eyak enye enọ mme mmọ emi midighe mme Ju.” 12Ke ñnyin ima ikokop ñkpọ emi, ñnyin ye mme mmọ eken emi ikodude do ima ikpe Pọl ubọk ite yak enye okuka Jerusalem.
13Edi enye ama ọbọrọ ete, “Nso ke mbufo enam emi ke editua eyet mbuñ mi esit? Ami mebeñe idem idighe ke edibọbọp mi ikpọñ ke Jerusalem, edi ndikpa do ke ntak Ọbọñ mi Jisọs.” 14Ñnyin ikekemeke ndinam enye ọkpuhọ ekikere esie, ndien ñnyin ima isana enye iyak inyuñ idọhọ ite, “Yak enam uduak Abasi.”
15Ke ima ikabiat esisit ini do, ñnyin ima itim ñkpọ ñnyin idaha ika Jerusalem. 16Ubak mme mbet emi etode Siseria ema enyuñ etiene ñnyin enyuñ eda ñnyin eka ufọk owo emi akanade nte iduñ ye enye emi ekekerede Masọn emi otode Saiprọs, emi ekenimde Abasi ke akpanikọ tọñọ ke ini emi ukwọrọ Eti Mbuk ọkọtọñọde. 17Ke ini ñnyin ima ikesim Jerusalem mme nditọ ete ema edara ñnyin eti eti.
18Ke ndañ nsiere ñnyin ye Pọl ima ika ikese Jems ye kpukpru mme ada idaha ufọk Abasi emi ekedude. 19Pọl ama ọkọm mmọ onyuñ etiñ ọnọ mmọ ọyọhọ ọyọhọ se Abasi ekebede ke ubọk esie anam ke otu mme mmọ emi midighe mme Ju.
20Ke ini mmọ ekekopde mbuk emi, mmọ ema ekọm Abasi. Do ke mmọ ekedọhọ Pọl ete, “Afo omokut, eyen ete, ibat tọsin mme Ju emi ema ekenim ke akpanikọ, ndien kpukpru mmọ enyene akwa udọñ ye ima ebaña ibet. 21Ema etiñ enọ mmọ ete ke afo ekpep kpukpru mme Ju emi edude ke idut mme mmọ emi midighe mme Ju ete yak ekpa edem enọ mme mbet Moses, onyuñ ọdọhọ mmọ ete yak mmọ ekunim nditọ mmọ mbobi, mme ndidu uwem nte ido emana ñnyin edide. 22Ñnyin idinam didie? Koro mmọ iditreke ndifiọk nte ke afo emedi mi.
23Ke ntre, nam se ñnyin itiñde inọ fi. Owo inañ edu mi ke otu ñnyin emi ema ekeda uñwọñọ. 24Da mme mmọ emi ka kabuana ye mmọ ke edinam edinam mmọ esana, kpe se iditakde mmọ, man oto do ekwat mmọ idet ke ibuot. Ke ntre ke kpukpru owo edidiọñọ nte ke akpanikọ iduhọ ke mbuk emi mmọ ekebukde ebaña fi, edi ke afo ke idem fo ke odudu uwem ke edisuk ibuot nnọ ibet.
25Edi ama edi mme mmọ emi midighe mme Ju, emi enimde ke akpanikọ, ñnyin ima iwewet se ñnyin ikebierede inọ esọk mmọ, nte yak mmọ ekudia udia emi ewade enọ ndem, ekuta iyip, ye unam emi efiañarede itọñ ewot, ekunam use.”
26Ke ndañ nsiere Pọl ama ada mme mmọ oro onyuñ akanam idem esie ye mmọ esana. Ndien enye ama oduk ke itie ukpono Abasi ọkọtọt abaña usen emi mme usen edinam asana editrede ndien enam uwa enọ mmọ kiet kiet.
27Ke ini usen itiaba oro ekekperede ndikure, ubak mme Ju emi eketode ñkanñkuk Esia ema ekut Pọl ke itie ufọk Abasi. Mmọ ema edemere iyat esit ke otu ofuri otu owo enyuñ emum Pọl. 28Mmọ ema efiori ete, “Mbon Isrel, eñwam! Emi edi owo emi asañade ke kpukpru ebiet ekpep kpukpru owo ñkpọ emi atuahade ye idut Isrel, ye mbet Moses, ye itie ukpono Abasi emi. Ndien idahaemi enye onyuñ ada ubak mme mmọ emi midighe mme Ju oduk edi itie ukpono Abasi edisabade edisana ebiet emi.” 29Mmọ eketiñ emi koro mmọ ema ekut Trofimọs emi otode Efisọs nte asañade ye Pọl ke esit obio ndien mmọ ema ekere ete ke Pọl ama ada enye oduk esit itie ukpono Abasi.
30Ndutime ama atara ọyọhọ ofuri obio, ndien kpukpru owo ema efeñe ekeboho ọtọ kiet, enyuñ eduri Pọl esio ke itie ukpono Abasi. Ini kiet ema eberi mme usuñ itie ukpono Abasi. 31Ke ini mbio ntime emi ekeñwanade ndiwot Pọl, ntọt ama ekesim adaibuot ukara mbon ekọñ Rom nte ke ofuri obio Jerusalem odu ke akamba ntime. 32Inikiet, ada iso ekọñ emi ama ada mme ikpọ mbio ekọñ esie ye mme mbio ekọñ eken efeñe ekesim otu owo emi. Ke mmọ ema ekekut ada iso ekọñ ye mme mbio ekọñ esie mmọ ema etre nditim Pọl. 33Ada iso ekọñ ama asaña okomum Pọl, onyuñ ọnọ uyo ete yak ebọp enye ke ñkpọkọbi iba. Ndien enye ama obup ete, “Anie edi owo emi, nso ke enye anam?” 34Ndusuk mmọ efiori ñkpo kiet, ndusuk eken efiori ñkpo efen. Sia ada iso ekọñ mikekemeke ndifiọk ntak uyom ye ntime, enye ama ọnọ uyo ete eda Pọl eka ebiet iduñ mbon ekọñ. 35Ke ini emi Pọl ama ekesim mme udighi ukot, ndutime mbio ntime ama okpon eti eti oro anam mbon ekọñ ema emen Pọl ke afara mmọ. 36Kpukpru mmọ ema ebine enye enyuñ efiori ete, “Ewot enye!”
37Nte mme mbon ekọñ ekeyomde ndida enye nduk ke itie iduñ mmọ, enye ama ebeñe ada iso ekọñ ete, “Nte ami mmekeme ndinyene se ntiñde ye afo?” Enye ama obup enye ete, “Nte afo emekeme nditiñ usem Krik?
38Nte idighe afo edi owo Ijipt oro akadade ediwak owo esin ntime onyuñ ada mbio obom tọsin inañ aka ke isọñ utatan ini kiet ntem?”
39Pọl ama ọbọrọ enye ete, “Ami ndi Ju, emi ntode Tasọs ke Silisia, eyen ọwọrọ etop obio. Mbọk, yak ñnyene se ntiñde ye mme owo emi.”
Pọl Anam Idaha Esie Añwaña
40Ke enye ama ọkọbọ unyime ada iso ekọñ, Pọl ama ada ke udughi ukot onyuñ anam idiọñọ ọnọ otu owo ete edobo. Ke mmọ ema ekedobo, enye ama ọdọhọ mmọ ke usem mme Hibru.
Currently Selected:
Ọbọsuru 21: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
