Ọbọsuru 19
19
Mme Andikabade Esit Ebọ Edisana Spirit
1Ke adaña emi Apọlọs okodude ke Kọrint, Pọl ama asaña oduk ke esit ñkanñkuk Kọrint tutu ekesim Efisọs. Do ke enye okokut ubak mme mbet, 2ndien enye ama obup mmọ, ete, “Nte mbufo ema ebọ Edisana Spirit ke ini emi mbufo ekenimde ke akpanikọ?” Mmọ ema ebọrọ ete, “Akananam ñnyin ikopke ite ke Edisana Spirit odu.”
3Pọl ama obup mmọ ete, “Ọfọn naña, mbufo ekena nso utọ babtisim?” Mmọ ema ebọrọ ete, “Babtisim Jọn.” 4Pọl ama ọdọhọ ete, “Babtisim Jọn ekenyene mme mmọ emi ekewọñọrede ekpọñ mme idiọkñkpọ mmọ, ndien enye ama ọdọhọ nditọ Isrel ete, enim Enyemi etienede imọ ke edem ke akpanikọ, oro edi ndinim Jisọs ke akpanikọ.”
5Ke ini mmọ ema ekekop emi, ema enim mmọ babtisim ke Enyiñ Ọbọñ Jisọs. 6Pọl ama odori mmọ ubọk ndien Edisana Spirit ama odoro mmọ ke idem; mmọ ema esem usem ke mme esen edeme ndien esiak uduak Abasi. 7Kpukpru mmọ ekedi ñkpọ nte irenowo duopeba.
8Pọl ama oduk esit ufọk ukpepñkpọ, ndien etiñ ikọ uko uko ye mme owo ke ọfiọñ ita, eneni eneni ye mmọ, añwana ndinam mmọ enim obio ubọñ Abasi ke akpanikọ. 9Edi ubak mmọ ekedi itun ndien ikenyimeke ndinim ke akpanikọ ndien ema etiñ mme ndiọi ndiọi ikọ ebaña usuñ Ọbọñ ke iso ofuri otu owo. Do Pọl ama ọkpọñ mmọ, ndien ama ada mme anditiene Kraist ye enye; ndien kpukpru usen enye ama enyene nneme ye mmọ ke efe mbono Tairanọs. 10Enye akanam emi ke isua iba, emi akanamde kpukpru mme mmọ emi ekeduñọde ke ñkanñkuk Esia, mme Ju ye mme mmọ emi midighe mme Ju, ekop ikọ Abasi. 11Abasi ke akananam mme utibe ñkpọ emi akananam mitibeke, ke ubọk Pọl. 12Idem ukwọhọde inua ye ọfọñ idem emi enye ekesinede ema eda ekenọ mbio udọñọ, ndien udọñọ mmọ ema ekure, ndien mme ndedehe spirit enyuñ ewọñọ mmọ ke idem.
13Ubak mme Ju ema esaña ñko ekanade ndibin mme ndedehe spirit, mmọ ema eñwana ndida Enyiñ Ọbọñ Jisọs nnam ñkpọ emi. Mmọ ema edọhọ mme ndedehe spirit ete, “Ami ñwuk mbufo ke Enyiñ Jisọs emi Pọl ọkwọrọde.” 14Nditọ irenowo itiaba ema edu emi ekedide mme nditọ akwa Oku mme Ju emi ekekerede Skefa, emi ekenamde ñkpọ emi. 15Edi ndedehe spirit ama ọdọhọ mmọ ete, “Ami mmọdiọñọ Jisọs, ñko Pọl mmọdiọñọ, edi mbufo edi mme anie?” 16Owo emi ndedehe spirit emi ekesinede ke idem ama ọfrọ ọtọ mmọ onyuñ akan kpukpru mmọ ubọk. Mmọ kpukpru ema efeñe ewọñọ ke ufọk esie iferi ye unan ke idem ye ñwaha ọfọñ idem.
17Kpukpru mme Ju ye mme mmọ emi midighe mme Ju, emi ekedude ke Efisọs ema ekop ebaña ñkpọ ntibe emi ndien ndik ama omum mmọ eti eti, ndien ema enọ Enyiñ Ọbọñ Jisọs akamba ukpono. 18Ediwak mme andinim ke akpanikọ ema ewọñọ edi añwa añwa edinyime enyuñ eyarade se mmọ ekenamde.
19Ediwak mmọ emi ekesikọkde ibọk ema etañ mme ñwed ibọk mmọ edibon ọtọ kiet enyuñ efọp mmọ ke iso kpukpru owo. Ema edian ekọm urua mme ñwed emi ndien ama esim ibat okuk ñkpọ nte bọn tọsin edip ye duop. 20Ikọ Abasi ama aka iso ndisuana ke usuñ emi ọkọyọhọde ye odudu onyuñ ọkọri onyuñ ọsọñ idem.
Eneni Ke Efisọs
21Ke mme ñkpọ emi ema eketibe ema, Pọl ama ebiere ke esit esie ndisaña mbe ke Masidonia ye Kris ndien aka Jerusalem. Enye ama ọdọhọ ete, “Ke mma ñkesim do, ami ñnyene ndikut obio Rom ñko.” 22Do ke enye ọkọnọ Timoti ye Erastọs, mme mbon uñwam esie iba eka Masidonia, kadaña emi enye akamanade abiat ini ke ñkanñkuk Esia.
23Ekedi ke ini emi ke ọkpọsọñ afanikọñ okoduk Efisọs ke ntak usuñ Ọbọñ. 24Owo kiet emi ekesinamde utom usọ silfa emi ekerede Demetriọs, ama obot silfa ke mbiet itie uwa ndem Atemis, ndien mbubehe esie emi ama ada ediwak udori ọsọk enye ye mme anam usọ emi. 25Do enye ama okot kpukpru mmọ obok ọtọ kiet ye mme mmọ efen emi ekenyenede ukem ubọk utom emi, ndien enye ama ọdọhọ mmọ ete.
“Irenowo, mbufo emediọñọ ete ke uforo ñnyin oto ke ubọk utom emi.
26Mbufo emekeme ndikut ñnyuñ ñkop ke idem mbufo se owo emi, Pọl akade iso ndinam. Enye ọdọhọ ete ke mme abasi emi mme owo enamde idighe mme abasi ke usuñ ndomokiet, ndien enye okut unen ke ndinam ediwak owo ekut ye enye mi ke Efisọs ye ke ofuri ofuri ñkanñkuk Esia. 27Akamba unọmọ odu idahaemi, nte ke mbubehe ñnyin emi ọmọñ enyene idiọk enyiñ. Idighe enye oro ikpọñ, unọmọ ñko odu nte ke itie uwa akamba ndem Atemis idiwọrọke aba ñkpọ ndomokiet, ndien eyebiat uku esie, ye enye ke idem esie emi etuakde ibuot enọ ke ofuri ñkanñkuk Esia ye ofuri ererimbot!”
28Ke otu owo ema ekekop mme ikọ emi esit ama ayat mmọ eti eti, ndien mmọ ema etọñọ ndifiori ete; “Ubọñ enyene Atemis ndem Efisọs!”
29Ndutime ama atara ọyọhọ ofuri isọñ obio. Mbio ntime emi ema emum Keyọs ye Aristakọs, mbon Masidonia iba emi ekesañade ye Pọl enyuñ eda mmọ eka efe obio. 30Pọl ke idem esie ama oyom ndiwọrọ ñkada ke iso otu owo, edi ikọt Abasi ikenyimeke enye anam ntre.
31Ubak mme akara ukara ke ñkanñkuk oro emi ekedide mme ufan esie ema enyuñ edọñ etop enọ enye ete yak enye okudi efe obio.
32Mbono oro okodu ke ndutime, ke enye ama eketiñ mme ikọ emi ubak owo efiori ñkpo kiet. Ndusuk efiori ñkpo eken, koro ediwak mmọ ikọdiọñọke ntak emi mmọ ekebonode.
33Mme Ju ema esio Aleksanda ewuk ke iso koro mmọ ekebierede ete ke Aleksanda ama ọdiọñọ ntime emi. Aleksanda ama emenede ubọk anam idiọñọ ete yak edop uyom, man enye ekeme nditiñ ikọ ñnyaña idem esie ke iso mme otu owo emi. 34Edi ke mmọ ema ekediọñọ ete ke enye edi owo Ju, kpukpru mmọ ema efiori ñkpo nte owo kiet ete, “Atemis ndem mbon Efisọs okpon!”
35Ke akpatre ewet ñwed obio ama anam otu owo edop uyo ndien enye ama ọdọhọ ete, “Nditọ iren Efisọs nte ofuri ererimbot idiọñọke ite ke obio Efisọs edi ifum ndem Atemis, ye mbiet esie emi ọkọduọde oto ke enyọñ? 36Owo ndomokiet ikemeke ndifaña mme ñkpọ emi. Ke ntre, mbufo enyene ndisuhọde idem mbufo ekunyuñ enam baba ntime ndomokiet. 37Mbufo emeda mme irenowo emi edi mi, okposuk edi nte mmọ miyipke ñkpọ ke itie ukpono mme ndisabade ndem ñnyin.
38Edieke Demetriọs ye mme nsaña utom esie enyenede ikọ ndomokiet ye owo ekededi, mme esop ena iñwañ, ndien mme ekpe ikpe do ñko, mmọ ekeme ndikeneni eneni mmọ do. 39Edi edieke ñkpọ efen odude akan oro emi mbufo eyomde, enyene ndikebiere enye oro ke esop mbet. 40Nte ñkpọ edide ntem, edinam ñnyin ọdiọk eti eti koro ekeme ndikot ñnyin ikọbọrọ ikọ ke se itibede mfin emi, ntak iduhọ ke edisin kpukpru ntime emi; ñnyin ñko idikemeke ndinọ akpan ntak uto edinam emi.”
41Ke enye ama eketiñ mme ikọ emi ama enye ama asuan mbono.
Currently Selected:
Ọbọsuru 19: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
