Ọbọsuru 18
18
1Ke emi ama ekebe Pọl ama ọkpọñ Atens aka Kọrint. 2Do ke enye okosobo owo Ju emi ekekerede Akwila emi akamanade ke obio Pọntus, emi okotode Itali edi ye ñwan esie Prisila, koro ada ibuot ukara Klaudiọs okowukde ete yak kpukpru mme Ju ekpọñ Rom. Pọl ama aka ndise mmọ, 3ndien okodu do onyuñ anam utom ye mmọ koro enye ekenyene udia inua esie oto ke edibọp ufọk emi ekotde atayat kpa nte mmọ ekenamde.
Ọtọñọde Ke Emi — Mmọ Emi Midighe Mme Ju
4Ke kpukpru usen ikọ Abasi mme Ju, enye ama esineni eneni ke itie ukpepñkpọ mme Ju, man enye ekeme ndiwọñọde mme Ju ye mme Krik. 5Ke ini Sailas ye Timoti ema eketo Masidonia edi, Pọl ama ayak ofuri ini esie esin ke ukwọrọ ikọ Abasi, onyuñ etiñ ikọ ntiense ọnọ mme Ju nte ke Jisọs edi Kraist. 6Ke ini mmọ etọñọde ndituaha ye enye ñnyuñ ntiñ mme oburobut ikọ isuñi mbaña enye, enye ama owut iyaresit esie ke edikeñ ntọñ ọfọñ idem esie onyuñ ọdọhọ ete, “Edieke mbufo etakde, iyib mbufo odoro mbufo ke ibuot; ndudue edi eke mbufo! Ami nsañake do. Ọtọñọde ke emi ami ñyeka mbine mme mmọ emi midighe mme Ju.”
7Ndien enye ama ọkpọñ mmọ ndien okoduñ ke ufọk owo emi midighe owo Ju emi ekekerede Taitọs Jọstọs emi okokponode Abasi; ufọk esie okodu ekpere ufọk ukpepñkpọ mme Ju. 8Krispọs, andikara ufọk ukpepñkpọ mme Ju, ye ofuri ufọk esie ema enim Ọbọñ ke akpanikọ, ndien ediwak mbon Kọrint emi ekekopde ikọ Pọl ema enim ke akpanikọ ndien ema enim mmọ babtisim.
9Ke okoneyo kiet, Ọbọñ ama etiñ ikọ ọnọ Pọl ke ñkukut ete: “Kufehe ndik, suk ka iso nditetiñ, kukibi inua, 10koro ami ndodu ye afo, ndien baba owo ndomokiet iditukke fi ubọk inyuñ inọhọ fi unan, koro ami mmenyene ediwak owo ke akwa obio emi.” 11Do ke Pọl okodu ke Kọrint isua kiet ye ubak ndikpep mmọ ikọ Abasi.
12Ke ini Kalio ekedide ada ibuot ukara obio Akaya, mme Ju ema edian idem ọtọ kiet emum Pọl ndien eda enye eka esop. 13Mmọ ema edọhọ ete, “Se owo emi añwana ndinyik mme owo ekpono Abasi ke usuñ emi ibet akpande!” 14Kpa ini oro Pọl okoyomde nditiñ ikọ ke Kalio ọkọdọhọ mme Ju ete, “Edieke mbufo mme Ju ekpenamde ntọt ebaña akpan ndudue mme ata idiọkñkpọ emi enye anamde ekpenen nte ami ñkpañ utọñ nnọ mbufo. 15Edi sia edide eneni emi otukde mme ikọ ye mme enyiñ ye mme mbet mbufo, edi mbufo ke idem mbufo enyene ndikpe mbiere. Ami ndidighe ekpe ikpe uduot ñkpọ oro.” 16Ndien enye ama ebin mmọ osioño ke ufọk esop oro.
17Mmọ kpukpru ema emum Sọstenes ada usuñ ke ufọk ukpepñkpọ, enyuñ emia enye ke iso efe esop. Edi oro ikebeheke Kalio ndomo esisit.
18Pọl ama etie ye mme nditọ ete ke Kọrint ke ediwak usen, ndien enye ama osio ye Prisila ye Akwila aka Siria. Mbemiso enye okosio, enye ama anam eñwọñọ ke Senkre ndien ama anam ekwat enye ibuot. 19Mmọ ema ekebehe ke Efisọs, ke ebiet emi Pọl ọkọkpọñde Prisila ye Akwila. Enye ke idem esie ama okoduk ke ufọk ukpepñkpọ onyuñ ọtọñọ eneni ye mme Ju. 20Mmọ ema ebeñe enye ndimana ntie ye mmọ mbighi, edi enye ikenyimeke.
21Edi enye ama ọdọhọ mmọ ke ini emi enye okoyomde ndinyọñ ete, “Edieke edide uduak Abasi, ami ñyefiak ndi mbine mbufo.” Do enye ama osio ke Efisọs.
22Ke ini enye ama ekebehe ke Siseria enye ama aka Jerusalem ọkọkọm ufọk Abasi do, ndien enye ebe aka Antiọk. 23Ke enye ama akabiat esisit ini do, enye ama ọkpọñ do. Enye ama asaña ebe ke ñkanñkuk Kalesia ye Frikia, ọkọnọ mme andinim ke akpanikọ odudu.
24Owo Ju kiet emi ekekerede Apọlọs emi akamanade ke Aleksandra, ama edi Efisọs. Enye ekedi owo udọñ onyuñ enyene ntọtuñọ ifiọk abaña Ñwed Abasi. 25Enye ama ọbọ ukpepñkpọ abaña usuñ Abasi, ndien ke ofuri esit enye ama aka iso ndikwọrọ ñnyuñ ñkpep ikọ Abasi nnen nnen ke kpukpru akpanikọ emi abañade Jisọs. Nte ededi, enye ọkọfiọk ñkpọ abaña babtisim Jọn ikpọñ. 26Enye ama ọtọñọ nditiñ ikọ ke ufọk ukpepñkpọ uko uko. Ndien kadaña emi Prisila ye Akwila ekekopde enye, mmọ ema eda enye enyọñ ufọk mmọ ndien ekenam usuñ Abasi ke mfọnmma usuñ añwaña enye.
27Apọlọs ama ebiere ndika Kris, do ikọt Abasi ke Efisọs ema eñwam enye ke ediwet ñwed nnọ esọk mme nditọ ete ke Kris, ndibeñe mmọ ndidara enye. Ke ini enye ama ekesim do, enye ama edi akamba uñwam ọnọ mme mmọ oro ekekabarede edi ikọt Abasi oto ke mfọn Abasi. 28Koro ke ọkpọsọñ eneni esie enye ama akan mme Ju ke eneni añwa añwa, onyuñ ada ñwed Abasi ọsọñọ nte ke Jisọs edi Kraist oro.
Currently Selected:
Ọbọsuru 18: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
