Ọbọsuru 17
17
Afanikọñ Etiene Pọl
1Mmọ ema esaña ekebe Amfipolis ye Apolonia, ndien edisim Tesalonika, ke ebiet emi ufọk ukpepñkpọ mme Ju okodude. 2Kpa nte ido esie esidide, Pọl ama oduk ke ufọk ukpepñkpọ emi, ndien ke usen ikọ Abasi mme Ju ita, enye ama eneni eneni ye mme owo oto ke ñwed Abasi, 3ayarade ikọ Abasi, onyuñ osio ke ikọ Abasi owut ete ke Kraist ekenyene ndibọ ukut, ndien enye eset ke ñkpa. Pọl ama ọdọhọ ete, “Jisọs emi ami ntiñde mi nnọ mbufo edi Kraist”. 4Ubak mme Ju emi ema ekut ye Pọl ye Sailas enyuñ edian idem ye mmọ, kpa ntre ñko ye ata ediwak mbon Krik emi ekekponode Abasi, ye mme ediwak mme ọwọrọ iso iban.
5Edi ndusuk mme Ju ema efibe eti eti, ndien mmọ ema etañ mme oburobut owo ke efak ebok enam ñka mbon ntime ndien mmọ etọñọ ọkpọsọñ ntime ke obio. Mmọ ema efeñe ini kiet eka ke ufọk Jesin ndiyom Pọl ye Sailas man eda mmọ edinọ mme mbio ntime oro.
6Ndien kadaña emi mmọ mikekwe Pọl ye Sailas mmọ ema eduri Jesin ye mme ubak nditọ ete ewọrọ ke iso mme akara ukara enyuñ efiori, ete, “Mme mmọ emi esin ntime ekanade kpukpru ebiet, ndien se idahaemi mmọ edisim obio ñnyin, 7ndien Jesin emen mmọ esin ke ufọk esie. Kpukpru mmọ ke ebiat mbet ada ibuot ukara, ete ke Ọbọñ efen odu emi ekerede Jisọs”.
8Ke ini mmọ ekekopde ñkpọ emi ofuri otu owo ye ofuri mme akara obio ema eyat esit eti eti. 9Mme akara ukara ema enam Jesin ye mme mmọ eken ekpe se ekebierede enọ mmọ ke okuk ndien eyak mmọ enyọñ.
10Eyo okokokut, nditọ ete ema enam Pọl ye Sailas eka Beria. Ke ini mmọ ema ekesim do, mmọ ema eka ke ufọk ukpepñkpọ mme Ju. 11Mme mmọ emi ekedude do ema enyene iñwañ iñwañ esit ekan mbon Tesalonika. Mmọ ema ekpañ utọñ enọ ikọ Abasi ke ata nsatitọñ, ndien kpukpru usen mmọ ema eduñode ikọ Abasi ndise mme se Pọl eketiñde ekedi akpanikọ. 12Ediwak mmọ ema enim ke akpanikọ ndien ediwak mme iban Krik emi ekedide mme ọwọrọ iso iban ye mme iren ema enyuñ enim ke akpanikọ.
13Edi ke ini mme Ju ke Tesalonika ekekopde ete ke Pọl kọkwọrọ ikọ Abasi ke Beria ñko, mmọ ema edi do enyuñ etọñọ nditimede mme owo esit, enyuñ etañ mbon ntime edi edisin ntime ye Pọl ye Sailas. 14Mme nditọ ete ema enam Pọl aka ke mben inyañ, edi Sailas ye Timoti ema esuhọ ke Beria. 15Mme mmọ emi ekedade Pọl ekandiyak ema esaña ye enye tutu ekesim Atens. Do ke mmọ ekefiak edem enyọñ Beria ye etop emi otode Pọl ete yak Sailas ye Timoti ekubighi ndibine mmimọ.
16Kadaña emi Pọl ekebetde Sailas ye Timoti ke Atens, esit ama etimede enye eti eti kadaña emi enye okokutde nte ukpono ndem ọkọyọhọde obio oro. 17Do enye ama oduk eneni ye mme Ju ke ufọk ukpepñkpọ mmọ ye mme mmọ emi midighe mme Ju emi ekekponode Abasi, ye ke añwa obio kpukpru usen ye mme owo emi esiwọñọde edi do.
Pọl Ye Ntaifiọk
18Mme ntaifiọk emi ediọñọde mmọ nte Epikurian ye Stọik ema etọñọ eneni ye Pọl. Ubak mmọ enyuñ edọhọ ete, “Nso ke owutidem ndisime owo emi añwañwana nditiñ?” Mme mmọ eken ema edọhọ ete, “Etie nte enye etiñ ikọ abaña mme isen abasi”. Mmọ eketiñ emi koro Pọl ọkọkwọrọde ikọ abaña Jisọs ye ediset ke ñkpa.
19Do mmọ ema eda Pọl ewọrọ ke itie mbono mmọ emi ekediọñọde nte Ariopakus, enyuñ edọhọ ete, “Ñnyin iyom ndidiọñọ se obufa ukpep fo emi ọwọrọde. 20Ediwak mme ñkpọ emi ñnyin ikopde fi etiñde edi isen ke utọñ ñnyin, ndien ikpama ndidiọñọ se mmọ ewọrọde.” 21Koro kpukpru mme amana isọñ Atens ye mme ododuñ emi eduñọde do ema ndibiat ini mmọ nditiñ ñnyuñ ñkop mme mbufa ekikere ye ñkpọ ntibe.
22Pọl ama adaha ada ndien ke esop mme Ariopakus, onyuñ ọdọhọ ete, “Mbufo mbon Atens! Ami mokut nte ke kpukpru usuñ, mbufo emenyene ido ukpono Abasi.
23Koro nte ami nsañade ñkabade akwa obio mbufo ñnyuñ ñkut mme ebiet ukpono mbufo, ami mma ñkut ñko itie uwa emi ekewetde do ntem:
Ke Enyiñ Abasi emi Owo Midiọñọke.
Ke emi, se mbufo ekponode nte ñkpọ emi mbufo midiọñọke edi se ami ñkwọrọde nnọ mbufo.”
24“Abasi emi akanamde ererimbot ye kpukpru ñkpọ ke esit esie edi Ọbọñ enyọñ ye isọñ, ndien enye iduñke ke ufọk emi ebọpde ke ubọk. 25Enye ñko iyomke ñkpọ ndomokiet emi owo ekemede ndinọ Enye ke edinam ñkpọ nnọ Enye, sia akam edi Enye ọnọ kpukpru owo uwem ye ibifik ye kpukpru ñkpọ eken. 26Oto owo kiet emi Enye okobotde ke Enye akanam kpukpru idut ubon owo, man mmọ eduñọ ke ofuri iso isọñ. Enye ñko okonyuñ ebiere ini emi enye enimde ọnọ mmọ ye mme nnen nnen ebiet emi mmọ enyenede ndiduñọ.
27Abasi akanam emi man mme owo eyom Enye enyuñ enyanarede ebine Enye enyuñ ekut Enye, okposuk edi emi Enye miyomke usuñ ikpọñ ñnyin kiet kiet. 28‘Koro edi ke Enye ke ñnyin idu uwem, iwọrọ, inyuñ iduk, inyuñ inyene obot ñnyin.’ Kpa nte ewet uto mbufo kiet ekewetde ete, ‘Ñnyin idi mme nditọ Esie.’ ” 29“Ke emi ñnyin idide mme nditọ Esie, inaha ñnyin ikere ite ke Enye ebiet ñkpọ kiet ekededi emi edade gold, mme silfa, mme itiat ebot ke usọ ubọk owo. 30Ke mme ini emi ekebede Abasi ama efep enyin ke mme utọ unana ifiọk eke etiede ntre, edi idaha emi Enye owuk kpukpru owo ke kpukpru ebiet ndiwọñọrede ñkpọñ mme idiọk usuñ mmọ. 31Koro Enye ama enim usen emi enye edikpede ikpe ofuri ererimbot ke unen, oto ke owo emi enye ekemekde. Enye ọmọsọñọ ñkpọ emi ke iso kpukpru owo ke edimenede owo oro nsio ke ñkpa.”
32Ke ini mmọ ekekopde ebaña edimenede ke ñkpa, ubak mmọ ema eda enye esin ke mbubru, edi ubak mmọ ema edọhọ ete, “Ñnyin imoyom ndikop fi ọtọñọde ntak etiñ ikọ emi.” 33Ke ntre Pọl ama ọkpọñ itie mbono. 34Ubak owo ema etiene enye enyuñ enim ke akpanikọ; ke otu mmọ ekedi Dionisiọs, kiet ke otu mme mbon Ariopakus, ye ñwan kiet emi ekerede Damaris, ye mme mmọ efen.
Currently Selected:
Ọbọsuru 17: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
