Ọbọsuru 1
1
1Edima ufan mi Tiofilọs: Ke akpa ñwed mi, ñkewet ñkpọ mbaña kpukpru se Jisọs akanamde ye se Enye ekekpepde, ọtọñọde ke ini emi Enye ọkọtọñọde utom Esie 2tutu ekesim ini emi ekemende Enye edọk ke enyọñ. Mbemiso ekemen Enye edọk, Enye ama ọnọ mme mmọ oro Enye ekemekde nte mme Ọbọsuru Esie item oto ke odudu Edisana Spirit. 3Ke Enye ama ekeset, Enye ama owut mme mmọ emi Enye ekemekde idem ke usen aba ke ediwak ini ye ke ediwak mme usuñ emi ọkọsọñde nte owo mikemeke ndineni nte ke Enye ke ododu uwem. Mmọ ema ekut Enye, Enye ama onyuñ eneme nneme ye mmọ abaña Obio Ubọñ Abasi.
Jisọs Ọdọk Enyọñ
4Kadaña ini emi Enye akadiade ñkpọ ye mmọ usen kiet, Enye ama owuk mmọ ete: “Ekukpọñ Jerusalem, edi ebet kabaña enọ emi Ete ọkọñwọñọde ndinọ, emi mbufo ekekopde nte Ami ñketiñde mbaña.
5Jọn ekenim babtisim ke mmọñ, edi ke usen ifañ ke iso eyenim mbufo babtisim ke Edisana Spirit.”
6Ke ini mme Ọbọsuru ekesobode oto kiet mmọ ema ebup Jisọs ete, “Ọbọñ, nte Afo ọmọñ afak Isrel osio ke ubọk mbon Rom onyuñ ọnọ enye ukara idem esie?”
7Jisọs ama ọdọhọ mmọ ete, “Inaha nte mbufo efiọk ini mme usen ọfiọñ emi Ete ekenimde ke odudu idem Esie. 8Edi mbufo eyebọ odudu ke ini emi Edisana Spirit edidorode mbufo ke idem, ndien mbufo eyedi mme ntiense Mi ke Jerusalem, ye ke ofuri Judia, ye Sameria, tutu esim utit ererimbot.”
9Ke Enye ama eketiñ mme ikọ emi ama, ema emen Enye edọk kpa ke idem iso mmọ; ndien kpasuk nte mmọ ekekade iso ndiwuk enyin nse, obubit enyọñ ama edip Enye ke enyin mmọ. 10Nte mmọ ekesuk ekade iso ndiwuk enyin nse ikpaenyọñ nte Enye okosuk ọdọkde, sese owo iba emi ekesinede mfia ñkpọ ema ewọñọ eda mmọ ke ñkañ. 11Enyuñ ebup mmọ ete “Iren Kalili, ntaha mbufo edade mi esuk ewuk enyin ese ikpaenyọñ-e? Kpasuk Jisọs emi ema ekemen edọk enyọñ ekpọñ mbufo, eyefiak edi kpa ke ukem usuñ emi mbufo ekekutde nte emende Enye edọk enyọñ.”
12Do ke mme ọbọsuru ekekpọñ obot Ọlif efiak eka Jerusalem, emi okoyomde usuñ ọkpọñ obio ke ñkpọ nte ubak itiat kiet. 13Ke ini mmọ ema ekesim Jerusalem, mmọ ema edọk ke ubet enyọñ emi mmọ ekesidude. Mme mmọ emi ekedude ekedi Pita, Jọn, Jems ye Andru; Filip ye Tọmọs; Batolomiu ye Matiu; Jems eyen Alfios, ye Saimọn emi ekekotde ñko Silọt, ye Judas eyen Jems.
14Mmọ kpukpru ema ebuana ebiet kiet ke akam kpukpru ini, ye Meri eka Jisọs ye mme nditọ eka Esie iren. 15Ke usen ifañ ema ekebe mme andinim ke akpanikọ ema ebok idem ọtọ kiet, mmọ ekedi ibat owo ikie ye edip, ndien Pita ama adahada onyuñ ọdọhọ ete,
16“Nditọ ete mi, ana nte ñwed Abasi osu, kpa nte Edisana Spirit eketiñde ke ata anyan ini oto ke inua Defid abaña Judas emi akadade mme mmọ emi ekemumde Jisọs usuñ. 17Judas ekedi kiet ke otu ñnyin koro ema emek enye man enye enyene ebuana ke utom ñnyin. 18Judas ama ada okuk emi enye ọkọbọde ke idiọk edinam esie edep isọñ; do ke enye ọkọduọ atuak itọñ, ndien idibi esie ama obomo ndien mme nsia esie ewọñọ ebono. 19Kpukpru owo ke Jerusalem ema ekop ebaña ñkpọ emi, ndien mmọ ema esio isọñ oro enyiñ ke usem mmọ ete ke ekere Akeldama, emi ọwọrọde isọñ lyip. 20Koro ema ewet ke ñwed Sam ete: ‘Yak ufọk esie ana ukpọk; yak owo ndomokiet okudu emi oduñde ke esit,’ ndien, ‘Yak owo efen ada itie utom esie.’ 21Ke ntre, odot ñnyin ndimek owo kiet ke otu mme mmọ emi ekedude ye ñnyin ofuri ini emi Ọbọñ Jisọs okodukde onyuñ ọwọrọ ke otu ñnyin.
22Ọtọñọde ke ini babtisim Jọn tutu ekesim ini emi ekemende Jisọs edọk ekpọñ ñnyin. Koro kiet ke otu mme mmọ emi enyene ndikabade ndi ntiense ye ñnyin kabaña ediset ke ñkpa Esie.” 23Do mmọ ema enam ekikere ebaña owo iba: Josef, emi ekekotde Barsabas ekenyuñ ediọñọde enye ñko nte Jọstọs, ye Matayas. 24Mmọ ema ebọñ akam ete, “Ọbọñ afo ọmọdiọñọ esit kpukpru owo. Wut ñnyin anie ke otu owo iba emi ke Afo emek 25ndida itie utom emi nte Ọbọsuru, emi Judas ọkọkpọñde man aka okoduk udim emi enye otode ke esit.”
26Do mmọ ema esin afia ndien ufọn ama ọduọ ọnọ Matayas; ke ntre ema eda enye edian ye mme Ọbọsuru duopekiet eken.
Currently Selected:
Ọbọsuru 1: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
