Jọn 21
21
Udia Usenubọk Ke Usiahautin
1Ke emi ama ekebe, Jisọs ama amana owut mme mbet Esie idem ke mben akpa emi ekotde Tiberias. Eketibe ntem.
2Saimọn Pita, Tọmọs (emi ekotde Amanamba), Nataniel emi otode Kenan ke Kalili, nditọ Sebidi, ye mbet iba efen ekebono ebiet kiet.
3Saimọn Pita ama ọdọhọ mmọ ete, “Ami mmọñ ñka ñkọkọ iyak.” Ndien mmọ eken ema edọhọ enye ete, “Ñnyin ñko iyeka ye afo.” Do mmọ ema ewọñọ ekeduk ubom. Edi ke okoneyo oro mmọ ikemumke ndomo iyak kiet. 4Ke tughi tughi usenubọk Jisọs ama ada do ke mben inyañ, edi mme mbet Esie ikọdiọñọke Enye.
5Enye ama esin uyo okot mmọ ete, “Mme ufan, nte mbufo imumke iyak ndomokiet?” Mmọ ema ebọrọ ete, “Ñnyin imumke baba ñkpọ kiet.”
6Enye ama ọdọhọ mmọ ete, “Etop iyire mbufo ke ñkañ ubọk nnasia ubom ndien mbufo eyenyene ñkpọ.” Mmọ ema enam ntre, ndien ikekemeke ndiduri iyire nsio ke mmọñ nsin ke ubom koro mme iyak emi ekeduọñọde ke iyire ema ewak eti eti.
7Mbet emi Jisọs akamade ama ọdọhọ Pita ete, “Edi Ọbọñ edi oro,” Saimọn Pita okokokop nte mbet oro etiñde ete, “Edi Ọbọñ edi oro,” enye ama emen ọfọñ enyọñ idem esie esine (koro enye ama osio ọfọñ oro enim), ndien enye ama ọfrọ oduk mmọñ, 8Mme mbet mmọ eken ema etiene enye ye ubom ke eduri iyire emi iyak ọkọyọhọde, koro mmọ ekeyomde usuñ ekpọñ isọñ ke ñkpọ nte ikpat ikie. 9Ke ini mmọ ema ekesim isọñ mmọ ema ekut ikañ emi ekedade ukañ ebara ye iyak ke esit odoro, ye mme ebok uyo.
10Jisọs ama ọdọhọ mmọ ete, “Eda ndusuk iyak emi mbufo esuk emumde edi.” 11Saimọn Pita ama oduk ubom onyuñ oduri iyire odori ke obot. Ikpọ iyak ema eyọhọ ke esit, ñkpọ nte iyak ikie ye aba ye duopeta, kpa ye utọ uwak iyak oro, iyire ikawahake.
12Jisọs ama ọdọhọ mmọ ete, “Edi, edidia udia.” Baba owo kiet ke otu mme mbet emi ikedomoke domo ndibup Enye ete, “Afo edi anie?” Koro mmọ ema ediọñọ ete ke ekedi Ọbọñ. 13Jisọs ama ekemen uyo edeme ọnọ mmọ, ndien onyuñ anam kpa ntre ye iyak.
14Emi akanam ọyọhọ ikata Jisọs ndiwut mme mbet Esie idem ke Enye ama ekeset ke ñkpa.
15Ke mmọ ema ekedia ñkpọ ema, Jisọs ama ọdọhọ Saimọn Pita ete, “Saimọn eyen Jọn, nte afo amama Mi ke ofuri esit akan emi?” Enye ama ọbọrọ ete, “Ih Ọbọñ, Afo ọmọfiọk ete ke mmama Fi.” Jisọs ama ọdọhọ enye ete, “Bọk mme erọñ Mi.”
16Jisọs ama ọtọñọ ntak obup enye ete, “Saimọn Eyen Jọn, nte Afo amama Mi ke ofuri esit?” Enye ama ọbọrọ, ete, “Ih, Ọbọñ, Afo ọmọfiọk ete ke ami mmama Fi.” Jisọs ama ọdọhọ enye ete, “Tim se mme erọñ Mi.”
17Enye ama afiak obup enye ọyọhọ ikata, ete, “Saimọn eyen Jọn, nte afo amama Mi?” Pita ikekopke inemesit koro Jisọs okobupde enye kpa mbume kiet emi ikata ete, “Nte afo amama Mi?” Enye ama ọdọhọ ete, “Ọbọñ, Afo ọmọfiọk kpukpru ñkpọ. Afo ọmọfiọk ete ke ami mmama Fi.” Jisọs ama ọdọhọ enye ete, “Bọk mme erọñ Mi.” 18Ami ntiñ akpanikọ nnọ mbufo, nte ke ini emi mbufo ekedide ñkpri owo mbufo esidọdiọñ idem mbufo eka ebiet emi mbufo emade, edi ke ini mbufo edukde usọñ, mbufo eyeneñede ubọk mbufo ndien owo efen esine mbufo ọfọñ onyuñ ada mbufo aka ebiet emi mbufo mikpamaha ndika; 19Jisọs eketiñ emi ndiwut utọ uduot ñkpa emi Pita edikpade ndinọ Abasi ubọñ. Do ndien ke Enye ọkọdọhọ enye ete, “Tiene Mi.”
20Pita ama ọwọñọrede okut ete ke mbet emi Jisọs akamade ke eketiene mmọ (Enye edi enye emi ekeberede Jisọs ke idem ke itie udia mbubreyo, okonyuñ ọdọhọde ete, “Ọbọñ, anie oyom nditap Fi?”) 21Ke ini Pita okokutde enye, enye ama obup Jisọs ete, “Ọbọñ edi didie ye Enye?”
22Jisọs ama ọbọrọ ete, “Edieke Ami ñyomde enye osuk odu uwem tutu Ami mfiak ndi, oro ebehe fi didie? Tiene Mi.”
23Ke ntak emi, mme ikọ ema ekanade isọñ isọñ ke otu mme nditọ ete, ete ke mbet emi idikpaha. Edi Jisọs ikọdọhọke ete ke enye idikpaha. Enye ọkọdọhọ ibibio ete, “Edieke Ami ñyomde enye osuk odu uwem tutu Ami mfiak ndi oro ebehe fi didie?”
24Emi edi mbet emi ọnọde ntiense abaña mme ñkpọ emi, onyuñ edi enye ekewet mme ñkpọ emi enim. Ñnyin imọfiọk ite ke ikọ ntiense esie edi akpanikọ.
25Jisọs ama anam mme uwak ñkpọ efen ñkọ. Edieke ekpewetde kpukpru mmọ kiet kiet enim, ami mmekere nte ke idem ererimbot ikpenyeneke ufañ ye itie inọ mme ñwed emi ekpewetde.
Currently Selected:
Jọn 21: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
