San Mateo 4

Satanáska Jesusta kamarka

(Mr 1.12-13; Lc 4.1-13)

1Chaymanta Jesusta aparka Yaya Diospa Espiritunka chunlla chakishka allpama, satanaska kamananpa.

2Chaypi Jesuska ayunashkan washa chusku chunka punchata, chusku chunka tutata, chaywasha yapa yarkarka.

3Chaypi Satanaska Jesusta kayllayashpan rimarka: “Shutipa Diospa wawan kashpaykika, rimay kay rumikunata pan tukunankunapa”.

4Chaypiña Jesuska aynirka: “Killkarishkami kahu:

‘Mana mikunawallachu runaka kawsanka. Ashwan Yaya Diospa rimashkanta kasushpanmi’ ”.

5Chay washa supayka Jesusta pusharka santu Jerusalén llaktama, Chaypi Yaya Diospa wasin awama sikachirka.

6Chaypiña Jesusta rimarka: “Shutipa Diospa wawan kashpaykika saltay kay awamanta allpama. Chasnami killkarishka kahun:

‘Yaya Dioska angelkunata kachanka kanta kuyranankunapa’, chaymanta riman:

‘Paykunami makinkunapi kanta alita kuyrankakuna mana rumipi waktarinaykipa’ ”.

7Chaypiña Jesuska aynirka: “Kaypas killkarishkami kahu: ‘Ama kamankichu Yayayki Diosta yanka’ ”.

8Chaymanta supayka Jesusta pusharka yapa awa urkuma. Chay urku awamanta tukuy kay allpata rikuchirka, yapa suma atun llaktakunatapas, yapa valik imakunatapas.

9Chaypiña rimarka: “Tukuy kayta kushkaykimi, kunkurishpa puntaynipi mañashpa kushichiwashpaykika”.

10Chaypiña Jesuska aynirka: “Anchuriy, Satanas, kaypas killkarishkami kahun: ‘Yayayki Diosllata kunkurishpa mañashpa kushichiychi’ ”, payllata kasushpa kawsaychi.

11Chasna Jesús sinchi shimiwa rimashpan supayka anchurirka. Chaypiña angelkunaka shamurkakuna Jesusta yanapanankunapa.

Jesús kallarirka yachachinata

(Mr 1.14-20; Lc 4.14-15; 5.1-11; 6.17-19)

12Chaymanta Bawtisak Juanta karselpi churashkankunata yachashpan, Jesuska Galilea allpama kutirka.

13Galileapi Nasaret kikin llaktanmanta llukshishpan Kapernaum llaktama kawsananpa rirka, chay llaktaka karka Galilea kucha mayanpi, Sabulonpa, Neftalipapas allpankuna.

14Paktachirinanpa profeta Isaiaspa rimashkanka:

15“Sabulonpa allpan, Neftalipa allpan, kanahun ñanpipi Galilea atun kucha mayanpi, Jordan chinpama, Galilea allpa mana Israel runakunapa llaktan;

16Chay runakunaka kawsanahun amsapi, ashwan kunanka rikushkakuna shuk atun punchayachik chuyahallata paykuna kawsakuna shuk amsa allapa wañuyshina.”

17Chaymanta pacha Jesuska kallarirka yachachinata: “Sakiychi mana ali ruranaykichita, ñami kallarihun Yaya Diospa ali kamachinanka kay allpapi”.

Jesuska chusku rediyak runakunata kayarka

(Mr 1.16-20; Lc 5.1-11)

18Chaymanta Galilea kucha mayanpi rihushpan Jesuska ishkay wawkikunata rikurka. Paykunaka karkakuna Simón chaymanta wawkin Andrés. Simonpa shuk shutin karka Pedro. Redinkunata yakupi kacharihurkakuna, paykunaka karkakuna challwata apikkuna.

19Chaypiña Jesuska rimarka: “Katiwaychi, sakishpaykichi challwata apinata, ñukami yachachishkaykichi runakunata apinaykichipa ñukataña katiwanankunapa”.

20Chay ratulla redinkunata sakishpa Jesustaña katirkakuna.

21Chaymanta astalla puntapi Jesuska rikurka ishkay wawkikunata, Jacobo, Juan Sebedeopa wawankuna. Maykankunami kahurkakuna kanuapi yayanwa pakta, redinkunata rimintahurkakuna. Chaypi Jesuska paykunata kayarka.

22Paykunaka chay ratulla llukshirkakuna chay botimanta, sakishpankuna yayanta katirkakuna Jesusta.

Jesuska achka runakunata yachachirka

(Lc 6.17-19)

23Chaymanta Jesuska tukuy chay Galilea allpa llaktakunapi yachachishpa purirka tukuy chay Israel runakunapa tantarinankuna wasipi. Chaypi yachachirka kay suma ali shimita Yaya Diospa ali kamachinan kay allpapi ña kallarishkanmanta. Chasna tukuy unkuykunamanta, nanaykunatapas anpirka chay llaktapi.

24Chay Siria allpa llaktakunapi achkata rimarkakuna Jesusmanta, unkushkakunata anpihushkanmantapas, chayrayku Jesusma aparkakuna chikan chikan unkuyyukunata, nanayyu runakunata, supay yaykushka runakunatapas, kunkaymanta sinchiyarik kuchparik unkushkakunata, chakichik unkuyyukunatapas; Tukuy chay unkushkakunata Jesuska anpirka.

25Chaymanta achka runakuna Galilea allpa llaktakunamanta, Dekapolis llaktakunamantapas, Judea allpa llaktakunamanta, Jerusalén llaktamanta, Jordán yaku chinpamantapas Jesusta katirkakuna.

Currently Selected:

San Mateo 4: QUP_B

Highlight

Copy