Genesis 38
38
Yuda na Tamali
1Mwo lupisi ulo Yuda awalekaga wanduguze na kugenda kwikala na mnt'hu yumwenga etangagwa Hilahi, mnt'hu uyo ekalaga mwo mzi wa Adulamu. 2Uuko, Yuda amuonaga mndele ywa Kikanaani akwitangwa Shua niyo amlomba. 3Mndele Shua enulaga ubovu na kweleka mwana kilume. Yuda amwitangaga mwana uyo Eli. 4Niyo enula ubovu kaidi no kweleka mwana mtuhu ywa kilume, amwink'haga zina niye Onani. 5Enulaga ubovu naho apataga mwana kilume mtuhu, zina dyakwe niye Shela. Lupisi ulo Yuda na mkaziwe wekalaga Akizibu.
6Yuda amlozaga mwanawe ywa nk'hongo we kilume kwa mvele etangagwa Tamali. 7Mna Eli, mwana ywa nk'hongo ywa Yuda andaga Mwavu hameso ha Zumbe, niyo Zumbe amkoma. 8Yuda niyo amgamba Onani, nduguye Eli, “Kagone no mfiilwa mkaza nduguyo, ukint'hize yadya yakuungwa mwe kihendo chetu mwa uyo mfiilwa vileke umwelekele wana nduguyo.” 9Onani amanyaga kugamba, awana hawande wakwe, kwa ivi kila akagona na mkaza nduguye andaga aketiila hasi zimbeyu ze cheleko vileke asekumwelekela nduguye wana. 10Zumbe helelwe naicho adamanye, ivo niyo akomwa nae. 11Yuda niyo amgamba Tamali, mka mwanawe, “Uuye kwa iso, ukekale uuko iivo umfiilwa mpaka mwanangu Shela akule.” Alongaga ivo kwaviya ogohaga sema mwanawe akakomwa enga viya wanduguze wakomigwe. Tamali niyo auya kwawe.
12Lupisi lutali lwize lwomboke, Shua mkaza Yuda niyo abanika. Yuda eze ibinde lupisi lo kumhongezela mkaziwe, yehe na mbwiyaye Hilahi ywa Adulamu, waitaga Timnahi, uko zingoto zakwe Yuda nezikakant'higwa mazoya. 13Mnt'hu yumwenga amgambilaga Tamali kugamba ise vyala naakaita Timnahi, kwo kukant'ha zingoto zakwe mazoya. 14Tamali niyo ahambula zisuke zo ufiilwa ziya availe, niyo agubika uso wakwe ne kitambala, no kwikala hasi he nk'hili yo mzi wa Enaimu, mzi umwe sila ikuita Timnahi. Nakatenda ivo kwaviya abunk'hulaga kugamba Shela mwana Yuda nakakula kale mna halozigwe kunda mgosiwe.
15Yuda eze amuone, aonaga kugamba yudya andaga pamp'he, kwaviya agubikaga uso wakwe. 16Ivo haheina kumanya kugamba yudya andaga mka mwanawe, ambasaga niyo amgamba, “Naunga nigone na weye.”
Yudya mvele niyo amhitula, “Nna kuzumila nounink'hei?”
17Yuda niyo amhitula, “Nohwink'he mbuzi kulawa mwe difyo dyangu.”
Yudya mvele niyo amgamba, “Nevidahike uneva una niikila lahani kint'hu chochose mpaka aho ukeza kunik'ha imbuzi.”
18Niyo amuuza, “Hwink'hei inde lahani?”
Niyo ahitula, “Nink'he iyo imp'hete yako ne sigi yakwe, hamwenga na iyo ingoda unanayo.” Yuda niyo amwink'ha uyo mvele ivo vint'hu, niyo akugona naye, niyo uyo mvele enula ubovu kwa Yuda. 19Tamali auyaga kaya, niyo ahambula kitambala icho akegubike mwo mtwi no kuvala naho suke zo ufiilwa.
20Yuda amtumaga Hilahi mbwiyaye egale imbuzi no kuvuza viya vint'hu aikile lahani kwa yudya mvele, mna Hilahi nakadunduga kumuwona. 21Agezaga kuwauza want'hu wa Enaimu, “Ekuhi yudya pamp'he andaga aha he sila?”
Niyo wamhitula, “Hahandile na pamp'he yeyose aha.”
22Hilahi auyaga kwa Yuda niyo amgamba, “Himuone. Naho want'hu wa uko wanigamba hakwandile mbwitu na pamp'he yeyose uko.”
23Yuda niyo agamba, “Leka aviguhe ivint'hu ivo. Kise kuunga kusekigwa ni want'hu. Nehiungisa kumliha mna kudunduga kumuona.”
24Miezi mitatu ize yomboke, want'hu niyo wakumgamba Yuda, “Haluse Tamali mka mwanao kanda pamp'he, naho mwo upamp'he uwo kenula ubovu.”
Yuda niyo asigiila, “Mlaveni kuse naho okigwe moto abanike.”
25Aho andile akegalwa kuse, egalaga ulosi kwa ise vyala, “Miye nna ubovu wa mnt'hu mta ivint'hu ivi. Sinya ukaule kugamba niani mta imp'hete ino ne isigi yakwe, ne ingoda ino.”
26Yuda avibunk'hulaga niyo agamba, “Tamali mkindedi kunijink'ha miye. Miye hidamanye vedi kwaviya himlozile kwa mwanagu Shela.” Yuda hagonile mbwitu na Tamali.
27Ize ibule Tamali aunga kweleka, neioneka kugamba Tamali neeleke mapasa. 28Umwo andaga akengila nyumba, mwana yumwenga alavaga mkono wakwe kuse, umnk'hunga niyo amfunga luzigi lwi nk'hundu niyo agamba, “Uyu niye akongile kwelekwa.” 29Mna niyo auvuza umkono kundani, miyawe niyo asunguza kwelekwa. Yudya mnk'hunga niyo agamba, “Nii kukup'huka!” Ivo niyo zina dyakwe etangwa Pelizi. Nuko kugamba, “Kukup'huka.” 30Nduguye niyo elekwa no luzi lwi nk'hundu mo mkono, niyo wamwink'ha zina niye Zela. Nuko kugamba, ung'azi wink'hundu wa mtondo, (mgingu).
Currently Selected:
Genesis 38: NguuBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Nguu @The Word for The World International and the Nguu Language translation, 2025. All rights reserved.
