Genesis 37
37
Yusufu na wanduguze
1Yakobo agendeelaga kwikala mwe isi ya Kanani uko ekalaga ise. 2Ino niyo isimulizi ya Yakobo ne mp'huga yakwe.
Yusufu akanda na miyaka mlongo na mfungate, andaga akadima na wanduguze zimbuzi ne zingoto za tati yawe awo wana Biliha na Zilipa, awo wandaga wawele wa ise. Yusufu amwigailaga ise ulosi wa yaihile wa kudamanya wanduguze.
3Yakobo amuungisaga Yusufu kujink'ha wanawe wose kwaviya amwelekaga umwo andaga kadalahala. Amsumilaga Yusufu nk'hazu nt'hali ina mahambo. 4Weze wabunk'hule kugamba tati yawe amuungisa Yusufu kujink'ha woho, wa mwiihiyaga ndugu ywawe niyo yanda hawa kusimwiilanya vedi.
5Yusufu alotaga sozi kilo kimwenga, eze awagambile wanduguze isozi iyo, niyo wanduguze wamwiihiya vitendese. 6Awagambaga, “Tegeelezeni ivo nilotile. 7Suwe chose chandanga kwe nk'honde kika kaka miganda yo uhemba, aaho niyo mganda uwangu wakimala chululu. Miganda iyenyu yauzungulukaga uwangu niyo yafunamila ho uwangu.”
8Wanduguze niyo wamuuza, “Weye wagamba nowize unde seuta kwetu?” Ivo wagendeelesaga kumwiihiya kwajili ye zisozi zakwe na ayo alongile mwa woho.
9Yusufu alotaga sozi nt'huhu niyo awagamba wanduguze, “Hilota sozi nt'huhu. Iyo inilagisa kugamba, zuwa no mnenge ne zint'hondo mlongo na imwenga zininamila.”
10Iviya iviya amgambilaga ise isozi iyo, ise niyo amtivila akamgamba, “Sozi yani iyo? Weye wagamba nyokwe na wanduguzo na miye neki kwinamile?” 11Wanduguze niyo wamuonela finju, mna ise niyo ayaika mwo moyo ayo yose.
Yusufu atagwa no kwigalwa Misili
12Zuwa dimwenga umwo wanduguze waitaga Shekumu uko wagendaga kudima mafyo ya tati yawe, 13Yakobo amgambaga Yusufu, “Naunga wiite Shekemu, kudya wanduguzo wakudimila amafyo.”
Yusufu niyo ahitula, “Neniite.”
14Ise niyo agamba, “Uite ukawakaule wanduguzo na amafyo uneva wagima, niyo wauya unigambile.” Ivo ise niyo amtuma kulawa kwe dikolongo dya Hebuloni.
Yusufu abulaga Shekemu, 15niyo anda atwangadika mwe nyika, mnt'hu yumwenga niyo amuona na kumuuza, “Wazungulai?”
16Yusufu niyo ahitula. “Nawazungula wandugu zangu wakudimadima. Wadaha kunigambila ukwo weli?”
17Yudya mnt'hu niyo agamba, “Awa wahalawa kale. Nehiweva wakagamba waita Dotani.” Yusufu niyo awatimila wanduguze niyo awabwiila uko Dotani.
18Umwo andaga akei kuwabwiila, wamuonaga kwa luhale, niyo waika mzungu ywo kumkoma. 19Wakegambaga, “Kauleni akulota sozi eza. 20Hayani nekimkomeni niyo cha duula kimba chakwe mwe disima hediina mazi. Nekigambe kugamba kakomwa ni makala mbago. Nekione elo zisozi zakwe nezinde vivihi.”
21Lubeni eze aweve agezaga kumhonya Yusufu kulawa mwo mzungu wawe. Niyo agamba, “Kise kumkoma. 22Nekimduule du mwe disima idi mwe nyika ino, kise kumnyulika.” Alongaga ivo kwa mzungu wa kumhonya kulawa kwawe vileke amvuze kwa ise. 23Yusufu eze abule kwa wanduguze, wamhambulaga ink'hazu yakwe imemile mahambo. 24Niyo wamgwila no kumduula mwe disima hediina mazi.
25Umwo wandile wakadya waonaga fyo dya Waishumaeli wandaga wakalawa Gileadi kuita Misili. Ngamia zawe zenulaga nt'hanu za ubani na zeli na Manemane. 26Yuda niyo awagamba wanduguze, “Nekipatei kina mkoma mvuna ywetu no kufisa ukomi uwo? 27Nekimtageni kwa Waishumaeli awa. Nekinde hakimkomile, hamwenga na ayo uyu ywetu, ni sakame yetu.” Wanduguze niyo wazumila. 28Want'hu wachuuzi wa Wamediani weze wabule aho, wanduguze wamlavaga Yusufu mwe disima no kumtaga kwa vipande va matundu milongo miidi kwa welekwa wa Ishumaeli, niyo waita naye uko Misili.
29Lubeni eze auye kwe disima niyo abwiila Yusufu hahali, atatulaga zisuke zakwe kwa kinyulu. 30Awauiyaga waduguze niyo awagamba, “Mbwanga hakuli! Nenitende vivihi?”
31Ivo wachinjaga mbuzi niyo watufika ink'hazu ya Yusufu mwe sakame ye mbuzi. 32Niyo waigala ink'hazu idya kwa tati yawe no kumgamba, “Kilogota ink'hazu ino, hiyo ya mwanao ino?”
33Tati yawe nakaimanya ink'hazu, niyo agamba, “Kindedi ino ink'hazu ya mwanangu, makala ya kwembago yamkoma. Mwanangu Yusufu, kasabant'hulwa vihendohendo!” 34Yakobo niyo atatula suke zakwe kwa kinyulu, niyo avala suke za gunia. Amhongezelaga mwanawe kwa mazuwa mengi. 35Wanawe wose wakilume na wakike, wagezaga kumtondowaza mna hazumile kutondowala niyo agamba, “Nilekeni nigendeele kumhongezela mwanagu mpaka mwe dizuwa dyangu dya kubanika.” Ivo niyo agendeela kumhongezela mwanawe Yusufu.
36Mwo lupisi ulo wadya Wamidiani wamtagaga Yusufu kwa Potifa, mkulu yumwenga mwo esueta wa Falao, uyo andaga mkulu ywa wamizi.
Currently Selected:
Genesis 37: NguuBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Nguu @The Word for The World International and the Nguu Language translation, 2025. All rights reserved.
