Mesali 12
12
1Yakafira kufundwa kafira umani, ila yakalema kuberiziwa ndo mzigizigi.
2Muntu muheri kafiruwa na Mtuwa Mlungu, kumbiti yakatenda madoda kapangalirwa na Mlungu.
3Muntu hapakagangamali kwa kutenda makontola, kumbiti kwahera shashiweza kumwusiya muntu muheri.
4Mdala muheri kamnemiziya mpalu gwakuyi, kumbiti yakamsoniziya mpalu gwakuyi ndo handa shironda mumihonju mwakuyi.
5Maholu ga muntu muheri ndo kuwatendera wantu pota kubagula, magambaziya ga mkontola ndo ga upayira.
6Visoweru vya wakontola nfiru yakuyi ndo kulaga yawahera vidoda, kumbiti visoweru vya muntu muheri viwalopola wantu.
7Wantu yawatenda ukondola wahowa pawawera wazewi, kumbiti yawawatenda maheri hawalikali mivinja itangala.
8Muntu kazyumwa kulawirana na luhala lwakuyi, kumbiti muntu gwa maholu madoda kabeziwa.
9Mbaka muntu gwa yakalisulusiya na kana vintu vyakuyi mweni, kuliku yakalifilira makulu na kukosa shiboga.
10Muntu muheri kawashera shawafira wavigongolu wakuyi, kumbiti matendu ga lusungu lwa muntu mkontola ndo ungesera.
11Mlimi yakagangamala kana shiboga shivuwa, kumbiti yakatenda mirandu yayifaa ndiri kahera mahala.
12Wakontola wafira shilii shawaweriti nashi wantu wadoda, kumbiti muntu mheri kagoloka ugangamala.
13Muntu mkontola kagomiziwa kwa mpayu yakuyi mweni, kumbiti muntu mheri kalawa muntabiku.
14Muntu kanampatiru kulawirana na visoweru vyakuyi, na hakapati malawiru ga mahengu ga mawoku gakuyi.
15Mzigizigi kalihola kila shakatenda kuwera ndo teratera, kumbiti yakana luhala kapikanira shakagambiruwa.
16Maya ga mzigizigi gamanika kalongola, kumbiti yakavimana kabeziya mayigilangu.
17Yakatakula nakaka hakalaviyi upitawu wa nakaka, kumbiti kapitawu gwa mpayu katakula uzyanga.
18Visoweru vya vuluvulu vitenda handa ligumba, kumbiti visoweru vyakatakula muntu yakana luhala gaponiziya.
19Nakaka ulikala mashaka goseri, kumbiti upayira ndo wa shaka shifupi hera.
20Yawapanga makontola wamema upayira mumoyu, kumbiti yawafira ponga wapata nemeleru.
21Wantu waheri wapatwandiri na mlandu gudoda, kumbiti wakontola wanantabiku zivuwa.
22Miromu yayitakula mpaya ndo nkalaliru kwa Mtuwa Mlungu, kumbiti wantu waminika ndo nemeleru yakuyi.
23Yakana mahala wafifa umani wakuyi, kumbiti wazigizigi wabwera uzigizigi wawu.
24Liwoku lya muntu mgangamala kumtenda muntu kaweri mkolamlima, kumbiti uleri hawumtendi mmanda.
25Lyoga mumoyu limtenda muntu kaheri nemeru, kumbiti shisoweru shiherepa shimkalamziya.
26Muntu muheri kawushapira ukontola, kumbiti matendu ga wakontola gawapotuziya weni.
27Mwinga mleri kapatandiri shakawinga, kumbiti yakagangamala hakaweri na mpatiru.
28Munjira yayifiruwa na Mlungu kwana ukomu, kumbiti njira ya ukontola ilonguziya mukuhowa.
Currently Selected:
Mesali 12: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.