Mawalanga 27
27
Maluwa ga Wahinga wa Selofehadi
1Lishaka limu wahinga wa Selofehadi ashina Mala na Nowa na Hogila na Milika na Tiriza wamgenderiti Musa, ayu Selofehadi kaweriti mwana gwa Heferi, mwana gwa Gileadi mwana gwa Makili mwana gwa Manasi kaweriti mwana gwa Yosefu. 2Su womberi wiziti palugomi lwa Liringu Linanagala na kugoloka kulongolu kwa mtambika Eleazari na wakulu woseri wa wantu wa Waisraeli. 3Womberi walongiti, “Tati gwetu kahowiti kushiwala na kaheriti mwana mpalu yoseri. Mweni kaweriti ndiri muwamu mwa wantu wa Kora yawimwiziriti Mtuwa Mlungu, tati gwetu kahowiti kulawirana na vidoda vyakuyi mweni. 4Iwera hashi litawu lya tati gwetu liwusiwi mulukolu lwakuyi toziya kaheriti na mwana maplu? Gutupanani semu ya isi yetu pamuhera na walongu wakuyi tati gwetu.”
5Musa kalijegiti lihinginiku lyawu kulongolu kwa Mtuwa Mlungu. 6Mtuwa Mlungu kamgambiriti Musa, 7“Shawatakuliti wahinga wa Selofehadi shiwera sha nakaka, guwapanani seemu ya isi pamuhera na walongu wa tati gwawu, watoli semu ya isi iweri yawu. 8Shakapanu guwagambiri Waisraeli kuwera muntu yoseri pakahowa pota kuleka mwana mpalu, uhala wakuyi wa semu ya isi hakapananwi muhinga gwakuyi. 9Paiwera kahera muhinga, su semu ya isi ayi hawapananwi walongu wakuyi wapalu. 10Na payiwera kahera walongu wapalu, su uhala wakuyi hawapananwi watati wakuyi wakulu na wapusu. 11Na payiwera tati gwakuyi kahera walongu wapalu, su uhala wakuyi hawapananwi walongu wakuyi wa pakwegera, na yomberi hakahali gambira yakuyi. Aga hagaweri malagizu na amuli kwa Waisraeli gambira neni Mtuwa Mlungu ntambu yanulagaliriti.”
Yoshuwa kasyagulwa kuwalongoziya Waisraeli
12Mtuwa Mlungu kamgambiriti Musa, “Gukweni kulugongu alu vigongu vya Abiramu guiloli isi yang'enda kuwapanana Waisraeli. 13Paguyiwona kala, gwenga viraa haguhowi gambira mlongu gwaku Aruni ntambu yakahowiti. 14Gwenga haguhowi toziya mugajimiriti ndiri malagaliru gangu kulii kushiwa sha Sini. Shaka shipinga sha wantu pawahinginikiti kuusu neni kulii Meriba, mwenga mlemiti kugajimira makakala gangu mananagala kulongolu kwawu pawafiriti wapananwi mashi.” Meriba liweriti linegu lya mashi ga kulii Kadeshi kushiwala sha Sini. 15Su Musa kamluwiti Mtuwa Mlungu, 16“Gwee Mtuwa Mlungu, Mlungu yaguweriti shyanjiru sha ukomu kwa viumbi vyoseri. Nikuluwa gumsyaguli muntu gwa kushigolokera shipinga sha wantu awa, 17ulii hakawalongoleri mumahengu gawu goseri, su Waisraeli nawiza kuwera gambira wakondolu yawahera mlolera.”
18Mtuwa Mlungu kamgambiriti Musa, “Gumtoli Yoshuwa mwana gwa Nuni, muntu yakawera na rohu iherepa, shakapanu gumtulili mawoku, 19na kumgolusiya kulongolu kwa mtambika Eleazari na shipinga shoseri sha wantu, gumpanani lihengu ali kulongolu kwa wantu agawu pawamlola. 20Gumpanani semu ya uwezu waku su shipinga shoseri sha Waisraeli wamjimiri. 21Yomberi hakamtumbiri mtambika Eleazari, su yomberi hakamumaniziyi galii ganfira neni kwa kugalambuziya simbi mulibuwi lya Ulimu na Sumimu. Kwa njira ayi Eleazari hakamlonguziyi Yoshuwa pamuhera na shipinga shoseri sha wantu wa Israeli muvitwatira vyawu vyoseri vyawatenda.” 22Musa katenditi gambira Mtuwa Mlungu ntambu yakamlagaliriti. Su kamtoliti Yoshuwa na kumgolusiya kulongolu kwa mtambika Eleazari na wantu woseri sha Waisraeli. 23Shakapanu kamtuliriti mawoku pamtuwi na kumpanana ulonguziwu ntambu yakalagalilitwi na Mtuwa Mlungu.
Currently Selected:
Mawalanga 27: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.