Mawalanga 25
25
Wantu wa Israeli yawamguwira mlungu Baali
1Wasraeli pawaweriti aku Shitimu, wapalu wanjiti kutenda uhumba na wadala wa Mowabu. 2Wadala awa washeritwi, Waisraeli watendi matambiku yawatambikiriti wamlungu wawu, nawomberi Waisraeli waliya shiboga na kuguwira wamlungu wawu. 3Hangu ndo ntambu Waisraeli pawanjiti kumguwira mlungu Baali gwa Peori, su maya ga Mtuwa Mlungu gaweriti panani pawu. 4Su Mtuwa Mlungu kamgambiriti Musa, “Guwatoli wakulu woseri wa Israeli yawawalonguziyiti wantu kutenda madoda, guwalagi kulongolu kwa neni pamshenji, su maya gangu kuusu mwenga gawuki.” 5Musa kawagambiriti wakulu wa Israeli, “Kila yumu gwenu kamlagi muntu yoseri pakati penu ulii yakamguwiriti mlungu Baali wa Peori.”
6Shaka shilaa shilii muntu yumu kamjegiti mdala yumu muntu gwa Midiyani ukaya kwakuyi, Musa na shipinga shoseri sha wantu wa Israeli pawaweriti wankudaya paligomi lya Liringu Linanagala. 7Su Finehasi mwana gwa Eleazari mzukulu gwa mtambika Aruni, pakawoniti aga, su kagolokiti kulawa mushipinga shilii, katoliti mgoha 8na kumfata muntu ulii gwa Israeli mpaka muliringu lyakuyi, kawasomiti mgoha woseri wawili mumtima. Su kwakutenda hangu, malweli makulu yagawapatiti Waisraeli gaperiti. 9Waisraeli yawahowiti kulawirana na malweli galii, waweriti wantu elufu malongu mawili na msheshi.
10Mtuwa Mlungu kamgambiriti Musa, 11“Finehasi mwana gwa Eleazari, mzukulu gwa mtambika Aruni, kalewelera maya gangu kwa Waisraeli. Muwamu mwenu ndo mweni hera kafiliti ndiri kuwona mlungu yumonga pakaguwiruwa kumbiti neni hera. Su kwajili yakuyi ndo mana nuwagamiziyiti ndiri Waisraeli woseri kwa maya gangu. 12Su gumgambiri Finehasi kuwera nakutenda nayu lipatanu lya ponga. 13Nankutenda lipatanu na yomberi kuwera mweni pamuhera na shiyiwuku shakuyi hawaweri watambika mashaka goseri toziya kalekiti ndiri kuwona mlungu yumonga kaguwirwi kumbiti neni hera Mlungu gwakuyi, su kawakolaniziyiti mawoku Waisraeli na neni.”
14Mwisraeli ulii yakalaguwitwi pamuhera na mdala ulii muntu kulawa muisi ya Midiyani yakashemitwi Zimri mwana gwa Salu, mkulu gwa kaya yimu mulikabila lya Simiyoni. 15Na mdala ayu muntu gwa Midiyani yawamlagiti wamshemiti Kozibi muhinga gwa Suri, yakaweriti mkulu gwa lukolu tunga lwa aku Midiyani. 16Mtuwa Mlungu kamgambiriti Musa, 17“Muwawiziri vumu kwa makakala wantu wa Midiyani na muwalagi, 18toziya womberi wawasoziya mwenga kwa vitendu vyawu vidoda, wawapayiriti kuusu Peori na toziya ya Kozibi, mhinga gwawu, yakalagitwi shaka malweri madoda pagalawiriti kulii Peori.”
Currently Selected:
Mawalanga 25: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.