Mawalanga 21
21
Waisraeli wawakanka Wakanaani
1Mfalumi yumu gwa Kanaani aku Aradi yakalikaliti aku uwega wa kusika mwa Kanaani, pakapatiti visoweru kuwera Waisraeli waweriti wankwiza kupitira njira ya Atiharimu, yomberi kagenditi kulikomanga ngondu na womberi, kawabatiti kwa makakala wamu wawu. 2Su Waisraeli wamlapiriti Mtuwa Mlungu kwa shirapu pawalonga, “Handa pagututanga kuwakoma, su twenga hatuyagamiziyi nakamu miji yawu kwajili yaku.” 3Mtuwa Mlungu kapikaniriti kuluwa kwawu, kawapanana ukanka kwa Wakanaani, Waisraeli wawalagiti nakamu Wakanaani pamuhera na kaya zawu, su pahala palii wapashema Horima.
Njoka gwa Shaba
4Waisraeli wagenditi mwanja kulawa lugongu Horima, wapitiriti njira yaigendera kulola kubahari ya Shamu su wayizyengeti isi ya Edomu. Kumbiti pawaweriti munjira wantu wafuwiti moyu toziya ya mwanja gutali. 5Su wanjiti kumuhinginikiya Mlungu pamuhera na Musa, walongiti, “Hashi, kwantambu gaa gutulaviyiti Misri twizi tuhowi panu kushiwala? Panu kwahera shiboga ama mashi, twenga tutoka kuliya shiboga ashi shidoda.!” 6Su Mtuwa Mlungu kajegiti wanjoka yawawera na usungu pakati pa wantu, wawalumiti na Waisraeli wavuwa wahowiti. 7Su wantu wamgenderiti Musa na kumgambira, “Twenga tutenda vidoda kwa kumuhinginikiya Mtuwa Mlungu pamuhera na gwenga viraa. Gumluwi Mtuwa Mlungu katuwusiliri wanjoka awa.” Musa kawaluwiriti kwa Mlungu wantu walii. 8“Shakapanu Mtuwa Mlungu kamgambiriti Musa, gunyawi njoka kwa madini ga shaba, gumtuli palupanda. Muntu yoseri yakalumuwa na njoka, pakamlola njoka ayu yakanyawitwi kwa madini ga shaba, hakaponi.” 9Su Musa kanyawiti njoka kwa madini ga shaba, kamtuliti palipanda. Kila muntu yakalumitwi na njoka, pakamoliti njoka ulii gwa shaba, kaponiti.
Mwanja kugenda lularanda lwa wantu wa Mowabu.
10Waisraeli wendereyiti na mwanja gwawu, shakapanu wabawiriti malingu gawu aku Obotihi. 11Kulawa aku womberi wagenditi mwanja mpaka Iyeabarimu, mushiwala sha uwega wa kwagulawa mshenji Mumowabu. 12Kulawa aku Mowabu wagenditi mwanja na wabawiriti malingu gawu mulilaranda lya Zeredi. 13Kulawa aku Zeredi wagenditi mwanja na wabawiriti malingu gawu kushana mwa lushemba Arinoni, lushemba lulii lwalunyinyirisha mashi kulawa muisi ya wantu wa Amori na kupitira kushiwala. Lushemba lwa Arinoni luweriti mbaka ya wantu wa Mowabu na wantu wa Amori.
14Kwa toziya ayi ilembituwi mushintola sha kulikoma ngondu za Mtuwa Mlungu.
“Mji gwa Wahebu muisi Sufa,
na lularanda lwa Arinoni,
lwalusoka mpaka mji gwa Ari,
na kulola uwega mumbaka mwa Mowabu!
15Na luseleru lwa lushi lwalusoka mpaka mji gwa Ari. Ari na kugenda mumbaka mwa Mowabu.”
16Kulawa aku Waisraeli wagenditi mwanja mpaka Beeri, yaani linegu palii Mtuwa Mlungu kamgambiriti Musa, “Guwajojoniri wantu pamuhera, neni haniwapanani mashi.” 17Palii Waisraeli wimbiti lwimbu alu:
“Gubwituli mashi gwee linegu! Mulilimbili lwimbu linegu alu!
18Linegu lyalibawitwi na wakulu
lwalibawitwi nentu na yawawera na ukulu,
kwa honga zawu za ukolamlima
na honga za wakulu.”
Kulawa kushiwala womberi wagenditi mwanja mpaka Matana, 19kulawa Matana wagenditi mwanja mpaka Nahalieli, kulawa Nahalieli wagenditi mwanja mpaka Bamoti. 20Na kulawa Bamoti wagenditi mwanja mpaka palularanda lyalingira muisi ya Mowabu, palupeleru lwa lugongu lwa Pisiga, lyalilola pasi kushiwala.
Waisraeli wankuwakanka wafalumi Sihoni na Ogu
Liholu 2:26-3:11
21Waisraeli wamjegiti mfalumi Sihoni gwa Waamori, ujumbi awu, 22“Gutujimiri tupiti muisi yaku, twenga hapeni tugendi kumbwega na kwingira mumalambu ama mumalambu ga mizyabibu ama kulanda mashi ga manegu genu, twenga hatugendi munjira nkulu ya mfalumi mpaka patuwuka muisi yaku.” 23Kumbiti mfalumi gwa Sihoni kawajimiriti ndiri Waisraeli wapiti muisi yakuyi. Yomberi kawajojonikiti wantu wakuyi, kagenditi Yahasa aku kushiwala kuwakomanga Waisraeli. 24Kumbiti Waisraeli wamlagiti mfalumi Sihoni, waitoliti isi yakuyi kwanjira lushemba Arinoni mpaka lushemba Yaboki, yaani mumbaka mwa isi ya wantu wa Amoni, mbaka ilii yaiweriti yankuloleruwa nentu. 25Waisraeli waitoliti miji ilii kwa makakala na walikaliti mumiji ya wantu wa Amori aku Heshiboni pamuhera na vijiji vyakuyi. 26Heshiboni guweriti mji gwa mfalumi Sihoni gwa wantu wa Amori, ulii palii kwanja kalikomangiti ngondu na mfalumi gwa Mowabu na kuitola kwa makakala isi yakuyi yoseri mpaka lushemba lwa Arinoni. 27Toziya pamakashu pamberi pakwiza Waisraeli, wantu wimbiti lwimbu kwa misali,
“Mwizi Heshiboni na kunyawa.
Mji gwa Sihoni na gunyawiwi na kugugangamiziya.
28Toziya motu gulawiti Heshiboni,
mimbamba ya motu ilawiti mji gwa mfalumi Sihoni,
gwangamiziyiti mji gwa Ari gwa Mowabu,
guwangamiziyiti migongu ya lushemba Arinoni.
29Shondi mwawantu wa Mowabu,
muwagamiziwa, mwenga wantu yamumguwila mlungu Kemoshi!
Guwatenda wana wenu wapalu kuwera watuga isi,
wahinga waku guwaleka watoluwi kwa makakala
mpaka kwa mfalumi Sihoni, gwa Amori.
30Kumbiti vinu shiyiwuku shawu shyagamiziwa,
kulawa Heshiboni mpaka diboni. Tuwagamiziyiti nakamu Nofa, pakwegera na Medeba.”
31Su Waisraeli walikaliti muisi ya wantu wa Amori. 32Shakapanu Musa katumiti wantu waloliloli weri mji gwa Yazeri, womberi wautoliti kwa makakala pamuhera na vijiji vyakuyi, wawawingiti wantu wa Amori yawalikaliti amu.
33Shakapanu Waisraeli wagalambukiti kugenda uwega wa kushana pawafata njira yaigenda Bashani. Mfalumi Ogu gwa Bashani kalawiti na shonta lyakuyi kuwakomanga aku Ederei. 34Kumbiti Mtuwa Mlungu kamgambiriti Musa, “Nagumtira, toziya hanukutangi gumkanki pamuhera na wantu wakuyi woseri na isi yawu yoseri. Hagumkomi ntambu yagumkomiti Sihoni mfalumi gwa wantu wa Amori, ulii yakalikaliti Heshiboni.” 35Su Waisraeli wamlagiti Ogu na wana wakuyi na wantu wakuyi woseri, pota kumleka ata muntu yumu, shakapanu waitoliti isi yakuyi.
Currently Selected:
Mawalanga 21: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.