Mika 6
6
Mtuwa Mlungu kankuyilalamikira Israeli
1“Mpikaniri shakatakula Mlungu kwa Israeli,
Gugoloki na gutakuli litakulu lyaku kulongolu kumigongu na vigongu vipikaniri shagufira kutakula.”
2Mwenga vigongu mpikiniri, malalamiku ga Mtuwa Mlungu, Mwenga miyanjiru ya pasipanu. Toziya Mtuwa Mlungu kana lishongeru kwa wantu wakuyi. Yomberi hakalaviyi masitaka kwa Israeli.
3Mtuwa Mlungu kalonga hangu, mwenga wantu waneni niwatendera shishi? Niwatokeziya kwa shintu gaa? Su munankuli. 4Niwalaviyeni kulawa Misri na kuwalopola kulawa isi ya umanda. Nimlagaliriti Musa na Aroni na Miriamu wawalonguziyi. 5Wantu waneni, mliholi mpangu gwakafiriti kugutenda kwa mwenga mfalumi Balaki gwa Mowabu na Balamu mwana gwa Beori ntambu yakamwankuliti. Mliholi yagalawiriti mumwanja gwenu kulawa Shitimu mpaka Giligali, mulihori mirandu ayi na hamuvimani shilii shantenditi su kuwalopola.
Mlungu kafira shishi
6Nimgenderi Mtuwa Mlungu na shintu gaa, su nimguwiri Mlungu gwa kumpindi? Hashi nimgenderi na tambiku za kulunguziya, nimlavaliri ng'ombi gwa shinja shimu? 7Hashi, Mtuwa Mlungu hakafiliziwi, panimlavalira wakondolu washipalu maelufu, ama nshemba yayiperandiri ya lipaki? Hashi nimlavaliri shipanta njira toziya ya likosa lyangu? 8Gwee muntu, Mlungu kakulanguziya yagawera maheri, shakashifira Mtuwa Mlungu kwa gwenga ndo ashi. Gutendi mirandu yayimfiliziya Mlungu, kufira kuwera na lusungu na kulikala kwa unanaga na Mlungu gwaku.
9“Mtuwa Mlungu kankuwashema wantu wa mji gwa Yerusalemu, kumguwira yomberi ndo mlandu gwa mahala nentu. Mpikaniri mwenga wantu wa Yuda.” 10Munumba ya wakontola kwana lunda za wiwiti. Womberi watendera vipimu vya mpayu, mirandu ayi ndo ya nkalaliru. 11Hapeni niwalekiziyi wantu yawatendera vipimu vya mpayu 12Walunda wawayonera wahushu na wantu woseri watakula mpayu. 13Su nanja kuwatabisiya na kuwaangamiziya toziya ya makontola genu. 14Hamliyi kumbiti hapeni mwikuti. Hamtuli kumbiti hapeni vilikali na kila shintu shamshitula hanishihalibisiyi munkondu. 15Hamyali kumbiti hapeni mbenangi. Hamkami lipaki lya zeyituni kumbiti hapeni mlitenderi. Hamkami zabibu kumbiti hapeni mlandi divayi ayi. 16Hagalawiri aga toziya ya kufata madoda ga mfalumi Omuri na mwana gwakuyi Ahabu yakaweriti mfalumi. Shakapanu haniwagamiziyi na wantu wa isi zimonga hawawagamiziyi.
The Bible version in the Pogoro Language. @The Word for The World International and Pogoro Language translation. All rights reserved.