Ayubu 3
3
Ayubu kankumlalamikira Mtuwa Mlungu
1Pa aga Ayubu katakula na kulipangira lishaka lyakiwukiti.
2Ayubu kalonga hangu, 3Lipangilwi lishaka lirii lya kwiwuka kwa neni
na pashiru palii papabwelitwi,
lishaka lya kwingira yinda!
4Lishaka ali liweri luwindu na Mlungu kumpindi nakalilola,
pota kulangala nakuliwalira.
5Lishaka ali liweri luwindu nentu,
na mawundi totolu gagibiki lishaka alii,
luwindu la pamihi litiliziyi lishaka ali.
6Pashiru palii pagibikirwi na luwindu totolu
napawalangwa mushaka sha shinja,
pota kuwalangwa mushaka sha mwezi goseri,
7Pashiru palii napawera na mdala gwa kupata yinda,
na nemeru nayipikinika mngati mwakuyi.
8Na wahawi wagapangili mashaka,
walipangili lishaka ali,
na waganga yawadaha kumwimusiya njoka songu kalikangali lishaka alii.
9Pashiru palii pakakoliti yinda ntondu zyakuyi za mandawira na ziweri luwindu
na zyeni ziheperi kulangala pota kupata,
pota naguwona kulangala pagwanja kulawa mandawira,
10Toziya pashiru palii gutatitindiri mtima gwa mawu gwangu,
pota kufifa ntabiku naniziwona.
11Ntambu gaa howandiri shaka sha kwiwuka?
Hashi, howandiri pandawiti mumtima?
12Ntambu gaa mawu gwangu kaniwuliti
ntambu gaa noniti maweri gakuyi?
13Vinu nfintirwa kwa ponga,
meweri ng'onja na kwoyera,
14pamuhera na wafalumi na wakolamlima wa pasipanu,
yawaweliti walinyawiriti syayi pahala pawu peni na vinu ndo mahami.
15Meweri pamuhera na wakolamlima yawaweriti na zahabu,
yawazimemeziyiti numba zawu kwa madini ga feza.
16Ntambu gaa nfindirwandiri pasi,
gambira mwana yakiwukiti na kuhowa,
handa nonu yakawonitindiri kulangala?
17Aku yawahowiti wakontola waleka kugaziya
na aku yawatokiti woyera pota lyoga.
18Aku watatilwa wanemelera ponga,
wapikanirandiri liziwu likalipa lya mgolokera gwa watatilwa.
19Walunda na wahushu woseri wa aku,
yawaweriti watatilwa walekeziwa kulawa kwa watuwa wawu.
20Ntambu gaa kulangala kuwawalira walii yawawera muntabika
na awa yawahinginika kupananwa ukomu?
21Muntu yakafira kuhowa kumbiti kahowandiri,
kasakula kuhowa kuliku luhanja lwalulififiti.
22Muntu gambira ayu kanemelera nentu na hakafyapiliri pakahowa na kufintirwa?
23Ntambu gaa nendeleyi kulikala,
Mlungu kandewelera kulikala,
wezandiri kulola kwang'enda?
24Pakuliya nankulila hera,
na mashozi gangu gitika gambira mashi ga lishemba.
25Shilii shanishitira shimpata, shantiriti ndo shimpata.
26Nahera ponga, pota unyamaliru,
noyerandiri, ntabiku zyangu zipelandiri.
The Bible version in the Pogoro Language. @The Word for The World International and Pogoro Language translation. All rights reserved.