Lyanjiru 44

Lwindi lwaluwoneka mulilobota lya Benjamini

1Shakapanu Yusufu kamlagaliriti mgolokera gwa numba yakuwi pakalonga, “Gumemiziyi malobota ga wantu awa viboga shyasi shawaweza kujega. Shakapanu gutuli mpiya za kila muntu pampindi pa lilobota lyakuyi. 2Mulilobota lya mpusu ulii gutuli lwindi lwaneni lwa madini ga feza pamuhera na mpiya zakuwi. Mgolokera ulii katenditi ntambu yakamgambiritwi Yusufu.”

3Papawushiyiti, yomberi kawalekiziya kuwuka pamuhera na wankanyama punda wawu. 4Womberi pawaweriti wamumwanja mutali ndiri kulawa mlushi, “Yusufu kamgambira mgolokera gwa numba yakuwi, kalongola guwafati wantu walii na paguwawona, guwakosiyi, iwera hashi mlipa maheli gamtenderitwi kwa makondola? 5Iwera hashi mwiwa lwindi lwa mtuwa gwangu, mweni kalandiraga na kushitendera kutungira? Mwenga mkosa nentu kwa kutenda hangu.”

6Mgolokera ulii pakawawoniti kawagambiriti visoweru avi. 7Kumbiti womberi wamkosiya, iwera hashi gutugambira ntambu ayi mtuwa gwetu? “Tulirapa, twenga wantumintumi waku hapeni tutendi shitwatira sha ntambu ayi! 8Guliholi mtuwa, mpiya yatuziwoniti pamalobota getu tuziwuziyiti kulawa muisi ya Kanaani. Iwezekani hashi kwiwa kayi mpiya ama zahabu mnumba mwa mkulu gwaku? 9Su pakapatikana yumu gwetu kana lwindi alu, su kalaguwi na twawoseri twenga hatuweri wamanda waku.”

10Mgoloke ayu kalonga, yina iweri ntambu yamlonga. “Lwindi paliwoneka kwa yoseri hakaweri mmanda gwangu, kumbiti wamonga woseri hapeni muweri na lawama.”

11Su kila yumu kasulusiya lilobota lyakuyi pasi kalongola na kuliyopola. 12Mgolokera ulii kagaloliti malobota goseri, kanjiti kulilola lya mkulu gwawu na kumalilira lya mpusu gwawu. Su lwindi luwoneka mulilobota lya Benjamini. 13Shakapanu wapapula nguwu zawu kwa kwinginika, kila yumu gwawu kampapiziya punda gwakuyi shisanka shakuwi wawuya mlushi.

14Yuda na walongu wakuyi pawasokiti ukaya kwa Yusufu, mweni kaweriti kankali muwukaya. Su wamsuntamaliti yomberi kwa ligoya. 15Na Yusufu kawakosiya, iwera hashi mtenda ntambu ayi? “Hashi muvimaniti ndiri kuwera muntu gambira neni nanawu uwezu wa kutunga?”

16Yuda kamwankula, tutakuli shishi kwa gwenga mtuwa gwetu? “Hatuwezi hashi kulanguziya kuwera twenga twahera kosa? Mlungu kagubutula ukondola wa wantumintumi waku. Vinu twawoseri twenga pamuhera na ulii yakawonikaniti na lwindi lwaku, hatuweri wamanda waku.”

17Kumbiti Yusufu kalongiti, ndala! Neni hapeni ntendi ntambu ayi! “Ulii hera yakawonekaniti na lwindi lwaneni, hakaweri mmanda gwangu. Kumbiti mwawoseri mwenga muwuyi kwa tati gwenu kwa ponga.”

Yuda kankumteteya Benjamini

18so Yuda kasegelera Yusufu na kumgambira, “Mtuwa, nikuluwa gunjimiri neni ntumintumi gwaku, ntakuli shisoweru kwa mtuwa gwangu. Nagumkalilira ntumintumi gwaku, tembera gwera gwa teratera na Farao mweni. 19Mtuwa, gwenga gutukosiyiti, hashi, mwenga muwera na tati ama mlongu? 20Su twenga tukuwankuliti, yina! Twana tati mgogolu, vulaa twana mlongu gwingi mpusu yakiwukiti shaka sha ugogolu wa tati gwetu. Kaka gwakuyi mpusu ayu kahowiti kala na mpusu ayu ndo yakasigaliti gweka kwa mawu gwakuyi, na tati gwetu kamfira nentu mpusu ayu. 21Shakapanu mtuwa gutulagaliriti twenga wantumintumi waku, mgendi mwakanjegeri mpusu gwenu, mpati kumwona. 22Twenga tukugambiriti, mpusu ayu hapeni kalileki na tati gwakuyi, toziya pakatenda ntambu ayi tati gwakuyi hakahowi. 23Kumbiti gwenga guwagambiriti wantumintumi waku, pamwiza ndiri na mlongu gwenu mpusu, hapeni niwawanki kayi.

24Patuwuyiti ukaya kwa ntumintumi gwaku, twenga tumgambiriti tati gwetu ntambu yagutulagaliriti, mtuwa. 25Shakapanu tati gwetu katugambiriti, mgendi kayi mwakaheneri shiboga shamonga. 26Kumbiti twenga tumgambiriti, hapeni tugendi, ira mpusu gwetu pakagenda pamuhera na twenga. Handa pakagenda ndiri pamuhera na twenga, twenga hapeni tuwankuwi na muntu ulii. 27Su tati gwetu, ntumintumi gwaku katugambiriti, muvimana kuwera mdala gwangu Raheli kaniwuliriti wana wawili.” 28Yumu kagamiriti, na neni nongiti, nakaka nkanyama gwa kuntundu kampapulanga vipandi vipandi, toziya nimwoniti ndiri kayi. 29“Handa pamumtola ayu vulaa kwa neni, payiwera hakapatwi shoseri shidoda, su hamundagi kwa hinginiku.”

30Su mtuwa panumwuyira tati gwangu ntumintumi gwaku pota mpusu ayu, ukomu wa tati ulikolerana pamuhera na mpusu ayu, 31na pakawona mpusu ayu kapamuhera ndiri na twenga hakahowi. Twenga wantumintumi waku, hatumlagi tati gwetu kwa hinginiku. 32“Vulaa neni mweni ntumintumi gwaku nililaviyiti kuwera mgolokera gwa mpusu ayu kwa tati gwangu. Su panumgambira yomberi kuwera nimuwuziya ndiri Benjamini kwa gwenga, handawumiwi mashaka goseri.” 33Vinu gwenga mtuwa nikuluwa, neni ntumintumi gwaku nsigali weri mmanda gwaku, gumleki mpusu ayu kawuyi pamuhera kaka zakuwi. 34Hawezi hashi kumwuyira tati gwangu pota mpusu ayu? Weza ndiri kuhepelera kuwona galii hagampati tati gwangu.

Currently Selected:

Lyanjiru 44: PBV

Highlight

Copy

Compare