Lyanjiru 43

Benjamini kankugenda Misri pamuhera na kaka zyakuwi

1Shakapanu njala iweriti nkulu nentu muisi ya Kanaani. 2Su womberi pawamaliliti kala kuliya shiboga shilii shawashihemeliti Misri, “Yakobu tati gwawu kawagambiriti wana wakuyi, mgendi kayi Misri, mwakatuhemeleri shiboga shingi.”

3Kumbiti Yuda kamgambiriti Tati gwakuyi, “Muntu ulii yakatuberiziyiti palonga, hapeni niwawanki pamwiza ndiri na mpusu gwenu. 4Handa pagujimira mlongu gwetu kagendi pamuhera na twenga, hatugendi kukuhemelera shiboga. 5Handa pagujimira ndiri kagendi pamuhera na twenga, hapeni tugendi aku, toziya muntu ulii katugambiriti pota kufifa, hapeni mumoni neni pamwiza ndiri na mpusu gwenu.”

6Israeli kakosiya, “Iwera hashi muntabisiya kumgambira muntu ayu kuwera muwera na mpusu gwingi?” 7Womberi wamwankula, “Muntu ulii katukosiyiti weri kuusu vitwatira vyatwenga na walongu wetu pakalonga, hashi, tati gwenu kankali mkomu? Hashi, muwera na mlongu gwingi? Su twenga tumwankuliti kulawirana na makosiwu gakuyi. Twenga metuvimani hashi kuwera mekatakuli, mumjegi mpusu gwenu?”

8Su Yuda kamgambiriti Israeli tati gwakuyi, “Gunjimiri neni ng'endi na yomberi, su hatuwuki kalongola tugendi twakahemeli shiboga natwiza kuhowa njala pamuhera na gwenga na wana wetu. 9Neni namweni haweri mgolokera gwakuyi, gwenga hagushongi neni. Panumwuziya ndiri gumoni kwa masu gaku, lawama hayiweri kwaneni mashaka gangu goseri. 10Handa metukawi ndiri, metugendi kala kulii na kuwuya panu mala mbili.”

11Panu Israeli tati gwawu kawagambira, “Yina! Handa mpaka iweri hangu, su mtendi ntambu ayi. Mtuli mumalobota genu viboga vimu viherepa vya isi yetu, mumjegeri mkulu ayu lifupu. Mumtoleri vulaa lipaki lididiki lya ukwashu na lwashi na ubani na manimani na kungu pamuhera na lozi. 12Mtoli mpiya mala mbili toziya hamuziwuziyi mpiya zilii zyazitulitwi pamalobota genu. Pamonga wazituliti pota kuvimana. 13Mumtoli vilaa mpusu gwenu mgendi kwa muntu ayu. 14Mlungu yakawera na makakala kawapanani lusungu kulongolu kwa muntu ayu, kawalekerani mlongu gwenu yumonga ulii pamuhera na Benjamini wawuyi pamuhera. Kwaneni handa, panyagamirwa wana wangu nahera shakutenda.”

15Su womberi watoliti mafupu galii, na mpiya mala mbili, wagenditi Misri pamuhera na Benjamini mpusu gwawu. Pawasokiti Misri, womberi wagenditi kugoloka kulongolu kwa Yusufu. 16Yusufu pakamwoniti Benjamini pamuhera na womberi, su kamgambiriti mgolokera gwa numba yakuwi, “Guwatoli wantu awa kugenda nawu ukaya kwaneni, kamlikituli nkanyama yumu na kumunyawa weri, toziya wantu awa hawaliyi shiboga pamuhera na neni paliwala.”

17Mgolokera ayu katenditi ntambu yawamgambiriti, kawatoliti wahenga walii kuwajega ukaya kwa Yusufu. 18Pawawoniti kuwera wawajega ukaya kwa Yusufu, womberi waweriti na lyoga, walitakuziyana weni kwa weni, “Watujega agawu toziya ya mpiya zilii zyawatuwuziliriti mumalobota getu patwiziti kwanja su kapati kutushambulia na sha kututakulira madoda su kapati kutukoma vumu na kutupoka wankanyama punda wetu na kututenda wamanda wakuyi.”

19Su womberi wamgendiriti mgolokera gwa numba ya Yusufu na wayoweriti nayu paligomi lya numba. 20Womberi wamgambira, “Shondi shondi mtuwa, twiziti panu kwanja kuhemera shiboga. 21Patusokiti pahala pa kugonja wahenga, tuyopoliti malobota getu, tulikangashiti kuwona mpiya za kila yumu gwetu pamalobota gakuyi. Vinu tuziwuziya mpiya azi. 22Tujega mpiya zyamonga kuhemera shiboga. Tuvimana ndiri gaa yakatuliti mpiya zetu mumalobota getu.”

23Mgolokera ulii kawankula, “Namuwera na lyoga. Mlungu gwenu, Mlungu gwa tati gwenu, kawapananiti mwenga mpiya mumalobota genu. Neni nangiti mpiya zyenu.” Shakapanu kawajegera Simiyoni mlongu gwawu.

24Mgolokera ayu kawashemiriti ukaya kwa Yusufu, kawapananiti mashi ga kugulula magulu gawu, vulaa kawaliyiziya wankanyama punda wawu. 25Womberi watandiriti mafupu gawu ga kumpanana Yusufu toziya wapikaniliti kuwera hawaliyi shiboga pamuhera na yomberi. 26Yusufu, pakawuyiti ukaya, wamjegera mafupu galii gawaweriti naga, wamsuntamalira.

27Yusufu kawakosiya ntambu yawawera na shakapanu na kulonga, “Mung'ambiriti visoweru vya mgogolu tati gwenu. Hashi, kakashina? Kankali mkomu?”

28Womberi wamwankula, “Ntumintumi gwaku tati gwetu, kakashina na kankali mkomu.” Shakapanu wasuntamiti makukama kulongolu kwakuyi. 29Yusufu pakanyasuliti masu gakuyi na kumwona Benjamini mlongu gwakuyi, mwana gwa mawu gwakuyi, su kalonga, “Ayu ndo mlongu gwenu mpusu yamung'ambiriti visoweru vyakuwi? Muntemba gwangu, Mlungu na kakupanani upendeleu.” 30Shakapanu Yusufu kawukiti pahala palii, toziya masozi gaweriti gankumlawa kwa maholu makulu kuusu mlongu gwakuyi. Kingiriti kalongola mushiwogu shakuwi na kanjiti kulira aku.

31Pakafyankuliti kala sheni shakuwi, kalawiti kunja pakalikamamiziya, kalagalira pakalonga, “Mujegi shiboga.”

32Yusufu wamtandiriti shiboga shakuwi gweka yakuwi, na walongu wakuyi wawatandira gweka yawu, na ntambu iraa ayi wantu wa Misri yawaliyiti pamuhera na yomberi, watandaritwi gweka yawu, toziya ndo nkalaliru kwa wantu wa Misri kuliya shiboga pamuhera na Waeburaniya. 33Walongu wakuyi Yusufu walivagiti kulongolu kwakuyi kulinganira na umuli gwa mivinja vyawu, kwanjira mkulu mpaka gwa upeleru. Womberi pawawoniti ntambu yawavagiti, su waliloliti pawalikangasha. 34Pawajegiti semu ya shiboga kulawa pashitalawanda sha Yusufu, shiboga sha Benjamini shiweriti mala muhanu kuliku wamonga. Su walanditi na kunemelera pamuhera na Yusufu.

Currently Selected:

Lyanjiru 43: PBV

Highlight

Copy

Compare