Lyanjiru 19

Ukondola wa wantu wa Sodoma

1Wantumintumi wakumpindi wawili walii wasokiti Sodoma pamihi na Lutu kaweriti kalikaliti paligomi likulu lya lushi. Shaka pakawawoniti, kagenditi kuwashemera na kuwasuntamalira makukama. 2Yomberi kalongiti, “Watuwa wangu, mwingili ukaya kwa ntumintumi gwenu, mwakagululi magulu genu na kugonja panu. Shakapanu mandawira shilawu mwendereyi na mwanja gwenu. Womberi wamwankuliti, ndala, hatugonji kunja panu paluwaga.”

3Lutu kawaluwiti nentu wingiri ukaya kwakuyi. Yomberi kawatandiriti msambu, kanyawiti mabumunda yagahera simika na womberi wagaliyiti. 4Kumbiti womberi pamberi pawagenda kugonja, wapalu woseri kulawa kila pahala pa lushi lwa Sodoma, wantemba na wazewi, woseri wayizyengikiti numba ya Lutu. 5Wantu walii wamshemiti Lutu na kumkosiya, “Wakoshi wapalu walii yawawiziti kwa gwenga? Guwalaviyi kunja tufira kugonja nawa.”

6Lutu kalawiti kunja kuyowera na wantu walii pakatata ligomi kumbeli kwakuyi 7su kawagambira, “Walongu wangu, niwaluwani namutenda ukondora awu. 8Mloli, nanawu wahinga wawili yawawera luyenja. Mleki niwapanani na mwenga mweza kuwatenderuwa shoseri shamfira. Kumbiti namuwatendera shoseri wapalu awa, toziya wahenga waneni.”

9Kumbiti womberi walongiti, “Guwuki zaku! Wendereyiti kutakula gwenga gwiziti paguwera muhenga na vinu gulitenda kuwera mtoza! Su hatukutendi vidoda nentu pamuhera na wahenga waku awa.” Palii wamsukumiza Lutu kumbeli na kwanja kumega ligomi. 10Kumbiti wahenga walii wagatalapiyiti mawoku gawu wamnika Lutu mnumba na kutata ligomi. 11Shakapanu wawatenda masu gawu gaweriti lwisi wantu walii wantemba pamuhera na wawezi yawaweriti paligomi pa numba ulii. Womberi wasinditi kuwona ligomi lilii.

Lutu kankulawa Sodoma

12Wahenga wawili walii wamgambiriti Lutu, “Hashi, gwana muntu yumonga panu, pamonga wana waku ama wahinga waku ama waganafu waku ama yoseri ulii mlongu gwaku mlushi amu? Guwawusiyi kalongola panu, 13twankugenda kupagamiziya pahala panu, toziya mashongeru gwakupikaniriti kwa Mlungu kwajili ya wantu yawalikala panu kuwera kukulu nentu na Mtuwa katujega kuwagamiziya.”

14Su Lutu kawagendera waganafu wakuyi, walii yawawahetiti wahinga wakuyi. Yomberi kawagambiriti, “Kalongola muwuki mlushi amu, toziya Mtuwa kapakwegera kulwagamiziya lushi alu!” Kumbiti waganafu wakuyi waliholiti kuwera Lutu kaweriti kankuwatendera lijonga.

15Pawushiyiti mandawira, wantumintumi wa kumpindi wamgambiriti Lutu, “Kalongola, gumtoli mdala gwaku pamuhera na wahinga waku wawili awa, namwagamiziwa shaka lushi alu paluwagamiziwa.”

16Lutu pakaweriti goyigoyi kuwuka, wantumintumi wa kumpindi walii wamkoliti liwoku na liwoku lya mdala gwakuyi na mawoku ga wahinga wakuyi, wamlaviyiti kunja kwa lushi, toziya Mtuwa kaweriti na lusungu nawomberi. 17Pawalaviyitwi kala kunja mlushi lulii, ntumintumi yumu gwa kumpindi kamgambiriti, “Mtugi kwa kugalopola mmakaliru genu! Namlola kumbeli ama namgoloka koseri papawera lularanda! Mtugiri kulugongu, pamtenda ndiri hangu hamwagamiziwi.”

18Lutu kawagambira, “Ndala watuwa wangu namtenda ntambu ayi! 19Nakaka ntumintumi gwenu neni mpata upendelewu pamasu genu na mwenga mumonera lusungu lukulu kugalopola makaliru gangu. Kumbiti weza ndiri kutugira kulugongu, shitwatira ashi hashimpati pamberi pa kusoka aku na neni hahowi. 20Mpikaniri, panu kwana lushi ludidini pakwegera lwatuweza kutugira. Su mundekeziyi ntugiri aku. Makaliru gangu hagalopolwi.”

21Yomberi kamwankula, “Yina njimira shaguluwa, hapeni nilwagamiziyi lushi lwagulukanditi. 22Gutendi kalongola! Gutugili aku na neni hapeni ntendi shoseri mpaka pagusoka aku.” Su lushi alu lushemuwa Soali, mana yakuwi ludidini.

Kwagamiziwa kwa Sodoma na Gomora

23Mshenji guweriti gulawa kala, Lutu kaweriti kasokiti kala mulushi lwa Soali. 24Su Mtuwa Mlungu katowiziyiti motu gukalipa gwa mabuwi ga madini ga baruti lushi lwa Sodoma na Gomora, 25kaziyagamiziya lushi azi na pahala poseri palilaranda pamuhera na woseri yawalikaliti amu, vilaa pamuhera na vyoseri vyavimeriti mulitapaka. 26Kumbiti mdala gwa Lutu yakaweriti kumbeli kwa Lutu, kaloliti kumbeli, kagalambuka kuwera lusiki lwa munu.

27Mandawira putiputi lishaka lyalifatiti, Abrahamu kagenda pahala pakagolokiti kulongolu kwa Mtuwa Mlungu. 28Pakaweriti aku, kalola pasi wega zoseri za Sodoma na Gomora na pahala poseri pa lularanda, kalikangashiti kuwona lyosi palikwena kumpindi, lyosi gambira lya litanulu likulu.

29Mlungu pakaziyagamiziyiti lushi zaziwera mulilaranda kwakalikaliti Lutu, kamuholiti Abrahamu kwa kumlaviya Lutu mlushi azi nakagamira.

Shyanjiru sha Wamoabu na Waamoni

30Lutu pamuhera na wahinga wakuyi wawili, wawukiti Soari na kugenda kulikala kulugongu, toziya katiriti kulikala Soari. Mweni pamuhera na wahinga wakuyi, walikaliiti mumpanga. 31Lishaka limu muhinga mkulu kamgambiriti mpusu gwakuyi, “Tati gwetu mzewi na kwahera mpalu pahala gwakutuyuga tuleri wana. 32Su tumlandasyii tati gwetu divayi ikalipa kaloweri, su tupati kugonja nayomberi na hatwiwuri wana kutula shiyiwuku shetu.”

33Pashiru palii wamlandaziyiti tati gwawu divayi ikalipa na muhinga ulii mkulu kagenditi kugonja nayu, kumbiti tati gwakuyi kavimaniti ndiri shaka muhinga pakangonjiti ama pakawukiti.

34Shirawu yakuwi, muhinga mkulu ulii kamgambiriti mpusu gwakuyi, “Lishu pashiru neni ng'onjiti na tati, leru vilaa tumlandisiyi divayi ikalipa kaloweri, shakapanu gwenga hagugonji nayu, su twawoseri twenga hatuweri na viyiwuku vya kumpanana wana tati gwetu.” 35Su pashiru palii wamlandasiya divayi tati gwawu, shakapanu muhinga musu kagenditi kugonja nayu. Kumbiti tati gwakuyi kavimaniti ndiri shaka muhinga gwakuyi pakagonjiti ama pakawukiti. 36Su wahinga woseri wawili wa Lutu waweriti na yinda kulawa kwa tati gwawu. 37Muhinga mkulu ulii kaleriti mwana mpalu, kamshema Moabu, yomberi ndo tati gwa Wamoabu mpaka leru. 38Muhinga mpusu ulii kaleriti mwana mpalu, kamshema Beni Ami. Ayu ndo tati gwa Waamoni mpaka leru.

Currently Selected:

Lyanjiru 19: PBV

Highlight

Copy

Compare