Lyanjiru 18
18
Wahenga watatu
1Mlungu kamlawiriti Abrahamu pamitera mikulu ya mialoni ya Mamire. Abrahamu kaweriti kalikala paligomi lwa liringu lyakuyi shaka sha shifuki paliwala, 2na pakanyasuliti masu gakuyi, kawoniti wahenga watatu wagolokiti kutali padidini kulongolu kwakuyi. Yomberi pakawawoniti, katugiti kugenda kuwawanka. Pakasokiti kasuntamiti makukama 3na kulonga, “Watuwa wangu, handa neni mpata upendelewu mumasu genu, Mwee watuwa, namumpita neni ntumintumi gwaku. 4Hamjegeruwi mashi, shakapanu mnawi magulu na kwoyera pasi pa mtera. 5Haniwajegeri shiboga mlii, su mpati likakala na kwenderea na mwanja gwenu, toziya mwiza kwa ntumintumi gwenu.”
Na womberi wamwankula, “Gutendi ntambu yagulonga.”
6Su Abrahamu katenditi kalongola, kingiriti muliringu lyakaweriti Sara na kamgambiriti, “Gutendi kalongola, gutoli mawoku matatu ga ubumu na guteleki shiboga.” 7Shakapanu katugiti kugenda mushipinga sha wang'ombi, kasyaguliti ng'ombi kaherepa nentu, kampanana ntumintumi na yomberi kamlikituliti kalongola. 8Shiboga pashiweriti kala, yomberi katoliti jibini ya maweli na vinofu vya ng'ombi ulii yakatandiritwi, kavituliti kulongolu kwa wahenga. Pawaweriti wankuliya, Abrahamu kaweriti kankuwahepa pakwegera pasi pa mtera.
9Wahenga walii wamkosiyiti Abrahamu, “Kakoshi Sara mdala gwaku?”
Abrahamu kawankula, “Kamuliringu.”
10“Yumu gwawu yakaweriti mkulu kalongiti, nakaka hambuyi shaka gambira ashi mushinja shashiza na mdala gwaku hakaweri na mwana mpalu.
Sara kaweriti kakuzyetu paligomi lwa liringu pakapikanira.” 11Abrahamu na Sara waweriti wagogolu na Sara kwa vitwatira vya shidala kaweziti ndiri kupata mwana. 12Su Sara kasekiti shimoyumoyu pakalihola, “Neni pamuhera na mpalu gwangu twawagogolu. Hashi, neni pawera mgogolu ntambu ayi, hanemeleri pang'onja na mpalu gwangu?”
13“Shakapanu Mtuwa Mlungu kamkosiya Abrahamu, iwera ashi Sara kankuseka na katakula kuwera nakaka hampati mwana uganu neni mgogolu ntambu ayi? 14Hashi kwana shitwatira shoseri shashikamala kwa Mtuwa? Hambuyi kwa gwenga shaka shilii shanukulagiliti na Sara hakaweri na mwana.
15Kumbiti Sara kaweriti na lyoga, su kazyangiti kwa kulonga, nsekiti ndiri. Kumbiti Mtuwa Mlungu kamgambiriti, gusekiti.”
Abrahamu kankuwaluwira yawalikala Sodoma
16Shakapanu wahenga pawimukiti kuwuka, womberi waloliti kugenda Sodoma na Abrahamu kalikoliti nawu munjira. 17“Su Mtuwa kalonga, hashi, nimfifi Abrahamu shitwatira shang'enda kutenda? 18Nakaka yomberi hakaweri tati gwa isi zivuwa na kupitira yomberi wantu woseri pasipanu hawatekelerwi.” 19Nimsyaguliti yomberi, mweni hakawafundi wakuyi pamuhera na kaya yakuwi kufata njira yangu, su waweri waheri na yawatenda vitwatira viheri, naneni mpati kutenda shilii shanagaliti. 20“Su Mtuwa Mlungu kalongiti, mashongeru makulu kuusu wantu wa Sodoma na Gomora pamuhera na vidoda vyawu, viwera vikulu.” 21Su hansuluki kugenda aku nikaloli namweni handa nakaka gawatenditi gawera madoda kulinganira na mashongeru ntambu yaganiziliti. Paiwera ndiri, hanivimani.
22Wahenga wawili walii waloliti kugenda Sodoma, kumbiti Abrahamu kasigaliti pakagoloka kulongolu kwa Mtuwa Mlungu. 23“Su Abrahamu kamsegelera Mtuwa Mlungu, kamkosiya, hashi haguwagamiziyi wantu waheri pamuhera na wakondola?” 24“Hashi, handa kwana wantu waheri malongu muhanu mlushi amu, haguwagamiziyi na hapeni gululeki kwajili ya wantu malongu muhanu waheri yawawera mlushi amu? 25Ashi shiweri kutali nagwenga, kutenda shitwatira gambira ashi, kuwalaga waheri pamuhera na wakondola, kuwatendera waheri teratera na wakondola. Iweri kutali na gwenga! Gwenga guwera Mtoza gwa pasipanu poseri na hagutendi lyaliwera teratera.”
26Mtuwa kamgambira, “Handa pamona wantu malongu muhanu waheri mlushi lwa Sodoma, hanilulekiziyi lushi lwoseri kwajili ya womberi.”
27Abrahamu kalonga kayi, “Vinu neni wera na ugangamala wa kuyowera na Mtuwa, tembera neni shintu ndiri kumbiti wera lidika na livu hera, 28hashi handa mawalanga ga yawawera waheri gapungula wamuhanu mumalongu muhanu, hagulwagamiziyi lushi lwoseri toziya ya wantu wamuhanu yawapungukiti? Mtuwa Mlungu kamgambiriti, handa haniwawona aku wantu malongu msheshi na muhanu, hapeni nilwagamiziyi.”
29Abrahamu kayowera nayu kayi, hashi, “Handa kwana wantu malongu msheshi hera?”
Mtuwa Mlungu kamwankula, “Hapeni nilwagamiziyi handa kwana wantu malongu msheshi.”
30Shakapanu yomberi kalongiti, “Gwee Mtuwa Mlungu shondo shondi nagukalala, kumbiti gundeki nkosiyi. Hashi, handa aku kwana wantu malongu matatu hera?”
Mtuwa kawankula, “Hapeni nilwagamiziyi panuwawona aku wantu malongu matatu.”
31Su Abrahamu kalongiti, “Vinu neni wera na ugangamala nentu kuyowera na Mtuwa, hashi handa kwana wantu malongu mawili hera?”
Mtuwa kamwankula, “Toziya ya wantu malongu mawili, hapeni nilwagamiziyi.”
32Abrahamu kalonga, “Mtuwa shondi shondi nagukalala, kumbiti gundekeziyi nyoweri kayi mala yimu hera. Hayiweri hashi handa kwana wantu lilongu aku?”
Mtuwa kamwankula, “Toziya ya wantu lilongu awa, hapeni nilwagamiziyi.”
33Mtuwa Mlungu pakamaliliti kuyowera na Abrahamu, kawukiti na Abrahamu kawuyiti ukaya kwakuyi.
Currently Selected:
Lyanjiru 18: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.
