Kulawa 15

Wantu wa Israeli wankuvina msambu kwa kukomboluwa

1Musa pamuhera na wantu wa Israeli wimbiti lwimbu halweniimbuwi lishaka loseri lilii.

“Hanumwimbiri Mtuwa Mlungu, toziya kakanka kwa ukwisa.

Kawawasiliti farasi pamuhera na walonguziya farasi mubahari!

2Mtuwa Mlungu ndo ulii yakantenda neni weri mgangamala, ndo ulii yanumwimbira

Mweni ndo yakanopoziyiti.

Yomberi ndo Mlungu gwangu, neni Hanimkwisi.

Mlungu ndo ulii wambuyi wangu wamguwiriti,

na hanuwagambiri wamonga ukulu yakawera nawu.

3Mtuwa Mlungu gambira muntu gwa ngondu,

Mtuwa Mlungu ndo litawu lyakuyi.

4Yomberi kaziyasiliti mbutuka zyazikwegwa na farasi za Falawu pamuhera na mashonta gakuyi

mubahari,

Wakulu wayaguwi waherepa

woseri wamiluwiti mubahari ya Shamu.

5Mashi gagubikiti gambira mashi makulu ga mafuriku,

womberi walidibiti mumashi gambira mabuwi.

6Gwee Mtuwa Mlungu, liwoku lyaku lya kumliwu lyana makakala ga ukwisa,

kwa makakala gwee Mtuwa Mlungu, guwasoniziyiti wangondu muvipandi vipandi.

7Guwera na ukwisa gwaguwagamiziyiti wangondu waku.

Toziya guwakaliriti womberi, gwagawamiziyiti womberi

gambira motu gwagulunguziya uhakata.

8Gwenga gupulila mubahari,

mankapala ga mashi gagolokiti,

mashi gagolokiti gambira vibambaza viwili.

Pasi nentu mubahari, mashi gakamaliti.

9Wangondu wa twenga walongiti, hatuwafati womberi

na hatuwakamuli.

Hatulaviyi magumba getu

hatuwalagi womberi.

Patuwakamula kala,

hatuugawi ulunda wawu.

Hatutoli kwa womberi shoseri shatufira.

10Kumbiti gwenga guvumishiti lyega lyaku,

na bahari iwagubika womberi.

Womberi walidibiti mumashi mavuwa gambira mabuwi.

11Mtuwa Mlungu, pakati pa milungu yawu, kwahera mlungu gambira gwenga!

Gwenga gukwisuwa, nakaka gwa tambu ya gweka na vyoseri vyaguvinyawiti.

Hashi, gaa yakalifana na gwenga?

Kwahera ata yumu yakalifana na gwenga, yakaweza kutenda mawuzauza ga ntambu yoseri ilii. 12Pagulitalipisiyiti liwoku lyaku lya kumliwu,

wangondu wetu wamilituwi na pasipanu!

13Gwenga kwa uheri waku guwalongoziya wantu gwaguwakomboliti,

kwa makakala gaku gwenga guwalonguziyiti womberi muisi yagulikala.

14Wantu wa isi zimonga hawapikaniri shilii shagutenditi,

na womberi hawalendemeri.

15Wakulu wa Edomu hawalikangashi.

Wakulu wa Moabu hawaweri na lyoga, hawashashatiki. Woseri yawalikala muisi ya Kanaani moyu yawu hayiweri na lyoga.

16Womberi hawaweri shashatika pamuhera na lyoga toziya ya makakala gaku makulu.

Kumbiti hawaweri jii gambira mabuwi

mpaka wantu waku pawapita,

wantu yaguwakomboliti kulawa muumanda muisi ya Misri, 17wagendi muisi ya Kanaani.

Haguwatendi womberi wawezi kulikala mulugongu lwaku,

pahala palii gwee Mtuwa Mlungu gupasyaguliti paweri ukaya kwaku,

mupahala pananagala,

gwenga gamweni gupanyawiti.

18Gwee Mtuwa Mlungu, hagukolimlima mashaka goseri!”

Lwimbu lwa Miriamu

19Farasi wa Falawu na mbutuka zyazikwegwa na farasi pamuhera na walongoziya farasi pawajeriti kwingira mubahari, Mtuwa Mlungu katenditi mashi gawuyi na kuwagubika woseri. Kumbiti wantu wa Israeli wagenditi kupitira pakati pa bahari munjira iyuma. 20Miriamu mbuyi gwa Mlungu, ulii yakaweriti dada mkulu gwa Aruni, katoliti ng'oma ndidini yakuwi, 21na kamwimbiriti Mtuwa Mlungu lwimbu alu, su wadala woseri wamgendiriti kumbeli kwakuyi pawavina na pawawera na ng'oma zawu.

“Mwimbiri Mtuwa Mlungu,

toziya kakankiti kwa ukwisa kulawa kwa wangondu wakuyi.

Yomberi kawawasiliti farasi pamuhera na walonguziya farasi mubahari.”

Mtuwa Mlungu kagalambula mashi gakalipa gaweri mashi maherepa

22Shakapanu Musa kawalongoziyiti wantu wa Israeli kulawa mubahari ya Shamu. Womberi wagenditi kushiwala lwalushemuwa Shuri. Wagenditi mwanja gwa mashaka matatu, pota kuwona mashi. 23Kuweriti na mashi palii, kumbiti womberi wasinditi kugalanda toziya gaweriti gakalipa. Ndo mana pahala palii pashemuwa Mara, kwa Shieburaniya mana yakuwi ikaripa. 24Wantu woseri wamuhinginikiiti Musa na kulonga, “Hashi, hatulandi shishi?” 25Su Musa kamliliriti Mtuwa Mlungu. Shakapanu Mtuwa Mlungu kamlanguziyiti mtera. Su yomberi katoliti lutambi lumu na kalyasiti mumashi na mashi gagalambikiti kuwera maherepa kwa kugalanda. Kulii Mara, Mtuwa Mlungu kawapananiti womberi malagaliru ga ntambu yingi yingi kugalongoziya makaliru gawu. Viraa Mtuwa Mlungu kawajeriti kulii kuwayambura handa womberi mewamjimiri, 26kwa kulonga, “Neni ndo Mtuwa Mlungu, Mlungu gwenu. Handa pamunjimira weri neni panuwagambira, na kutenda shilii shitwatira shanushimana kuwera shiherepa, kugalola weri goseri ganuwalagalira, neni haniwaloleri weri kulawa mumalweli ganugajegiti kwa wantu wa Misri. Namulyaluwa kuwera ndo ulii yakawaponiziya.”

27Patulawiti Mara, twiziti pahala papashemuwa Elimu. Kulii kuweriti na mbwiru za mashi lilongu na mbili pamuhera na mitera ya mitendi malongu saba kulii. Su womberi wanyawiti malingu gawu kulii.

Currently Selected:

Kulawa 15: PBV

Highlight

Copy

Compare