Mbwera 9
9
1Hangu niliholiti goseri aga, mona handa Mlungu kalonguziya matendu ga wantu yawana luhala na wamika, kwahera muntu yoseri yakaweza kuvimana yagawera kulongolu. 2Woseri awa wana upeleru wumu, mwaminika na mkontola, mheri na mdoda, yakaherepa na mhumba, yawalaviya malaviwu na yawalaviyandiri. Ntambu yayiwera kwa mheri ndo ntambu yayiwera kwa yakana vidoda na ntambu yayiwera kwa yawalirapa ndo hayiweri kwa yawalirapandiri. 3Agu ndo mlandu gudoda nentu pakati pa goseri yagatendeka pasipanu, upeleru ulauli uwapata wantu woseri. Kayi, shaka shoseri sha makaliru gawu, wantu wamema ukontola na lukwali, shakapanu wahowa. 4Kumbiti yakawera pamuhera na yawawera wakomu kana litumbiru, mbaka ng'ang'a mkomu kuliku simba yakahowa. 5Mana, wakomu wavimana handa hawahowi, kumbiti yawahowiti wavimanandiri shintu. Wahera sha mana na womberi walilyaluwika nakamu. 6Ufiru wawu, nkalaliru zawu na matamata zawu, vyoseri viwuka na womberi, su hapeniwashitendi kayi shintu shoseri pasipanu.
7Gugendi gwakaliyi shiboga shaku kwa nemeru na gwakalandi divayi yaku kwa nemeru, mana Mlungu kajimira shagutenda. 8Mashaka goseri guvali nguwu iherepa na guliswagi lipaki kumtuyi. 9Makaliru ndo madidi, gunemeleri pamuhera na mdala gwaku yagumfira shaka shoseri sha makaliru gaku, Mana ashi ndo shagupangiritwi na Mlungu mumakaliru gaku na lihengu lyaku lya ntabiku pasipanu. 10Kila shintu shagufira kushitenda gushitendi kwa makakala gaku goseri, mana kumambi aku kwagugenda kwahera kutenda lihengu pota shoseri shirii pota umani ama luhala.
11Kayi, mona shintu shimonga pasipanu, handa yawadaha kutuga wakankandiri kwa kutuga kwawu, pota wamashonta hapeni wakanki nkondu na yawana luhala hapeni wapati shiboga na yawana mahala hapeni walundi, pota yawana umani wapatandiri ukulu, kumbiti shaka sha mpatiru shiwapati woseri. 12Muntu kashimanandiri shaka shakuyi hashisokindii. Handa wasomba ntambu yawagomera muwavu pota kuvimana na handa wampongu ntambu yawagomera mumgomiziwu, hangu ndo madoda ntambu yagawapata wantu pota kuvimana.
Luhala luherepa kuliku uzigizigi
13Viravirii mona shintu shakashitenditi muntu yakana luhala shihelepiziyiti nentu. 14Paweriti na mji gumu mdidini gwana wantu wadidini. Mfalumi yakana likakala kagukankaliti na katuliti mashonta wakuyi su kagukomangi. 15Mumji agu, kuweriti na mhushu yumu yakana luhala, mweni kwa luhala lwakuyi kagulopola mji agu. Kumbiti kwahera muntu yakamholiti mhushu ayu. 16Su neni ntakula, luhala ndo luherepa kuliku likakala, kumbiti luhala lwa mhushu lubeziwa na kwahera yakapikanira visoweru vyakuyi. 17Mbaka kupikinira visoweru vyampolimpoli vya muntu yakana luhala, kuliku kupikira umatu wa mfalumi kushikawu sha wazigizigi. 18Kuwera na luhala ndo kuherepa kuliku vintu vya kulikomangira vya nkondu, kumbiti yakana vidoda yumu kahalibisiya maherepa gavuwa.
The Bible version in the Pogoro Language. @The Word for The World International and Pogoro Language translation. All rights reserved.