Mbwera 8
8
1Gaa yakawera handa yakana luhala? Gaa yakavimana mirandu ntambu yaviwera? Luhala lumjegera muntu kuseka na lugalambula sheni sha muntu yakana hinginika.
Kumjimira mfalumi
2Nikugambira gujimiri lagalira ya mfalumi, toziya gulilapiti kwa Mlungu. 3Naguwuka kalongola kulongolu kwa mfalumi, pota nagwendeleya kutenda madoda, mana mfalumi hakatendi ntambu yakafira. 4Mana lagalira ya mfalumi ndo litakulu lya upeleru, kwahera yakaweza kumkosiya, “Ntambu gaa gwankutenda hangu?” 5Handa pagujimira lagiru lyakuyi hapeni gupati madoda na yakana luhala hakavimani shaka shashifiruwa kutenda shintu. 6Kila shintu shana shaka shakuyi na njira yakuyi, ata hangu ntabiku impata muntu. 7Kwahera yakavimana mashaka gagiza, na kwahera yakaweza kumgambira lyanalizi? 8Kwahera muntu yakawera na uwezu wa kulewelera rohu naifuwa, viraa kwahera muntu yakana uwezu wa kulewelera lishaka lyakuyi lya kuhowa. Viraavilii lishonta liwezandiri kuwuya kumberi lishaka lya nkondu na ukontola uwezandiri kumlopola mkontola shaka sha kuhowa.
Wantu wakontola na wantu waheri
9Goseri aga nigawona paweriti nankulihola kuusu yagatendeka pasipanu, kweni kwana muntu kakolamlima wayaguyi na kuwatabisiya. 10Viravirii, niwawona wakontola pawafintirwa kwa ligoya, wantu weni wazoleriti kwingira na kulawa pahala pakuguwira na waweriti wankuzyumwa mumji gulagulii gwawaweriti watenda makontola gawu. Ali viraa ndo shintundiri.
11Handa toza yizandiri kalongola kwa wakontola, su miyoyu ya wantu haifiri kutenda madoda. 12Tembera yawana vidoda watenda makontola mala zivuwa, kumbiti wendeleya kulikala. Hangu meyiweri mbaka kwawomberi yawamguwira Mlungu. 13Kumbiti wantu wakontola hapawaweri na mpatiru, mana womberi hapawaweri na makaliru matali toziya wamguwirandiri Mlungu. 14Kwana mlandu gumu gwagutendeka pasipanu. Gweni ndo wantu waheri watenderwa makontola na wakontola watenderwa maheri, agu viraa gwahera mana.
15Hangu, neni nilihola kuwera mbaka kunemera makaliru, toziya shintu shana mana kwa muntu pasipanu ndo kuliya na kulanda na kunemelera. Shakapanu nemeru hayigendi pamuhera na yomberi mulihengu lyakuyi mashaka goseri ga makaliru gakuyi gakapananitwi na Mlungu pasipanu.
16Panjeriti kuvimana luhala na kuwona yagalawira pasipanu, nyambuliti kuwera guweza kulikala pota kugonja paluwala na pashiru, 17shakapanu moniti goseri galii Mlungu kagagatenditi. Kwahera muntu yoseri yakaweza kuvimana goseri yagatendeka pasipanu. Ata muntu pakajera ntambu gaa kusakula, muntu hapeni kawezi kuvimana mana yakuyi. Ata muntu yakana luhala pakalitenda kavimana, nakaka hapeni kawezi kuvimana.
The Bible version in the Pogoro Language. @The Word for The World International and Pogoro Language translation. All rights reserved.