Dwɔn 21
21
1Amozi ye, Gyisɛse yele ɔ nwo hilele ye ɛdoavolɛma ne mɔ wɔ Galeli Tandane ne anloa. Kɛ ɔzile ɔyele ɔ nwo ɔhilele bɛ la ɛne:
2Ɛnee ɛdoavolɛma ne mɔ anu bie, Saemɔn Pita, Tɔmase, mɔɔ eza bɛfɛlɛ ye “Daedimɔso” anzɛɛ kɛ “Ndabia”, Natanayɛle, mɔɔ vi Kana mɔɔ wɔ Galeli, ɔ nee Zɛbɛdi amra mrenyia nwiɔ ne, Gyemise nee Dwɔn ɔ nee ye ɛdoavolɛma ne mɔ anu nwiɔ noko wɔ ɛkɛ.
3Saemɔn Pita zele bɛ kɛ, “Mekɔ adwɛne.”
Bɛzele ye kɛ, “Yɛ nee wɔ bahɔ.” Ɔti bɛvile sua nu na bɛ muala bɛhɔle ɛlɛne ne anu, na emomu bɛangye fɛlɛ biala wɔ nɔe ne amuala. 4Aleɛbahye ne, bɛnwunle kɛ nrenyia bie ɛragyinla ɛnwea ne anloa, na ɛdoavolɛma ne mɔ, annwu ye sonla holɛ.
5Ɛnee Gyisɛse ɔ. Ɔti ɔvɛlɛle bɛ ɔzele bɛ, “Ngakula, anzɛɛ bɛnyia fɛlɛ bie ɔ?”
Bɛbuale ye kɛ, “Kyɛkyɛ.”
6Akee ɔzele bɛ kɛ, “Bɛdo bɛ avonle ne wɔ ɛlɛne ne foa ko wɔ fema zo, na bɛbahye edwɛne dɔɔnwo!” Ɔti bɛdole avonle ne, na ɔlua fɛlɛ somaa ne ala mɔɔ bɛnyianle ye la ɛnlomboɛ ti, bɛangola bɛandwe avonle ne bɔbɔ.
7Na ɛdoavolɛ ne mɔɔ Gyisɛse kulo ye edwɛkɛ la zele Pita kɛ, “Awulae ɔ!” Saemɔn Pita dele kɛ Awulae ɔ la, ɔyele ye anwuma tɛladeɛ ne ɔkyekyele ɔ nwo, ɔluakɛ ɛnee ɔ kɛnra amuala gua zo, na ɔwulule ɔdɔle azule ne anu ɔweɛle ɔrale ɛnweazo. 8Ɛdoavolɛma ne mɔ mɔɔ hale la vole ɛlɛne ne anu; na bɛhwenle avonle ne mɔɔ fɛlɛ ngome ɛyi ye la bɛrale file zo; na ɔ nee file zo anwa biala, ɔbaye kɛyɛ abɛsamu ɛya nsa ala. 9Mɔɔ bɛvile ɛlɛne ne anu bɛdwule aze la, bɛnwunle kɛ bɛlɛtondo fɛlɛ wɔ senle bie mɔɔ bɛwuda la azo wɔ ɛkɛ, ɔ nee kpanwo noko.
10Gyisɛse zele bɛ kɛ, “Bɛva fɛlɛ ne mɔɔ bɛhye ye la bie bɛrɛlɛ me kɛkala.” 11Ɔti Saemɔn Pita vindele hɔle hɔhwehwenle avonle ne rale aze. Bɛdianle la ɛnee fɛlɛ mgbole mgbole ɛya ko nee abulanlu nee nsa yɛɛ wɔ avonle ne anu a, noko akee avonle ne antete.
12Gyisɛse zele bɛ kɛ, “Akee bɛrɛla bɛrali debie!” Na ɛdoavolɛma ne mɔ anu biala angola ambiza ye kɛ “nwane a le wɔ,” ɔluakɛ ɛnee bɛdabɛ mumua ne bɛze ye wienyi kɛ ɔdaye ɔ. 13Akee Gyisɛse vale kpanwo ne nee fɛlɛ ne anu nwiɔ, na ɔhyɛle ɔmaanle bɛ muala.
14Ɛhye a le mɔɔ tɔ zo fane nsa, wɔ mekɛ mɔɔ Gyisɛse vi ewule nu dwazole la, ɔyele ɔ nwo ɔhilele ye ɛdoavolɛma ne mɔ a.
15Mɔɔ bɛlile aleɛ bɛwiele la, Gyisɛse zele Saemɔn Pita kɛ, “Saemɔn, Dwɔn ara, asoo ɛlɛ me nwo ɛhulolɛ ɛtɛla ɛhye mɔ amuala ɔ?”
Pita buale ye kɛ, “Ɛhɛe, Awulae, ɛdawɔ mumua ne ɛze kɛ mekulo wɔ.”
Gyisɛse zele ye kɛ, “Maa me mboane mralɛ ne mɔ aleɛ.”
16Gyisɛse bizale ye kpuyia ne bieko kɛ, “Saemɔn, Dwɔn ara, amgba ala ɛlɛ me nwo ɛhulolɛ ɔ?”
Pita zele ye kɛ, “Ɛhɛe, Awulae, ɛdawɔ mumua ne ɛze kɛ mekulo wɔ.”
Gyisɛse eza zele ye kɛ, “Ɛnee nea me mboane ne mɔ maa me.”
17Gyisɛse bizale ye mɔɔ tɔ zo fane nsa kɛ, “Saemɔn, Dwɔn ara, asoo ɛkulo me ɔ?”
Ɔyɛle Pita nyane somaa ne ala kɛ Gyisɛse bizale ye fane nsa kɛ saa ɔlɛ ɔ nwo ɛhulolɛ a la. Ɔti Pita zele ye kɛ, “Awulae, ɛdawɔ mumua ne ɛze me ahonle nu; ɛze kɛ melɛ ɛ nwo ɛhulolɛ.”
Gyisɛse eza zele ye kɛ, “Ɛnee maa me mboane mralɛ ne mɔ aleɛ.” 18Akee mese wɔ nɔhalɛ nu kɛ, “Mekɛ mɔɔ ɛle kpavolɛ la ɛdawɔ a ɛfa wɔ ɛdanlɛ ɛpɛ ɛ bo a, na ɛkɔ ɛleka mɔɔ ɛkulo la, na saa ɛyɛ kpanyinli a, awie a bava wɔ ɛdanlɛ apɛ ɛ bo amaa wɔ a, na bɛ nee wɔ ahɔ ɛleka mɔɔ ɛngulo la.”
19Gyisɛse hanle ɛhye vale hilele ewule holɛ ko mɔɔ Pita bawu ava awula Nana Nyamenle anyunlunyia la. Akee Gyisɛse zele ye kɛ “Toa me.”
20Pita hakyile ɔ nye ala la, ɔnwunle ɛdoavolɛ ne mɔɔ Gyisɛse kulo ye la kɛ ɔdoa bɛ, na yemɔ noko a vale ɔ ti dole Gyisɛse akɛnra zo wɔ mekɛ mɔɔ bɛde aleɛ nwo bɛdi la na ɔbizale Gyisɛse kɛ, “Awulae, yɛ nuhua ne boni yɛɛ baye wɔ amaa a?” 21Pita nwunle ye la ɔzele Gyisɛse kɛ, “Awulae, na nrenyia ɛhye noko ɛ?”
22Gyisɛse buale kɛ, “Saa mekulo kɛ ɔtɛnla ngoane nu kɔkpula melɛ mɔɔ menwɔzia menwɔra la a, ɔfale ɛ nwo ɔ? Wɔmɔ bɛla badoa me.”
23Edwɛkɛ ɛhye yɛle huhuhuhu wɔ ɛdoavolɛma ne mɔ anwo ɛkɛ, kɛ ɛdoavolɛ ko ne ɛnrɛwu; na Gyisɛse noko anze Pita kɛ zɔhane ɛdoavolɛ ne ɛnrɛwu. Mɔɔ ɔhanle la a le kɛ, “Saa mekulo kɛ ɔtɛnla ngoane nu kɔkpula kɛ menwɔra la a, ɛhye fale ɛ nwo ɔ?”
24Mame a le ɛdoavolɛ zɔhane a! Menwunle ɛhye mɔ amuala kɛ bɛlɛsisi; medi nwolɛ daselɛ, ɔti mehɛlɛ nwolɛ edwɛkɛ noko medo ɛkɛ. Yɛ muala noko yɛze kɛ, ye daselɛlilɛ ne amuala le nɔhalɛ tagyee bɔkɔɔ. 25Na medie medi noko kɛ, saa bɛhɛlɛle edwɛkɛ mɔɔ sisile kosooti wɔ Gyisɛse ɛbɛlabɔlɛ nu la a, anrɛɛ ewiade amuala ɛnrɛnyia ɛleka bɔbɔ ɛnrɛva mbuluku zɔhane mɔ ɛnrɛzie!
Currently Selected:
Dwɔn 21: ONEN
Highlight
Share
Copy
Want to have your highlights saved across all your devices? Sign up or sign in
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
