Epelé 3
3
Yésus nyɛ ɔkɔ́n ó Moyíis
1Pifúmak píámɛ pí paandimán, panɔ́ nunyɛɛ́ epé Támbák maápílíkɛn, ánuák Yésuse ɔ́ niɔlɔ́ aná etúmí na asákɔsakɔ wɔɔkɔ́n u kuátap kúásɔ́ tukémenée. 2Waápá nulátát na Támbák kúúkɔ́ wáányíyɔ́ɔ́n wɔ á pusɔ́m pukáánɛ́, yá aná Moyíise maápá nulátát á kiansi kíɛ́yɛ́ kitikit. 3Maná Yésus mapiá nukanyi kukányɛn Moyíise, á kiákí ewú uwáákanɛ́ áápian nukúm kukányɛn kiansi kí muɛ́t. 4Siki kiansɛ́ áápian ewéékí, ewéékí u púpuum unyɛ Támbákɛ́ɛ. 5Moyíis mapá nulátát á kiansi kí Támbák kitikit, umapá nulátát ɛlɛɛ́ eŋelípusɔ́m umaápiánɛɛ́ utétunyi epú Támbák kɔɔ́nyɔ́ɔyɛt. 6Maná Kilíis nyɛɛ́ nulátát ɛlɛɛ́ muɔ́nɔ́ kɛ́ɛ́yɛ́ á kiansi. Kiansi kíɛ́yɛ́ nyɛ pasúɛ índɛ tuɛ́nɛkɛn pípíóndínyí ɔtɛ́m na anyamɔ́ é púúpú tupéétenyée.
Kupiɔyɛt kú paán pá Támbák
7Púú pukáánɛ́ Emfúnukufúúmɛ ɔ́ɔ́yɔɔnɛ́ɛ: Ínanɔ índɛ nusiɔ́p ekelú wɛ́ɛ́yɛ́, 8nutilúndí itɛ́m síánɔ́ aná á kisikɛl numeénúénésí wɔ, aná pesíí pɔɔkúnɛ́ɛ páánɔ́ maák wɔ́ ɔ́ yɔɔ́pítɛ́n e kúúsí kú kiandɔ́l. 9Támbák kanyɛɛ́: Ta aná pɛ́mɛɛ́n epú imɛɛ́lɛ́ ɔ́ tuɔŋ etín áandɛ́, Pɔtíɔ́ páánɔ́ páákiŋák ɔ́ yɔɔ́pítɛ́n, 10Púúpú imɔɔ́pɛ́n pɛɛnd pakáánɛ́ kutɛɛ, iŋganyɛɛ́: Á kisikɛl kitikit itɛ́m síɔ́p yuukan kaáyɛ́ɛ naamɛ; Pámanyɛ pɛ́tiɛ́n iŋilí síámɛ, 11kí ilópi nɛkɛtɛ́ɛ yaapília: Tuɛ́nyɛ́ɛ́n índɛ pényípíkin káámɛ ɔ́ kupíɔyɛt! 12Ɔ́nukɔ́l kisikɛl paandimán, tɛ mɔɔnd utiɛlɛ́ nɔ ɔtɛ́m kilɔk, alúndán utiányípá waátapan, unyɛɛ́ kuátɔn wɔ́ na Támbákɛ́ɛ wɔɔkɔ́si. 13Maná ánuákínán ilúndɛ panúɛ na panúɛ siki puɔ́síɛ, ínanɔ tuɔ́pɔnɛ́ɛ ɔmbílíkínɛ́n, ɛ́ɛ́ kifal tipúlít tɛ omoómí káánɔ́ kɔ́ ɔlɔŋ kíond kínúlúndi itɛ́m. 14Pasúɛ epé tukanyɛɛ́ pekúlíkuli pé Kilíis, kɔ́ɔ́m ɛ́ɛ́ túpian pipíóndínyí ɔtɛ́m tumeétúm na pɛ́ɛ kuám á mamaná. 15Naánɛ́ ɛ́ɛ́ púnyɛ puɔ́ŋɔ́n ɛ́ɛ́: Ínanɔ, indɛ nusiɔ́p ekelú wɛ́ɛ́yɛ́, nutilúndí itɛ́m síánɔ́ ɛɛlɛ́ á kisikɛl numeénúénésí wɔ. 16Pɛ́ɛ́nyɛ́ pɔ́mɔɔ́p ekelú ú Támbák póond pɛ́ɛl wɔ́ ɛtɔ́ kulal? Pányɛ peem epé Moyíis meémí Esípit. 17Pɛɛ́nyɛ́ Támbák mɔɔ́pɛ́n pɔ́ kutɛɛ tuɔŋ etín áandɛ́? Epé pɛ́mɛɛ́lɛ́ kifal, pɔ́ pɛɛ́tɛ pémeékú e kúúsí kú kiándɔ́l. 18Támbák masɔ́mb kiansɛ́ ekie: «Pétiényípíkín ɔ́ kitɔŋ yɛɛ́nyɛ́ɛ́yinɛnɛ́ pɔ́ ɔ́ kupíɔyɛ́t.» Pɛɛ́nyɛ́ umaásúmbɛ́n pɔ́ kiansɛ́? Epé pɛ́mɛɛ́lɛ́ ɛtɔ́ kulal. 19Tuɛ́kɛɛ́nɛn kɔk ɛ́ɛ́, pétimepíkin kɔ́ɔk ó pusíó ɛ́ɛ́ pátimaátap.
Currently Selected:
Epelé 3: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL