Efesiɛ́ŋ 6
6
Paápayɔ ne pepíényí
1Paápayɔ, ɔnuɔpinɔn pepíényí paanɔ aná Ɔkɔ́n aambanɛ, pu punyɛ indɛ́ndɛ́nɛ. 2Ɔpinɔn tio no niikoti, kikotí kí kuutuan kikáánɛ́ kinyɛ ni indan: 3Kinyɛ ɛ́ɛ́ akaapa é peseé ondo apia metúk kusɔl e kúúsí ekue. 4Paanu peesi, nú tienepesi itɛ́m sí paana páánɔ́ maná onuopukosi pó nuekenyi po insúŋɛ ni iŋónyí si Ɔkɔ́n.
Kiɔl nɛ muɛt nuya
5Paanu piool, ɔnuɔpinɔn pɛt nuya paanɔ ekue é kúusí, nɛ nutɛtinɛ, pepiseelesi, nɔ ɔtɛ́m owokon yá aná nuɔpɔninɛ Kilíise. 6Nutiopinɔn pɔ kɔɔm aká paanufialanɛ ɛ́ɛ́ nupa peseé kɔ́ɔ́p ke eŋis, maná ɛɛlɛ piol pí Kilíis píɛlɛnɛ kilɔ́ɔ́ŋɛ́t kí Támbák, nɔ ɔtɛ́m kitiki. 7Ɔnukɔtɔn pɔ ɔtɛ́m owokon, ɛɛlɛ nuɔkɔtɔn Ɔkɔ́n, kútipá pɛɛnd. 8Nuemenyen: Epu ɛmɛɛlɛ peseé, siki mɔɔnd onikoki pú kí inyɛn yi Ɔkɔ́n, tɛ tuúpa kiɔ́lí kúnyáánɛ weéŋelí. 9Paanu pɛt nuya, ɛnuɛlɛ puandá púmoómí ɔ pioli píánɔ́. Anuyapana pisas kɔ́ɔ́p ó pusíó. Naanu nɔɔpɔ nuapiana maasɛ omoomi mɛnɛ́mɛnɛ́ɛ, utipa weye pɛɛnd.
Insalia í kuátap
10Aakuman, ɔnukɔl imbekí káánɔ́ á nipílat nɔ Ɔkɔ́n á kiákí ɛ́ɛ́ pukaaka púɛ́yɛ́ nyɛ kiandákáand. 11Ɛnupilɛŋ mɛlɛŋ me piíti ma Támbákɛ́ɛ nutikɔn ɛ́ɛ́ nuunɛm nú Sáátan. 12Tutipa tunuanan nɛ pɛɛnd pí imeku, maná nɔ pilɔk pi piliínditíe pi imbíne pí kuúsi ekue neépi pinyɛ mɛnɛ́mɛnɛ́ɛ. 13Pu puɔwone nukɔl mɛlɛŋ me pitíí Támbák ekenye, ɛ́ɛ́ ɔ mɔɔsi mɔ kilɔk nutiɛlɛ tɔlitɔl, nulɔpɔ petimbimet kuám á mamaná. 14Anupisumbin kémuémue á nital asi kiamam, indɛ́ndɛ́nɛ punɛmbin kisaas, 15ɔ pikɔnd, pipɔkɔt mɛɛsíkɛnɛn kuupa kutaam ku kupeke insɔ́m yi indámb i kiyeéwe. 16Nutipieliti ipɛnɛ i kuátap, iini kunuɔk ekuwusenyi tuúla tu yiik tu okóyikoy. 17Nutaŋap á mamaná ikɔngo i kisotio nɔ yɔnɔnɔ i pitíí yi Enfuunukuúmɛ inyɛ nukal nú Támbák. 18Onupisokolonyi kaati insukie tunama tu imbísókólí kitikit ke enfúnukuufúmɛ, nɛ kuyɛpɛ; Enutepukesi kisikɛl kianu okupisokolonyi ó pusíó pu peépi pɔ́ɔ́pɔninɛ́ Támbákɛ́ɛ. 19Onupisokolonyi kɛk kami ó pusíó ɛ́ɛ́ Támbák aaka nukal nuɛyi nuowone kaami é niiti, yoondo imbeke no pipíóndínyí ɔtɛ́m insipit yi insɔ́m yí indámb 20inyɛ eŋeli pusɔ́m u Kilíis akútá ɛ́ mɛɛ́ndí, ónupísókólónyí ɛ́ɛ́ ímbia kutáam é kupéke aná kúɛsikɛnɛnɛ.
Iŋondio
21Yaakamba ɛ́ɛ́ panɔ́ kákáánɔ́ numenyi etényí wáámɛ ne púúpú yɛlɛnɛ. Andimán áámɛ u iŋɔyɔ Tisite unyɛ eŋelípuólí nulátát kɔ Ɔkɔ́n, kanutian puandá kitikit. 22Imanutumin wu á nyani ɛ́ɛ́ wasinutian aná tusɔtɔnɛ woond unuaka ilúndɛ. 23Ɛ Támbákɛ́ɛ Síí nɔ Ɔkɔ́n Yésus Kilíis eeki paandimán páásɔ́ kiyeéwe, iŋɔyɔ na kuátap. 24Támbák pinun epe pɔyɔnɛ Ɔkɔ́n waasɔ́ Yésus Kilíis ni iŋɔyɔ ikati kuumanɛ.
Currently Selected:
Efesiɛ́ŋ 6: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL