Efesiɛ́ŋ 5
5
Kusɔ́tɔn é kisie
1Enupiekenyi ilúndɛ ekuketésí Támbákɛ́ɛ, á kiákí ɛ́ɛ́ nunyɛ paán epé wɔɔyɔnɛ́ɛ. 2Ɔ́nusɔ́tɔn kí iŋɔyɔ aná Kilíis mɔɔ́tuɔyɛt. Woond weekeeki kusɔ́t kuɛ́yí ó pusíó puású ɛlɛɛ́ nupoo na kifunɔ́ niaŋ ní elepínde wɔɔ́lukɔninɛ́ Támbákɛ́ɛ niaŋɔ́. 3Nuɔ́kɔ́pinɔn Támbákɛ́ɛ, nutipá nuɛsikɛnɛn ɛ́ɛ́ nuand apá peendí musɔm, kunyiánɛ́ pɛɛnd pɛ́ɛlɛnɛ́ pinyik, kunyiánɛ pɛɛnd posoleé kuɔyɔ muenyí. Maakan maandá tianda apa káánɔ́ ɛ́ kikɛtɛ́kɛtɛ́ɛ. 4Nutipá nuɛsikɛnɛn ɛ́ɛ́ núémenyi pifɔ́ndɔ́l pí moony, tɛ tukál tú kati ɛtúɛ, tɛ etú tunyiɛ́ pinyik, maná énulémbésí Támbákɛ́ɛ. 5Énumenyí pessé ne peseé ɛ́ɛ́: Tɛ eŋendí musɔm, tɛ ewú wɛɛlɛnɛ́ maandá mé pinyik, tɛ ewe wɔyɔnɛ muenyi puólílóoli, mukanyɛ Támbákɛ́ɛ wɛɛyɛ, tiɔnyikɔ́l niap é pufuŋ pú Kilíis nɛɛyɛ́ na Támbák; 6Tɛ́ mɔɔnd utinúpúlít na tukál tu sɛkisɛk: maandá makáánɛ́ mápílanɛ́ ilópi í Támbák épéepé pɛ́ɛlɛnɛ́ wɔ́ pitúkɔ́l. 7Nutiɛl ɔlɔŋ nɔɔpɔ́. 8Numapá insúá kí imbíne, níínuan nukanyi é kisie nɔ Ɔkɔ́n, ɔ́núsɔ́tɔ́n kɔk niaŋ ní paán pé kisie. 9Á kiákí ɛ́ɛ́ masɔm mé kisie nyɛ punya peseé umoól woond, indɛ́ndɛ́nɛne, kémuémue. 10Ánuambá epú puɛlɛnɛ́ Ɔkɔ́n peseé. 11Nutikɔ́lɔ́n niap á maandá mí imbíne mátiányípá móómo tɛ puandá putamb, maná ánupalúná mɔ. 12púnyɛ ɛtɔ́ kunúá ɔ́ kuɔyit puandá epú pɛɛnd pakáaní ɛ́lɛnɛ́ kí imbíne. 13Maná epú punyɛɛ́ palúpalú ɛ́píɛlɛ é kisie. 14Á kiákí ɛ́ɛ́ epú púɛ́nikɛnikɛ́ palúpalú ɛ́kɛ́yɛn kisie. Tɛ ɔ́ɔ́pɔn pɔ́kɔyɔ́ ɛ́ɛ́, aŋúɛ apítimanɛ́, ɛnyúk átukin ɛ́ kikɛtɛ́kɛtɛ́ɛ kí pikú, Kilíis ényíkutekenyi. 15Kémuémue ánupá ni inséti kí imbalá á pilɔŋ epí nusɔ́tɔnɛ́, nutisɔ́tɔ́n ɛlɛɛ́ pɛɛnd pátiányípá na tutátɔ́, ánupá ɛlɛɛ́ patátutat, 16Páákanɛ́ kisikɛl ekie ɔ́ nyɔlɔ́, á kiákí ɛ́ɛ́ mɔɔ́sí nyɛ kilɔk. 17Nutiɛl kɔk ɛlɛɛ́ pɛɛnd pá kati ituɛ maná ɔ́nuɔ́pɔ́n peseé ne peseé epú Ɔkɔ́n pilɔŋɔnɛ. 18Nutiótúkón maakɛp, máayukan naanú é punyím, maná ánupá powónón ne emfúnukufúumɛ. 19Ánuákínán kutáam panúɛ na panúɛ ni isak, na pilɛ́l kitikit epí emfúnkufúumɛ nútunene, ɔ́nutɔ́ŋɔ́ pilɛ́l ni isak nuond nuomokosi Ɔkɔ́n nɔ ɛtɛm wanu kitikit. 20Á kisikɛl kitikit, á puandá pum énuekenyí Taatá Támbákɛ́ɛ ilémbie ɛ́ kisiɛ́nɛ́ kí Ɔkɔ́n waasɔ́ Yésus Kilíis.
Kusɔ́t ku akányi nɔ ɔnɛ́m
21Panɔ́ epé nutínené Kilíise ɔ́nuɔ́pínɔ́n panɔ́ ná panúɛ. 22Pakáand, ɔ́nuɔ́pínɔ́n pɔ ɔnɛɛ́m páanú yáaná nunyiɛ́ ó pusíó pú Ɔkɔ́n. 23Á kiákí ɛ́ɛ́ ɔnɛm nyɛ efuŋ u akáanyí yáana Kilíis nyiɛ́ efuŋ u ɔlɔŋ u peétépí, Kilíis nyɛ andíkɛk Osótí u ɔlɔŋ u peétépí unyɛɛ́ nuɔ́l núɛ́yí. 24Pakáand kɔk ɛ́ɛ́kɛɛsikɛnɛn kuɔ́pinɔn pɔnɛ́m pɔɔ́p aná ɔlɔŋ u peétépí ɔ́pinɔnɛ́ Kilíise. 25Pɔ ɔnɛm, ɔ́nuɔyɔ́ pa akáanyi páanú yáaná Kilíis mɔɔ́yít ɔlɔŋ u peétépí wepíeki ó pusíó púɛy. 26Wakambɛt ɛ́ɛ́ upa kifúúmak, wasukɔn wɔ ne mekélíe mɛyi mɛnyɛ ɛɛlɛ moomb. 27Wakambɛt ɛ́ɛ́ ɔlɔŋ u peétépí ukáanɛ telimit kɛ́ɛ́yɛ́ ó pusíó owónón ne nuum, kati kinyíke, tɛ kilutitín, kati kipalalɛ́, umambá kifúúmak kí ɔlɔŋ u peétépí kati kifíkɛ́. 28Yáanakáanɛ ɔnɛm ɛ́sikɛnɛnɛ́ kuɔyɔ akáanyi wuɛyí ɛlɛɛ́ nuɔ́lú núɛ́yí núpímúɛt ewú wɔyɔnɛ́ akáanyí ɔ́píɔyɔ wumuɛ́t. 29Tɛ mɔɔnd umapási utifɛmítɛ nuɔ́l núɛ́yí, maná woókoyosi núɔ, ukɔ́lɔ́n kisikɛl na núɔ yáaná Kilíis ɛ́lɛnɛ́ ó pusíó pú ɔlɔŋ wɛy u peétépí. 30Tunyi malááŋ mɔ́ nuɔ́l núɛ́yí. 31Tɛ ɔɔ́pɔn ɛ́ɛ́ mɔɔnd ányíatɔk ku si no yoótí wapílatá akáanyi, peem páandɛ ɛ́ɛ́y nuɔ́l numoómí. 32Kiandá kí kémuémue nyɛ kinɛmbɛ́n ɔ́ kɔɔ́mɔ akɛ, niŋúɛ yɔ́núɔyɔn ɛ́ɛ́ púoyoson Kilíise nɔ ɔlɔŋ wɛy u peétépí. 33Maná kɔk siki mɔɔnd káánɔ́ kɔ́ ɔlɔŋ, é púúpú puyosoné wɔ, ɛ́ɛ́kɛɛsikɛnɛn ɛ́ɛ́ wɔ́ɔ́yɔ akáanyi ɛlɛɛ́ wu puɛt, yáaná akáanyí ɛ́sikɛnɛnɛ́ ɛ́ɛ́ wúɔ́pinɔ ɔnɛm.
Currently Selected:
Efesiɛ́ŋ 5: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL