Kolosiɛ́ŋ 4
4
1Panɔ́ pamásɛ, énuendésí piɔ́lí píánɔ́ kí indɛ́ndɛ́nɛ na aná kúɛsikɛɛnɛnɛ́ɛ, numenyen ɛ́ɛ́ panɔ́ kákáánɔ́ nuápian Másɛ mɛnɛ́mɛnɛ́ɛ.
Insúŋɛ i Póol ó pokolosiɛ́ŋ
2Ɔ́nulɔpɔ́ kí imbísókólí, ikapá inúnɛkɛn pɛɛnyɔ́ é kulémbesi Támbákɛ́ɛ. 3Anuanda opísókolonyi káásɔ́ ó pusíó, ɛ́ɛ́ Támbák túɛ́ŋunin iŋilí é kupéke insɔ́m yi indámb, kɔk iŋgála insipit i Kilíis eyí inyɛɛ́ á yɛ́ɛ á kiansi kí imbíne; 4Ɛ́ɛ́ yɔɔyɔ yɛ́ɛ talɔ́ talɔ́ aná imbianɛ́ɛ ɛ́ɛ́ yɛ́ɛlɛ. 5Ɔ́nusɔ́tɔ́n peseé na tutátɔ́ ne péépé pámanyɛɛ́ pátiátáp Kilíise, á kisikɛl kitikit ekí Támbák núfáanɛ́ɛ. 6Tukál túánɔ́ pá tuutámb, tuwóónón ni insiŋí ó kuondinyi siki mɔɔndɛ aná púówonée.
Imbíkélie
7Épúúpú puúyoosonée Tisik kanútían puum, unyɛ andimán áámɛ ewu yɔɔyɔnɛ́ɛ ukɔtɔnɛ́ɛ naamɛ, eŋelípuólí u nulátát á pusɔ́m pú Ɔkɔ́n. 8Imanútúmɛ́n wɔ́ ɛ́ɛ́ únútían aná tunyɛɛ́ wóond únúák ilúndɛ. 9Onesime, andimán waasɔ́ u niɔy na nulátát ékesitílíkén wɔ. Unyɛ mɔɔnd u kiáyí kíánɔ́, pákanútían epú kitikit púpítápukanɛ́ɛ ekue. 10Alisitálak unyɛɛ́ á kiansi kí imbíne naamɛ́ ménupíkéliti, na malakus, imbúɛ́mɛ́ɛ u Palanápas. Imamaná anúfá insúŋɛ indɛ Malakus siól kuanɔ́, nukɔ́l wɔ́ peseé. 11Yésuse páandɛɛ́ apílan ɛ́ɛ́ Yutuse ménúpíkélítí kɛ́kɛ́ɛ́yɛ́, pányɛ pééŋényí imbíéne imbíéne ɛ́ kikɛtɛ́kɛ́tɛ́ɛ kí Pɛyúútɛn pɔ́kɔtɔnɛ́ɛ naamɛ é pufuŋ pú Támbák. Pɔ́ píŋákanɛ́ɛ ilúndɛ. 12Epafalas unyɛɛ́ waanɔ́ ménupíkéliti; Eŋelípuólí u Yésus Kilíis ukáánɛ́ tipá waándan imbísókólí káánɔ́ ó pusíó, ɛ́ɛ́ núkúnɛn á kuátap, papílúndánɛ́n kí indɛ́ndɛ́nɛ, powóónón nɔ kilɔ́ɔ́ŋɛ́t kí Támbák. 13Inyɛ etétúnyí é muyú ukɔlɔnɛ́ɛ káánɔ́ ó pusíó, ne péepe Palaotise ne Péyelapolis. 14Ekúl waanɔ́ Lukasɛ unyɛɛ́ tɔ́pítɛ nɛɛyɛ́ ne Temas ménupíkéliti. 15Énupíkélítí paandimán pá Kuátap Palaotise, na Ninfa nɔ ɔlɔŋ ú peétépí úlumenenée kɛ́ɛ́yɛ́ á nuya. 16Ɔmbɔp waamɛ ewe kɛɛlɛ́ úmáápíláaŋ kuanɔ́, ánutúmɛ́n ɔlɔŋ ú peétépí ú Laotise ɛ́ɛ́ páláaŋ wɔ́ kɔ́kɔ́ɔ́p. Panɔ́ kákáánɔ́ núláaŋ ɔmbɔp ukoónyóólin kuɔpɔ́. 17Ánutíán Akipɛ úkɔ́l kisikɛl no puólí pú Ɔkɔ́n umaátáŋáp, wɛ́ɛ́lɛ púú peseé. 18Imbikélie yaamɛ i Póol eye inúɔ́ŋɔninɛ́ɛ nɔ ɔmbɔk wáámɛ, nutipíélítí ɛ́ɛ́ inyɛ á kiansi kí imbíne. Peseé u Támbák pá naanɔ́.
Currently Selected:
Kolosiɛ́ŋ 4: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL