Kolosiɛ́ŋ 3
3
1Aná nunyɛɛ́ nuámán á pílɔ́ŋ ne Kilíis, ánuambá epú púnyɛɛ́ mɛnɛ́mɛnɛ́ɛ kɔɔ́mɔ Kilíis nyɛɛ́ ɔnyɔ́mbítɔ́n kí inyɛ́ŋ yí inɛm i Támbák. 2Imbítáákítɛ́n yaasɔ́ nyɛ mɛnɛ́mɛnɛ́ɛ, kútipá e kúúsí. 3Kemuemue nunyɛ pekúén, kusɔ́t kúánɔ́ nyɛ kunɛmbɛ́n ne Kilíis á Támbák. 4Aká Kilíise unyɛɛ́ kusɔ́t kúánɔ́ áányísuunukɛɛ́, akáánɛ́ kɔk panɔ́ kákáánɔ́ nuányísuunukɛɛ́ nɛɛyɛ́ kɛ́ɛ́yɛ́ á nukanyi.
Kusɔ́t kuukɔ́si é Kilíis
5Kɔɔk púnyɛɛ́, ɛ́nupílɛɛ́ŋúnɛ́ epú púɔ́pɔninɛ́ kúúsí ɛlɛɛ́: kuɛndɛ musɔm, kilɔk kí kusɔ́t, kuwéémbe, pilɔk pí pilɔ́ɔ́ŋɛ́t na kuamba punɛ́m táásɛ púkanyɛɛ́ kuluke Patámbákɛ́ɛ pá pisupɔ́. 6Púú pútúkɔ́kinɔnɛ́ ilópi í Támbák, 7Yá aná numaápá nuɛlɛ anakáánɛ́ ɔ́ kusɔ́t kúánɔ́ kú insúá. 8Nínúan kɔk, panɔ́ kákáánɔ́ ɛ́nupílɛɛ́ŋɔ́n makáánɛ́ kitikit ɛlɛɛ́: Ilopi, ɔtɛ́m kupal, ifil, insikɛ́ɛ, tukál tú púsuman túámanɛ́ɛ káánɔ́ é niít. 9Nutiandá epúlenin panúɛ na panúɛ, á kiákí nuáyapá kusɔ́t kú insúá na maluŋ mɛ́ɛ́yɛ́. 10Nuɔkɔ́l kusɔ́t kuukɔ́si, ekú eluŋí waasɔ́ núkesíe kati insúkie ɛ́ túam kitikiteékítíkíte kɛ́ɛ́yɛ́ é meyin; 11Akáánɛ́, Kɛlɛk, Yúútɛn, aŋasán na kati kuansɛ, peenyi, pɛɛnd pá kati tutátúɛ, piɔ́lí nɛ pɛɛnd pé weéŋelí peem kanyɛ puandá púmoómí é Kilíis unyɛɛ́ puandá kitikit á mɔɔnd kitikit. 12Támbák ɔ́ɔ́núɔyɔ, waanúyɔ́ɔ́n, waanúsukɔ́n, kúúkɔ́ áánupián itɛ́m siwóónón na makánákana nɛ niɛ́nɔsúkɛ, sipíselésí, siwoókón síond síésepenyi. 13Énuésépényínyí panúɛ na panúɛ nuond nuyapinan indɛ waakúánɔ́ siɔkulɔkɛn. Ɔkɔ́n áánúyapɛ́n, ɛ́nuɛlɛ́ ɛlɛɛ́ wɔ. 14Kutápɔk puandá kitikit, ɔ́nuɔyinɔn: Iŋɔyɔ nyɛ puandá púnúlatanɛ́ɛ peseéképese. 15Ɛ́ɛ́ kiyeéwe kí Kilíis ekí umaánúpílíkɛ́n á kɛ́ɛ ɛ́ɛ́ núpá nuɔ́l númoómí ééndesi itɛ́m síánɔ́. Énuekenyí wɔ́ ilémbie á kisikɛl kitikit. 16Nukál nú Kilíis, na punɛ́m púɛ́yɛ́ kitikit pá káánɔ́ ɛ́ kikɛtɛ́kɛtɛ́ɛ. Ánupífáan iŋónyítónyí nuond nupíkésinteyinyi panúɛ na panúɛ ní insiŋí kitikit. Ɔ́nutɔ́ŋɔ́n Támbákɛ́ɛ káánɔ́ kí itɛ́m ni ilémbie, pilɛ́l, ni isak síólinonée ké Emfúnukufúúmɛ. 17Epú kitikit nunyɛɛ́ kuɛl kúnyaánɛ kuɔyɛ́t, ɛ́nuɛlɛ́ púú ɛ́ kisiɛ́n kí Ɔkɔ́n Yésus, tulémbesi kɛ́ɛ́yɛ́ Támbákɛ́ɛ Síí.
Iŋɔyɔ é nikúli
18Pakáandɔ́ ɔ́nuɔ́pínɔ́n pɔnɛ́m páánɔ́ yá aná púówonée káánɔ́ á nipílat nɔ Ɔkɔ́n. 19Pɛnúmɛndɔ́, ɔ́nuɔyɔ́ pakányí páánɔ́ nuond nutiɔ́pínɔ́n pɔ́ kutɛɛ. 20Paápayɔ́, ɔ́nuɔ́pínɔ́n pepíényí páánɔ́ á puandá kitikit, púúpú Ɔkɔ́n péétényé káánɔ́. 21Pepíényí nutitiókólósí paán páánɔ́ itɛ́m, epúsíen pésulukiki imbɔk. 22Piɔ́lí, ɔ́nuɔ́pínɔ́n pɔkɔ́n páánɔ́ ekue é kuúsi á puandá kitikit. Nutikɔtɔ́ kɔɔ́mɔ aká pánúfialanɛ́ɛ, ɛ́ɛ́ púɛ́lɛ pɛɛnd peseé, maná nɔ ɔtɛ́m wáánɔ́ owoókón ú pɛɛnd pétíínenée Ɔkɔ́n. 23Epú kitikit nuɛlɛnɛ́ɛ, ɛ́nuɛlɛ́ púú nɔ ɔtɛ́m peseé, ɛlɛɛ́ pú Ɔkɔ́n pútipá pú pɛɛnd. 24Énumenyi ɛ́ɛ́ Ɔkɔ́n áányínúfá pinamá. Ɔkɔ́n u kémuémue unyɛɛ́ kilíise, wɔ́ nukɔtɔninɛ́ɛ wɔ. 25Ewú wɛɛlɛnɛ́ kilɔk áányípia pinamá pí kilɔk kíɛ́yɛ́, á kiákí Támbák tipá weeye pɛɛnd.
Currently Selected:
Kolosiɛ́ŋ 3: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL