2 Timoté 3
3
Epú púɛnyípíɛlɛnɛ́ ɔ́ mɔɔ́sɛ́ mé kusúkin
1Pítáákit epue peseé: ɔ́ mɔɔ́sɛ́ mékusúkin, mɔɔ́sɛ má kulal ányipa. 2Pɛɛnd ányípá patímítɛm, pekulu pé muenyí, pokolo, pépíméketesi, pásikan Támbákɛ́ɛ, pétimenyi kueki ilémbie, pɔ́tiɔ́pínɔ́n pepíényí pɔ́ɔp, pefenen maandá ma Támbák. 3Kulal, kati niɛ́nɛ ɔsúkɛ, papásiapasia, kati kiyeéwe kí ɔtɛ́m, ɔyɔ́k, patiamba pe peseé, 4pápalan pɔsɔ́k, paapa ɔyɔk kupíméketesi áákán pɔ́ pipúte, pɔ́ɔyɔ maandá mí imekú kukányini Támbákɛ́ɛ; 5páányípá ɛ́kuɛ́n pɔ́ ɛlɛɛ́ peétépí, maná pátiányíatápán pukaaka pú kuátap. Túmú pɛɛnd pakáánɛ́ kélém! 6Pomoti kɔ́ɔ́p kɔ́ ɔlɔŋ epíken á piansi, pɔ́lɔ́kɔ pakáandú pátiányípá papílúndánin, powónón na pifal, maandá mí imekú kitikit tɔ́ɔ́ndɔ pɔ, 7pakaandɔ pakáánɛ́ kisikɛl kitikit kí iŋónyítónyi maná tɛ kuáminɛn tɛ puɔ́s é kumenyi kémuémue. 8Pilɔŋ pímoómi niaŋ ní Yánɛsɛ nɛɛyɛ́ na Yámbɛlɛs menuenesi Moyíis, yáaná pɛɛnd pakáánɛ́ nuenesie kémuémue, pányi pɛɛnd kiliínditié kíɔ́p niɛ́ kitamán, andíkíkɛ kuátap nyɛ kifókúfók. 9Maná pátiányiyuúkɔ́ kayiɛ, ákiákíɛ́ mɔɔnd kitikit ényímenyi pipínanɔ́ píɔpɔ́, yáaná pú maápá ó pusío pú Yánɛsɛ nɛɛyɛ́ na Yámbɛlɛs. 10Maná aŋúɛ, ɔmɔɔŋɔ́ káámɛ́ ketutketut kí iŋónyítóyi, na nunamá núámɛ nú kusɔ́t, ne tuketi tuamɛ, á kuátap, ne kupilimbit ne kuésepenyi, kí iŋɔyɔ. 11Ɛmiŋɛn kí inséésítényí, ɔ́ kuɔ́pikɔn ekú imɔɔ́píkɔ́n Antíos, Ikoniúm, Lístɛlɛ pilɔŋ pí múyu ní inséésítényí epí imápiá, Ɔkɔ́n wu ŋáŋunu á pí pim! 12Epé kitikit pámbanɛ kusɔ́tɔn á nulátát na Támbák á nipílat ne Kilíis Yésus pényí sésitenyi pɔ. 13Maná pefílefile na pasupusupɔ, pányísuŋuna kusuŋuna ɔ́ kilɔk, pépúle pɔsɔ́k, pɔ́ kɔ́kɔ́ɔ́p pɔsɔ́k púle pɔ. 14Maná aŋuɛ́, pílúndínɛ é púúpú omoopionyitonyi, akaátap ɛ́ɛ́ púnyɛ kémuémue: eémenyene kanyi omoopionyitonyi. 15Aŋúɛ kɔk eémenyen imfíɔ́ŋ ní puúpayúɛ wuawɔ; síápian pukaaka pú kukufá insiŋi iyukanɛ ɔ́ kusɔ́t aká tuátapanɛ́ Yésus Kilíise. 16Infiɔ́ŋ kitikit óókoólinon ku Támbák, peseé ó kuónyonyi kémuémue, ekunuenesi kipinanɔ, á kupununa, nó kuónyonyi kusɔ́t ku indɛ́nɛ́nɛ. 17Ɛɛ eŋelípuólí u Támbák pá ɛpíɛyɛ́n, ɛkuɛlɛ pielínyíélínyíé piitámbɔ́ kitikit.
Currently Selected:
2 Timoté 3: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL