2 Timoté 4
4
Kémé mekélíe
1Muɔ́nɔ́ waamɛ Timoté, ké eŋís yá Támbák ne Yésus Kilíis, wuónyóloné ó kuosisósosí pɔ ɔkɔ́si ne pe ekuén, wɔ́ ukaányanda epitinyi ukanyi efuŋ: 2Yɛpi kááwɔ ɛ́ɛ́ kémé mekélíe, onditonyonyi tɛ á kisikɛl kí kilok tɛ kitamb, etenikenyenyi, ekenyí insúŋɛ ni inlundɛ ne kuésepenyi nɔ kilɔ́ɔ́ŋɛ́t kí kuonyonyí. 3Á kiákí kisikɛl óókoólon ekí pɛɛnd enyienené kupítɔ́likɔn iŋónyitónyí i kémuémue, maná pɔ́nyɔŋɔn kɔ́ɔ́p ɔ́ pilɔ́ɔ́ŋɛ́t, pɔnyípíkɔkitɛn embúl ú poónyonyí panyitíananɛ pɔ́ epú pɔ́ɔyɔnɛ́ kuɔ́pɔn. 4Pényifuk pɔ́ itú pátiandá kuɔ́p kémuémue póond ɔ́ kuɔŋɔn é piluúme. 5Maná, aŋúɛ pá na tutáatú á puandá kitikit, ésépényí iŋɛ́n, keme mekélíe, wónyósí puóli púáwɔ pú eŋelípuólí u Támbák.
Kisikɛl kíámɛ kí kupálɔk máasíám
6Epupú puyosone, pámán kusɛm. kisikɛl kíámɛ kí kupálɔk máasíám. 7Imánuá kiták kí kitul, yaman ɔtɛ́t wáam, yɛnɛkɛ kuátap. 8Nínúan kɔk, pinama pí kusɔ́t kú indɛ́ndɛnɛ Ɔkɔ́n usósosié kí indɛ́ndɛ́nɛ miínɛkínɛ ékimbétenyi ɔ́ puɔ́s pú kusúkin; pútíapá kɔ́ɔm niŋúɛ eŋényí, maná ne péépé kitikit pépétenyíé kuosiondó kúɛyí na anyamɔ́.
Insuŋɛ sí kusúkin
9Píkanyɛ́k ɛ́ɛ́ ɔ́siwɔɔ́kɛ́n pɛkɛtɛpɛkɛt. 10Á kiákí ɛ́ɛ́ Temas nyɛ wuyapán ɔ́ kuɔŋ ɔ́ kusɔ́t kú kúúsí ekue. Wayukɔ Tesaloník, Kelesánsɛ wɔ́ waayɔɔk Kalasí, Tíite wɔ waayɔɔk Talamasí. 11Lukasiɛ wéeŋényí unyɛɛ́ naamɛ. Kɔ́l Málúkuse núólɔ nɛɛyɛ á kiákí ɛ́ɛ́ unyi imfí naamɛ ó puóli. 12Yaátúmɔ́ Tisíike efɛ́ɛse. 13Akanyi ɛ́ɛ́ ólo, iŋólin na kinyuŋa ekí imaáyapá tolas ku Kalupós, na pakálatɛ kakapɔ, solusol imbɔp. 14Alɛkɛsándɛlɛ etunyi u tuɛy wɛlɛnɛ kilɔk tɛ pɔkuɔyɔ, Ɔkɔ́n enyíeki wɔ pinamá pí puólí púɛ́yɛ́. 15Aŋú kákáwɔ pikeŋenyesi wɔ, á kiákí ɛ́ɛ́ wu enuenesi tukál túásɔ ni ilópí kitikit. 16Kitúmu kí kutúan ekí imɔɔ́píɔkɔnɔkɔn, tɛ mɔɔnd utimiŋákɛn, peem pékinseŋeliti. Támbák tísésitenyi pɔ. 17Ɔkɔ́n wɔ́ umapá naamɛ; wɔ́ umíímfá pukaaka pumɛɛ́l ɛ́ɛ́ iŋéme insúmu yiindámb pindiátápɛ́ peem ɔ́ɔp yɛ́. Wondo wuŋáŋunɔ é niít ní aŋual. 18Wányíanda ku ŋáŋunu ɔ́ kilɔk kitikit woond wumbíkinyi sélélélélé kɛ́ɛ́yɛ́ é pufuŋ mɛnɛ́mɛnɛ́ɛ. Nuúmu pá nɛɛyɛ́ é teeníík ne nííké! Anakáánɛ́.
Imbíkélie i kusúkin
19Ímbíkélítíní Pilísikɛ nɛɛyɛ́ na Akiláas, ne nikúli ni Onesifɔ́ɔl. 20Elásítɛ wu wɔɔ́lɔpú Kɔlínte. Yaáyapá Tolofíme Milɛ́ unúma. 21Píkányíkɛ́ ɛ́ɛ́ óólukun puyo manyi pútiasíám. Epúle mékupikeliti, nɛɛyɛ́ ne Putɛnsɛ, na Linus no kolóotia na paandimán páásɔ́ peem. 22Ɔkɔ́n pá nawu. Ɔtɛ́m Peseé u Támbák pá naanɔ panɔ́ peem.
Currently Selected:
2 Timoté 4: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL