2 Timoté 2
2
Kɔ́l níáwɔ niap ní muyu
1Aŋú kɔk, muɔ́nɔ́ waamɛ Timoté, pílúndinɛ kɔ́ ɔtɛ́m peseé u nyiɛ́ é Kilíis Yésus. 2Epu ɔmiŋɔp yonyonyi ke eŋis ye petetúnyí puólíkóoli, onyonyi pú ɛ́ pɛɛnd pánulátát pányípianɛ́ pukaaka pú kuand kuónyitónyi pɔsɔ́kɔ́ pólotí. 3Kɔ́l níáwɔ niap ní muyú niaŋ ni kiták kí pulúse pú Kilíis Yésus. 4Aká pulúse ményipíkíní kɔ ɔlɔŋ ú meluse woond wamba ɛ́ɛ́ puólí puɛ́yí ɛ́ɛl ɔkɔ́n wɛɛyi peseé utipá wand ɔsɔtɔn kusɔ́t ku mɔɔnd u sɛ́kísɛ́kí. 5púnyɛ pilɔŋ pímoómi, mɔɔnd utíínené ɔ́kɔ́lɔn indanyía yɔ ɔtɛt, índɛ usietííne ó pikotí pí ɔtɛt. 6Puandá púmoómí na mɔɔnd wuɛ́nɛnɛ́ muyú no puólí pú imbɔ́k wɔ́ wɛɛsikɛɛnɛnɛ́ɛ kutúán katáŋap masamɔ́ mó niok niɛ́yí. 7Ɔpɔ epú inŋuɔyɔnɛ́. Mésiénené, Ɔkɔ́n ɛ́nyíɛl ɛ́ɛ́ ɔ́ɔ́p mɔ́ meem.
Pítáaka Yésuse u mɛɛ́nyɔ́k á pilɔ́ŋ
8Pítááká Yésuse kuólin é pupúndini pu efuŋ Tafíit umɛɛ́nyúkɔ á pilɔ́ŋ, aná insɔ́m yi indámb eyie iŋgémené ónyonyíé, 9yíyaátakáanɛ yiɔ́pikɔnɛ́ á yí kuám ɛ́ɛ́ píŋgúta ɛlɛɛ́ olokí. Maná mékelié má Támbák tipá makútá. 10Tɛ ɔɔkɔ́pɔn ɛ́ɛ́ yeékésepenyenyi á puandá kitikit ó pusíó pú pesé u payúúnan, ɛ́ɛ́ pɔ́ kɔ́kɔ́ɔp pápia kusɔ́t kunyɛ é Yésus Kilíis, ne nuúmu nú teeníík. 11Nukál enue ɛ́ɛ́kɛɛsikɛnɛn ɛ́ɛ́ tupíondonyí ɔtɛ́m naanɔ́:
Indi tusiekúéne nɛɛyi,
tuɔ́nyísɔtɔn nɛɛyi.
12Indi tusesepenyi nɛɛyɛ́,
Tuányipian nɛɛyɛ́.
Indi tu siapísáŋunɔ wɔ́,
Wuányítúpísáŋunɔ kɛ́kɛ́yí.
13Indi tutipá nulátát nɛɛyɛ́,
wɔ́ unyi nulátát,
á kiákí ɛ́ɛ́ utiányipísáŋɔ́n wɔ́ muɛ́tí tɛ ɔpuɔsí.
Kuónyonyi nukálu nú kémuémue kí indɛ́ndɛ́nɛ
14Makáanɛ kitikit, pítékési mɔ talútalɔ ké eŋis yá Támbák, páyap iŋɔ́mɔn si pipúk kɛ́ɛ́yɛ́ ke eŋis: Síí tipá síɔkɔnɔkɔn tɛ á puandá, kɔ́ɔ́m yá kunyímesi epé pɔ́ pítɔlikɔnɛ́ pɔ. 15Píkányíkán ɛ́ɛ́ epítíínyí á Támbákɛ́ɛ niaŋ ní mɔɔnd u kati kipalala, eŋelí puóli wuɔ́pɔnɛ́ peseé no puólí puɛ́yí, wuónyonyié nukal nú kémuémue kí indɛ́ndɛ́nɛ. 16Pinyaŋá ɛndɛpɛ́t úkati ɛtuɛ́ útiányípá wɛndɛ na kuátap, á kiákí epé pépíekenyié á wɔ́ ányíyukanin Tambákɛ́ kaáyíɛ. 17Nukál núɔ́pɔ nyɛ niaŋ ní ensííŋ ú níáninɛ́. Yáanakáaní Imené nɛɛyɛ́ na Filétos nyiɛ́. 18Pámapínyáŋɛt kémuémue pɛ́ɛlɛ ɛ́ɛ́ kuɛnyɔk á pilɔ́ŋ áámaná ɛpíɛ́l; pékusenyi kuátáp kú pɔsɔ́k pólotí puólíkóoli.
Endímbí ú Tambák
19Kɔ́ɔk, kilúndak kí endímbi ekí Támbák maákɔn niya pɔkɔ. Tukál tunyiɛ́ tuɔ́ŋɔ́n á wɔ́ etue:
Ɔkɔ́n émenyen pɛ́ɛ́yɛ́, ewú upípílanɛ́ ɛ́ɛ́ unyi wɛɛyɛ́ ɛ́ɛ́kɛɛsikɛnɛn kupínyáŋa kilɔk.
20Á kinúmɔ kí kiansi kí punɛ́m, kútipá yá pipááŋ pitúanán no kóol na pitúánán ne muenyí pinyiɛ́ kɔ́ɔk; pílotí nyɛ kɔɔk pitúánan na mati pilotí na nima. Epie pétenyi mɔtɔ́mbí, pílotí kɔtɔ mɔɔ́sí meem. 21Ewú upísukunanɛ́ kilɔk kíɛ́yɛ́, ányipá kipááŋ kí putɔ́mbí, anyáŋúnán ó pusíó pú ɔkɔ́n wɛɛyɛ́, etélímét ɛ́ kuɛlɛ melínyiélínyié maatámb.
Ewú wɛlinɛnɛ Ɔkɔ́n puóli
22Yapá pilɔ́ɔ́ŋɛ́t pí piɔ́mfɔ, ámba indɛ́ndɛ́nɛ, kuátap, iŋɔyɔ, kiyeéwe ne péépé pambanɛ́ Ɔkɔ́n nɔ ɔtɛ́m asukuná. 23Maná yapá kupekenyikenyi kú sɛkisɛk ku katiɛtúɛ. Eémenyen ɛ́ɛ́ múókólon ni iŋɔ́mɔn. 24Eŋelí puólí u Ɔkɔ́n tipá wɛsikɛnɛn ɛ́ɛ́ wuɔ́munɔ, wɛɛ́kɛɛsikɛnɛn kuɔyɔ mɔɔnd kitikit. wɔ́ mɔɔnd unyɛɛ́ pó kuónyonyi, wesepenyi kutunun. 25Wuɛ́kɛsikɛnɛn kuónyonyi epé pátiányípá ekelú nɛɛyɛ́ nɔ ɔtɛ́m owokon: ɛɛlɛ Támbák átapin pɔ́ ɛ́ papikuŋɔn pé menyi kémuémue. 26Meéne mɔɔp kɛɛ́ndɔk pond Pɔpiɔk á putamb pú okóyikoy umalatin pɔ́ ɛ́ɛ́ pɔpinɔn wɔ.
Currently Selected:
2 Timoté 2: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL